“Mi no ke independensia, pasó mi no ke pèrdè mi pasport Hulandes.”—idiotes!

Pasport Hulandes

Manera un hende toka e tema di independensia, bo ta tende hende sali grita ku nan no ke pèrdè nan pasport Hulandes.

E tema aki semper ta trese diskushonnan kuné, kaminda lo bo tende yen argumento pro i kontra. E argumentonan pro i kontra sa ta basta fuerte. Pero fo’i momentu bo uza ‘pasport’ komo argumento pa Kòrsou keda den reino Hulandes, bo ta pèrdè kualke diskushon ‘by default’, pasó esei t’e argumento di mas fofo ku bo por uza, i pa kolmo e ta egoista. Mi ta bai splika dikon.

Pa komprondé e tema aki bon, ta importante pa nos sa kiko presis ta nashonalidat i pasport.

Pasport ta un ‘reisdocument’ (travel document) ku gobièrnu di un pais ta duna su suidadanonan, ku ta konfirmá identidat i nashonalidat di un persona. E dokumento aki ta keda uzá primariamente na momentu ku un persona ke risibí akseso na un pais internashonal. ‘That’s it!’ Si bo no sa sali fo’i pais, bo pasport ta nada mas ku un ‘pronkstuk’.

Nashonalidat ta e derechi ku bo tin pa pertenesé na un pais. E ta práktikamente bisa kua pais ta bo “doño”. Na momentu ku bo ta karga nashonalidat di un pais, e pais por obligá bo hasi sierto kosnan, por ehèmpel trabounan den servisio militar. Na momentu ku un pais duna bo su nashonalidat, e ta duna bo un pasport tambe, ku bo por hasi uzo di dje na momentu di biahe. Básikamente por atkerí nashonalidat den sinku forma:

• Jus Soli: bo ta atkerí nashonalidat i pasport di un pais for di na momentu ku bo nase den e pais. Un total di 30 pais ta apliká e prinsipio aki, entre otro Merka, Cuba, Venezuela i Brazil.

• Jus Sanguinis: bo ta heredá nashonalidat di bo mayornan. Hulanda i mayoria otro pais ta apliká e prinsipio aki. Pues si bo ta yu di dos mayor Kolombiano, i bo nase riba teritorio Hulandes, bo nashonalidat lo bira Kolombiano. Bo no ta haña nashonalidat Hulandes.

• Jus Matrimonii: bo por atkerí nashonalidat di un pais na momentu ku bo kasa ku un suidadano ku ta karga e nashonalidat ei. Paisnan manera Merka, Inglatera, Alemania i Canada ta pèrmití esaki. Sa tin kondishonnan mará na e matrimonio si, pa evitá matrimonionan falsu.

• Naturalisashon: paisnan por duna bo nashonalidat si bo drenta e pais legalmente, biba den e pais pa un kantidat di tempu, pasa algun tèst di konosementu i idioma di pais, òf si bo haña asilo polítiko den e pais.

• Nashonalidat ekonómiko: paisnan por duna bo nan nashonalidat si bo ta invertí den e pais.

Tin pais ta duna bo nan nashonalidat relativamente fásil, i otronan ta hopi mas difísil. Kada pais ta disidí tambe ki ora bo ta pèrdè nan nashonalidat. E nashonalidatnan Griego i Iranes por ehèmpel, bo no por entreg’é/pèrd’é nunka. E ta algu ku nan ta konsiderá ilegal.

Si bo tin nashonalidat i pasaporte di pais A, no ta nifiká ku bo no por muda bai biba na pais B, sin mester kambia di nashonalidat. Bo pasport ta duna bo pèrmit pa drenta i keda un kantidat di dia den e pais. Si bo ke keda biba i traha, lo bo tin ku buska residensia den e pais (i/òf pèrmit pa traha.) Den teoria, hendenan ku pasport Oropeo por biba i traha libremente te ku tres luna den Oropa, sin mester inskribí. Den práktika si, e no ta asina fásil. (Kisas ta esei ta duna hende e sintimentu ku e pasport Hulandes ta duna nan mas libertat?)

Pasport Hulandes

Si bo ta haña ku e pasport di bo pais tin muchu restrikshon, bo por apliká pa un di dos nashonalidat, i asina risibí un di dos pasport, basta ámbos pais ta pèrmití esei.

E diskushon rondó di pasport relashoná na un posibel independensia di Kòrsou, pa ami ta apsurdo. Dikon?

