Porfabor, no hasi e kos aki ora bo ta bula den avion!

Reading Time: 5 minutes

Esaki ta algu ku a pasa mi, pero ku mi no a konta boso ainda. Mi lo mester a hinka e historia aki tambe den mi buki ‘Hink’é aden’, pero si mi lo a hink’é, e ora ei lo no a sobra nada pa mi konta boso ora mi no tin nada di hasi.

Eniwee, e kos a kuminsá asina aki:Despues di hopi aña, mi a disidí drenta avion atrobe pa bai hasi un biahe largu. Na momento ku mi a buk mi pasashi pa Hulanda, mi tabata ke un stul pegá ku bentana i den e reinan te dilanti ya asina mi por rèk mi pianan largu. KLM a konvensé mi pa paga 20 dòler èkstra pa mi a reservá un stul te dilanti. Pero riba e plano di e avion ku bo ta mira na momentu di skohe bo asiento, nan no a pinta ku sierto stulnan ta pegá ku e portanan di emergensia, pues ku si bo sinta pegá n’e bentana, bo no ta haña espasio pa rèk bo pia, pasó tin asina un bultu grandi bo dilanti. Mi a paga 20 dòler èkstra pa a sinta sumamente inkómodo den avion.

Pues na momentu di a regresá bèk for di Hulanda mi a skohe pa no reservá un dònder. Mi a simplemente skohe un stul adekuá pa mi na momentu di ‘check-in’ online. Asin’ei mi a skohe un stul pegá ku e gang ya asina sikiera un pia mi por rèk. Ademas, ta hopi mas fásil ora di lanta, pasó mi no mester keda pidi hende despensa. Ora  ku mi a bai den avion mi a ripara ku tabata tin un dama yòn Hulandes ku a reservá un stul band’i mi. Manera el a sinta, mi a sera konosí kuné. Mi a pensa ku hopi chèns e lo ta bai Kòrsou ku fakansi i ku lo ta nèt bon pa mi frei e durante un par di siman. Nos lo por hasi yen kos loko, dushi i inolvidabel promé ku e mester bai Hulanda bèk.

Pero manera mi a konta boso den mi buki ‘Hink’é aden’, mi tin hopi mal abilidat sosial. Pues mi a pensa un wega pa mi hunga kuné ya asina mi por kibra e eis. Mi a mira ku el a kue un deken tapa i hasi manera kos ku e tin pensá di drumi durante di e buelo. Pues promé ku e pega soño, mi a puntr’é si e ke hunga un wega ku mi. E di ku mi, “Nee, ik wil alleen maar slapen”. Mi a bis’é, “Okay, sorry. Ik val je dan niet meer lastig.”

Pero despues di un ratu mi a pensa ku no ta bon pa mi entrega asina lihé. Si tur hende hòmber tabata entrega lihé asina, tur muhé lo tabata soltero. Pues mi a bolbe tek e na su skouder i bis’é ku lo ta great si e hunga un wega ku mi. Nos lo hasi otro pregunta di konosementu general i wak ken sa mas tantu kos. El a keda wak mi ku kara serio i despues bolbe bai drumi. Mi a sinti malu. Mi a sinti mi rechasá i humiá

Mi a pensa un ratu i despues bolbe tek e na su skouder i bis’é “Luister, we gaan een spel spelen. We stellen vragen van algemene kennis aan elkaar. Als je het antwoord op de vraag niet weet, dan moet je me 5 euro geven. Maar als ik de antwoord op jouw vraag niet weet, dan geef ik je 50 euro. Wat zeg je?”

E di ku mi, “50 euro zeg je? Okay, doen we maar.”

Mi a pensa un pregunta difísil pa mi hasié i mi a puntr’é, “Wat is de afstand tussen de maan en de aarde?”

E muhé a keda wak mi ku kara serio, hinka man den su saku i duna mi 5 euro. Mi a tuma e sèn fo’i dje kontentu i bis’é, “Okay, nu ben jij aan de beurt. Stel me een vraag.”

E muhé a puntra mi, “Wat klimt een heuvel op drie voeten, maar komt naar beneden op vier voeten?”

Mi a keda pensa, pensa, pensa. Mi a kue mi lèptòp, subi Google i keda buska. Mi a keda buska e kontestá pa kasi dos ora largu, pasó mi no ke a pèrdè. Mi a lanta puntra diferente hende den avion wak si nan sa.  Mi a puntra tur e stewardessnan wak si nan ta. Mi a asta bai puntra e piloto i e ko-piloto wak si nan sa. Niun di dos no tabata sa. Mi a manda un e-mail pa tur mi amigu i konosínan puntra nan si nan sa. Niun no hende no tabata sa. Despues di kasi kuater ora di frustrashon,mi a hinka man den mi saku, saka 50 euro pa duna e dama. El a tuma e sèn, hink’é den su saku i sigui drumi. Mi a keda wak e tur konfundí, i despues mi a tek e na su skouder i puntr’é, “Zo, wat is het antwoord dan?” El a hinka man den su saku, saka 5 euro duna mi.

Kos serio, no bai buska kòmbersashon ku niun hende den avion. Ami sa sigur ku nunka mas lo mi hasi esei.

Pa mas historia di diferente kosnan ku a pasa mi, buska bo buki ‘Hink’é aden’, optenibel pa solamente 50 florin na Mensing’s Caminada, òf personal serka mi. ‘Awa, Habon ku Past’i Djente‘ tambe ta kontene diferente historia ku sigur lo pone bo hari i drecha henter bo siman. Kòrda ku ‘Niun Pátaka‘ i ‘Kibra Hacha‘ lo keda semper bukinan great i interesante pa lesa.

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.