Asin’aki a logra krea un bakuna pa Covid-19 den tempu rèkòrt!

E artíkulo aki ta pa iluminá mente di esnan ku ta poko konfundí, i ku tin sierto dudanan rondó di e bakuna di Pfizer pa Covid-19. Di ningun manera mi lo bai purba kambia pensamentu di esnan ku ta konvensí, ku gobièrnunan i personanan di poder a sinta huntu riba un fecha deskonosí, den un kamber luhoso di un hotel deskonosi, i krea un plan diabóliko den forma di un pandemia, pa afektá bida, salú, mente, pensamentu, libertat i privasidat di delaster un ser humano riba e mundu aki. Mi no tin forsa pa boso!

E sobrá hendenan ku ke sa kon bin a logra krea un bakuna asina lihé pa Covid-19, por sigui lesa.

Djabièrne ultimo, FDA (Food and Drug Administration) a aprobá e bakuna di Pfizer/BioNTech pa uzo di emergensia kontra di Covid-19. Asina Merka a bira e di tres pais, aparte di Inglatera i Canada, ku ta aprobá e bakuna aki, pa asina yuda kombatí un vírùs ku ya a kosta bida di 285 mil Merikano, i 1.5 mion hende rònt mundu. Ami, meskos ku ekspertonan, ta di akuerdo ku FDA a aprobá e bakuna muchu lihé. Pero esaki no ta pasó e bakuna no ta seif, sino simplemente pasó e konfiansa pa ku seguridat di e bakuna no tei. FDA por a yuda “restourá” e konfiansa, dor di a tuma su tempu promé ku a aprobá e bakuna. Pero dikon hopi hende no ta konfia e bakuna aki?

E duda rondó di bakunashon kontra di e vírùs aki, por parte ta pasó e bakuna a keda kreá den un tempu sumamente lihé. Hopi hende ta pensa ku si normalmente ta dura 10 pa 15 aña pa krea un bakuna, kon bin a logra krea esaki den apenas 1 aña?

E otro parti ta tur e informashonnan robes ku a bin ta sirkulá rondó di henter e pandemia aki. E úniko parti ku ami lo bai splika ta kon bin a logra krea un bakuna asina lihé. Si mi desviá tòg, ta ‘sin querer queriendo’!

Manera mi a indiká ariba, e aprobashon ta pa uzo di emergensia, pues pa e gruponan ku mas tin mester di dje. E palabra “emergensia” ya kaba mester duna bo un indikashon. Pero tin mas ku un motíbu.

Un bakuna ta un injekshon ku ta kontené partinan di un vírùs, ku ta bai siña bo kurpa kon e mester bringa infekshon dado kaso e hañ’e konfrontá ku e patógeno ei. Na momentu ku ta bai krea un bakuna, sientífikonan ta tene algun kos na kuenta:
1. Kon bo kurpa su resistensia ta reakshoná kontra e patógeno.
2. Kua ta e gruponan ku lo bai tin mester di e bakuna.
3. Kua ta e miho manera/teknología pa krea e bakuna ei.

Tin diferente tipo di bakuna, i e tipo di bakuna ta dikta kon lihé e por keda desaroyá, kon bon su efektividat ta, i tambe kuantu dósis di dje lo bo tin mester. Tin bakuna por ehèmpel, ku ta kontené un vírùs debilitá (‘live attenuated vaccines’). E tipo di bakunannan aki ta hopi efektívo, i ta sòru pa bo kurpa haña resistensia duradero kontra di un vírùs. Otro bakunanan ta kontené partinan morto di un vírùs (inactivated vaccines), pero ku tòg ta lanta resistensia di bo kurpa kontra di e vírùs. E bakunanan aki no ta asina fuerte manera esun ku mi a menshoná, i ta pesei mester di mas ku un dósis pa krea resistensia duradero. Sinembargo, un di e retonan pa krea un bakuna ta keda e parti di logra un formula ku ta lanta resistensia di e kurpa, i ku ta seif pa kurpa di hende. Mas konosementu bo tin di e vírùs, mas lihé por logra krea esaki. 

