Ku un amigu manera MCB, mi no mester di enemigu!

Reading Time: 10 minutes

Hopi hende ta kategorisá kosnan ku mi skibi riba mi página komo ‘fake’. En realidat no ta asina. De bes en kuando, mi sa haña ideanan pa krea un historia rondó di akontesimentunan ku a sosodé den komunidat òf ku mi persona. E ideanan aki ta kai mas bien bou di sátira. Ta ideanan ku mayoria bia ta basá riba algu ku a sosodé di bèrdat, i sea mi a pone algu aserka pa eksager’é òf pa dòrn’é ku un tiki ‘dark humor’. Ta ami su stail. Bo no mester gusta ni aprobá esei.

Sátira pa esnan ku no sa, ta e uzo di humor, ironia òf eksagerashon pa ekspresá un pensamentu. Tin hende ta hasié pa ridikulisá òf krítika un persona òf instansia. Partikularmente polítikonan ta resultá víktima di sátira pa motibu di nan komportashon hipókrita.     

Na Kòrsou aki, ta parse mi ku nos no konosé esaki, i pa motibu di flohera i ignoransia, hopi hende ta sea tuma e sátira komo e realidat, òf (pa nan ta ‘safe’) nan ta kere ku tur kos ku mi skibi ta falsu, pa motibu ku pa nan, e ta difísil pa diferenshá kiko ta real for di kiko no. Esaki ta algu ku ami lo tin ku bai kambia, pa evita konfushon.

Loke mi ta bai skibi aki, mi por bisa bo ku e no ta kai bou di ni ‘fake news’ ni sátiro. Mi ta bai konta presis loke a sosodé, na e manera ku ami a eksperensi’é.

Entre djaweps i djabièrnè 20 pa 21 di sèptèmber, MCB tabata tin problema ku su Online Banking. Pa 22 di sèptèmber e problema a keda solushoná. Mi a mira algun persona komentá riba Facebook ku nan ta haña ku MCB mester duna hende un rekompensa pa e inkumbiniensia. Ami a pensa ku lo tabata great bèrdat si MCB duna hende un rekompensa, i komo tabata siman di kultura mi a haña un tremendo idea. Den un ‘post’ mi a skibi ku pa diskulpá su mes, MCB lo duna un rekompensa chikitu na tur hende ku a sufri algun inkumbiniensia dor di e storing i tambe ku esnan ku bishitá un filial di MCB lo risibí un kòpi ku chukulati kayente i tambe un lèter. Mi sa bon bon ku MCB lo no bai duna hende niun rekompensa. Esaki tabata algu deseabel pa mi mira, i komo ku mi sa ku e lo no sali di MCB, ami a krea esun di mi. Ku hende tuma e kos na serio (riba mi página), esei no ta presis mi falta. E ‘post’ ku mi a krea no tabata tin niun intenshon maligno, ni pa ami saka niun klase di benefisio for di dje.

En todo kaso, djarason mainta mi ta haña un yamada. Ora mi a kue, mi a topa mi ku un persona ku stèm di FBI ta puntra pa mi. E mener a bisa mi su fam, splika mi ku e ta di MCB su departamentu di ‘Securty and Investigations’ i ku e ke invitá mi pa papia ku mi. Mi a puntra nan pa kiko asina, i nan a bisa mi ta pa algu ku mi a ‘post’ riba Facebook.

Na e momentu ei mi a pensa lo siguiente. E mener ku a yama mi ei, ta un hende ku mi konosé for di Radulphus College. Ta un persona ku gusta hasi su weganan pues mi a pensa ku el a yama mi ku stèm serio djis pa pompa. Pero ku ora mi bai serka dje, nos lo sinta kome lèter i bebe chukulati, miéntras e ta komentá riba mi kreatividat, ku e i su koleganan semper lo ta lesa i hari mi postnan èts. Kos serio, esei mi a pensa. Mi a asta pensa ku nan lo a sera un grupo di hende ku lo ke kumpra mi bukinan pa sostené mi, manera vários di mi siguidó ku ta traha na otro kompania a yeg’i hasi.  Pero tambe mi a pensa ku kisas nan lo no a gusta e ‘post’, i nan lo ke pidi mi pa kita e ‘post’. Pero esei mi ta haña nan lo por a hasié na telefòn mes. Pues mi a preferá pensa ku nan ke a konosé mi personal i kumpra mi bukinan. Mi ke men ta henter un Maduro & Curiel’s Bank!

