Pa bisa bo frankamente, yu’i Kòrsou ta yu’i p*ta!

Reading Time: 8 minutes

Pa di promé, e nòmber di e artikulo aki di ningun forma ta representá e bèrdat ni mi opinion riba e pueblo yu’i Kòrsou. Di ningun forma mi ke insinuá ku niun hende ku ta yu’i Kòrsou, ta yu di p*ta. Apsolutamente ku nò. Nan ta pió ku esei. Nan ta mama di tur p*ta. Un yu di un p*ta ta un hende inosente. E no por yuda ku su mama tabata p*ta. Yunan di Kòrsou si no. Nan ta hendenan egoista ku ta solamente wak pa nan mes.

Mi ta bai konta bo tres insidente ku a pasa ku ta splika dikon mi ta haña ku yunan di Kòrsou ta mama di p*ta. Un di nan si, lo mi no por konta b’e ku luho i detaye, pasó ta riba Internèt mi ta. Pushi ku kachó ta lesa tur kos akiriba i nan ta kapas di hiba mi korte pa esei.

E promé insidente:
Mi ta un hende ku ta hopi presis na ora. Si bo traha un sita ku mi pa och’or di anochi, bo mester tei einan fo’i  7:55 PM. Bo yega lat, mi ta bira krou riba bo, pasó ami ta un hende ku no gusta warda. Mi por warda sinku minüt riba bo ku pasenshi. Despues di 10 minüt ya mi beis a kuminsá daña. Si 15 minüt despues di e orario ku nos a palabrá ainda bo no a yega, ami ta bai laga bo. Mi no tin kunes ken  bo ta, mi ta bai laga bo. Ta p’esei mes na Kòrsou mi no ta bai dilanti. Tur hende ta lat riba e lugá aki. Te asta muri nan ta muri lat.

Den siman ei mi a traha un sita ku un dama, den kual mi tabata tin tur espektativa ku e sita ei lo bai kaba den sèks. Mi a baña bon e dia ei, feita mi webunan, bisti mi djòki di suerte, uza mi mihó perfume, i sòru pa mi sali kas ku sufisiente kondon.  Ami ku e dama lo mester a topa pa och’or di anochi na Zuikertuintje. Einan nos lo mester a dal un eiskrim huntu, sinta wak otro den wowo, hasi un tiki ‘voetjesvrijen’ pa despues bai hunga den outo riba e ‘parkeerplaats’. Mi a yega na e sitio 7:54 PM. Mi a keda warda te 8:15 PM i despues mi a bai mi kas. Despues ku mi a bai kas, mi ta risibí un mensahe di e dama 8:21 PM, ta puntra na unda mi ta. Ta ku ken e persona aki a kere ku e ta dil kuné? Ora el a mira ku mi tabata serka di eksplotá, el a kore bin te na mi kas ku dos kuki di Subway pa mi no keda rabiá kuné. E di ku mi ku ta 8:05 PM el a haña chèns di sali kas. Mi ke men si bo sa ku bo mester di dos ora pa feita bo pushi mes no, bo tin ku kuminsá na tempu pa bo kaba. Na momentu ku el a bin serka mi, ni gana di chupa lenga mi no tabata tin mas. Hende ta bisa ku ta ami ta ferfelu, pero ban serio; yu’i Kòrsou tin ku siña kumpli ku palabrashon.

Di dos insidente:
E di dos insidente ta algu ku a sosodé ayera i tambe tin di haber ku e kultura Kurasoleño. Mi tabatin un sita ku un mener ku a ofresé mi un supuesto trabou. El a traha sita ku mi for di djaluna pa nos topa den Punda kuat’or di atardi. Un dia promé mi a konfirmá e sita, i e mener a skohe pa hala e orario di e sita dos ora atras, pues e sita lo a bira seis’or. Mi no a preokupá, i mi a konfirmá. Mi ta yega den Punda for di 5:30 PM, pasó mi gusta ta trempan, i mi a keda kana rònt manera hende ku no tin nada di hasi, djis pa mata tempu. Sinku minüt pa seis mi a yega kaminda nos lo mester a topa, i mi a manda un mensahe pa e mener pa bis’é ku mi tei. E mener ta kontesta i ofresé su diskulpa pasó e lo no por yega. E di ku e no a logra keda kla ku su outo. Mi a hala rosea 10 bia pa evitá ku mi ta manda hende den k*ño. Mi a puntr’é, “Ke men mi a sali mi kas pòrnada?” El a kontesta bisando mi ku el a kere ku e lo a kaba na tempu i p’esei e ta pidi diskulpa.

Ki dònder ami ta hasi ku diskulpa? Por si akaso mi por bai pòmp di gasolin i pidi nan pa yena mi tanki di gasolin bèk ku un diskulpa? Si bo traha sita ku un persona i bo no por yega na e sita ei, bo tin ku laga e persona sa na tempu ya e persona no ta gasta ni tempu ni gasolin pòrnada. Pero Yu’i Kòrsou no. Yu’i Kòrsou no tin kunes ku un k*ño. Tur kos nan ke men ku por drecha ku un “despensa”. Ta bon ku mi no sa ki outo e mener ei ta kore, si no lo mi a bora tur su kuater tayonan i despues ofresé un diskulpa wak si e ta keda kontentu.