Pa e pandemia aki, e kompanianan Pfizer i Moderna, a uza un teknologia nobo pa krea un bakuna. E bakuna aki ta kreá, uzando e teknologia di mRNA (messenger RNA), kual básikamente ta kontené un mRNA sintétiko, similar ku esun ku e vírùs ta uza pa krea su proteinanan infeksioso, na momentu ku e pega na un sèl den bo kurpa. E mRNA den e bakuna básikamente ta “gaña” sèlnan di bo kurpa, ku ta e vírùs ta den bo kurpa, i pa asina start e proseso defensivo kontra di e vírùs. (E teknologia aki ta nobo den bakuna, pero e ta eksistí pa sigur un 10 aña kaba, i a konosé hopi progreso den e ultimo añanan.) E bakuna aki por keda kreá hopi mas lihé ku otro bakunanan i tambe ta kosta menos sèn pa krea.

Pero na momentu ku bo tin un formula efektívo, bo tin djis e fundeshi kla. Sientífikonan no por djis bisa ku un bakuna ta seif pa kurpa di hende. Nan tin ku prueba esei. Esaki ta e otro parti den kreashon di un bakuna, ku ta tuma hopi tempu. Na momentu ku someté e bakuna pa aprobashon, mester entregá tur kos ku ta prueba ku bo bakuna ta seif pa salú di hende. Esaki ta enserá investigashon den algun fase.

E fase pre-klíniko i klíniko.
E fase pre-klíniko ta sosodé den laboratorio, kaminda ta tèst e bakuna riba sèlnan humano i den animal pa wak si e bakuna ta funshoná (ta lanta resistensia), i ku si e ta kousa daño òf nò. Si tur kos ta mustra bon, ta bai tèst e bakuna klínikamente.

E investigashon klíniko tambe ta sosodé den algun fase. Den e promé fase, ta bai tèst e bakuna den algun desena di personanan boluntario. Den e di dos fase, den algun shen persona boluntario. Den e fase aki tambe ta wak kuantu dósis ta nesesario.  Den e di tres fase ta tèst e bakuna den miles di personanan boluntario. Mitar di e grupo ta haña un bakuna real, i e otro mitar (control group) ta risibí un plasebo (un injekshon falsu, pero niun di e boluntarionan no sa si nan a risibí esun real òf esun nèp). Den e fase aki ta bai wak efektonan sekundario riba termino kòrtiku, i ku si realmente e grupo ku a risibí e bakuna real, ta miho protegé kontra di e vírùs. (Pa tèst un bakuna pa efektonan sekundario riba termino largu, mester keda monitoriá e boluntarionan pa un periodo basta largu. No tin otro forma pa sa esei.)

Despues di esaki, ta bai buska aprobashon di e bakuna. Si e keda aprobá, ta bai produsi esaki na kantidat, i despues pa e keda distribuí. Esaki ta henter e proseso pa kreashon di un bakuna, ku nòrmalmente ta tuma un dekada òf mas.

Sinembargo, mi ta supone ku bo ta komprondé, ku un pandemia ta pone sierto preshon, i ku ta adapta algun kos pa aselerá e proseso aki. E motíbunan ku a logra krea un bakuna asina lihé, aparte di e teknologia nobo ku a keda uzá, ta entre otro:

1) Pre-konosimentu
SARS-CoV2 por ta nobo, pero e famia di Coronavírùs no. E suerte ku nos tin ku e vírùs aki, ta ku e tin algun similaridat na e vírùsnan SARS-CoV (2003) i MERS-CoV (2012), kual ya tabata tin hopi investigashon hasí riba nan. Sientífikonan tabata tin un idea kaba kon un bakuna kontra SARS-CoV2 lo mester ta, pues no mester a inventa e wil kompletamente di nobo. Anto for di Yanüari, ora ku e vírùs tabata plamando na Wuhan, Chinesnan a publiká e informashon genétiko (gene sequencing data) riba virological.org. Pues for di akinan kaba, ekspertonan por a kuminsá studia e vírùs pa saka afó di unda el a bin, kon laboratorionan por tèst pa detekt’é, i kon e vírùs ta komportá. Tur esakinan a yuda aselerá kreashon di e bakuna.