1) Kòrsou te ainda no a kuminsá enkaminá niun proseso pa bira independiente, pues no tin niun palabrashon hasí tokante di kua nashonalidat nos lo karga, te pa disidí kua pasport nos residentenan lo bai tin. Bo no por tin miedu di pèrdè bo pasport, sin ku bo sa ki palabrashon lo bai tin pa ku nos nashonalidat i pasport. E ta apsurdo.

Mi ta duna bo algun ehèmpel di palabrashonnan ku por tin. Den palabrashonnan ku Scotland tabatin ku Inglatera (promé ku Brexit a bin kompliká kos), nan a akordá ku siudadanonan di Scotland lo por skohe pa keda ku pasport Ingles, òf tuma un pasport di Scotland. Kòrsou lo por hasi meskos.

Den kaso di suidadanonan di Puerto Rico (estado liber asosiá), nan tin dos nashonalidat—Portorikeño i Merikano—i nan tin pasport Merikano. E posibilidatnan aki tei. (Bo tin ku tene kuenta si, ku si bo karga nashonalidat di un pais, e pais ei ta esun ku ta disidí kiko ta bo derechi i obligashonnan komo suidadano.)

Den kaso ku si Kòrsou skohe pa independensia, gobièrnu di Kòrsou por akordá pa por ehèmpel, su suidadanonan mantené nashonalidat i pasport Hulandes (pa un X-kantidat di aña, òf periodo indefiní). Pero ta parse ku hende tin den nan kabes, ku manera Kòrsou disidí di bira independiente, Hulanda lo eksigí pa nos tur pa hinka nos pasport den ènvelòp, i pòst e mand’é Hulanda. ‘Helemaal niet, mijn lieve pimpelmees.’ E kos no ta funshoná asina.

2) Te na ora ku Kòrsou skohe pa bira independiente, ainda lo tin un ruta largu pa kana. Lo bo bai keda ku bo nashonalidat i pasport Hulandes pa sigur 10 pa 15 aña despues di a deklará independensia. Despues di esei, ta dependé ki akuerdo Kòrsou sera ku Hulanda, nos lo sa kiko lo para di nos nashonalidat, i konsekuentemente nos pasport. Den proseso di dekoloninashon, e pais kolonisadó mester yuda e pais kolonia mas tantu posibel, pa e por para riba su mes. No ta asina ku Hulanda por “saka nos fo’i kas sin niun paña na nos kurpa.” Mayoria pais ku a dekolonisá for di Inglatera, awe ta paisnan fuerte pará riba nan pia. Hulandesnan ta poko mas Cha Tiger, pues bo abilidatnan pa negoshá ku nan, mester ta fuerte.

Den e ‘toescheidingsovereenkomst’ entre Sürnam i Hulanda, a keda akordá ku si bo skohe pa nashonalidat Surnameño, lo bo pèrdè nashonalidat Hulandes, i si bo skohe pa nashonalidat Hulandes, lo bo pèrdè nashonalidat Surinameño. E  akuerdo aki a duna tur Hulandes mayor di edat, ku estadia legal riba Sürnam, por lo ménos 10 aña pa skohe kua nashonalidat nan ke, for di na momentu ku e akuerdo a drenta na vigor.

En bes di sinta spanta pa ko’i loko, nos mester siña saka probecho di Hulanda, meskos ku Hulanda ta saka delaster un probecho ku nan por saka for di Kòrsou. Ademas, komo pais independiente—si bo skohe pa bo propio nashonalidat—bo ta liber pa bira miembro di kua asosashonnan internashonal ku bo ke, i disfrutá di tur bentaha ku esei ta bin kuné, inkluso rekonosementunan internashonal pa bo propio pasport. Tur kos ta dependé di ki akuerdonan bo sera.

E miedu ku ta sinta hinka den hende pa pèrdèmentu di pasport—atrobe—ta totalmente inesesario i apsurdo.

www.lionspratt.com

3) Manera mi a splika kaba, pasport ta un ‘reisdocument’. Bo mester sa biaha frekuentemente pa bo ègt tin benefisio na dje. Mayoria hende ku tin miedu di pèrdè pasport, ta un bia den kada lustro nan ta bai ‘travel the world’ pa sea bai kumpra paña p’e muchanan na Miami, chupa vèt na Bogota, òf bai Zomer Karnaval na Hulanda. Tin hende ta asta kana ku pasport kaduká pa diferente aña sin sa.

