Rekobrá plaka ku bo a pèrdè hungando “e flor” den kuater stap simpel.

Reading Time: 4 minutes

 Último dianan aki tur hende ta papia di e flor. Hendenan ku bo tin ratu sin tende di nan tabata tuma kontakto ku bo ta pidi bo pa drenta nan flor. En prinsipio yen bia mi a kere ku ta kue nan ke mi kue nan. Pues ami tabata bisa nan ku mas ku klaro lo mi ke drenta nan flor, i nan tabata bisa mi ku 180 florin mi mester i mi por drenta nan flor. Ami tabata pensa ku e dil ei no ta asina malu, pasó aworakí kualke trago-meisje di kalidat ta kobra 300 florin i ainda bo tin ku paga ko’i bebe i hotèl. Pues 180 florin no ta malu. Ta ora ku mi bai hiba e 180 florin i kuminsá kita paña pa mi drenta e flor ku tur hende ta papia di dje, nan ta keda wak mi straño, pasó no ta esei nan ke men.

Asina m’a bin siña ku ta un otro tipo di flor nan ke mi drenta. Unu kaminda bo tin ku keda buska mas hende pa asina forma algu manera un piramide—den forma di flor— i ora bo yega tòp bo ta kobra un suma di plaka. Pero si e flor stanka—i e lo stanka pasó lo yega e dia ku no tin mas atkisishon di hende i/òf hende no ta keda re-invertí—hende lo bai pèrdè plaka.

Mi no ta bai pèrdè mi tempu splika ni konvensé bo pa drenta òf no drenta niun hende flor. Hende ta kabes duru i fásil pa tuma hasi, pues bo por hasi loke bo ke ku bo sèn. Ta bo sèn. Pero e sistema ku e kos ta hinká den otro, pa definishon hende mester sigui drenta den e nivel di “aporta”, pa asina sigui pusha e otro nan di nivel, te ora un hende yega e nivel di mas haltu (mei mei di e flor) pa asina e por kobra. Pues pa kada bes ku un hende yega den sentro di e flor, tin ocho hende den e nivel di mas abou ku tin ku warda nan bùrt pa por yega mei mei. Si no tin mas hende, lo bo pèrdè bo plaka di invershon. Ta un tipo di piramide—un tipo di wega sosial ku aparentemente hende ku ta kere den sinterklaas ainda— sa partisipa aden.

Pero si abo ta un di e personanan ku laga nos bisa pa “mala suerte” (lesa idiotes) no a logra yega e nivel di mas haltu pa bo kobra plaka di e flor, pa di promé, mi ke bisa bo drechi. Pa di dos mi tin bon notisia pa bo. Tin manera pa bo rekobrá bo plaka bèk. E ta un método ku ta funshoná ku 90% di siguridat. (Nada no ta 100% sigur) Si bo sigui lesa, lo bo deskubrí kon bo por rekobrá e plaka ku bo a pèrdè hungando e flor den kuater stap simpel.

1) Aseptá e fayo ku bo a hasi i bisa bo mes “Drechi” por lo menos tres bia. Drechi ku bo a kere ku ta eksistí un manera sigur di rende plaka ku un porsentahe asina haltu den tiki tempu. Wak bo mes den spil i puntra “Kon mi por tabata asina idiot di kere den e kos ei?” Mi a yega di bisa bo un bia kaba. Si ta plaka brutu bo ke traha, bo tin ku sea prostituí òf bende droga. Esakinan tampoko ta 100% sigur si.

2) Sali kas mañan mainta bai Mensing’s Caminada i kumpra e bukinan ‘Awa, Habon ku Past’i Djente’ i ‘Hink’é aden’.

3) Lesa e bukinan kompletu despues sigui pa stap number kuater.

4) Ora ku bo kaba di lesa e bukinan aki lo bo sinti bo asina bon ku lo bo lubidá mes ku bo a pèrdè sèn hungando e flor. E buki lo pone bo relahá, hari i kita tur strès. Lo bo sinti manera un hende ku nunka a pèrdè a ni un depchi.

Si bo hasi e kuater stapnan aki, i ainda bo ta sinti bo malu, manda mi un mensahe i buk un seshon di ‘Photoshoot’ ku mi. Lo mi sòru pa bo sinti bo asina sèksi i bunita ku si bo no lubidá ku bo a pèrdè bo plaka den e flor, lo bo no lubidá e kos ei nunka mas. Pues ni maske mi duna bo 1 mion florin aworakí, lo bo keda sinti bo malu tòg. Pero tèst e prome kuater stapnan aki promé ku nos mester yega na e konklushon ei.

Por sierto, si bo sa di un hende ku mi por drenta su flor pa 25 heldu, laga mi sa. Preferibel un flor limpi sin abeha, sin spiña, i ku ta habri anochi, sera den dia. E flor mester tin hopi awa, pa ora mi drenta aden, e keda spuit saka awa riba mi di un forma masha bunita. Si mi por bin ku dos hende mas pa drenta e flor aki ku mi, lo ta great.

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.