Loke ta yuda, ta ku e vírùs Covid-19 ta lanta resistensia den kurpa di hende. Kontrali na vírùsnan manera HIV, esei no ta e kaso serka mayoria di hende. Esaki ta hasi kreashon di bakuna kontra Covid-19, hopi mas fásil, i ta e motíbu ku ainda no tin bakuna kontra AIDS.

2) Emergensia
Dor ku ta trata aki di un vírùs respiratorio ku a sòru pa un pandemia, a hasi partinan di e investigashonnan klíniko mas rápido. Pa yuda gana tempu, e promé dos fasenan di investigashon klíniko, a keda hasí pareu. E di tres fase, a sosodé riba su kurpa.

3) Finansiamentu
Kontrali na loke “komplotgekkies” sa bisa, farmasianan no ta asina loko pa krea bakuna. E kreashon, produkshon i distrbuishon di bakuna ta kosta masha hopi plaka. Sèn ku hopi bia, nan no ta haña bèk, presis pasó ta tuma muchu tempu pa krea un bakuna. Hopi bia ora e bakuna ta kla, ya e epidemia a disparsé, òf a keda kontrolá ku medidanan preventivo.

E pandemia aki a sòru pa un krisis ekonómiko rònt mundu,  pues hopi pais, i e hendenan ku plaka, ta poko mas inkliná pa yuda finansiá e kreashon di un bakuna. Rònt mundu tabatin por lo menos 180 bakuna den kreashon. Hopi di nan a keda finansiá, sin ku tabatin resultado di nan efektividat.

Akinan nos ta yega na e nomber Bill Gates. E mener aki, a bin ta involukrá su mes pa diferente aña kaba den salubridat mundial, i atraves di su fundashon, a hinka biones di dòler den salubridat general. Esaki ta un dje motíbunan ku e no ta e persona mas riku na mundu mas. (Ainda e tin hopi sèn si.) E mener aki a bin ta biaha rònt mundu, konvensiendo e rikunan pa hinka mas i mas sèn den salubridat general, i asina el a logra haña entre otro Jeff Bezos i Jack Ma, pa yuda finansiá diferente bakuna, promé ku nan efektividat tabata konosí.

Ta bèrdat ku tur e hendenan aki a solamente bira mas riku durante e pandemia aki, pero esei no ta nifiká ku ta nan a orkestrá e pandemia. E ta nifiká ku ABO a yuda hasi nan mas riku. Bo no ta kere? Bisa mi kuantu bia den 2020 aki, bo a kumpra un buki serka mi? SERO, òf nò? Awó bisa mi si den 2020 bo a kumpra un produkto riba Amazon (Jeff Bezos), AliExpress (Jack Ma) òf un kòmpiuter ku Microsoft Windows (Bill Gates) ariba? Mi sa ku bo ta mas interesá den loke nan tin di ofresé, pero ta djis pa bo sa. Anto ami no ta ni eksigí ku bo tin ku lesa mi bukinan. Bo por djis kumpranan, i despues lubidá riba nan, meskos ku bo ta kumpra paña, kèts òf sapatu, i nunka mas uza nan. Ami n’ ta rabia.

Mi bukinan ainda ta online riba www.lionspratt.com pa bo kumpra. Of mi tin ku pone nan riba Amazon, i yuda hasi Jeff Bezos mas riku? Ta djis un pregunta.

