10 kos ku hende ta bisa di personanan introvèrt, ku no ta bèrdat!

 Ya komo mi tin hopi tempu sin toka e tema di introvershon, mi a disidí bin bèk riba e punto aki. Manera tur hende sa, mi ta introvèrt te den mi último gota di sanger i hopi tempu mi tabata tin ku soportá hende papia yen ko’i kèns ku nan no sa di dje. Aki mi ta bai trata algun mito ku ta biba den nos sosiedat di hendenan introvèrt, pero ku no ta bèrdat

(Klek aki, si bo no sa kiko ta introvèrt ni èkstrovert)

Intro51. Personanan introvèrt no gusta papia.
Esaki no ta bèrdat. Loke ta pasa ta ku hendenan introvèrt no ta papia a ménos ku nan no tin algu interesante di bisa. Nos no ta papia djis pa bisa algu. Introvèrtnan ta malu den ‘small talk’. Ke men hopi chèns ku si bo topa un den kaya, bo kuminsá puntra kosnan manera “Konta ku mama ku papa”, lo bo haña bo ku kontestanan kòrtiku i seku, pasó nos ta haña ku e preguntanan ei no tin sentido. Puntra algu na tinu i interesante, anto bo ta mira kon nan ta papia i bai profundo den un tema, laga bo keda kompletamente babuká!

2. Personanan introvèrt ta tímido.
Timides no tin nada di haber ku introvershon. Klaro ku tin hendenan introvèrt ku ta tímido, meskos ku tin hendenan èkstrovèrt ku tambe ta tímido. Personanan introvèrt no tin miedu di hende, solamente ku nan mester di un motibu pa interaktua ku hende. Nan no ta hasié djis pasó nan mester di hende pa ‘jibber jabber’ kuné.

3. Personanan introvèrt ta brutu i sin manera.
Kisas ami por ta un tiki brutu i sin manera, pero esei no tin nada di haber ku introvershon. Loke ta pasa ta ku personanan introvèrt no gusta keda bira rònt di un kos. Nan gusta hende real i ku ta papia e kosnan stret manera nan ta. Lamentablemente den nos sosiedat tin hopi hende ku no ta haña esaki aseptabel, i ya komo nan ta pokoi delikado, nan por konsidera komo algu brutal i sin manera. Ami sigur tin ora no sa kon mi mester ta den hende, anto prinsipalmente den hende ku ta hunga fini pa nan mustra interesante.

Intro24. Personanan introvèrt no gusta hende.
Esaki tampoko no ta bèrdat. Hendenan ku ta introvèrt ta balorá e tiki amistatnan ku nan tin inmensamente. Mayoria persona introvèrt por konta nan amistatnan riba un man. E personanan ei ta hendenan ku por konta ku nan sosten i apoyo pa restu di nan bida. Ami si ta un kaso apart. Ami no tin amistat. Mi tin hende ku mi gusta, i hende ku mi no gusta. E hendenan ku mi gusta ta tiki. Hopi tiki. Ke men si mi yega na gusta bo, ta hopi speshal bo ta.

5. Personanan introvèrt no gusta sali den públiko.
E frase aki no ta kompletu. Personanan introvèrt no gusta sali den públiko pa tempu largu. Klaro ku mi por drenta un fiesta ku yen hende riba otro. Pero hopi chèns ku despues di 10 minüt mi ta sali pafó bèk. Klaro ku mi por bai Punda riba dia di Rei. Solamente ku lo mi bai para kamindanan ku ta mas trankil. Hendenan introvèrt ta bira sobrestimulá hopi lihé i esei ta pone ku nan lo evitá ambientenan ku tin hopi hende i hopi bochincha. (Lesa mas di esaki den e artíkulo “Mientras e èkstrovèrt ta manera un Helianthus, e introvèrt ta manera un palu di Cactus”.)

6. Personanan introvèrt semper ke ta nan so.
Ta bèrdat ku un persona introvèrt ta apresiá i stima su momentunan kaminda e por ta su so pa e lesa, pensa, analisá, studia kosnan kompliká etc. Tur esakinan ta hasié sumamente felis. Pero un persona introvèrt por sintié su so tambe. Tur hende, i tambe hendenan introvèrt ke tin un hende ku nan por kompartí momentunan plasentero kuné, papia di kosnan ku nan a lesa òf deskubrí etc. Mayoria persona introvèrt lo apresiá kompania di UN persona…..UN persona so, ku nan por papia tur kos kuné.

Intro37. Personanan introvèrt ta straño.
Introvèrtnan no ta straño. Simplemente nan no ta hasi loke tur sobrá hende ta hasi. Nan no ta hendenan ku ta ‘follow the crowd’. Nan ta preferá ser apresiá pa nan manera distinto ku nan ta biba en bes di biba nan bida di e mesun forma ku tur hende ta hasié. Semper nan ta reta loke tur sobrá hende ta konsiderá komo regla i norma. Nan desishonnan nunka no ta basá riba loke ta popular òf loke tur sobra hende ta hasi.

8. Personanan introvèrt ta hopi distante.
Inrovèrtnan ta hopi den nan mes. Nan ta konstantemente okupá ku nan pensamentu i emoshonnan. No ta asina ku nan no ta atendé ku otro hende, solamente ku nan ta sinti nan hopi mas felis na momentu ku nan ta okupá ku nan mes.

9. Personanan introvèrt no sa kon pa dibertí.
Ekstrovertnan gusta bochincha, i ambientenan ku tin hopi hende. Introvèrtnan ta nèt kontrali. Nan gusta silensio i trankilidat. Ambiente nan ku tin hopi zonido i bochincha ta pone ku nan ta sera nan mes. Nan seleber simplemente ta funshoná di forma diferente kompará ku un èkstrovèrt.

10. Personanan introvèrt por kambia i bira mas ekstroverso.
Ámbos personalidat mester di karakterístikanan di e otro pa nan por desaroyá, pero bo no por kambia niun di dos. Kada un di nan por siña dil diferente den sierto situashonnan ku ta hasi nan inkonfortabel, pero niun no por kambia bira e otro. Ta simplemente e forma ku nan mente ta funshoná. (Lesa mi buki Kibra Hacha, e promé kapítulo pa un splikashon mas detayá.) Un mundu sin personanan introvèrt ta un mundu sin sientífikonan, sin músikonan, sin poetanan, sin matemátikonan, sin eskritornan, sin filósofonan, etc. Pa falta di konosementu riba e materia di personalidat di hende, nos sosiedat ketu bai ta kere ku un persona introvèrt mester kambia i bira mas ekstroverso. Pero realidat ta ku bo no por kambia niun hende introvèrt, i kada persona introvèrt meresé di wòrdu respetá pa e manera ku nan ta, i pa nan kontribushon ku nan ta duna na humanidat!

Intro4Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook

Leave a Reply

Powered by WordPress and ShopThemes
Copy Protected by Chetan's WP-Copyprotect.