Kòrsou ta nada mas ku den alerta, pa vírus nobo konosí komo Coronavirus?

Un vírus nobo, konosí te aworakí komo 2019-nCOV, a keda konfirmá di ta un tipo di Coronavirus ku nunka ántes a keda detektá den ser humano. Den pasado mundu a konosé Coronavirus kaba den ser humano, un di nan konosí komo Sars (severe acute respiratory síndrome). E vírus aki a kousa kasi 800 morto den añanan 2000. E mesun tipo di vírus aki tabata asosiá ku e epidemia di MERS (Middle East Respiratory Syndrome) ku a plama den medio oriente, i a kousa alrededor di 850 morto.

Coronavirus ta un famia grandi di diferente tipo di vírus. Algun ta kousa malesa solamente den kurpa di animal, pero otronan por kousa malesa den ser humano. Algun ta kousa malestar leve manera djis un ferkout, pero otro ta kousa problema severo den e sistema respiratorio, te ku e por kousa morto. Algun por keda transmití di hende pa hende, i e otronan no.

Segun investigashon, e Coronavirus nobo aki—ku a originá den e pais China—a sali for di kolebra. Masha poko bia Coronavirus sa sali di animal pa ser humano, pero esaki ta posibel. Tabatin sospecho kaba ku e 2019-nCOV lo ta un meks di dos Coronavirus. Un di nan sa keda detektá den raton di anochi, i e otro tabata deskonosí. Pero investigashon resien a konkluí ku e otro Coronavirus den e 2019-nCOV ta bin di kolebra. Tambe ta konosí ku diferente karni di kolebra a keda bendí den e Seafood Wholesale Market na e siudat di Wuhan, kaminda e promé kasonan di e Coronavirus nobo aki a kuminsá.

Wuhan aktualmente ta den un siere di siudat pa evitá ku e vírus aki ta sigui plama. Ya kaba tabata tin mas ku 500 kaso di personanan infektá ku  e vírus aki konfirmá i 17 morto. Awe mainta Huanggang, un di dos siudat chines, a lanta den un siere di siudat den esfuersonan pa stroba e vírus aki di sigui plama.

Outoridatnan a suspendé tur buelo ku lo sea sali òf drenta e siudat, tambe tur trein i transporte públiko den e siudat ta será. Benta di máskara di kara a subi drástikamente, pero investigadónan no ta sigur ku esaki lo yuda. Un dòkter na Wuhan a bisa ku e vírus ta plamando di un forma alarmante. Investigadónan ta trahando riba un vakuna pa e vírus nobo aki.

Merka ya kaba a konfirmá su promé kaso di Coronavirus serka un persona ku a yega Seattle for di Wuhan. E persona a yega Merka dia 15 di Yanüari, i den kuater dia el a bira malu i a buska atenshon médiko. Colombia i Mexico tambe tin sospecho di e vírus aki, i ta hasiendo mas investigashon. Kòrsou a indiká di ta den alerta pa e vírus aki. Esei so. Den estado alerta.

Mi sa ku mi ta poko dramátiko, pero ami no ke bira malu. Ya kaba hende a pegá ku mi SendePaga, Chikunguya i Zika. Ebola, Chikunguya i Zika a bira emergensianan global, i Coronavirus tambe lo por bira meskos.

Si ami tabata Minister Presidènt di e pais aki, ya kaba lo mi a pone siere di siudat. Niun hende lo no por drenta mi pais bin pega mi ku niun vírus straño. Esun ku ke lo por sali si, pero drenta sigur lo bo no por drenta bèk. No ta interesá mi unda bo a bai, ni di unda bo a bin. Tampoko ta interesá mi ku bo ta sinti bo bon di salu ni ku bo tin famia pa kria akinan, ni ku bo a saka 3000 heldu pa bo partisipá den 50 aña Karnaval. Bo no ta drenta.

Defakto, lo mi introdusí un estado di emergensia, obligando hende pa laba man kada 30 minüt, i evitá kontakto den tur forma ku otro. Sèks sigur lo ta estriktamente prohibí. Si bo ta haña ku mi ta eksagerá, ta pasó bo no sa ku mi ta kapas di tira hende mata si nan tosa band’i mi.  Si ta ami tabata e persona ku a logra detektá grip den kurpa di hende, ami lo a tira e persona ei mata fo’i dia mi mir’é nister a promé bia. Si ami tabata e promé persona pa detektá vírusnan manera Ebola, Chikunguya, Zika, Kachete, Sende Paga, Wowítis, Chlamydia, Gonorea, HIV i otro vírusnan ku por keda transmití di un hende pa otro—niun di e vírusnan ei lo no tabata eksistí aworakí, pasó lo mi a tira e promé hende ku a keda detektá ku e vírus, i deshasí di e kurpa manera mafia Ruso. Si mi tabata Minister Presidènt, lo mi a introdusí un lei pa prohibí tur hende di mishi, sunchi òf sèks ku otro, te un próksimo aviso. Lo yama e lei, “Niun koño ‘n ta chinga awe!”

Eniwei, e outoridatnan ku ta enkargá ku salubridat na Kòrsou aki aparentemente no ta dramátiko manera mi, i a bisa ku nan ta keda alerta i monitoriá e situashon djaserka. Nada mas, esei so. Ami lo keda será den kas por lo pronto. Abo, keda leu fo’i mi!

Ta bon ku bo no mester sali kas, ni bin personal serka mi pa kumpra e edishon number 5 di ‘Ko’i Lesa’. Defakto, tur mi bukinan bo por kumpra ‘online’ masha trankil dor di subi www.lionspratt.com i hasi bo pedido. No mester bèl mi, ni bin personal serka mi bin hala rosea den mi kara. Ta lamentabel si, pasó mi tabata gusta brasa hende ku mi topa, primi tete di e muhénan ku ko’, pero ku e vírusnan ku ta bai rònt aki sí e kos ta bira fèrfelu. Awòraki mi tin fis di tur hende, mi n’ por yuda!

Ko'i Lesa 5th Edition

Keda pendiente pa dia promé di Febrüari pa ‘Ko’i Lesa, edishon number 5!

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook
Powered by WordPress and ShopThemes
Copy Protected by Chetan's WP-Copyprotect.