Bill Gates tin algun aña kaba ta finansiando bakunanan kontra diferente vírùs, entre otro Malaria i Influenza. Sinembargo, akusashonnan falsu a tres’é dilanti komo e persona ku lo a orkestrá henter e pandemia aki. E motibunan di e akusashon aki ta —aparte ku el a hinka sèn den por lo menos shete bakuna— pa e echo ku el a finansiá un estudio di instituto di teknologia di Massachusetts (MIT), pa mira riba e posibildat pa krea historia di bakunashon uzando ‘nanocrystals’. Esaki a bira base pa hende pint’é komo e diabel ku a krea e vírùs, i/òf e persona ku ke hinka chep den kurpa di hende, pa por vigilá, kontrolá i mina nan privasidat, pa medio di un bakuna. Akinan hopi hende a spanta, pasó segun nan, ku e chep ei, nan pareha lo por vigilá i spioná nan tur bia ku nan ta serka e baisait. Bo mes sa, baimentu di ‘Moonlight’ por bira peligroso asina.

E motíbu tras di henter e estudio di ‘nanocrytals’ ei, pa ami ta komprendibel (e no ta pa mundu kompletu), i meskos ku Gates, mi ta hañ’é un tremendo idea. Bo por mir’e komo un tatuahe modèrno, pero enbes di uza ‘tattoo dye’ djis pa hasi bunita, ta uza ‘quantum dots’ ku ta kontené historia di bakunashon di un persona. Kuantu hende bo konosé awendia (ku eksepshon di ami), ku no tin a ni un tatuahe riba nan kueru? Hopi tiki tòg? Tur hende awendia ta kana ku kueru tur na prek, ku informashon di nan fecha di nasementu, nòmber di tur nan freinan èts. E idea di ‘nanocrystals’, no ta masha leu. Solamente ku e lo no ta pa dòrna kueru di hende—pasó e lo no ta visibel pa wowo di hende—sino pa prevení infekshon di malesanan ku aktualmente ta matando miones di hende tur aña.

Mi tabata bezig ku un e-book na Papiamentu ku ta splika e motíbunan ku hende ta bini i kere den e teoria di konspirashonnan ku a lanta kabes último tempunan aki, pero aparte ku aktualmente mi no tin spèlchèk mas, lamentablemente mi no ta asina motivá pa kab’é. Aparte ku loke mi ta hasi ta kosta ami HOPI tempu i sèn, mi ta haña sumamente lamentabel kon hende ta asina inkliná pa plama kosnan falsu i negativo. Ta hopi difísil pa konvensé hende di lo kontrario, fo’i loke e mes tin gana di kere. Ta parse ku hende tin mas nesesidat di sinti òf kere ku nan bida i bienestar ta konstantemente na peliger, ku mundu kompletu ke konspirá kontra di nan, ku nan si no ta na soño manera otro hende, ku nan si no ta kai pa mentiranan di e gruponan di poder ku ke kontrolá òf venenánan, i ora nan plama nan teorianan, nan ta trese hopi pániko, miedu i angustia den otro hende. Pio ainda, e ta pone ku hendenan ta rebeldiá kontra medidanan di prevenshon ku tei pa protegé salubridat general.

Pasó, aparte ku tur e teorianan di komplot ta hopi konfuso, kon abo lo sinti, i kiko bo tin ku hasi, dado kaso tabata berdat ku ta hende a krea e vírùs den laboratorio, pa sea bende bakuna i traha sen? Òf ku e vírùs ta un mentira, i ku ta 5G ta loke ta hasi hende malu? Òf ku e no ta un vírùs respiratorio, pero ku ta uza e teknologia di 5G pa plama e vírùs? Ku e sifranan di hendenan ku a fayesé i keda hospitalisá, ta eksagerashon pa gobièrnunan (rònt mundu) bini ku medidanan pa krea pániko, kontrolá bo bida i kita bo privasidat? (un supuesto New World Order). Ku bistimentu di tapaboka ta hasi hende mas malu ku e vírùs mes, i a hasi esakinan obligatorio, pa sea bende mas tapaboka òf suak kurpa di hende? Ku bakunashon ta venenu ku nan ta uzá pa mata hende òf hasi hende malu, pa asina farmasianan por traha mas sèn òf bende mas remedi? Kiko tur e teorianan aki ta yuda mundu kune?