Ora mi a yega MCB (Na Bon Bini Business Center), mi a dal den e shon ku mi tabata bai skol kuné, i mi a imaginá ku e lo bai kuminda mi bisa algu manera “Ki tin sua?” òf grita mi nòmber remarkando ku mi ta ‘post’ yen kos di kontroversia riba Facebook. Pero no, el a duna mi man, i introdusí su mes. Mi a keda mané, “Ang oke, nos ta bai hasi manera ku nos no konosé otro? Wel oké anto.” E gai tabata bistí manera Carlton Banks di Fresh Prince òf Bel Air, i ku su manera eksageradamente seku i serio, el a keda manera Tom Willis di ‘The Jeffersons’.

El a guia mi pa bai den su kantor i mi a drenta den un lugá, kaminda e trahadónan tabata traha manera katibu di Jeff Bezos. Bo por a sinti un ambiente tenso i seku. Mi a bai sinta den un kantor i huntu ku e gai, a bin un otro un mener probablemente pa hasi e kos mas serio. Nan dos a sinta ku mi i ku un tono hopi serio nan a splika mi ku nan a tuma nota di mi ‘post’ riba Facebook i ku MCB ke hiba mi dilanti pa ‘Valsheid in geschrifte’, ‘Smaad en Laster’ ku ‘Oplichterij’ ku yen kos mas i ku lo mi por risibí kastigu di prizòn di entre seis luna i ocho aña i tambe risibí un but di 7500 euro. Segun nan, esaki lo por pone ku lo mi no por haña trabou nunka mas na Kòrsou aki. Kos serio, e mesun MCB ku ta kana bisa mi ku e ta mi banko amigu ei.

MCB no ta e promé persona/instansia ku a bisa mi ku nan lo hiba mi korte. Ta vários nan tabata. Mi ta un persona rasonabel, i si dado kaso bo no gusta algu ku mi publiká riba Facebook, bo por aserká mi trankil i pidi mi pa sea adaptá òf kita e loke mi a publiká. Hopi bia un komediante òf personanan ku ta krea sátira, por krea òf bisa algu ku ta bai “muchu leu” i ku en bes di hende tum’é ku un tiki humor, nan ta tum’é na malu. Ta algu ku por sosodé. Lógikamente—ami en todo kaso—ta purba pa no falta niun hende rèspèt. Pero ora bo ta figura òf instansia públiko, tin sierto kosnan ku manera nan ta bisa: “Je moet er wel tegen kunnen.” Nos por a diskuti si ku e manera ku mi a hasié (dor ku mi a kue nan logo) no tabata esun di mas apropiá. Pa e motibu ei mi a baha e ‘post’

Pero ku ami ta daña nòmber i reputashon di MCB? Waw! MCB ke men ku nan nòmber no ta daña ora ku nan hasi yen ko’i sinbèrgwensa ku hende, pero e ‘post’ ku mi a krea ei si ta daña nan nòmber. Por sierto, kon nan lo a hasi, si mi tabata biba den eksterior? Nan lo pidi Ministerio Publiko pa ekstraditá mi ku man i pia di bui manera a hasi ku Jorge Jamaloodin, pa un sátiro ku mi a krea riba Facebook? Asta mi nòmber mi a pone bou di e ‘post’ pa evitá ku hende ta kue i plam’é rònt komo algu ku MCB a publiká. Esei si lo a bira problema.

