Un bida religioso sin sèks ta posibel?

Reading Time: 9 minutes

Promé ku mi kuminsá, mi ke pone algun punto bon kla:
1. Si bo ta un persona religiosamente sensibel, ku un bes bo ta sinti bo ofendí òf ku hende a ofendé bo religion, e artíkulo aki no ta p’abo. Pues lo mi rekomendá bo, dal e página sera mesora. Evitá desgustu, i tambe rabia. Plùs mi tin miedu pa bo no bin tira mi mata despues. (“Se han visto casos”, i mi no ta pro violensha.)

2. Si bo ta un persona religioso pero ku mente habrí, bo por konsiderá na les’é, pero mi ta atvertí si ku bo ta les’é bou di bo propio responsabilidat. Na final di e artíkulo, mas ku klaro bo por hasi orashon i pidi pordon pa mi pikánan, i di bo tambe. No pidi malu pa mi si.

3. E artíkulo aki no tin nada di haber ku e skandal ku a sosodé último aki den seno di religion katóliko. Mi sa ku lo bo no kere mi, pero ta bèrdat. E no tin nada di haber kuné. Si algu bini dilanti ku tin similaridatnan ku e kaso en kuestion, esaki ta puro koinsidensia.

Bon, awor si nos por kuminsá.
Mundu a konosé diferente skandal den e religion katóliko kaminda pastornan ta tene relashon seksual, siendo ku esaki ta prohibí. E skandalnan ta bira mas serio ora ku sali na kla ku e pastornan a tene relashon seksual ku un persona di nan mesun sekso,(siendo ku esaki tambe ta prohibí den e religion), anto pió ainda, ku mucha. Awendia parse ku e skandalnan a bira pió, paso parse ku pastornan tin pareha den skondí, anto riba dje, nan ta kòrta orea di nan pareha tambe. Ke men aparentemente pastornan tòg ta humano.

Horny priest 2
Esaki hopi bia ta lanta e diskushon riba e obligashon ku pastornan katóliko tin pa apstené for di relashon seksual. E ta posibel? E ta humano? Ta kos di hende loko? Dikon un hende hòmber lo skohe boluntariamente pa bira pastor katóliko i konsekuentemente priva su mes di tene relashon seksual?

[Tuma un break i “like” nos page riba Facebook. Djis primi e “like” akibanda —->
i bo ta kla. Banda di e kònòpi blou di “like” mester tin skibí “You like this”. Si bo a “like” e kaba, obligá bo amigu, amiga, frei, bisiña, kolega pa e tambe “like” e. Si nan no ke hasié, pone pistol na nan kabes. (Kòrda bon, mi no ta pro violensha, pero ratu ratu bo mester pone un tiki preshon.)]

Nos ta bibando den un sosiedat altamente seksualisá. Den e tempu ku nos ta aki, mayoria hende, prinsipalmente esnan yòn, tin e deseo interno di tin òf tèst diferente pareha promé ku nan skohe un pareha pa bida . Tin vários persona ku a yega di kasa (skohe un persona pa bida) na edat yòn. Pues ta ku e persona ei so nan a yeg’i tene relashon seksual. Despues di tempu nan ta bin sinti un gana di ke purba algu otro. Na mi humilde opinion, e ta lógiko i humano.

Tin hende ta kere ku esaki ta algu apsurdo i ku ta e mesun pareha ei bo mester keda tene relashon seksual, pero ku variashon. Pa hende hòmber mas tantu, e variashon ku nan ta referí na dje ei no ta variashon. Si mi tin un Toyota Yaris ta kore 20 aña largu. Mi por spuit’e kambi’é di kolo diferente bia, pero echo ta ku t’e mesun Toyota Yaris mi tin ta kore ketu bai. Gana por drenta, ku mi tin gan’i tèst un Hyundai, òf un Honda, òf asta un Lamborghini. Hende muhé aparentemente por keda kore e Toyota Yaris ei te dia nan muri……asina nan ta bisa anto.