E loke ami ke hasi ta mustra bo ku hopi di e kosnan ku abo a bin ta tende, no tin evidensia), ta malinformashon, manipulashon di informashon, i hopi di nan ta asta kompletamente falsu. (Un video riba Youtube, no ta evidensia, i hopi di nan ta kontené informashon robes.)

Bayendo bèk riba e tema, esakinan ta e motíbunan ku a logra kaba ku un bakuna den tempu rèkòrt. Realidat ta si, ku mester hasi investigashon (riba tur bakuna) ku si e ta seif riba termino largu tambe. Bo mes por komprondé ku mei mei di un pandemia, esaki no ta faktibel ni deseabel pa hasié un eksigensia pa e gana konfiansa di hende. Pero tin diferente akusashon ku bakunanan ta kousa entre otro outismo i diabetes tipo 2 den hende. Un di e trabounan di sientíkonan ta pa prueba òf desaprobá tipo di teorianan aki. Anto te ainda, tur e teoria/sospecho/akusashonnan aki a keda formalmente rechasá.

No ta nifiká ku bakunanan no tin efektonan sekundario. Tiki ta e hendenan no ta sinti sintoma, na momentu ku nan kurpa ta kreando defensa kontra di un patógeno. Ta pesei hende ta kere ku bakunashon ta hasi nan “malu”. Pero bo no por spera ku un bakunashon lo ta sin sintoma. Den mayoria kaso, e lo tin efektonan sekundario leve. Efektonan sekundario serio ku ta eksistí, ta minimal, i ta sosodé den un parti hopi chikí (usualmente menos ku 1% di hende). Por lo general, bakunannan ta seif. Semper lo tin hendenan ku no ta rekomendabel pa tuma bakuna, por ehèmpel personanan ku tin resistensia debil. Si bo kurpa su resistensia ta funshona bon, lo no tin niun problema pa bo tuma un bakuna ku a keda aprobá!

Mester bisa ku, maske a krea i aprobá un bakuna, ainda mester keda mantené distansia, bisti tapaboka i sigui kumpli ku medidanan ku outoridatnan a pone. Un bakuna ta yuda pa e vírùs no hasi bo malu, òf forma peliger pa bo bida, i bida di esnan den e gruponan di riesgo. E no ta prevení bo di drenta den kontakto ku e vírùs, i dado kaso esei pasa, no tin evidensia ku bo no por kontagiá otro hende ku e vírùs. Te ainda, no tin sufisiente bakuna pa TUR hende haña pareu, i distribuishon di e bakuna di Pfizer ta un reto, ya komo e mester keda wardá den un temperatura di -70 grado Celsius. (E bakuna di Moderna posiblemente lo keda aprobá pronto, i e lo ta mas fásil pa distribuí, ya komo e no mester keda wardá den temperaturanan asina friu.) Pues e echo ku tin un bakuna, no ta nifika final di e pandemia. Aña nobo, ainda lo habri nos den pandemia, i esaki posibemente lo bai dura basta un par di luna.

Pues, sigui kuida bo mes, i hendenan rondó di bo. Bisti tapaboka (mondkapje) i keda atherí bo mes na e ‘normal nobo’.

Danki pa a lesa mi spich. Anto si bo a sinti mi falta, tur mi bukinan ta ‘online’ ku bo por kumpra i lesa kada bes ku bo mente pasa riba mi. (Kisas Mensing’s Caminada tambe tin.) E mensahe ku b’a manda pa mi, bisando mi ku mi ta hasi falta no ta yuda mi ku un dònder. Kumpra mi bukinan, lag’i nèk.

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook
Powered by WordPress and ShopThemes
Copy Protected by Chetan's WP-Copyprotect.