Komprondé e sikologia di un hòmber òf un muhé ‘player’!

Pa ki motibu un hende lo namorá un persona i despues bai lag’é ku su sintimentunan destrosá? Pa ki motibu un hende lo primintí bo shelu i tera, i despues ku bo a dun’é tur bo atenshon, tempu i konfiansa, e ta disparsé i bai buska un otro persona p’e konkista?

Player 1Un persona ku ta hunga ku sintimentu di otronan pa su propio benefisio, i kada bes ta keda buska otro víktima pa kumpli ku su propósitonan, nos ta yama un ‘Player’. E persona aki por ta maskulino, pero tambe femenino. Hende hòmber usualmente ta ‘play’ ku muhé pa yega na sèks, pero nan por ta enbuska di otro kos tambe por ehèmpel material, i hende muhé ta meskos. Nan por trata bo di e forma di mas amabel ku tin, i kumpra kos p’abo, pero al final nan ta sòru di saka nan benefisio fo’i bo, i ora nan ta kla ku bo nan ta bandoná bo sin niun splikashon i laga bo konfundí i kompletamente destrosá.

Dikon un hende lo hasi algu asin’aki? Dikon tin hende ‘player’?
Wèl, tin un kos ku bo tin ku komprondé. Hopi hende ta huzga desishonnan di demas persona basá riba e echo ku no opstante nan tabata tin defisiensia di loke un ser humano mester risibí den su desaroyo, òf eksperensianan ku ta perhudiká e desaroyo aki, tòg nan no a skohe pa tuma sierto pasonan. E frase ei por zona un poko kompliká pues pèrmiti mi simplifik’é: Por ehèmpel Sonia a lanta den un famia pober i sin un tata presente. Tòg Sonia a lucha den bida i awe Sonia tin un bon trabou i un famia saludabel. Carla tambe a lanta den un famia pober i sin un tata presente, pero Carla fo’i den su infansia a tuma e desishon pa bira un prostituta por ehèmpel. Sonia ta huzga Carla ku e echo ku el a lanta den famia pober sin tata presente no ta hustifiká Carla su desishon pa bira prostituta. Loke Sonia no ta komprondé ta ku Carla ta Carla. Carla no ta Sonia. Kada hende ta diferente i un defisiensia manera e efekto di ousensia di figura di tata pa Carla por ta hopi mas devastador ku e defisiensia ei den bida di Sonia.

Kiko tur esaki tin di haber ku un persona ‘Player’? Komportashon di hende ta un indikashon di kon e persona a keda formá i eksperenshanan ku el a pasa aden. ‘Playernan’ tin defisiensia di algu i esei nan ta buska den e komportashon ku nan tin. Hende ta mira nan komo personanan atraktivo, prèt, popular i ku konosé hopi hende, pero e persona mes tin defisiensia di yen kos ku ta kousa su komportashon:

Un ‘player’ no sa ken e ta
Un ‘player’ nunka a haña chèns di konosé su mes, i dor di esaki, e ta buskando aprobashon di e persona ku e ta kere ku e ta. Pues nan ta desaroyá abilidatnan di konkista vários hende pa nan por haña e aprobashon aki. Nan mester di atmiradó, hende ku ta ‘look-up’ riba nan pa nan por stimulá nan outo-estima i balor propio.

player 3Un ‘player’ ta sintié no stimá i insigur
Un hende ku nunka a haña amor i kariño na kas por bira un ‘player’ pa asina e buska e amor i atenshon ku nunka el a risibí. Esaki ta pone ku nan ta keda drenta i sali for di diferente relashon, buskando kada bes pa mas i mas hende ‘stima’ nan. Ora hende ta hasi tipo di aktonan aki pa prueba nan mes di algu, ta debí na inseguridat.

Un ‘player’ tin miedu pa hende bai lag’é
Esaki tambe por pone ku un hende ta bira ‘player’. E ta drenta un relashon, i bai laga e persona, promé ku e persona bai lag’é. Esaki usualmente ta desaroyá despues ku un persona a bai laga e ‘player’ i nunka mas el a kura di e herida aki.

Un ‘player’ ta sinti ku e no tin balor
Tur ser humano ta lucha pa logra kosnan den bida pa duna nan bida un balor. Tin hende ta hasié dor di logra sierto metanan den nan karera. Otro ta hasié dor di logra algu grandi pa nan famia òf pais. Pero tin hende ta keda sinti ku nan bida no tin balor, ni maske kiko nan hasi. E personanan aki ta hasi sierto akshonnan ku nan ta keda hasi dia aden dia afó, pa laga nan sinti bon ku nan mes. Mi no ta bai masha profundo den esaki, pasó e tipo di hendenan aki ta hopi. Hopi mes.

Pero e ‘player’ ta haña sierto satisfakshon dor di laga hende sinti nan mes atraé na dje. E lo keda hasi esaki kada bes ku e ta sinti ku e no tin balor.

