Hink’é aden!

Reading Time: 3 minutes

Despues di a publiká tres buki, esta ‘Kibra Hacha’, ‘Awa, Habon ku Past’i Djente’ i ‘Niun Pátaka’ hende a keda pidi mi mas buki. Pero mi no tabata sa buki di kiko mi skibi. Esaki—huntu ku vários otro problema mas— a kuminsá kousa hopi preshon i strès riba mi, ku a pone ku mi mester a bai un sikólogo. Mi a konta e sikólogo tur loke tabata molostiá mi i pidié konseho di un tema pa mi siguiente buki. El a puntra mi dikon mi no ta skibi un outobiografia. Mi a keda wak e mané “Ai, ban serio òmbu”

Mi a ripará bèrdat si ku hopi outor tabata skibi i publikando bukinan den forma outobiografia pero ora mi lesa nan semper mi ta pega soño di laf ku nan ta. Mi tabata puntra mi mes ken a gaña e hendenan aki ku nan bida ta asina interesante, te ku hende lo tin gana di lesa tokante di nan bida den un buki.

Pero segun mi ta publiká insidentenan ku a yeg’i pasa mi den mi bida, mi a ripará ku hende gusta lesa mi tragedia i tristesanan. Pero ami no a gusta ku hende ta hari kosnan ku mi a pasa aden, i mi a bai papia esaki tambe ku mi sikólogo. Mi sikólogo por sierto ta un muhé masha dushi mes. Tur bia ku mi ta den terapia serka dje mi tin ku fòrsa konsentrá riba loke mi ta papia, pa mi no keda wak su tetenan. Masha dushi muhé mes.

En todo kaso, ora mi a kont’é ku e echo ku hende ta hari mi tragedianan ta molostiá mi, el a simplemente bisa mi ku mi no tin ku laga e kosnan ei traha ku mi, i ku mi tin ku purba saka benefisio for di esei.

Den mi mes mi a pensa ku e muhé ta bunita si, pero e no sa di kiko e papia. Mi ta haña ku e mester a pidi mi nòmber di e hendenan ku ta hari mi tristesanan ei i yama nan pa nan bin terapia, pasó tin un kos ku no ta bon ku nan. En todo kaso, asina mi a sali bai for di su kantor i kore bai banda abou pa mi relahá mi mente. Na momentu ku mi tabata na banda abou mi a risibí un yamada di dje den kual ami a tend’é bisa: “Lo bo chinga mi den un huki siguiente bia ku bo bin terapia?”

Mas ku klaro mi a bis’é “SI”. Mi ke men algu asina no ta kos di ninga. Ora mi a bai serka dje ku un bukèt di flor i un kaha di chukulati i tambe un kondon den mi man, logá a resultá ku loke el a bisa mi tabata: “Lo bo ke hinka den un buki tur e kosnan ku bo a konta mi durante terapia?”

Mi a pasa masha bèrgwensa ora ku mi a ripará ku loke el a bisa mi tabata kompletamente diferente for di loke mi a skucha. Pero asina mi a firma un kontrakt kuné, den kual tur loke mi a kont’é durante terapia lo bai den un buki, kual mi a yama ‘Hink’e aden!’

Ya komo hende gusta hari mi tragedianan, esaki lo ta un tremendo buki pa bo lesa, hari mi tristesa te dia fièrnu manda yama bo pa hasi chèrchi di otro hende.

Kòrda ku mi bukinan no ta pa hende sensibel. Si bo saka sèn, kumpra mi buki, despues bin reklamá ku mi ta brutu bulgar i ordinario, e ora ei ta abo tin ku buska un sikólogo bo bai!

Klek aki pa un avanse di e buki!

 

Will be published on May 27th 2018 Price Fl.50,-

Portada: Lion Spratt i Ydellienne Heerenveen
Photo: Aymar Profas

Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.