Dama ta konta kon difísil ta pa mustra felis di pafó, pero ku un tristesa profundo di paden!

“Si hende tabata konosé hende mas mihó, nos lo stòp di huzga bida di otro hende, i hinka mas tantu tempu den yuda i sostené otro.”

Den tempunan primitivo, na momentu ku emoshonnan fuerte dal nos, indikando ku nos bida ta na peliger, nos tabata reakshoná abase di loke nan ta yama ‘fight or flight mode’. Pues sea nos ta bringa pa salba nos mes òf nos tin ku hui.

Awendia tempu a bira mas moderno i tin lei regla i norma ku nos mester mantené nos mes na dje. Ainda nos ‘fight or flight mode’ sa aktivá, solamente ku nos tin otro maneranan pa dil kuné. Nos por skohe pa bai un kaminda aislá, lesa un buki, hasi yoga òf meditashon etc. Nos por skohe pa tuma un vakashon i bai afó tambe pa relahá. Nos por skohe pa papia ku un amigu òf amiga pa yuda klarifiká nos pensamentunan. Den kasonan ekstremo nos tin sikólogonan pa yuda nos dil ku nos emoshon i pensamentunan.

Sinembargo tin hende ta skohe pa suprimí (wanta) nan emoshonnan aden. Esaki ta nifiká ku nan ta skohe pa no pensa òf no dil ku emoshonnan ku ta laga nan sinti malu. Sinembargo mente di hende ta permití bo suprimí bo emoshonnan te ora ku e no por mas.

Lesa historia di un dama ku ta konta kon difísil su bida tabata na momentu ku e no por a blòkia ni wanta mas pensamentu i emoshon aden:

Depression1“Tabata durante wenter di aña 2012 ku mi a haña mi mes den trampa di un depreshon pretu asina agotante i deslumbrantemente grave, ku mi no tabata mira un salida mas for di dje. No tabata tin niun rayo di lus ku ta penetrá e murayanan di heru di e tùnel friu ku a bira mi kas.

Pero pa e mundu eifó mi tabata un mucha muhé ku tabata tin tur kos: un merikano yòn, bibando den e suidat vibrante di London. Mi tabata den tòp di mi karera, ganando un salario lukrativo bibando den e industria glamuroso di aktuamentu i kosmétika. Mi tabata tin solamente 24 aña, bibando den e suidat ku mayoria hende lo ke biba aden.

Mi tabata tin un kantidat grandi di amiganan eksitoso i bunita. Hende ku por yega un kaminda i silensiá un sala di hende ruidoso i desordená ku solamente nan presensia. Ami mes tabata tin un potensial grandi. Mi tabata un persona ku mayoria hende tabata envidiá i mi tabata aparentá di tin un outo-esatima haltu.

Mi tata kende mi tabata stima hopi, semper tabata bisami ku mi ta un mucha ku e no mester preokupá kuné. Mara nan tabata ke sa un kos. Mara nan tabata sa ku mi tabata guli un sekreto mas skèrpi ku blet, i e puntanan di e blet tabata kòrta kada bes riba superfisie di mi kurason. E sekreto aki mi tabata purba na der’é mas hundu posibel den mi mes, pasó mi tabata tin miedu di kiko lo pasa na momentu ku e sali na kla: Mi tabata sufri di depreshon.

Hopi hende ta puntrami kon bo ta sinti ora bo tin depreshon. E ta diferente pa kada hende, pero ami por splik’é asin’aki:

Imaginábo tin algun peso mega super pisá ankrá na tur e partinan di mas debil di bo kurpa. Anto kada moveshon di mas sutil ku bo hasi, ta kousa asina tantu doló, ku ta hasi e moveshonnan aki imposibel.

Imaginábo bo ta den un estado di koma i un estado katatóniko na un playa sukú i aislá i ku no tin niun hende na bista. Bo kurpa ta rígido i steif benta abou. Anto e olanan di tristesa friu i fuerte di laman ta pasa over di bo, i kada bes ku e pasa over di bo e ta ranka un pida di bo kurpa bai kuné, te ora no sobra nada mas di bo.

Imaginábo ku kada bes soledat ta gana bo, poniendo ku bo ta sinti nostalgia aunke bo ta den e brasanan sòft di bo propio hogar.

Depression 4Pa mi ta honesto, ta imposibel pa mi deskribí depreshon. Depreshon ta algu interno, no intelektual. E ta biba den bo kurason i no den bo kabes. Ta p’esei ta imposibel pa bo rashonalisá i saka bo mes for di dje.

