Pronto Aqualectra lo tin ku bai rekompensá pueblo kada bes ku koriente bai.

Reading Time: 4 minutes

Aktualmente señor Darick Jonis ta dirigí Aqualectra komo direktor interino pa Aqualectra i e ta kandidato fuerte pa bira direktor general di Aqualecra. Sinembargo, e lo bai hañ’é ku un tarea fuerte, komo ku Aqualectra a pèrdè un kaso kardinal den Hoge Raad.

Desishon di hues den e kaso aki lo bai tin konsekuenshanan bastante serio pa tantu Aqualectra komo Gobièrnu di Kòrsou. Esaki ta pone ku Parlamento di Kòrsou lo tin ku bai reuní mas pronto posibel riba e punto aki, ya komo ku tin un desishon di hues ta kologá riba kabes di Aqualectra ku ta obligá nan duna un rekompensa na tur kliente ku sufri interupshon di suministro di koriente. Rekompensa pa daño i perhuisio dor di interupshon di servisio ku un kompania ta brinda ta komun na Hulanda, pero ta algu ku na Kòrsou aki nos no a kustumá kuné i e un responsabilidat ku Aqualectra na e momentunan aki no por karga.

Ta trata aki di e kaso AWB 15/5684 NL:AQLS  kual a trata apelashon di un demanda ku un sivil a entamá kontra e kompania di Aqualectra. Segun e suidadano aki, den vários okashon koriente a bai na su kas, pone ku el a pèrdè su frishidèr, stof,  èrko i últimamente su lèptòp kual e ta uza p’e gana su pan di kada dia kuné.

Na vários okashon e suidadano aki a entamá kaso kontra Aqualectra pero a pèrdè tur e kasonan komo ku segun pólisa di Aqualectra, nan no ta para responsabel pa niun aparato elektróniko ku daña na momentu ku surgi un interupshonnan riba nan retnan di koriente.

Sinembargo, riba e fecha 13 di mart 2016, koriente lo a bai bin bèk, kimando lèptòp di e persona en kuestion, kual nèt n’e momentu ei e tabata trahando riba un proyekto grandi. E suidadano aki, a bolbe entamá kaso kontra Aqualectra, kaminda el a eksigí daño i perhuisio komo ku el a pèrdè henter e manuskrito di su proyekto. Esaki a kousa retrasonan pa ku lansamentu i publikashon di e proyekto ku hopi hende tabata spera. Den un ‘kortgeding’, e suidadano di forma sorprendente a gana e kaso kontra Aqualectra.

Tabata Aqualectra e bia aki ku no a keda kontentu i a apelá e kaso. Den korte di apelashon Aqualectra a bolbe pèrdè e kaso, ya komo tin leinan internashonal ta protehá  e profeshon di e suidadano ku a bira víktima di Aqualectra. Segun e veredikto di korte di apelashon, e proyekto di e suidadano tabata algu grandi di interes general pa komunidat di Kòrsou i den niun sirkunstansia nada ni niun hende no por stroba e proyekto aki di keda kristalisá. Aqualectra no a keda kontentu akinan tampoko i a bai Hoge Raad na Hulanda. Akinan e suidadano a duna un disertashon den su ‘zelf pleidooi’ ku a pone ku e huesnan a bolbe dun’é rason i asta aprobá su petishon pa asina obligá Aqualectra pa drecha su mashinnan, òf kada bes ku koriente bai, e lo tin ku rekompensá kada kas di famia ku sufri interupshon di suministro di koriente ku 250 florin.

 

Mirando ku praktikamente tur dia koriente ta bai den un bario na Kòrsou,  ta premirá ku Gobièrnu di Kòrsou lo tin ku bai yuda Aqualectra drecha nan sistema purá, òf Aqualectra lo tin ku bai saka a lo ménos 60 mil florin tur dia na rekompensa. Esaki lo redundá den un gastu di 1.8 mion florin pa luna, i ta sigur un gastu ku e kompania di utilidat lo no por karga a largo plaso.

E proyekto di e suidadano, kual ta e konosido eskritor Lion Spratt, a keda kristalisá, i su buki ‘Hink’é aden’—no opstante tur e interupshonnan di koriente—a subi merkado tòg, i tur hende por haña esaki kumpra na Mensing’s Caminada.

E profeshon di e eskritor aki ta algu protehá pa leinan internashonal, ya komo su bukinan manera ‘Awa, Habon ku Past’i Djente‘, ‘Niun Pataka‘, ‘Kibra Hacha’ i ‘Hink’é aden’, ta bukinan ku ta kura strès, depreshon i tristesa dor di kousa alegria. Tambe a keda probá ku nan ta sana kurasonnan destrosá, i asta duna hende kompaño emoshonal i seksual den momentunan di soledat. Tur esaki pa un preis hopi mas barata ku sinta bebe alkohòl tur dia pa lubidá doló i tristesa.

P’esei e huesnan a baha riba Aqualectra ku tur peso di lei. Nos lo keda pendiente pa reakshon di Aqualectra riba e kaso aki.

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Privacy Preference Center

Necessary

Advertising

Analytics

Other

Copy Protected by Chetan's WP-Copyprotect.