Pues esaki ta trese e pregunta: Hende hòmber ku skohe pa bira pastor di bèrdat por apstené kompletamente for di sèks?

E personanan ku a bira pastor katóliko ta bisa ku ta un yamada nan a haña, esta nan tin un vokashon pa bira pastor. Mi no sa si tabata un yamada lokal òf “long distance” pero en todo kaso nan a haña un yamada si. Ami ta puntra mi mes, ta kon bo por sa? Bo mester a nase sin pénis e ora ei pa bo ta sigur ku no ta yamada robes b’a risibi.

BBC a tene un entrevista ku diferente èks-pastor katóliko, ku awe no ta pastor mas, i a papia ku nan pa haña un bista riba kon e bida komo pastor ta, i dikon nan a disidí di renunsia for di nan vokashon.

Èks-pastor Jimmy O’Brien, a indiká ku e tabata konsiente di e implikashonnan di su desishon pa bira pastor, i el a aseptá esaki, i tambe e bida selibato (bida sin relashon seksual). El a kuminsá studia pa pastor ku su 18 aña. Segun Jimmy, aseptá e bida di pastor ta un kos, pero bib’é ta otro. Kuater pa sinku aña despues el a kuminsá kuestioná e implikashonnan di e desishon ku el a tuma.

Segun Jimmy, e bida selibato no ta e kos, sino mas bien e soledat. Tur bo amigu i amiganan a kasa i tin nan yunan, i bo ta ripara ku abo si no tin bo otro mitar. Ku 34 aña Jimmy a disidí di entrega su retiro komo pastor pa evitá ku e ta bira loko. El a konosé su futuro esposa na e edat ei kaba, i nan a kasa i aktualmente tin 20 aña kasá ku 2 yu.

BBC a papia tambe ku un èks sur Mel Baird ku a kuminsá studia pa bira sur ku 18 aña na aña 1965. Segun Mel, hopi hende a yam’é loko, ku e ta lesbiana òf ku e no ta kompletamente sélibe. (Seksualmente inaktivo).

Segun e èks sur, hopi hende no ta komprondé ku bo por sinti bo kompletu i alegre sin ta seksualmente aktivo. (Pa ser franko, mi tampoko.)

Mel ta splika ku nunka el a mira e selibato komo un kastigu òf privatisashon. Nunka el a ninga su feminismo, i su eskoho pa sur no ta nifiká ku e no ta sintié hende muhé ku sintimentu i tambe gana di tin yu. El a mira su eskoho mas bien komo algu ku e tin ku hasi, pa e por sintié kompletu. Meskos ku tur otro hende, nan tambe ta haña deseo seksual, pero nan tin e sosten di un konvento ku ta enkurashá bo pa hasi orashon ora bo haña deseo seksual pa desviá e energia. Ta e sosten aki pastornan katóliko si no tin, segun Mel.

Ku 26 aña Mel a sinti ku e bida di sur, ya no ta yen’é mas. E no tabata e mesun persona tempu ku e tabata tin 18 aña, pues e mester a sali for di e bida ei pa evitá di biba un bida miserabel. Mel aktualmente tambe ta kasá ku yu.

Pastor Stephen Wang a bisa ku ni Mel Baird ni Jimmy O’Brien no a retirá for di nan vokashon pa kuminsá ku un bida parotin. E ta mas bien pa un motibu humano.

Bo ta hañabo den un lucha. Den tempunan di soledat, bo ta haña deseo seksual, bo ta soña pa kasa, tin un pareha, tin yu. E kosnan aki no tin nada di haber ku e selibato, sino mas bien e ser humano. Hende mester di intimidat segun Wang.

Pastor Wang kada tantu siman ta sali for di su bida religioso pa bai sali ku su amigunan. E ta hui tin ora, pa bai sine i wak un pelíkula i e ta resa hopi.

Segun e sur Mel Baird, si bo ke bira sur bo tin ku aseptá e selibato i dia bo no por mas, sali afó. Mel ta haña ku pastornan katóliko si mester por tin un eskoho, pa por stòp e skandalnan ku tin den e religion.

