5G: kon peligroso e ta, i kon preokupá nos mester ta?

Prome mi kuminsá papia e impakto ku 5G tin riba salú di hende, laga mi kuminsá na duna bo un analogía:

“E motibu di e ‘lockdowns’ rònt mundu tin un nòmber: “Jhonny Cake”. Den Johnny Cake tin un ingrediente ku yama “salu”. Salu ta konsistí di un elemento ku yama ‘sodium chloride”, i e elemento aki ta kousa retenshon di ‘vocht’ i preshon haltu. Manera bo kome un Johnny Cake, bo ta bin sufri di problema ku nir i kurason, i hopi hende lo bai fayesé. Na China hopi hende ta kana dal abou den kaya despues di a kome un Johnny Cake. Gobièrnunan ta poniendo ‘lockdowns’ spesial pa nan haña chèns di yena supermerkado i tokonan ku Johnny Cake kla trahá kaba pa hende por kumpra. Di e forma aki hopi hende lo bira malu, i botikanan lo por bende un vakuna ku yama JC2020. For di plaka di benta, nan ta duna gobièrnu un ko’ afó. Shonnan lanta for di soño. Avisá bo ser kerínan pa nan niun no kome Johnny Cake mas!”

Si e kos aki ta zona bo ridíkulo, asina ridíkulo hende ta zona tambe ora nan ta papia kos di 5G ku nan no sa un dònder di dje. Awor ta konekt’é ku Covid-19, manera kos ku Coronavirus no ta eksistí. Nan ta pretendé ku ta eksposishon na radiashon di 5G ta loke ta hasi hende malu. Ke men ta idiot Dr. Gerstenbluth, i tur e sobrá epidemiólogo i virólogonan rònt mundu ta. Of ta kòmplòt nan tur a traha pa bin sinta tuma hende hasi pan franses.  Sinembargo Coronavirus a presentá su mes na mas ku 200 pais kaba, inkluso Kòrsou. Anto Kòrsou di baina tin 4G na drechi. ‘Hoe kan dat nou?’ (4G LTE parse 4G, pero e no ta. Nos a djis siña asept’é komo 4G.)

E analogía ku mi a presentá di Johnny Cake no ta asina apsurdo. Nos ta kome kumindanan tur dia ku tin sodium (salu) aden. Nos ta asta pone salu riba kosnan ku no mester di salu, manera webu i awakati. Un persona no mester konsumí mas ku 2300 mg di sodium pa dia Segun bo ta bira grandi bo mester limitá esaki te na 1500 mg. Pero si bo kome tres sosèshi riba un dia, ya b’a yega e límite aki kaba. Ke men pa e sobrá di dia bo no mester kome nada ku tin salu aden. Kantidat haltu di sodium ta kousa preshon haltu. Preshon haltu ta kibra ‘bloedvaatjes’ di bo nir, kual despues di tempu ta bin daña bo nir.  Esaki t’e motibu ku Kòrsou ta sumamente haltu riba lista di hendenan ku mester dialisá. (Aparte dje echo ku nos no gusta bebe awa). Esaki sin mester papia di tur nos mal kustumbernan ku ta simplemente malu pa nos kurpa i salú, pero ku masha tiki hende ta preokupá nan kabes kuné. Keda kome trùk di pan i bebe kantidatnan haltu di alkohòl i limonada ta mas dushi.

Pero ta kon bin nos ta asina preokupá pa 5G awor? Kon bin awó hende ke bisti mòndkapje i sali protesta kontra antenanan di 5G? Bo ke men, abo mes tin mag di daña bo mesun salú, pero 5G si nò? Ang, mi a komprondé bo. Fregadó bo ta. Anto pa kiko hende na Kòrsou ta preokupá mes anto? Manera mi a bisa, Kòrsou di baina tin 4G na drechi, pero laga nos sali subi kaya (lesa ‘Social Media’) i malinformá tur hende kontra 5G. Dikon ha? Dikon? Dikon nos mester komportá manera hende ku seleber di pan dushi seku sin rasenchi asina?

Kiko t’e bèrdat di 5G?

