I.B.F.F. su evento ‘Gala of Beauty’ a laga mi keda mal di shòk!

Reading Time: 8 minutes

 Djadumingu último e organisashon I.B.F.F. tabata tin su evento ‘Gala of Beauty’ titulá “Andale, Andale Mexico” na Curaçao Renaissance Hotel.

Mi a keda invitá pa presensiá e evento aki, kual mi tabata tin espektativanan haltu p’e, komo mi sa ku e persona na kabes, esta Aubrey America, su eventonan ta di alto nivel. Mi ta suponé ku e sa ku mi ta un persona sumamente opservativo i krítiko, pues mi ta kere ku e sa ku si ami presensiá e evento aki, lo mi bai kas despues i skibi un relato krítiko riba tur e kosnan ku mi a opservá. Prinsipalmente kosnan ku a shòk mi, mi no por keda ketu riba nan. A ni maske e paga mi, mi no ta keda ketu riba nan.

Por sierto, mi a mir’é bai ‘live’ ayera riba Facebook ta gaba kon bon e evento tabata. El a yama danki na tur hende—tur hende ménos ami. Mi sa ku mi no a yuda ni kontribuí ku un dònder, pero tòg. Semper bo tin ku yama mi danki, sino mi ta kuminsá pulushá mesora.

Por lo general, e evento tabata bon organisá. Aubrey meresé un Grammy Award pa esei. Mi problema ta mas bien ku detayenan ku no tabata bon kla i ku a kousa sierto mal kontentu serka mi.

Mi tin ku bisa ku esaki ta e di dos bia ku mi ta presensiá un evento di Aubrey America, pues mi no por evitá di hasi sierto komparashonnan entre e promé i e di dos evento. Kosnan ku a hala mi atenshon tabata lo siguiente:

1. Orario
Bia pasa ku mi a bai I.B.F.F. su promé evento, mi a yega na ora, pero e evento a kuminsá lat. Ami no ta hende ku pasenshi, pues mi no gusta warda. E bia aki pa evitá ku mi ta sinta warda, mi a disidí adaptá mi mes i bai mas lat. Grandi tabata mi sorpresa ku nèt e bia aki, e kos a kuminsá na ora. Ora mi a yega nèt tabata tin un banda di mariachi ku a kaba di toka. Mi a pèrdè nan presentashon kompletu. A ni un “Ayayaiii, canta y no llore” mi no por a lòs huntu ku nan.

Mi ke men disidí si, Aubrey. Sea bo ta kuminsá lat òf bo ta kuminsá na ora.

2. ‘Dresscode’
Riba e invitashon a ser spesifiká ku e dresscode pa e evento ta “Gala”. Pa bo no kere ku ta gaña mi ta gaña, ata un screenshot aki:

Pa mi no bai mal bistí, mi a Google e ‘dresscode’ aki, pa mi sa sigur kon mi mester ta bistí. Mi a mira ‘gala’ pa hende hòmber ta enserá un set di flus òf Tuxedo ku dashi i sapatu pretu na pia, limpi i bon lombrá. Esei a pone ku mi a sali kas mesora bai Wulfsen & Wulfsen na Promenade, pa mi kumpra un trahe adekuá, pasó den mi kashi di paña mi no tabata tin niun trahe di gala. Mi a kumpra un Tuxedo di 1200 florin, spesialmente pa e evento aki, huntu ku un sapatu di 300 florin, pues total mi a saka 1500 florin pa evento di I.B.F.F. aki.

Ora mi a yega n’e hotèl, mi a topa par di dama sumamente bunita bistí. Mi a sinti bon, mi a sinti mi great ku mi a hasi e invershon ei, pa mi tambe keda bon bistí.

Pero ora mi a drenta den e sala, mi a topa yen gai kabei bruá, ku flanèl na kurpa i ku djins ‘driewart’ kibrá kibrá bon pèrtá na kurpa bistí. Algun di nan tabata tin djins asina pèrtá ku mi por a mira algu manera un banana ta marka na altura di nan kiel, miéntras ku otronan tabata tin algu di tamaño poko mas chikí, manera un mini berehèin ta marka. Na nan pia nan tabata tin kèts normal bistí, anto algun di nan pa kolmo sin mea. Tabata tin asta un persona den un bèrmuda shòrt i un kòpi di Starbucks Coffee den su man. Mi tabata e úniko persona den e sala ei den un Tuxedo. Si e definishon di Gala a kambia masha ten, mi ta haña nan mester a informá mi di esei. Siguinte bia, mi ta bai den mi zwèmbruk.