Den mi buki “Kibra Hacha” mi tambe a splika ku hende mester di intimidat. Tin hopi hende eifó ta kana hunga ròl ku nan no tin mester di hende, ku nan ta hasi otro kos pa yena nan ser. Mi ta respetá kada un su opinion, pero pa mi nan tur ta “cuckoo”. Despues di tempu bo ta kuminsá ripara ku nan ta kuminsá flep. Falta di intimidat ta pone hende kuminsá buska atenshon di tur manera, i tambe afirmashon pa sierto pensamentunan ku nan ke kere aden. T’e meskos ku loke e surnan ta hasi.

Bo ta mira esei tur dia den nos sosiedat. Riba Facebook mes esaki ta sosodé hopi. Wak na bo trabou tambe por ehèmpel. Bo mester mira un hende sin pareha ku ta hasi yen kos straño. Pa kuminsá e ta yega trabou tur dia 6or di mainta p’e kuminsá prepara su kosnan p’e kansa kabes di hende. Hopi bia nan ta pone nan mes komo ehèmpel di “e bon trahadó”. Ora di bai kas nan no ke bai tampoko. (Lógiko, paso no tin niun hende ta warda nan na kas). E personanan aki por asta hunga ròl, tira falta riba otro hende ku lo ta stroba nan di bai kas trempan òf bai ku fakansi. (Tene kuenta si ku esaki por sosodé den un persona ku pareha tambe. Si bo ta kasá ku yu, no ta nifiká ku bo tin intimidat. Hopi hende ta uza nan trabou pa yena bashí ku nan tin den nan bida.)

Falta di aktividat seksual ta pone hende bira masha sensibel. Kualke kos chikí ta pone nan rabia. Hopi bia e hendenan aki ta trata hende ku masha mal moda. (For di aki a sali e kerensha ku fo’i ora hende tin mal aktitut, ta paso e tin falta di sèks.) Awó mas ku klaro hopi hende no ke atmití esei, paso e ta algu difísil pa aseptá. Ta solamente un hende fuerte por atmití ku nan tin falta di intimidat i sèks. Esnan debil ta hunga ròl ku nan no ta sinti falta di nada.

Mas ku klaro ku bo tin dos kos. Situashon di hende por pone si ku nan no ta kla pa forma un relashon ku un persona. Pero esei ta totalmente algu otro. Si bo ta hende, bo ta keda haña e falta di intimidat. (Tene kuenta ku intimidat no ke men sèks. Intimidat ta un relashon estrecho ku un persona di konfiansa ku por ekstendé te na sèks.) Pero mi ta duda ku tin hende ku lo ke bira bieu nan so. E kos ei ta kuminsá traha mentalmente ku bo.

Echo ta si ku no ta tur hende lo por tin un pareha. Na Kòrsou por ehèmpel tin mas muhé ku tin hòmber, anto den e hòmbernan un gran parti ta homoseksual i un otro gran parti ta kriminal, i un otro gran parti no sa kon trata ku hende muhé. Por lo tantu tin un kantidat enorme di hende muhé soltero. E personanan aki tin ku buska un remplaso pa e falta di intimidat.

Finalmente, mi ke bisa ku ami si ke bira pastor, pero un pastor diferente. Un pastor ku por yuda tur e muhé solteronan ku tin ta kana ku mal beis hinter dia.  Si bo sa di hende muhé soltero ku ta kana hasi ko’i mal moda riba hende, manda nan mesora serka mi pa mi duna nan hòstia i baña nan ku awa bendita!

Mi ta spera ku tin mas hende ku lo ke duna mi un man, pa nos baha e kantidat di hendenan loko i frustrá ku tin ta kana rònt!

Horny priest

[Danki pa “like i “share”. Mi ta apresiá mashá. Kualke dia ku nos topa, kòrdá mi pa mi regalábo un lòlipòp komo muestra di apresio! Sinti bo liber pa laga bo komentario atras tambe.]

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.