Mi sa bishita Punda ku regularidat i tur bia ku mi bai, mi ta para na waaigat kana bai Punda. Esei ta pone ku tur bia mi tin ku pasa dilanti un mini kiosko nèt na skina di e brùg. (Pasó no tin otro kaminda pa pasa.)

Den e kiosko aki, ku yama Andina’s Dushi, tin un mener i un señora ta bende un variedat di kuminda i bibida. Tur bia ku mi pasa su dilanti mi ta sinti holó di arepa di pampuna, pero nunka mi a puntra ku si nan ta bende arepa di pampuna, pasó mi sa ku mi gusta arepa di pampuna, anto si mi kumpra un bia, i e resultá bon, mi ta den problema. Ya kaba mi ta adikto na Subway. Mi ta hasi kasi tur kos pa un Subway te ku hende sa yama mi puto di Subway. (Ounke hopi dje trahadónan di Subway tin masha mal moda.) Si mi bira adikto na arepa tambe, esei lo hasi mi problema aun mas grandi. Hopi hende lo bai abuzá di mi pagando mi ku arepa, pa mi hasi tur sorto di fabor pa nan. Anto mi no por pèrmití esei.