Awor, kiko pa ami ta daña MCB su nòmber serka mi?
Mi a bai MCB algun luna pasá bai puntra nan kiko ta e diferensia entre un kuenta koriente i un kuenta di spar. Nan di ku práktikamente no tin masha diferensia, pero pa ami e diferensia grandi ta ku mi tin ku paga 2 piku tur luna pa gastunan di atministrashon, sea tabata tin transferensia riba e kuenta òf no. Dor ku mi kuenta por keda hopi luna sin niun aktividat, mi no ta haña ku mi mester sinta regalá MCB plaka asina.  Mi a pidi nan pa kambi’é pa un kuenta di spar. Nan ta splika mi ku no por, i ku lo mi tin ku sera e kuenta di koriente i habri un di spar. Pero pa mi habri esun di spar mi tin ku bin ku ‘salaris slip’ òf kualke prueba ku ta indika di unda mi fuente di entrada lo sali. Mi a splika nan ku mi no tin niun koño di fuente di entrada. Ta e sèn ku tin riba e kuenta koriente lo pasa over p’e kuenta di spar. Ratu ratu un ‘Sugarmom’ por benta 100 heldu riba dje pa mi.  Nan a splika mi ku no por. Mi a kue fadá, sera mi kuenta koriente i sali bai laga nan.  Aktualmente, ta mas fásil pa mi traha un kuenta di banko na Alemania bou di nòmber di Adolf Hitler, ku pa mi lanta un kuenta di spar ku MCB.

Despues di esaki, mi karchi di bankomátiko a ekspirá sin ku mi a risibí un nobo na kas. Mi a bai reklamá MCB i nan a bisa mi ku esun nobo a sali via pòst pa mi adrès. Ami no a risibí nada, pues mi a bai informá nan di esaki i nan a blòkia e karchi ku mi no a risibí ei i traha un nobo pa mi i tambe krea un sistema di ‘online banking’ nobo. Ora ku mi a subi ‘online’, mi a mira ku nan a kobra mi 20 florin pasó nan a konsiderá ku mi a  pèrdè e karchi. Ora ku mi a bai reklamá, nan ta bisa mi ku mi tin ku papia ku un manager i splika nan ku mi no ta di akuerdo ku loke nan a kobra mi. Mi a dura henter un luna diskutiendo ku MCB pa nan drai e 20 florin ei bèk, pasó ami no a pèrdè un dònder.

Tempu ku MCB tabata tin e sistema bieu ‘online’, tabata fásil pa bo paga un persona dos bia pa motibu ku bo tin ku ‘schedule’ un pago promé ku bo hasi e pago. Pero si bo ke pa e persona risibí e sèn mesora, bo tin ku bai na e pago ku bo a ‘schedule’ i klek “Pay now”. Si bo lubidá di ‘delete’ e pago ei, e mesun pago ei ta pasa dos bia. Esei a pasa ku mi, na momentu ku mi a pasa sèn di mi kuenta pa mi propio Money Card. No tabatin manera pa mi mes drai e bèk.  Ora ku mi a bai MCB pa pidi nan pa drai e bèk, nan ke a kobra mi 10 òf ta 15 dòler pa esei, pasó no ta nan falta. Mi a bisa nan “awèl laga numa anto.”

Ora hende manda sèn djafó pa asina kumpra buki serka mi, mi no ta duna nan mi kuenta di MCB, pasó MCB ta kome tur mi plaka. Ku ora un persona hasi un pago na mi, via di un otro banko lokal aki mes MCB ta kita mai 10 florin for di mi.

Pa fiansa ku eseinan, mi no ta ni pasa banda di nan, pasó e hende nai lo pone mi bula for di brùg.

Ku esaki mi ke splika MCB ku ami sigur no por daña MCB ni niun otro banko su nòmber. Nan ta sinbèrgwensa sufisiente pa hende pensa tur sorto di kos di nan.

Por ultimo, mi a sali bai for di MCB ku un smak amargo. E hendenan no a kumpra a ni un buki serka mi. Legumai buki—a ni un glas di aw’i kranchi e koñonan no a ofresé mi, te pa nan duna mi lèter ku chukulati. Pero ta ami ta daña nan nòmber? MCB, stòp di pompa.

Ke men ami tin gana di sa ta ken t’e hendenan ku a kere ku MCB lo duna nan niun dònder di rekompensa pa motibu ku nan sistema a kai afó.  Boso ta mes òf mas pompadó ku MCB.

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.