Finalmente, ata e 3 ingredientenan ku bo mester pa bo bira un bionario.

Reading Time: 10 minutes

Si semper bo tabata ke a bira un mionario òf asta un bionario, e ora ei awe ta bo dia di suerte. Stòp ku tur loke bo ta bezig kuné. Bai sinta bo so den un kamber, òf sinta un kaminda ku niun hende no ta stroba bo, ya asina tur bo atenshon lo ta na loke mi ta bai splika. (Lesa e artíkulo aki promé ku e bionarionan ‘delete’ e for di Internèt.)

Mi no ta bai presis duna bo idea di kua produkto o servisio pa bende pa bo bira bionario, pero mi ta bai duna bo e ingredientenan pa bo bira un persona kapas pa hasi loke ta nesesario pa asina bo bira un mionario i despues un bionario. Bo hasi presis tur loke mi bisa bo hasi, pa fin di e aña aki mes bo por ta mínimo un mionario.

Mi a yega di bai un charla di un bionario (mi no ta kòrda su nòmber). El a bisa ku pa bo bira mionario ta fásil. Segun e, kualke idiot por bira un mionario. Loke bo tin ku hasi ta purba bira un bionario. Anto awe ami ta bai bisa bo tur loke mi a siña ku ta nesesario pa bo bira un bionario.

Pa di promé, algun sifra:

►Pa bo bira un mionario, bo mester logra atkerí por lo ménos un mion florin. Pa bo bira un bionario bo mester logra atkerí por lo ménos mil mion florin.

►Na mundu aktualmente (na momentu ku mi a skibi e artíkulo aki) tin 2208 bionario repartí den 72 diferente pais. Te asta Zimbabwe— un di e pais di mas pober na mundu— tin un persona bionario. Ke men abo ku ta un Antiano bibá na Aruba, Boneiru, Kòrsou i Hulanda no tin apsolutamente nada ku ta stroba bo di bira un bionario.

►Na mundu aktualmente tin 36 mion mionario repartí rònt mundu. Na Antias mes tin diferente, entre otro Robby Dos Santos i Gregory Elias. (Mi no a menshoná nan nòmber pa bo bai tira atrako riba nan si.)

►Pues, den un mundu ku ta konsistí di 7.6 bion hende, bo chèns pa bira un mionario ta 0.47% i bo chèns pa bira un bionario ta 0.000029%.

Mi no ta bisa esakinan pa hasi bo tristu. Mi ke simplemente hasi bo konsiente, ku loke sea ta bo motibu pa logra atkerí tantu sèn asina—ku despues lo bo no sa kon pa gasta—ta bon pa bo sa ku bo chèns pa logra esaki promé ku bo muri ta sumamente chikí—pero no imposibel.

(Desde aki lo mi sigui splika kon pa bo bira un bionario en bes di mionario. Malu malu, si bo no logra bira bionario, lo bo keda kontentu tòg ku algun mion florin riba bo kuenta bankario tòg?)

Estudionan di sikologia i NLP ta bisa ku si bo ke logra algu ku otro hende a logra, òf mínimo subi bo chèns di logra esei, bo mester mimiká presis loke nan ta hasi. Personanan bionario tin sierto komportashonnan partikular ta hasi, ku si bo kopia esakinan, bo tambe tin chèns di bira un bionario. Esei ta loke ami ta bai bisa bo, ya asina pa fin di luna aki mes bo logra bira mínimo un mionario.

3) Bo mester tin hopi pasenshi.
Si bo ta haña ku e artíkulo aki ta muchu largu i bo ta sinti ku bo no tin pasenshi pa kaba di les’é, mihó bo peña saka numa, pasó asina hamas lo bo bira un mionario. (A ménos ku bo ta super talentoso den un òf otro deporte òf kreativo sufisiente pa bira un ‘one-hit wonder’ di anochi pa mainta òf ku bo gana loteria.)

Lesamentu ta un di e armanan ku hopi di e bionarionan ta uza pa por sigui krese. Nan ta bisa ku no ta tur hende ku ta lesa ta bira bionario, pero tur bionario ta lesa.