Por último:
E último insidente ta esun ku a kibra rekòrt. P’esnan ku lo duda, e kos aki ta un ‘True Story’. Mi no por skibi henter e historia riba Facebook, ta p’esei mi a skibié den e promé kapítulo di mi buki ‘Hink’é aden’. Si bo ke les’é kompletu, ta den e buki ei lo bo tin ku bai busk’é pa lesa. Mi ta kere hendenan ku a yeg’i bai Hulanda kurú kurú lo mester sa presis di loke mi ta bai konta aki.

Tabata aña pasá ku mi ke a bai dal un buèlta na Hulanda, i ku mi tabata buskando un kaminda di keda. Mi a ‘app’ un amiga bis’é di mi plan, i el a invitá mi bin keda serka dje. E no a palabrá nada ku mi, sino solamente bisa mi ku mi ta wèlkòm pa keda kon largu ku mi ke serka dje. Kontentu di mi, mi a drecha mi maleta i bai Hulanda serka dje. Na momentu ku mi a drenta su kas mi a ripara ku e kas ta sumamente fo’i òrdu. Pero komo hende hòmber, mi no a wòri. Siguiente dia ku el a bai traha, mi ke a dun’é un sorpresa. Komo muestra di gradesimentu p’e echo ku el a laga mi keda gratuitamente na su kas, mi a lanta e siguiente dia  i limpia su kas p’e di ariba te abou. Mi a laga su kas keda kasi irekonosibel. Ora ku el a yega kas, mi a pensa ku e lo a bula riba mi, brasa mi, sunchi mi yama mi danki, pasó mi por a mira ku e mes no tabata tin tempu pa limpia kas. Su kas tabata pió ku kushina di restorantnan chines ku MEO sa sera tur siman. Masha sushi mes. Tur kaminda e tin mea, paña i pènti sushi benta abou. Te asta pènti ku kotèks aden e tabata benta abou. Mi a limpia tur kos. Frega tur wea hasi nan limpi limpi. Ora e shon a yega kas, a muhé a kuminsá zundra. E muhé a keda zundra mi hinter anochi pasó mi a limpia su kas, anto pió ainda—for di e dia ei maltrato a kuminsá.  Lo bo kere ta wega, pero ta kos serio. El a bisa mi ku e no gusta hende mishi ku su kosnan den kas i ta p’esei el a rabia.

Mi no ta bai pone potrèt di hende su kas riba Internèt, pero esaki ta djis pa duna bo un idea di kon bruá su kas tabata.

En todo kaso, mi a práktikamente ignorá su maltrato den kuminsamentu, pero mas dianan ta bai, mas pió el a bira te ku mi no por a soportá mas. Mi a bai serka un amiga di mi kont’é e kaso. E amiga mesora a bisa mi ku ta algu hopi komun ku sa pasa entre yunan di Kòrsou ku ta invitá otro bin Hulanda i no ta palabra e kosnan adelantá. El a puntra mi si nos a yega na un akuerdo pa ku repartishon di gastunan di kas. Mi a bis’é, “No, pero ku ami mes a disidí di dun’é algu si pa yuda kubri gastu.” Mi no tabatin intenshon di keda na kas di hende sin yuda kontribuí ku nada. E amiga a puntra mi si ta e shon mes a pidi e suma ei. Mi di kuné ku e shon no a pidi mi nada. Ta ami mes a stipulá e montante ei di bon kurason, pasó niun ratu so e shon no a bisa mi ku e ta kobra mi pa estadia. E amiga di ku mi pa puntra e shon kuantu sèn e ke, pasó hopi chèns ku ta sèn e ta warda yega.

Despues ku mi a bai kas, mi a papia ku doño di kas, i bèrdat ta sèn e shon tabata warda yega. Pero despues ku nos a regla esei i dun’é e sèn ku e tabata spera, e trato a keda meskos i despues asta a bira pió. Pues na e momentu ei mi a ‘app’ un otro amiga di mi na Kòrsou i kont’é di e kaso. E amiga mesora a puntra mi si mi a sèks kuné. Mi di kuné, “Nò”. E di ku mi, awèl purba esei, kisas ta speshi e shon tin. Kisas ta poko ‘inzalving’ e tin mester.

Awèl, promé ku el a yega trabou, mi a rùim òp den su kamber un tiki, pone algun flor aki aya, sende bela aromátiko, dal un baño, i subi su kama ward’é yega blo sunú ku un kondon den mi boka. Ora e muhé a yega, e muhé a bira loko loko. E muhé a kuminsá zuai tur kos—te asta pènti sushi— benta riba mi. E mesun dia ei el a pone mi porta afó. Einan tabata momentu ku mi a bira ‘dakloos’ na Hulanda durante di un vakashon pa motibu di un yu’i Kòrsou.

Ke men niun hende no por bin purba konvensé mi di nada diferente. Yu’i Kòrsou ta mama di p*ta!

Si bo a gusta e historia aki, awèl lo bo stima mi bukinan ‘Awa, Habon ku Past’i Djente’, i ‘Hink’é aden’. Hopi hende ta kere ku mi ta skibi kosnan fiktisio pero den e buki ‘Hink’é aden’ lo bo komprondé presis kon mi ta yega na mi historianan. Fiktisio sigur nan no ta! Ta yen ko’i mas mi sa pasa aden. Lesa mi bukinan bo ta sa.

 

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.