5G ta e di sinku generashon di ‘mobile data technology’. E aparato ms komun ku lo uza e teknologia aki ta bo telefòn selular. 5G ta primintí di bira 100 bia mas lihé ku 4G, loke mayoria pais tin te aworakí (un stail). Hopi hende ta kere ku 5G lo ta asina lihé, ku e lo mata hopi hende, òf mínimo hasi hende malu. (Manera kos ku ta e spit t’e peliger.)

E generashonnan di ‘Mobile Data Technology’

Bèrdat 5G (i tur sobrá vershon bieu di e teknologia aki) ta emití ‘electromagnetic radiation’. Radiashon ta emishon òf transmishon di energia den forma di ‘waves’ òf ‘particles’ den un espasio òf dor di material. Diferente aparato ku nos ta uza diariamente ta emití radiashon, pero usualmente na un frekuensia abou, entre otro telefòn selular, ‘wifi router’, ‘microwave’, televishon i ‘smoke detectors’. Te asta humamentu di sigaria ta lòs substansianan radioaktivo, kual e humadó ta inhalá via di e huma, i manda den su pulmon. Kos masha malu mes pa pulmon di hende.

Radiashon ta keda midí na ‘frequency’ i ‘wavelenght’.  Na momentu ku e frekuensia ta abou, e ta keda konsiderá komo “non-ionizing radiation”, (no peligroso). Na momentu ku e frekuensia ta haltu, e ta keda konsiderá komo ‘ionizing radiation’, (peligroso). E frekuensia—e liñanan ku ta subi-baha manera ser’i dabudèk—mas chikí i pegá riba otro nan ta, ta nifiká mas haltu i poderoso e frekuensia ta. ‘Radio waves’—loke diferente aparato ku nos ta uza diariamente ta generá— ta emití radiashon ku frekuensia abou i ‘wavelenght’ largu. 5G ta uza ‘milimeter waves’ (mmWaves) ku ta operá na un frekuensia mas haltu, i mas ariba bo bai riba e ‘electromagnetic spectrum’ bo ta haña UVlight, X-ray, Gamma rays i Cosmic rays ku ta super mas haltu. Si bo no a komprondé nada di loke mi a skirbi, les’é atrobe. Si bo a les’é dos bia, i ainda bo no a komprondé, bo tin ku kuminsá lesa mas tantu, pasó dje kompliká ei, e no ta. Pero èniwei, djis wak e pintura akibou. Bo gusta pintura si tòg?

Electro Magnetic Spectrum

E kantidat di radiashon ku ta kousa malesa den hende ta keda midí na dosis, (no djis frekuensia haltu). E faktornan ku ta afektá e dosis aki ta e intensidat di e radiashon, e kantidat ku ta keda apsorbé, i kuantu tempu di eksposishon na e radiashon aki tabatin. E unidat ku ta keda uzá, ora kombiná tur e tres faktornan aki yama “Sievert” (Sv). B’a kompronde? Bo tei te ainda? Bon, ban sigui.

E kantidat di radiashon ku por kousa loke nan ta yama ‘radiation sickness’ ta kuminsá na 0.75 Sv. (Pues si, hopi tiki radiashon ta nesesario pa hasi bo malu.) Ora un spesialista ke sa kiko tur tin den bo paden, e por manda bo hasi un CT-Scan, kual ta uza X-Rays (tene kuenta ku X-Rays si ‘ionizing radiation’, pues, peligroso), i esaki ta eksponé bo (e parti di bo kurpa ku lo keda studiá) na 0.015 te 0.030 Sv di radiashon. Si bo haña 0.10 Sv di radiashon den un aña, bo ta kore riesgo pa desaroyá kanser. (Bo ta kore riesgo di haña kanser ora bo kome truk’i pan anochi lat tambe, muchu ‘junk food’, kore paranda bebiendo alkohòl, huma sigaria i yen otro kos mas.) 1 Sv di radiashon por kousa kanser fatal algun aña despues den 1 di kada 100 persona. E kantidat di radiashon aki por kousa nousia, hemoragio, sakamentu, pero no morto instantáneo. Un dosis di 5 Sv di radiashon ta mata bo den 30 dia, i un dosis di 10 Sv ta letal—morto garantisá, hisa pareu, ‘rest in peace.’

