E mihó manera pa dil ku preokupashon!

 Bida tin yen buèlta kuné i tin ora sierto kosnan ta kousa preokupashon ku ta pone bo keda pensa sin por stòp. Preokupashon ta kousa sintimentunan no agradabel i tin bia hopi doló’i kabes.

Tin bia nos sa kiko ta kousa e preokupashon, pero bo sa si ku tin bia bo ta kuminsá sinti preokupá sin sa e motibu. Debí ku bo no sa e motibu di bo preokupashon, bo tin tendensha di kere ku ta ‘de la nada’ bo a kuminsá sinti bo preokupá!

Hende ta sinti preokupashon pa diferente kos, pero por general tin tres kos ku por pone nos sinti preokupá:

1. Preokupashon pa ku kosnan doloroso di pasado ku lo por bolbe ripití.
2. Preokupashon pa ku kosnan ku nunka no a yega di sosodé, pero ku lo por sosodé un dia den futuro, i ku nos no sa kon nos lo por hèndel kuné.
3. Preokupashon pa ku kosnan ku a yeg’i sosodé ku otro persona i ku nos tin miedu ku e lo por sosodé ku nos.

Loke ta sumamente importante pa bo sa ta ku preokupashon nunka no ta pasa sin motibu. Semper tin algu ku a kousa e preokupashon ku bo tin. Si bo ke logra dil ku e preokupashon bo mester por yega n’e kousa. Hendenan ku tin ‘mood swings’, pues beis ku ta kambia manera wer, tambe e kambio ta debí na un motibu. Tin hende ta kere ku nan por simplemente lanta mainta ku mal beis, i ora bo puntra nan pa ki motibu nan tin mal beis, nan ta bisa ku no tin un motibu.

E personanan aki sea no ke bisa bo e bèrdat, òf kisas nan mes no sa e bèrdat dor ku nan ta muchu floho òf tin miedu di bai pensa riba e kousa di nan ‘mood swing’. Meskos ta pasa ku preokupashon.

worrying-1Den mi buki ‘Niun Pátaka’ mi a splika e diferensha den mente konsiente i menta inkonsiente. Tantu e mente konsiente komo e mente inkonsiente ta piki informashon ku ta drenta via di un di nos sentidonan. E mente inkonsiente ta piki hopi mas tantu informashon kompará ku e mente konsiente, anto e informashonnan ku wòrdu kaptá dor di e mente inkonsiente, sin ku bo ta paga tinu ariba e por afektá bo estado emoshonal i kousa tantu ‘mood swing’ komo preokupashon.

Pues e promé stap pa bo siña dil ku preokupashon ta di determiná e kousa di bo preokupashon. Pensa riba tur loke bo a tende, tur loke bo a mira, ku lo a kousa un kambio den bo estado emoshonal. Esaki por ta asta un bòrchi ku bo a mira kantu di kaminda, òf un pensamentu ku a pasa pa 5 sekònde den bo kabes. Bo por ta mirando televishon trankil di bo, i diripiente bo ta mira algu den un propaganda ku ta ‘trigger’ un memoria i esaki ta kambia bo estado emoshonal i pone bo kuminsá preokupá. Esaki ta algu ku por pasa fásilmente riba Facebook òf otro medionan sosial. Segun hopi investigashon, medionan sosial ta un di e kousanan mas grandi di depreshon, debí n’e bida falsu ku hende ke ilustrá. Tur hende ke mustra nan gloria, i ta skonde tur aspekto negativo di nan bida. Por ehèmpel un hende ku masha dia ta buska trabou, fásilmente por sintié malu ora e mira potrèt di un otro persona na trabou, òf si e mira ku tal persona a wòrdu promové, òf personanan ku ta skibi kosnan pa ilustrá ku nan ta sinti nan produktivo dor di nan trabou. Tambe potrètnan di vakashon por kousa depreshon den otro hende, prinsipalmente na personanan ku no tin moda di bai ku vakashon.

worrying-4Ta hopi difísil pa pone hende bai tene kuenta ku tur loke nan ta mustra pa asina evitá ku nan ta hasi impakto riba bo estado emoshonal. Ta mas fásil pa abo detektá i evitá ku sierto kosnan ta hasi impakto riba bo emoshonnan. Na momentu ku bo determiná ta kiko a kousa e kambio den bo estado emoshonal, bo por bai evaluá pakiko/dikon esaki a trese e kambio emoshonal ku ta laga sintimentunan no masha agradabel atras.