Estudionan ta mustra ku e bionarionan tur tin un kantidat impreshonante di pasenshi, —mas ku kualke persona komun. Warren Buffet a yega di bisa ku Stock Market ta un artefakto perfekto pa transferí sèn di esun sin pasenshi pa esun ku hopi pasenshi. Hopi di e personanan riku awendia ta hendenan ku mester a warda hopi promé ku nan a logra algu. Sierto di nan mester a pasa den hopi frakaso, promé ku nan a logra. Pues pasenshi sigur ta klave den bo ruta pa bira un bionario.

2) Nan ta lanta mainta hopi trempan, i drumi tiki.
Ami semper a bisa ku drumimentu ta pèrdèment’i tempu. Mi ta kòrda un bia Curtis Jackson (50 Cent) a yeg’i bisa ku drumimentu ta pa hende ku ke keda bashí.

Estudionan ta mustra ku mayoria di e bionarionan ta lanta for di 4:30 AM, i sobránan ta lanta di mas lat 5:30 AM. Irwin Simon ta un di e bionarionan ta lanta tur mainta 5or AM i e ta bisa ku e ta logra hasi mas tantu kos promé ku 9or AM, kompará ku loke hendenan normal ta logra hasi henter dia.

Si nan ta lanta trempan, lo bo pensa ku nan ta drumi trempan tambe. Pero esei no ta e kaso. Mayoria di nan a bisa ku nan no drumi mas ku 4 ora pa dia. Tin algun di e personanan aki ta pèrtenesé na un grupo di persona ku no mester drumi hopi. Di naturalesa  nan ta drumi tiki, i tòg funshoná riba kapasidat máksimo durante dia. Esaki ta danki na un mutashon di e gene ku nan tin (hDEC2), ku ta pone ku nan no tin mester drumi hopi pa por funshoná riba máksimo kapasidat. E otro bionarionan ku no ta pèrtenesé n’e grupo aki, ta train nan mes pa drumi tiki ora, ya asina nan por hasi hopi mas tantu kos durante dia. (Hopi kos no kemen chat riba Whatsapp i Snapchat i sinta wak video riba Facebook i Youtube henter dia.)

Pues si bo no ta pèrtenesé na e 2% di poblashon ku no mester drumi hopi, bo por simplemente train bo mes pa logra esaki. Si di bèrdat bo ke logra bira bionario, bo tin ku stòp di drumi tantu asina.

1) E karakterístika prinsipal i indispensabel ku bo mester pa logra bira un bionario ta ku bo mester ta un sikopata (òf mínimo un sosiopata.)
Mayoria di nos a yega di tende di e nòmbernan aki den pelíkula, i semper nan a pinta e personanan aki komo ‘serial-killers’, esta hendenan ku ta mata hende sanger friu ku un hacha òf un mashin di zag.

E personanan aki no nesesariamente mester mustra manera e hòmber spantoso akiriba. Defakto, hopi chèns bo konosé mas sikopata i sosiopata di loke bo ta kere. Probablemente na bo trabou mes tin un par di nan, òf e por ta asta e persona ku bo ta drumi tur anochi banda di dje. Echo ta, ku nos tur konosé un sikopata òf un sosiopata, pasó segun estudionan un di kada 10 persona ku bo konosé ta un sikopata. (Esaki no ta nifiká ku tur sikopata ta bionario. E ta simplemente un karakterístika ku bo mester tin pa por logra bira un bionario.)

Un sikopata ta nada mas i nada ménos ku un persona usualmente hopi sabí, ku ta poseé karakterístikanan manera  un karisma superfisial, bon abilidat den kòntròl i manipulashon di hende i abilidat pone hende hasi loke ku e ke, ta kere ku nan ta mas ku otro persona, ta sumamente talentoso den gañamentu, no tin niun sentido di remordimentu, ta karesé di empatia, tin sierto problemanan di komportashon i ku probablemente a kasa i divorsiá un par di bes. (Ta zona mané ku mi a deskribí Donald Trump, pero tur sobrá bionario ta mesun kos.)