Bo tei te ainda, òf b’a pèrdè na kaminda? Si bo a pèrdè, kuminsá lesa di nobo fo’i na Johnny Cake, (pasó bo ta mustra mane slow pa kapta kos.)

Kon preokupá nos mester ta?

Si bo no a hasi niun CT-Scan, bo no ta traha den planta di radiashon, bo no ta biba den área di e plantanan nuklear Chernobyl na Ukraina òf Fukushina Daiichi na Hapon—e kantidat di radiashon ku bo ta keda eksponé na dje den un aña, ta mas o ménos 0.003 Sv. E kantidat di radiashon ku torennan di telefòn ta saka (inkluso di 5G) ta keda konsiderá na 0.000 Sv. Dikon konsiderá? Pasó nan no emití ‘ionizing radiation’. Ademas, e radiashon ku bo lo risibí lo no ta konsistente tampoko, pues pa kalkulá kuantu radiashon bo a keda eksponé na dje dor di e torennan aki ta difísil pa kalkulá, i komo ku e ta ‘non-ionizing’, nan ta konsider’é sero.

Computed Tomography Scan (CT-Scan)

Mi no ke bai muchu den detaye pa no hasi e artíkulo mas largu i kompliká ku e ta kaba (al final, lesamentu ta un arte ku tiki hende ta dominá). E punto ta ku 5G ta keda konsiderá ‘non-ionizing radiation’. Ounke riba frekuensia haltu, e por penetrá kueru di hende (un tiki), tòg e no ta sufisiente fuerte pa kibra electron for di e base di un atom òf molekül, kual ta loke ta keda konsiderá peligroso (por kousa kanser.)

Radiashon mester tin sufisiente Electron volt (Ev) pa por kibra un electron for di atom òf molekül. E energia mester tin mínimo 10 Ev pa hasi esaki, loke 5G no tin. E no ta ni yega serka di e kantidat ei. “Not even close.”

Ounke tur esakinan ta bèrdat, nos ta papia tòg di un subida di riesgo. Sientífikonan tin mas ku 25 aña ta investigá e tema aki, dor ku tin sospecho ku eksposishon na radiashon dor di señalnan mobil por kousa kanser. Esaki ta dor di e subida di kantidat di aparatonan elektróniko ku un persona ta rondoná di dje den tempu modèrno, i e subida di kasonan di kanser ku a bin ta detektá. Sinembargo, loke ta stroba sientífikonan di aseptá e vinkulo, ta ku e kantidat di métodonan pa detektá kanser mas lihé i trempan tambe a subi. Pues bo no por bisa ku ta eksposishon na radiashon emití dor di e aparatonan aki ta kousando mas kanser. No tin niun evidensia di esaki. Realidat ta si, ku mas fuente di radiashon nos krea òf instalá, mas tantu radiashon nos ta eksponé nos mes na dje. (Riba tur esnan natural ku tin kaba. Por ehèmpel nos planeta mes ta magnétiko, i e tambe ta emití un tipo di radiashon.) Maske nos ta papiando di ‘non-ionizing radiation’, tòg, ta radiashon e ta, i e kantidat lo subi. Pero kualke idiot no por kalkulá e montante, te pa e konkluí ku e kantidat por tin efekto negativo riba kurpa di hende, te pa nan sa ku 5G tin efekto negativo riba bida òf salú di hende.

Pero, pa bo ta seif, nan ta rekomendabo redusí e kantidat di radiashon ku lo bo por risibí via di bo telefòn, tèblet èts. Bo ta risibí radiashon, ora e aparato ta den uzo. Pesei nan ta rekomenda ‘text’ enbes di yama, pa tene e aparato leu for di bo kabes/kurpa, i redusí e ‘specific absorption rate’ (SAR, e terminologia ku nan ta uza pa kalkulá loke mi a splika ariba).