Pa bo logra determiná esaki bo mester konosé i komprondé bo mes hopi bon i tambe ta konsiente di bo heridanan emoshonal. Bo mester sa kiko ta tur e kosnan ku ta pone bo kòrda riba bo heridanan.

Kon pa evitá e ‘trigger’ nan aki?
Komo medida temporal bo por purba evitá e ‘trigger’ nan pero esaki no ta e mihó solushon. Hui for di loke ta kousa bo doló no ta kura pa bo heridanan. E no ta hasi bo mas fuerte ni e no ta yuda den bo progreso. Pero pa alivio temporalmente bo por evitá e loke ta ‘trigger’ bo preokupashonnan:

  1. Pone hopi atenshon i traha lista di kosnan ku ta pone bo kuminsá preokupá. Por ehèmpel kisas bo ta deskubrí ku ora hende papia di ‘shopping’, bo estado emoshonal ta kambia debí ku esaki ta pone bo kòrda riba bo estado finansiero ku no ta pèrmití bo bai ‘shop’.
  1. Pone atenshon riba pensamentunan ku ta pone bo kuminsá preokupá. Hende su mente pa dia ta pensa riba un mion di kos i debes en kuando e ta bai pensa riba kosnan ku ta kambia bo estado emoshonal. Detektá ta kua esakinan ta i bira konsiente riba nan.
  1. Evitá e ‘trigger’ nan aki. Esaki hopi hende ta hasi dor di tene nan mes konstantemente okupá, traha hopi ora, bira ménos sosial etc.

Esakinan ta sirbi pa yuda evitá e preokupashonnan i kambionan emoshonal no agradabel. Mi tambe ta hasié, pero miéntras bo ta hasi esaki, lo bo tin ku traha riba un solushon mas duradero. Un di e kosnan ku ami a ripara ta funshoná ta di buska un manera pa aseptá sierto kosnan ku ta asina nan ta, i asept’é di un manera ku e no ta trigger preokupashon òf kambio di estado emoshonal mas, mientras tantu bo ta trahando riba un posibel solushon pa e loke ta trese e preokupashon. Por ehèmpel, si bo ta preokupá pa motibu ku tin kanser den bo famia i bo tin miedu ku bo tambe lo por hañ’é, bo tin ku kuminsá na aseptá ku e rísiko ei ta eksistí i ku bo tambe lo tin chèns di hañ’é plùs muri di dje, i kuminsá traha riba posibel solushonnan. Pues siña tur kos di e malesa i kon te maneranan pa kontrarestá e malesa aki, plùs prepará tur kos pa si dado kaso bo tin ku bai laga bo hendenan atras.

E proseso aki por dura largu, pero e ta esun mas efektivo. Hopi hende ta kere òf bisa ku nan a aseptá algu ku ántes tabata molostiá nan, pero na nan komportashon defensivo bo ta mira ku ainda e ta hasi doló. Den hopi kos ami ta kombiná e dos solushonnan. Pues miéntras mi ta buska manera pa aseptá sierto kos, mi ta evitá tur loke por ‘trigger’ preokupashon òf sintimentunan no plasentero den mi.

worrying-2Serka personanan sensibel bo ta mira presis loke mi kemen ora ku hende no aseptá algu. Komo solushon pa nan sensibilidat, nan ta purba na aktua komo un persona ròf i tòf den hende, pa hende no mira kon sensibel nan ta, dor ku esaki por keda mirá komo un debilidat. Ami semper ta bisa nan ku en bes di mir’é komo debilidat, mir’é komo bo fortalesa. Un persona sensibel ta ‘sinti’ hopi kos i hopi mas lihé kompará ku otro persona. Esaki por ta bon, si loke nan ta sinti ta positivo, pero e por tin impakto hopi fuerte si loke nan ta sinti ta negativo. E personanan aki mester aseptá ku nan ta sensibel, aseptá ku hopi kos por pone nan yora hopi lihé, i simplemente uza esei komo nan karakterístika enbes di skonde i ke aparentá komo persona ròf i tòf, kual en realidat nan no ta.

