Awor mi tin problema ku Gobièrnu, Polis i tambe Ministerio Públiko.

Promé ku tur kos, mi ke bisa ku mi tin mas miedu di Bankonan, Gobièrnu, Polis i Ministerio Públiko, ku mi tin miedu di un atrakadó. Ami por suerte, te ainda mi no a yega di wòrdu atraká nunka. Te ainda, nunka un kriminal a yega di kita algu di sumo balor fo’i (‘afkloppen’). Lamentablemente mi no por bisa meskos di banko, gobièrnu, polis ni Ministerio Públiko.

Gobièrnunan di turno semper a kita tur plaka di impuesto fo’i mi pa nan biaha ‘busness class’, kumpra djòki ku kolonia karu i yuda kompinchinan ku fabornan ku nunka a faboresé ami. Aparte d esaki, semper nan a bini ku leinan idiot i diferente medida ku simplemente ta kita tur mi smak di sigui biba riba e pais aki.

Bankeronan ta lanta mainta i pensa den ki forma nan por hode un hende bashí manera mi kobrando yen gastu pa kada bes ku bo lanta òf ke uza bo propio sèn.

Polis i Ministerio Públiko semper a sòru di laga tur kriminal hasi nan fechoria na pas, miéntras nan ta molostiá e suidadano ku a lubidá di bisti su faha, a sali kas sin reibeweis òf a tint su glas pa solo no karbonis’é den outo.

Kiko a sosodé?

Resientemente mi a indiká na boso ku mi no ta kore outo mas. Korement’i outo ta nada mas ku gastu, i mirando kuantu hende loko tin den kaya, e ta ‘nami strès tambe. P’esei m’a disidí ku mi ta preferá kore baiskel. Aparte di ku e no ta kosta mi niun depchi di gasolin, e ta bon pa e salú tambe. Komo un introvèrt, di baina mi sa sali kas, i ora mi tin ku sali, mi ta sali riba mi baiskel. Masha poko mi ta sali ku outo. Pero djarason último mi tabata tin un sita na Kranshi 10:24 am i awaseru tabata kai, pues mi a skohe pa bai ku outo. Mi a sali kas 10:07 am, kual ta sufisiente trempan pa mi kore trankil i yega na tempu. Manera mi a subi Rooseveltweg na altura di Samira mi a topa kòntròl di polis, i komo mi tin mala suerte, polis a para mi. E promé kos ku polis a mira tabata ku mi no tabatin mi faha di seguridat bistí. Promé ku bo husga mi, pèrmití mi splika.

Kontrol Polis Trafiko

Mi ta un introvèrt ku henter ora ta pensa un mion di kos simultáneamente. Di baina mi ta kòrda bisa hende “Bon Dia” ora mi topa nan te pa mi kòrda bisti faha di seguridat ora mi drenta outo. Simplemente mi ta lubidá, i un but no ta bai pone mi kòrda siguiente biaha pa bisti e faha tampoko. Lo mi bolbe lubidá. Te na ora mi kòrda mes, e faha ta pone mi sinti manera ta un brizièl pèrtá mi tin bistí. Mi no gusta.

Mi tin 17 aña ta kore outo, i den e 17 aña nan ei (promé ku djarason último ei) dos bia polis a yega di para mi. Un bia nan a but mi pa bistimentu di faha di seguridat i e otro bia pa glasnan di tint ku papelnan di 35% ku mi a kaba di pone. Komo ku hende semper a bisa mi pa papia ku e bèrdat, mi a splika e polisnan dikon mi no tin faha bistí i dikon mi a skohe pa tint mi glasnan, pero nan a but mi tòg.Nan no a tene niun klase di konsiderashon ku mi situashon.

E bia aki mi a disidí di splika e polis ku mi no por bisti faha, pasó mi wil patras ta lòs kada bes i mi mester ta fleksibel pa ora mi mir’é ta kore bai laga mi, mi por baha for di outo i kue promé ku e bai hecha baina. E polis na su turno a bisa mi ku mi tin ku drecha e wil e ora ei, ya e no ta lòs mas. Mi a splik’é ku esei lo no ta posibel temporalmente, ya komo ku sèn ta poko krap, i mi tin ku drecha mi brek promé, pasó e no ta traha.