E efekto ku ‘ionizing radiation’ tin riba hende, i e probabilidat ku e por kousa kanser ta dependé di e ‘absorbed dose’, ‘equivalent dose’ i ‘effective dose’. Esaki ta hasi sumamente difísil pa kualke laiko konkluí ku ta 5G (ku ta emití ‘non-ionizing radiation’) ta loke ta hasiendo hende malu òf ta matando hende. E frekuensia di 5G ta hopi mas haltu kompará ku di 4G, pero tòg hopi mas abou kompará ku ‘ionizing radiation’ manera UV-light, X-Ray i Gamma. Nos ta papiando aki di un diferensia di frekuensia di 2 te 2.5 mion Ghz  mas abou. (Segun mi paisnan ta bezig ta tèst e den 60 Ghz mmWave.) Pues si bo a mira potrèt di paranan morto riba kaya, i nan a bisa ku ta stralnan di 5G a mata nan, gaña nan ta gaña. “It’s not possible.” Si tabatin para morto riba kaya, hopi chèns ku ta hende a mata nan.

5G lo mester bai uza diferente transmisor riba distansia kòrtiku. Esaki ta pa motibu ku ‘milimeterwave’ ta keda apsorbé dor di gasnan den atmósfera, kual ta hasi su señal suak. Esei t’e motibu ku mester uza diferente transmisor riba distansia kòrtiku pa e por funshoná efisientemente. Esaki por lanta preokupashon mirando ku e transmisornan lo bai ta mas serka di kasnan kaminda hende ta habitá, kompará ku 3G i 4G.  Riba su mes, 5G no ta emití radiashon asina fuerte pa kousa niun malesa agudo manera diferente ‘online posts’ ta pretendé. Pa radiashon krea un impakto riba hende, ku ta hasi hende malu den 30 dia òf ménos, e radiashon aki mester ta bastante fuerte, anto a ménos ku un persona no hañ’é den un aksidente den un planta di radiashon, un persona komun i koriente no ta bai hañ’é eksponé na tantu radiashon asina.

Kiko 5G tin di haber ku Coronavirus?

Aha, awor nos a yega n’e parti interesante. Lamentablemente e kontesta ta hopi kòrtiku. E no tin apsolutamente nada di haber ku un infekshon viral respiratorio ku ya a keda detektá na mas ku 200 rònt mòndu (inkluso paisnan ku di baina tin koriente manera India, Cuba, Sto. Domingo i Bhutan, te pa nan tin 5G). Manera mi a menshoná, e radiashon emití dor di e señalnan aki no ta asina fuerte pa kousa un malesa agudo manera Covid-19 den hende. Anto ta simplemente imposibel transmití un vírus via di e teknologia aki, meskos ku ta imposibel pa mi saka un muhé na estado dor di sèks kuné via ‘video chat’. Si bo no ta kere, bai puntra Dr. Gerstenbluth, pe manda bo ku ròl di papel di wc den bo kabes.

Pero mi ke diskutí tokante 5G. Mi ke krea konspirashon, sembra pániko i bisa hende ku nan ta na soño!

Mi ta komprondé ku hopi hende tin e nesesidat aki. Pa aworakí, e úniko diskushon na tinu ku bo por hiba rondó di 5G ta ku no tin sufisiente investigashon ku eksposishon eksesivo na e stralnan aki riba tèrmino largu (5 aña òf mas) ta 100% seif pa kurpa di hende. E investigashon ei no ta eksistí, pues nos no sa. (E investigashon ta difísil pa kondusí tambe.) Ta p’esei nan ta konsehá pa limitá bo eksposishon na e stralnan aki. Pero esaki no ta motibu pa bo bai krea un ‘script’ di pelíkula ‘a la zombie’ rondó di e teknologia 5G, hinkando sekshonnan bíbliko aden, i mand’é pa yen idiot ku lo kere ku e ta bèrdat. Ta ‘Julius Koko Syndrome’ bo tin?

Si bo a haña un teksto di notisia òf teoria, ku bo no sa si e ta bèrdat, no kompartié. Un komunidat mal informá na mi pareser ta hopi mas peligroso ku un komunidat no informá. Duna hende informashon ta hopi mas fásil ku konvensé hende ku loke e ta kere, no ta korekto. Kisas abo no a kere e loke ku bo a lesa, pero Mayron di Boka Samí si ta kere, i e ta lanta loko bai basha tur pal’i lus di Aqualectra abou p’e no haña Coronavirus, hinkando nos tur den problema.

Petishon pa investigá 5G.