3. “L.A.P.D. all over da place!”
Tabata tin algun dama i kabayero na pretu bistí ku flanèl di L.A.P.D. Por si akaso bo no sa, L.A.P.D. ta nifiká Los Angeles Police Department. Bo ke splika mi pa kiko un evento di Tiner mester tin asina tantu polis merikano? Por poko mi a pensa ku ta Donald Trump ta sintá dilanti komo Hurado. Sto’i pompa mi.

Pero despues di un ratu mi tabata kontentu ku e polisnan tabata tei pasó bo mes sa, mi sa skibi yen ko’i loko riba Facebook, anto yen bia vários hende sa tuma mi na malu, menasá mi ku nan lo bati mi ku yen kos. Pues durante henter e show mi a keda pará serka di e polisnan, ya ki ku ta pasa mi ta grita “Ousilioooooo”, pa nan bin yuda mi mesora. Ami den mi Tuxedo di 1500 florin, no ta bai para bringa ku niun hende. Loko bo ta?

4. Drechament’i kurpa
Algu ku sigur a hala mi atenshon ta e kantidat di hende muhé ku tin kurpa drechá. Muhénan ‘jong en oud’ tin kurpa drechá aworakí. Mi a asta mira un Oma di 70 aña ku par’i tete mané bòm nuklear koreano i par’i sanka manera Mount Everest ta subi su lomba bai ariba. Un persona konosí ku tambe mi a mira tabata Abogado Saran Inderson. Si mi no ta robes, e tabata forma parti di Hurado. Saran semper tabata tin bunita kara i figura di kurpa. MI no ke bisa ku e tambe a drecha kurpa, pasó mi no sa. Pero su kurpa tabata notabel si. Sea el a kita barika òf pone sanka, òf e tin un hòmber ku ta dal e ku un bon martin na kas. Mester ta un di nan si.

5. E kuminda
Delaster bia ku mi a bai, mi a risibí dos bòn di kuminda na porta. Ora hamber a dal mi, mi a pasa na bar pa tuma algu di kome. Mi a risibí un pastechi mesun grandi ku pénis di Kim Jong-Un i algu mas ku mi no sa ta kiko, pero ku tambe tabata chikí. Mi a her’i dal abou eiden di hamber. E bia aki, mi a bai bon prepará. Mi a kome bon na kas ya mi no ta kai flou riba hende eiden, pero nan a sorprendé mi. Tabata tin un bar bon ku stòk ku kumindanan Mehikano. Nan tabata tin Tacos, Burrito, Enchillada, Quesadilla, Guacamole, Tamales, Tostada, Churros, Guevos Rancheros i diferente otro mas. Mi a kome te lubidá mes ku tabata tin un sertámen riba esenario. Bo mes sa, ora ami mira kuminda, mi ta namorá mesora. Mi a keda pará na bar fo’i kuminsamentu te final. Esaki tabata un burrito ku mi a kome. Maestral e kos aki a dal.

6. E partisipantenan
Mi no tin nada di keha riba e partisipantenan. Nan tabata bunita bistí, nan presentashonnan tabata bon i……..Wèl frankamente mi no a pone masha atenshon riba nan, pasó mi tabata kompletamente distraí dor di e holó di e kuminda. Loke si a hala mi atenshon tabata e sabiduria di e kandidatanan. Mi ta bisa esaki, pasó na momentu ku e maestronan di seremonia tabata hiba un kombersashon ku e kandidatanan, un di e kantidatanan a kuminsá yora. E yùfrou aki tabata bon na altura ku kasi den tur kompetensia, si bo ke gana, bo tin ku konvensé e hurado ku algu konmovedor. Pues e kandidata aki a kuminsá konta kuantu e stima su mama, te ku el a kuminsá yora. Di mes, yoramentu ta èkstra punto. Ora e otro kandidatanan a nota ku e huradonan a duna e kantidata en kuestion aki èkstra punto pa su historia konmovedor, nan tur a kuminsá yora pa nan tambe haña èkstra punto. Dado momento mi tampoko no por kontené mi lágrimanan mas, i mi tambe a kuminsá yora, pasó tur Tacos i Burritos a kaba.

Keda pendiente pa mi buki ‘Hink’é aden’, ku lo sali e luna aki riba merkado. Mi tin sigur ku e buki aki lo bai pone bo hari, drecha bo dia, bo siman, bo luna i hinter bo aña. Pa esnan ku ainda no a lesa ‘Awa, Habon ku Past’i Djente’—e buki kómiko mas bendí aki na Kòrsou—esaki tambe lo ta bèk riba merkado fin di luna aki.

 

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV
Copy Protected by Chetan's WP-Copyprotect.