Aparte di depreshon mi tabata tin un hansha tambe ku mi no por a suprimí. Semper mi tabata sufri si ansiedat, pero nunka mi tabata tin e kurashi pa dil kuné. Ignorá e mònster ei a solamente dun’é mas forsa pa e kaba ku mi.

Na momentu ku mi a yega 23 aña, mi hansha a bira asina fuerte ku mi tabata sufri di diferente ataka di pániko ku a duna mi miedu pa asta sali for di kas. Mi tabata den un estado asina malu ku mi bida a kuminsá bira mas manera un trep ásido i no un bida normal.

Ora bo tin hansha ta manera ku bo ta riba un spit. Bo kurason ta kuminsá bati duru i lihé i tur kos ta kuminsá duna bo nèrvio. E ta asina molestoso ku asta ora bo bai supermarket pa kumpra lechi, ta manera ta asina un kos grandi i ferfelu bo ta hasiendo. Pero tur esaki tabata un sekreto. Mi abilidat di mas grandi tabata pa ehekutá un imágen perfekto pa e mundu eifó, siendo ku tabata tin manera un bientu di warwarú destruyendo mi di paden.

Mi tabata hoga den tristesa, pero tòg ora mi amistat, famia i koleganan tei, mi por hunga ròl bon i hasi manera ku mi ta sumamente felis. Kon esaki tabata sinti? Ora mi wak bèk patras, mi tabata sinti ku durante dia mi no tabata na bida. Mi tabata den un kaska. Mi tabata manera un personahe di un ‘cartoon’. Mi lepnan por a saka palabranan ku no tabata di mi mes. Ta komo sifuera ku mi ta lesando un ‘script’ di mi bida ku no ta ami mes a skibi. Manera kos ku mi tabata parti di un elenko di un mal pelíkula bibando bida di otro hende. E sintimentu ei tabata horibel. Mi tabata sintimi mi so. Ta un tipo di soledat ku remedi no por kura, pa motibu ku mi tabata deskonektá ku mi mes.

Depression 3Dikon mi no a pidi yudansa? Dikon mi no a habri mi boka i bisa e hendenan ku mi tabata totalmente kabá i destruí? Miedu i bèrgwensa tabata e kombinashon funesto pa mi. Mi tabata tin miedu ku si mi lo a papia, niun hende lo no ke ta band’i mi mas. Mi tabata tin miedu ku mi tristesa lo spanta tur hende i pusha nan leu fo’i mi.

Nos ta biba den un sosiedat ku ta stigmatisá malesanan mental. Sosiedat ta pone bo pensa ku si bo no ta sinti bo bon, ta pasó bo a frakasá. Niun hende no ke keda mirá komo un frakaso. Nos ta preferá sufri den silensio te ora e doló bira imposibel pa manehá, te ku ta pone nos bai uza métodonan ku ta destruí nos mes pa aliviá e doló. Nos ke bai kura nos mes.

Ami tabata bebe. Aunke mi tabata bebe di forma sosial, nunka alkohòl no a trèk mi. Mi por a skohe pa bebe òf keda sin bebe. Pero na final di trabou ora mi yega kas i mi kita e pleisternan di felisidat falsu, eksponiendo e heridanan, tur e dolónan ta dal mi. Anto na e momentu ei un òf mas glas di biña tabata fria e doló. Esei a keda asina, te ora ku e biña no tabata fria e doló mas.

Riba un dia skur ku áwaseru tabata kai na London mi a lanta den un estado di pániko asina intensivo ku mi tabata preokupá p’ami bida. Tur kos tabata spanta mi. Te asta e pinturanan riba muraya i e kada blòki di e muraya tabata mustra asina endemoniá. Tur kos tabata kombertí den un imáhen negativo den mi mente. Mi no por a kome, ni drumi. Pa di promé bia mi a sinti ku mi no tabata por mas. Mi no tabata por a falsifiká mi felisidat mas, anto pa promé bia mi a pidi yudansa. Mi a yama mi ruman hòmber na Los Angeles i mi a kont’é tur kos. Mi a kont’é kon mi tabata biba den un felisidat falsu pa asina tantu tempu ku e echo ku mi tabata konta esaki na mi ruman so tabata duna mi un alivio.