E polis e ora ei a puntra pa mi karchi di kùr i puntra ta kon mi ta hasi kùr ku un outo asina. Mi a bis’é ku mi outo no sa bai kùr. Ta mi tio mi ta laga print e karchi pa mi ora mi fecha di kùr ta seka di yega. E polis a kuminsá bira poko hostiná i na e momentu ei el a mira ku seguro a kaduká. Pero mi a bis’é ku e no tin ku preokupá ku esei pasó ta ami mes ta ‘photoshop’ mi papelnan di seguro. Mi a bisa e polis ku mi por djis bai kas, traha un nobo i trese p’e mira. Mi a splika e polis tur esakinan, i el a disidí di duna mi un ‘heftige boete’ tòg. Kon un polis por duna outor/eskritor manera mi—ku di baina tin sèn pa renobá su djòkinan—un but pika asina? Awor si mi no sa kiko mas mi tin ku hasi. Polisnan no ta tene konsiderashon ku hendenan introvèrt anto?

Komo ku e polis no a tene konsiderashon ku mi, e siguiente dia mi a disidí bai Ministerio Públiko pa wak si nan si ta tene konsiderashon ku hendenan introvèrt i anulá e but. Mi a pensa ku lo mi topa un damita ‘leuk’ i amabel ku si lo a komprondé mi situashon, sinembargo mi a topa un dama ku probablemente no tin a ni un vibrator na kas, i e tampoko no a tene konsiderashon ku mi.

Mester bini un lei ku hendenan introvèrt òf hendenan ku ta kore baiskel no POR haña but.

Kòrda ku mi a menshoná ku mi no sa sali kas, i ora mi sali, hopi chèns lo mi sali ku baiskel. Pa kore baiskel no mester di reibeweis, ni seguro ni tampoko plachi di number bálido. Baiskel no ta uza gasolin pues e no ta kontribuí na emishon di gasnan ku ta dañino pa medio ambiente i ku ta kousa kalentamentu global. En bes di duna mi un premio komo un persona pionero ku ke laga outo para, ta duna mi but pa e instante ku mi a sali kas ku outo.

Bo sa kuantu molèster ta kosta un introvèrt p’e sali riba kaya? Anto ora e disidí di sali, bo ke but e tambe? NO POR tòg?

Awor mi tin mas miedu di polis i Ministerio Públiko, ku mi tin miedu di atrakadó.

Tin un mener ku sombré di guera ta kana tira atrako tur dia riba tokonan chines. E mener aki tin mas ku 40 atrako riba su nòmber i te ainda polisnan no por arest’é. E kos aki ta asina apsurdo te ku mi a kuminsá pensa lo siguiente:

• E mener aki posiblemente lo ta traha pa un banko lokal pa asina stimulá   chinesnan pa warda nan sèn na banko (ya asina banko por kobra nan kada bes ku nan hasi uzo di nan propio plaka.)

• E mener aki ta sea un polis òf e ta traha ku polis. (Si nan por hòrta 600 kilo di koka, kon difísil ta pa kere ku nan sa tira atrako tambe?

• Polis i Ministerio Públiko no tin niun ganashi arestando e mener aki, pues nan ta preferá para outo riba kaya i parti but pasó esaki sikiera ta generá entrada pa kaha di ministerio di Hustisia. Probablemente polisnan lo ta kobra un porsentahe di komishon tambe pa kada but ku nan parti.

Loke ta reforsá punto number tres mas ainda ta e echo ku polisnan ta para hende djis pa kontrolá papel. En todo kaso tur e bianan ku nan ku nan a para mi, nan a kontrolá solamente mi papelnan, bistimentu di faha di seguridat i glasnan skur. No a interesá e polisnan nada di e kokaina ku mi tabata tin bou di mi stul, tampoko e pistol ku mi tabata tin den ‘dashboard’, ni tampoko tur e handgranat nan skondí den mi baul.

E kos di mas èrg tabata ku…

E polis a pone mi yega lat na mi sita. Anto no tiki lat. Mi a yega TRES MINUT LAT! Ami no sa yega lat niun kaminda. Pa kolmo, e polis no ke a duna mi un ‘te laat brief’ tampoko pa mi mustra nan na Kranshi.  Pues, ku e but aki— awor mi no ta sali kas mes mas!

Pues hendenan ku ke un di mi bukinan, wak kon boso ta hasi bai Mensing’s Caminada òf Bruna i kumpra boso bukinan, òf lo bo tin ku bin te na mi kas, pasó ami sigur NO ta sali kas mas. ( A ménos ku Chaika ‘app’ mi bisa mi ku e ta tonto afó drumí riba kama ta warda mi. E ora ei si mi ta sali kas pia abou mes bai serka dje.)

Awa, Habon ku Past'i Djente i Hink'é aden

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Tweet about this on Twitter
Twitter
Share on Facebook
Facebook
Powered by WordPress and ShopThemes
Copy Protected by Chetan's WP-Copyprotect.