Pa bai bèk na e lokualnan ku por kousa preokupashon, lo bo stòp di sinti preokupashon na momentu ku:

1. Bo a kura di bo heridanan di pasado, i a siña kon dil ku nan, pues bo tin ménos miedu ku nan lo por bolbe ripití.

Por ehèmpel un persona a yeg’i wòrdu rechasá den pasado dor di un persona ku el a stima. E rechaso aki por kousa komportashonnan den e persona aki, (dor di outo-estima abou kousá pa e rechaso) ku e mes no sa ku e tin nan debí n’e rechaso ku el a yeg’i sufri. Pa semper el a keda ku miedu di rechaso atrobe. Dia e persona aki aseptá ku el a wòrdu rechasá pa motibu ku esun ku a rechas’e tin su mesun motibunan personal pa kual el a hasi esaki, kisas pa nesesidatnan diferente, e lo por pasa mas lihé riba e rechaso aki, i tambe kita su miedu di bolbe wòrdu rechasá.

2. Bo ta mihó prepará pa kosnan ku lo por pasa den futuro dor ku bo sa kon pa hèndel ku nan, dado kaso nan mester sosodé. E loke bo tin miedu p’e pasa ei, bo tin ku siña, i konvensé bo mes ku si tal kos mester sosodé, lo bo sa kon pa hèndel kuné.

Por ehèmpel, bo tin un trabou ku bo no gusta, pero bo tin miedu di pèrdè trabou ei pasó bo no sa kon lo bo por sigui mantené bo mes i bo famia. Bo por kita e preokupashon aki dor di buska un otro trabou, krea manera nan ku bo por traha sèn riba bo mes, i tambe konvensé bo mes ku bo por i lo ta totalmente konfortabel bibando un bida ku ménos rekurso finansiero. Preokupashonnan ku ta bin dor di malesanan den famia, bo por dil ku nan dor di hasi kambionan nesesario den bo dieta, biba un bida mas saludabel, hasi ehersisio, i lesa/siña tur loke bo mester sa di e malesa ku tin den famia pa bo por dil mihó kuné, dado kaso e presentá. Tambe tuma tur e pasonan nesesario pa ku otro miembronan di famia ku lo por wòrdu afektá dor di e malesa aki.

3. Bo ta mihó prepará pa kosnan ku bo a yeg’i mira pasa ku otro hende, i bo tin miedu pa nan pasa ku bo.

Bon preparashon ta kita preokupashon. Por ehèmpel tin hende tin miedu di drenta relashon dor ku nan a mira hopi di nan amistatnan pasa den sufrimentu den un relashon i nan no ke pasa den e mesun kos. Un persona asin’aki mester kuminsá na siña ku bo tin ku pasa den algun relashon malu pa bo yega na esun bon. E persona aki lo sinti ménos miedu si e sa kiko te ingredientenan ku ta hiba un relashon na frakaso i tambe kiko t’e ingredientenan ku por yuda un relashon bai bon. Tambe e mester sa ki ora ta momentu di lòs laga bai, na momentu ku un relashon ta kostando bo pas mental i felisidat!

Asin’aki mi por sigui duna hopi mas ehèmpel, pero mi ta kere ku bo a kapta mi punto!

Pa siña hopi mas di hende i komportashon di hende, chèk mi bukinan ‘Kibra Hacha’ i ‘Niun Pátaka’. No tin nada ku lo por igualá e kantidat di kosnan ku bo ta siña den e bukinan aki.

Dayenne Kibra Hacha and Niun Pataka

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook
Powered by WordPress and ShopThemes
Copy Protected by Chetan's WP-Copyprotect.