Un ‘player’ tin nesesidat di aprobashon
E persepshon ku un player ta proyektá ta di un hende sigur di su mes, ku sa ku e tin tipo i ku e por logra haña òf konkista ken ku e ke. Un persona ‘normal’ ta sintié bon ora e sa ku un persona gust’é i ta atmir’é i ta sinti orguyoso di dje. Un ‘player’ tin hopi nesesidat di aprobashon, pues si un persona so gust’é, esei no ta sufisiente. E mester di mas. P’esei e ta lucha kada bes pa mas persona gust’é.

player 4Un ‘player’ ta sinti ku su bida ta bashí
Hende ta sinti ku nan bida tin nifikashon ora nan logra sierto metanan ku nan tin pa kumpli ku nan nesesidatnan sikológiko. Dor ku un ’player’ ta sintié bashí, e tin ku keda buska loke nan ta yama viktorianan barata. Esta kada bes konkista un persona, i na momentu ku e konkistá un, e tin ku bai pa un otro p’e bolbe sinti e satisfakshon.

Un ‘player’ tin hopi duda
Un ‘player’ tin hopi duda rondó di su personalidat òf di su nan aparensha, òf duda di lokualnan e ke logra den bida pa e por sinti ku su bida tin balor òf nifikashon.

Pues básikamente un player ta un persona instabil i insigur ku mester di su libertat pa konkistá mas tantu hende posibel pa e por keda satisfasé su mes sino e lo sintié bashí i sin balor propio!

Tin hende ta pensa ku nan tambe tabata tin sierto defisiensianan, pero tòg nan no a skohe pa bira un ‘player’. P’esei mi a menshoná e ehèmpel di Carla ku Sonia. Kada hende ta diferente i kada hende ta keda afektá i reakshoná diferente dor di nan eksperenshan di bida. Den mi proksimo buki lo mi splika esaki mas en detaye!

Bo tin gana di yuda un ‘player’?
Komo ku hende muhé gusta yuda i bira e San Salvador di hòmbernan ku e tipo di komportashon aki, mi ta konsehá nan pa laga esei na e hòmber mes. Pa di promé un ‘player’ hamas i nunka lo aseptá ku e tin e karakterístikanan aki, te p’e aseptá ku e mester di yudansa. Bo bai yud’é, bo ta eksponiendo bo mes na dolónan emoshonal ku chèns ku bo ta rabia i buska e hòmber pa mata despues!

Bo por yuda un muhé player? Klaro, bo por yud’é dor di keda leu fo’i dje. Kada persona lo buska yudansa ora e mes ta sinti nesesidat pa esei, anto tin hende ta kambia riba nan mes! Bo no por yuda niun hende ku no ta aseptá ku e mester di yudansa.

Hende hòmber tambe ta pega emoshonalmente riba muhé meskos ku muhé ta pega riba hòmber, i hòmbernan ku un bia a wòrdu lástimá dor di muhé tambe por krea komportashonnan di ‘player’ pa evitá ku nan tin ku bolbe pasa den e mesun eksperensha. Hende muhé usualmente ta krea deskonfiansa den hòmber i ta skohe pa sea keda nan so, krea aktitud ‘bitchy’, bira lesbiana òf un ‘player’.

player 5Resientemente un persona a bisa mi ku hende hòmber tin mas inseguridat ku hende muhé. Komo representante di e grupo maskulino, m’a her’i mand’é kaminda el a sali, pasó mi ta haña e kos ei un insulto masha grandi mes. Pero mi no por a mand’é kaminda el a sali, pasó e tin rason. Hende hòmber tin hopi mas tantu inseguridat ku hende muhé i ta p’esei nan ta adoptá komportashonnan seksual parotin, pa subi nan outo-estima. Pero kriansa ku defisiensia di kariño sea di e mama òf e tata i tambe ousensia di e imágen di un pareha ‘normal’ i monogamo, tambe ta krea e hòmber ku komportashon seksual parotin. Pues un hòmber ku a lanta den famia di un mama so por ehèmpel, bo por ta kasi 100% sigur ku ta uza sèks pa djis pa un akto físiko, debí ku e no a eksperensha e imágen ku ta krea otro hormonanan den su kurpa ku ta hasié monogamo. Ni maske kon bon e mama a kri’é! Anto mayoria hòmber por lo general ta asina, i tin algun muhé ku tambe ta asina. Un muhé ku ta sèks parotin tambe tin su defisiensianan. Pero kada hende ta diferente pues ta difísil pa mi bisa dikon e persona ta sèks parotin!  Den mi buki ‘Kibra Hacha‘ mi a splika e funshonamentu di e hormonanan i komportashon seksual maskulino mas den detaye.

Awendia tin hopi hende habrí pa tin djis relashonnan seksual. Hende muhé tambe, pues bo no mester ‘play’ niun hende pa yega na sèks. Djis traha un sita i bo ta kla. Pero ‘player’nan tin otro agènda basá riba otro nesesidatnan pues djis ‘sèks’ so no ta sufisiente, sino nan lo a bai Campo tòg? Tene kuidou ku nan pasó nunka nan lo ta honesto ku bo, i un di e triki ku nan ta uza ta konfushon. Nan lo konfundí bo dor di nan instabilidat, i e konfushon ta krea dolónan emoshonal serka bo.

Nota: den e artíkulo aki mi ta menshoná e palabra defisiensia debí ku esaki ta krea un persona ku su komportashon no ta segun e imáhen ku nos a krea di hende. Pues ta nos mes a krea e kerensha di kon hende mester ta i hasié generalmente aseptabel dor di mara komportashonnan na normanan ku nos ta aprobá i/òf desaprobá!

Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook

Leave a Reply

Powered by WordPress and ShopThemes
Copy Protected by Chetan's WP-Copyprotect.