E diferensha entre un sikopata i sosiopata no ta masha leu. Un sosiopata tin simplemente un forma ménos severo ku un sikopata. Tur dos ta karesé di empatia i remordimentu pero un sosiopata ta ménos severo. Pues tur sikopata ta un sosiopata, pero no ta tur sosiopata ta sikopata. Un sosiopata tin mas abilidat pa forma konekshonnan ku hende, usualmente famia serka di nan. Siendo ku un sikopata no por forma konekshon sosial a ni ku su famia.

Segun estudionan, mayoria bionario (pa mi no bisa tur) tin karakterístikanan di un sikopata òf mínimo un sosiopata. Simplemente pasó e karakterístikanan ei ta nesesario pa bo logra yega den e tòp di e lista di e personanan mas riku na mundu. Hopi di nan ta kompartí e mesun karakterístika nan aki, esta ser kapas di hasi loke ta nesesario pa por yega na tòp. No ta tur ta involukrá nan mes ku aktonan ilegal, pero hopi di nan si. Hopi di nan mester tuma desishonnan kritiko ku ta den desbentaha pa otro hende, pa asina nan por logra nan meta.

Nos ta biba den un sosiedat kompetitivo i ta solamente esnan ku ta dispuesto na tuma hopi rísiko i kometé aktonan sin empatia i na rant di loke ta legal, ta esnan ku lo gana i òf eliminá nan kompetidor i logra yega den tòp. Evadí impuesto, bende kosnan ku ta mata òf kousa daño na bida di otro hende, hòrta poseshon di hende (pensa riba sklabitut, trafikashon i eksplotashon di hende, benta di droga, arma etc.), tur ta aktonan ku a trese un rikesa enorme pa hopi hende di diferente pais.

Jeff Bezoz, CEO di Amazon, aktualmente ta e persona di mas riku na mundu ku un rikesa di mas ku 150 bion dòler, siendo ku mitar di su empleadonan ta gana ménos ku dos mil dòler pa luna. Empleadonan di Amazon ta bisa ku nan tin ku traha bou di kondishonnan rigoroso, ku tiki ora di break i diferente regla estrikto mas, pa asina e kompania por produsí mas plaka pa e doño. E tipo di komportashon aki pa ku hende aparentemente ta nesesario pa bo yega den tòp di e lista di personanan mas riku na mundu.

Jeff Bezos

Warren Buffet tin un rikesa di mas ku 80 bion dòler i loke e ta paga na impuesto ta apénas 0.02% di tur plaka ku e ta generá.

Na Kòrsou aki tambe nos konosé vários di e personanan aki. Pensa riba Emsley Tromp, doño di Gomez Enterprises i mi bon amigu Joel Gois. (No bisa nan ku mi a menshoná nan nòmber si. Sino hopi chèns ku pa medio di un aksidente lo bo tende ku mi a disparsé fo’i mapa.) Pero pa ami, nan tur ta hendenan ku ta poseé di e karakterístikanan ariba menshoná, i si bo ripara bon, tur riku ta sigui bira mas i mas riku, miéntras ku e pobernan ta keda bira mas pober. Bo ta kere e bionarionan no sa esei?

Pues si bo tambe ke bai den e lista di e personanan di mas riku na mundu, kuminsá prepará pa bo bira un yu’i puta. Si bo no ta poseé di niun di e tres karakterístikanan aki, no pèrdè speransa. Si bo sali kas mañan mainta trempan bai Mensing’s Caminada, kumpra i lesa mi bukinan ‘Awa, Habon ku Past’i Djente‘ i ‘Hink’é aden’, mi ta garantisá bo ku lo bo sinti bo e persona mas riku na mundu. Pero riku na felisidat. Mi bukinan ta simplemente maestral. Ta si bo no ke felisidat so lo mi komprondé dikon lo bo no ke lesa mi bukinan.

Ami en todo kaso a konformá kaba ku lo mi keda pober i bashí pa semper.  Mi sa sigur ku mi no tin niun gota di pasenshi, mi ta detestá lanta mainta trempan fo’i kama i mi ta leu for di ta un sikopata, sino masha dia lo mi a laga un hende pone pistol na bo kabes pa bo kumpra i lesa tur mi bukinan. Pero mi no a hasié, tòg? Pasó mi sa ku bo mes lo bai kumpra i lesanan pronto. Tòg?

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.