E motibu ku mi ta kontando e historia aki ta pasó na mundu tin asina tantu hende ku ta sufri di paden pero ku ta kana ku un kara di felisidat falsu pa e mundu pafó. Bèrgwensa ta pone nos keda ketu. Anto e silensio aki ta loke ta mata nos.

Mas tantu tempu bo keda herebé den bo tristesa, mas severo e situashon lo bira. Mi a gasta hopi aña di mi bida ta dil ku depreshon, mi so. Na momentu ku mi a kuminsá konta mi problema na mi famia i amistat i tambe mi terapista, ku mi tin tremendo konfiansa den dje, e ora ei e proseso di kura a kuminsá.

Nunka….nunka no tene bèrgwensa di bo pasado pa tristu ku e por ta. Niun hende su bida no ta perfekto. No ta eksistí hende perfekto. E persona di mas kreativo, inteligente i eksitoso tambe ta pasa den momentunan difísil. Ta e kosnan difísil nan aki ta hasi nos fuerte. Pero e úniko manera pa bo sali for di tristesa ta ora bo stòp di sufri den silensio. Stòp di hoga bo mes den un pisina di bèrgwensa. Pasó ta e silensio i bèrgwensa ta loke ta stroba bo di progresá den bida.”

Depression 2Te aki e historia di e dama a yega.

Manera mi a splika ariba, hopi hende ta blòkia pensamentunan doloroso i suprimí emoshon. Pero na momentu ku nos mente no por wanta mas emoshon aden, nan ta kuminsá manifestá den diferente forma. Bo ta bin kai sin bo sa den represhon kaminda e pensamentunan ku bo ta blòkia ku bo mente konsiente ta pasa over pa bo mente inkonsiente i na final di e ruta ei bo ta bin kai den depreshon.

Hopi hende no ke ekspresá òf no tin hende ku nan por ekspresá nan sintimentunan di mas profundo kuné. Esaki ta algu ku ta eksigí kurashi, i tambe un hende ku por yuda guia bo pensamentunan sin prehuisio. Esaki tin ora ta kousa ku bo ta rabia ku e hende tambe, na momentu ku e ta pone bo mira i realisá kosnan ku bo no ke realisá ni aseptá! Pero bo tin ku hasié.

Hopi bia hende ke evitá pa otro hende puntra nan “Kiko a pasabo?”, ya nan no tin ku papia nada. Por lo tanto hende ta skohe pa bisti máskara. Kana hari di pafó, siendo ku nan ta muriendo di doló di paden.

Ami ta un persona ku semper mi a bisa ku mi no ta gusta hende ku ta bisti máskara. Maske kiko ta pasando ku bo den bo bida, maske kon deprimí bo ta, mi ta preferá bo mustrami loke ta biba realmente den bo. Mi no tin nada na un sonrisa falsu i fabriká. Mi ta preferá bo ekspresá loke realmente bo ta sinti, i no hari ku mi den falsedat.

Unabes bo kai den depreshon, esaki por ta funesto pa bo. Depreshon ta dal hende asina duru ku tin ora ta suisidio te úniko kos ku nan ta pensa ku lo por saka nan for di nan doló. Tin hende ta kere ku nan mes por dil ku nan problemanan. Pero mayoria bia, bo pensamentunan ta pasa over pa bo mente inkonsiente kual ke yuda protehá bo, pero no ta tur bia e ta hasié di e forma korekto. Tur loke ta biba den bo mente inkonsiente ta bin kontrolá bo pensamentu, komportashon i akshonnan. Ta p’esei ta importante pa bo tin un hende pa yuda guiabo den esaki.

E mihó manera ta papia ku un persona ku semper ta lagabo sinti bon, òf den kasonan ekstremo, akudí na un terapista! Pero terapia ta yuda i e kura real ta kuminsá solamente si bo habri bo mes i bo ta 100% honesto i sinsero. Lo bai tin momentunan asina doloroso ku bo ta rabia i lo no ke bai terapista mas. Pero tur esaki ta parti di e proseso di kura! Keda pèrsistí!

Depression 5Fuente: Elite Daily

Danki pa “like i “share”. Mi ta apresiá mashá. Sinti bo liber pa laga bo komentario atras.]

**Images used in this article is copyrighted by their respective authors. I just happened to google for an image and found what I’ve used, so please don’t sue me, for I have no money to pay you or a lawyer. Plus I fear going to jail.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook

Leave a Reply

Powered by WordPress and ShopThemes
Copy Protected by Chetan's WP-Copyprotect.