Hende hòmber por tin speshi pa buki asina?

Reading Time: 4 minutes

Dos aña pasá mi a pidi Aymar p’e lesa mi buki ‘Awa, Habon ku Past’i Djente’ p’e duna mi su opinion honesto riba kontenido di e buki. E di ku mi ku e ta purba les’é, pero ku e no gusta lesa buki. Mi a bis’é ku no ta nada i p’e djis hasi su bèst.

El a bai kas bai lesa e buki i den dos dia e ta puntra mi si mi tin mas. Mi a bis’é nò, i ku ta tuma mi mas ku un aña pa skibi un buki. No ta mané galiña ku ta pone webu tur dia mi ta saka buki. E di ku mi ku nunka el a hari asina tantu lesando un buki, anto e ke mas pa lesa. Mi a bis’é no tin.

Siguiente siman e ta ‘app’ mi puntra mi atrobe si tin mas buki. Mi a rabia i blòk e. E ponementu di preshon ei, ami no por kuné.

Un aña despues mi a desblokié. Manera el a mira mi ‘online’ el a ‘app’ mi bisa mi, “Awoooooo, bo tin mas buki?”

Mi a bis’é ku mi ta bai skibi un mas ku yama ‘Hink’é aden’. Mi a bis’é ku si e yuda mi saka un potrèt pa e ‘cover’, lo mi dun’é un buki asina ku e buki ta kla. For di e dia ei, tur dia e gai aki a keda puntra mi ki dia e buki ta kla. Mi a bolbe blòk e.

Djabièrnè ei mi a desblokié atrobe bis’é ku e buki ta kla. Mi a bis’é ku lo mi top’é djasabra 3or di atardi na Hotèl Trupial pa dun’é su buki. E gai aki a bai drumi warda mi fo’i djabièrnè anochi na e hotèl. Mi a yega Hotèl Trupial djasabra 3or, hañ’é drumi pafó den un tènt WigWam, bistí manera  Cantinflas i ku un pèchi mané esun di el Chavo riba su kabes. Ora el a mira mi ta bin ku e buki el a grita, “Awoooooooo!”.

Kos serio, nunka mi a mira hòmber ku tantu speshi pa buki asina. Anto supuestamente ni lesa e no gusta lesa.


Djadumingo 27 di Mei t’e dia…..
Dia 27 di Mei próksimo porfin e buki tan sperá ‘Hink’é aden’ lo subi merkado. Pareu ku ne, ‘Awa, Habon ku Past’i Djente’, ‘Kibra Hacha’ i ‘Niun Pátaka’ tambe lo ta bèk riba merkado.

(Klek aki pa bo lesa un avanse di buki ‘Hink’é aden’)

Pero warda, promé ku bo sali kas kore rònt Kòrsou mané hende loko ta puntra unda tin e buki, lesa bon pa bo no kore gasta gasolin pòrnada. Sóbadje awó ku ConocoPhillips a pone beslag riba PDVSA, nos tin ku uza kombustibel di forma efisiente. Lesa bon:

Djadumingu 27 di Mei lo tin un ‘Book Sale & Signing Day’ kaminda lo bo por pasa personal i kumpra bo bukinan firmá serka mi. Esaki lo tuma lugá na hotèl Trupial Inn entre 14:00 pa 17:00.

(No bai kana puntra hende n’e hotèl unda tin bendement’i buki, pasó niun hende no sa i bo ta kapas di pone ku nan ta saka ami plus abo pafó. Pues djis sigui e intrukshon akibou i drenta ketu ketu bo kana bin serka mi.)

Na momentu ku bo drenta e hotèl, kana riba e tapeit kòrá (ku mi a laga pone spesial pa bo, pasó bo ta un persona VIP), ora bo yega na e restorant “Rosso” bo ta kita na man robes, i bo lo mira mi. Si bo no mira mi, ta pasó bo wowonan ta será òf pasó bo a yega despues di 17:00.

Preis di kada un di e bukinan (hardcopy) ta Fl. 50,-. Lo tin un regalo pa tur esnan ku kumpra nan buki(nan) riba e dia aki.

E-books
Despues di 27 di Mei, e bukinan lo ta optenibel den e formato digital. Spesialmente pa esnan ku ta biba den eksterior, esaki ta hopi kumbiniente. Preis di e E-book lo ta Fl. 26.55 pa un. ($14.75 òf €12 mas o ménos. Tene kuenta ku preis di Euro ta fluktua.)

Korda bon, esaki nan lo bira optenibel despues di 27 di Mei próksimo. Bo ‘app’ mi puntra mi si bo por haña un e-book awe, e kontesta lo ta, “Si, despues di 27 di Mei.”

Pòst buki ‘hardcopy’
Personanan den eksterior ku tòg ke un buki ‘hardcopy’ por laga mi sa, i mi lo por pòst esaki. Preis pa pòst un (1) buki pa Hulanda i demas paisnan den Oropa ta 20 florin. Preis pa pòst dos (2) buki ta 25 florin. Si bo ta interesá den esaki, manda mi un e-mail na lionel_326@hotmail, i mi lo duna bo un kuenta di banko Oropeo pa bo por hasi e pago. (No tin gastu di transakshon.)

Preis pa pòst buki pa Aruba i Boneiru ta 10 florin via Divi Divi.

Si bo ta biba na kualke otro parti di mundu, manda mi un mensahe pa mi wak kiko mi por regla. Si bo ta na Syria, Nòrt Korea, Israel, Palestina, Zimbabwe òf Venezuela, e ora ei si mi no por yuda bo.

Mensing’s Caminada
Entrante 31 di Mei tur e bukinan lo ta optenibel na Mensing’s Caminada. (Klek aki pa mas informashon di kada un di e bukinan. )

Segun mi, mi a splika tur kos. Si mi a lubidá algu, òf si bo tin pregunta manda mi un mensahe riba Facebook òf manda mi un e-mail riba e adrès ariba menshoná!

Mi ta warda bo 27 di Mei próksimo na Trupial Inn!

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.