Si nada ku mi a splika ariba, no a trankilisá bo, tin algu mas. Tin un petishon entregá na union oropeo firmá pa 180 sientífiko i dòkter di 36 pais diferente, pa wanta ku instalashon di 5G, te ora tin mas estudio riba e subida di eksposishon na radiashon ku e teknologia aki ta trese kuné. E komishon a bisa ku kada pais ta responsabel pa salubridat di nan pueblo, pero esaki mi ta kere lo yuda stimulá mas investigashon. Parlamento di Hulanda a pidi pa un investigashon independiente riba e posibel peligernan ku e teknologia aki ta trese. Diferente pais oropeo lo bai hasi meskos (mi ta kere anto). Defakto, mayoria pais tabatin basta problema asta ku 4G, i hopi di nan ta djis uzando un vershon di 3G+, pasó e tabata mas kuminiente. Pues si bo ta na Kòrsou, Aruba òf Boneiru, i bo ta preokupá pa 5G, ta hari lo mi tin ku hari bo.

Kua pregunta mas bo tin?

Miéntras bo ta pensa riba bo pregunta nan, kòrda ‘support’ mi, kumprando mi bukinan riba lionspratt.com. Ku ‘support’ mi, mi no ke men manda mi mensahe i pidi mi buki pòrnada. Bo ta ofendé mi asina. Mi ta invertí hopi tempu skirbiendo e artíkulonan aki, pasó mi ke pa bo ta mihó informá. Mi parti buki pòrnada, lo mi no por kome, ni skirbi niun artíkulo mas. E bukinan ta trahá pa nos kuminsá lesa mas tantu. En bes di papia (taip) mas tantu, nos tin ku lesa mas. Mi bukinan ta pa bo kuminsá hinka bo mes den e ‘mood’ di lesamentu. Subi mi wepsait, wak kua bo ta haña interesante, i kuminsá eksperensiá e dushi di lesamentu. Esei ta tur loke mi ke. Eniwei, ainda bo no sa kiko mas bo ke puntra?

www.lionspratt.com


Dikon nos mester di 5G?

Hopi bon pregunta. Mi ta gusta bo preguntanan si. Bon mirá, nos no mester di 5G, meskos ku bo no mester di bo telefòn. Ta abo ta kere ku bo no por biba sin dje. Pero e ta un avanse konsiderabel den mundu teknológiko, i niun hende no ke keda atras. Bo sa kuantu kos lo bira posibel ku 5G? Di for di ‘self driving cars’, te na ‘download’ 10 pelikula di pòrno den 20 sekonde. Nos ta papiando di ‘download speeds’ di riba 1.5 Gb pa sekònde. Ombu, ban serio. N’e otro banda hende tin miedu di otro posibilidatnan ku ta habri porta pa ‘state control’, kual no ta imposibel. Pero esei ta tema pa un otro dia. Si bo kumpra ‘Ko’i Lesa 1st Edition’, i Ko’i Lesa 2nd Edition, esei ya kaba lo motivá mi pa mi kuminsa skirbi riba e tema ei. Si bo kumpra ‘Kibra Hacha‘ i ‘Niun Pátaka‘, lo mi kai stimá riba bo. Si bo no kumpra niun, lo mi no rabia. Lo mi bira poko tristu si.

Eniwei, e kompania ku ta mas avansá aworakí den teknologia 5G ta e kompania chines Huawei. E pais ku logra hasi e teknologia aki operashonal mas lihé, lo bai mira un subida drástiko den empleo i GDP (Gross Domestic Product). Merka a mira ku nan ta bai pèrdè kontra China, i a disidí di bòikotiá Huawei (manera un mucha chikí ku a kue bala kore bai kune, ora e mira ku e ta perdiendo e wega.) Kisas ta pesei yen teoria ridíkulo a lanta kabes rondo di 5G. ‘Who knows.’

Kua pregunta mas bo tin? Tur kos ku mi a splika tabata komprendibel? Wèl, si ta asina, kompartí e artíkulo ku un hende ku no sa, ya nos tin ménos hende papiando ko’i loko. Bo no mester yama mi danki tampoko pa a splika bo. Djis bai kumpra mi bukinan. Klek aki, i bai shòp riba mi wèpsait. Bo por basilá bon riba mi bukinan.

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook
Powered by WordPress and ShopThemes
Copy Protected by Chetan's WP-Copyprotect.