Mi no tin e sifra presis, pero den un ‘steekproefonderzoek’ di aña 2000, ta 47% di yunan di Kòrsou a sali fo’i pais, ku Hulanda komo destinashon prinsipal. Mayoria Hulandes Karibeño na Hulanda no sa ni biaha den Hulanda, te pa nan bai otro kaminda. Di esnan ku si ta biaha, e destinashonnan semper ta meskos: Fransia, Bèlgika Inglatera i Spaña. E sobránan di baina nan ke kue trein i sali fo’i Randstad.

Segun sifranan di Curaçao Airport di 2018, 41% di hendenan ku sali fo’i pais, ta bai Hulanda, 17% ta bai Merka, 6% ta bai Colombia, i sobrá porshentonan ta repartí entre Canada, Alemania, Venezuela, Aruba, Brazil, Sürnam, i Bèlgika. Ta masha poko di nos ta ègt hasi uzo di e poder ku e pasport tin. E mayoria di Yu’i Kòrsou, ta snèk nan ta bai, kapsalòn, kasino òf campo. Bo no mester di pasport p’e kosnan ei.

4) Diferente pais ta pèrmití “dual citizenship” (dos nashonalidat diferente, ku ta pèrmití bo tin dos pasport). Pues pais Kòrsou lo por skohe pa su residentenan karga mas ku un pasport. Hulanda por lo general NO ta pèrmití pa bo tin dos nashonalidat. Kada pais ta pone eksigensianan pa ku su nashonalidat i pasport. Den kaso di Sürnam por ehèmpel, esnan ku a skohe pa mantené nan nashonalidat Hulandes, por a hasi esaki, teniendo na kuenta ku bo no lo por tin derechinan ku e nashonalidat Surinameño ta proveé bibando na Sürnam. Mirando ku e akuerdo a duna Surinameñonan te ku 5 aña di akseso liber pa Hulanda, un kantidat grandi di Surinameo a skohe pa bandoná Sürnam, i bai establesé na Hulanda, despues di Sürnam su independensia.

5) Dado kaso Kòrsou bira independiente, i gobièrnu di Kòrsou pone pistol na bo kabes pa bo tuma pasport Kurasoleño—pero abo ta haña esun Hulandes mihó—bo por skohe pa kambia esei bèk. Tur oud-Nederlander pa medio di “optieprocedure” por pidi pa nan bolbe haña nashonalidat/pasport Hulandes bèk, si nan ta deseá esei. Pues den kaso ku Kòrsou bira independiente, pero abo ke mantené òf re-obtené bo pasport Hulandes, esei ta totalmente posibel, basta bo ta bai di akuerdo ku e kondishonnan.

6) E pasport Hulandes no ta e pasport mas poderoso na mundu. E pasport mas poderoso na mundu ta esun Hapones. Pero pa poderoso ku e pasport ta, ta solamente 13% di Haponesnan ta hasi uzo di nan pasport. Anto mayoria di nan ora nan sali pais, ta bishitá paisnan den serkania den Azia.

Japanese Passport

7) Sürnam a bira independiente for di Hulanda na 1975, i suidadanonan Surinameño tin akseso na 78 pais ‘Visa-free’ òf ku VOA (‘Visa On Arrival’). Abo ku bo pasport Hulandes (ku bo tin asina tantu miedu di pèrdè),  a yeg’i bai mas ku 78 pais den bo bida?

8) Singapore ta un pais kasi mesun chikí ku Kòrsou (na teritorio), i ku a bira independiente na 1965 “sin querer queriendo”. Awe nan tin e di dos pasport mas poderoso na mundu, ku ta duna su suidadanonan akseso na 190 pais rònt mundu Visa-Free òf ku VOA. Loke mi ke bisa ku esaki ta ku, “Waar er een wil is………”

www.lionspratt.com

Ta eksistí hende na mundu ku tin mai seis pasport diferente.  Bo tambe por tin diferente pasport si bo ke. (Dor di ègt hasi uzo di bo pasport, i buska residensia i nashonalidat na otro paisnan ku ta pèrmití bo karga mas ku un nashonalidat). Mi ta kalkulá ku 60% di residentenan di Kòrsou, no tin nesesidat pa un pasport Hulandes. Ta totalmente komprendibel ku abo si ke mantené bo pasport Hulandes—i lo bo por—pero bo no por stroba un pais di skohe rumbo pa su libertat, djis pasó bo ke keda mantené un pasport p’e hasi bunita den bo tas. Bo por tin otro motibunan pa ninga independensia di Kòrsou, pero e argumento di no ke pèrdè pasport, ta un argumento fofo, apsurdo i egoista!

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook
Powered by WordPress and ShopThemes
Copy Protected by Chetan's WP-Copyprotect.