Ta sumamente importante pa bo sa ku…..

Reading Time: 4 minutes

 Mi buki ‘Hink’é aden’ ta riba laman na kaminda pa Kòrsou. Esaki lo bira mi di kuater buki na Papiamentu ku mi a skibi i publiká kompletamente riba mi mes.

Mi ta haña ku bo mester ta orguyoso di mi. Dikon? Pasó mi a logra saka kuater buki sin tin un trabou figo i sin niun respaldo finansiero, pues kompletamente riba mi mes forsa i kreatividat. Mi mes ta skibi, mi mes ta hinka e bukinan den otro i mi mes ta diseñá e portadanan (ku yudansa di Aymar Profas). Aki aya mi a konta ku algun yudansa ku semper mi ta apresiá. Por ehèmpel RidderCargo e bia aki a ofresé pa transportá mi bukinan di Merka pa Kòrsou, i Biblioteka Nashonal semper a publiká e lansamentunan den korantnan lokal. Mi mes ta hasi merkadeo na mi propio estilo sin gasta miles di florin na propaganda den korant i na radio èts.

Tur loke mi ta konta kuné ta solamente sosten di esnan ku ta kumpra mi bukinan. Esnan ku kumpra mi bukinan ta hasié libremente pasó nan ke. Mi no ta pone pistol na kabes di niun hende pa kumpra mi bukinan. Esmas nunka mi a pidi niun hende pa “like” ni “share” nada ku mi a publiká. Mi no ta manda mensahe privá pa niun hende, ni riba Facebook, ni riba WhatsApp, pidi pa niun hende “share” nada pa mi. Esnan ku a hasi esaki a hasié simplemente pasó nan ke.

Skibimentu no ta hasi mi riku. Tur loke e ta duna mi ta frustrashon, doló’i lomba (dor di sinta hopi), carpal tunnel syndrome i gastu. Na momentu ku abo gusta loke mi a skibi (si esei sosodé) mi ta haña un telep di plaser.

Hink’é aden’ ta un buki ku historianan real i totalmente insolito den dje, pero ku mi ta konta bo di un forma sarkástiko i alegre. Ta kosnan ku realmente mi a pasa aden, ku probablemente lo bo no kere si mi bisa bo ku nan a pasa di bèrdat. Hopi chèns ku lo bo hari miéntras mi ta konta bo di mi frustrashonnan, tristesa i mi mala suerte ku mi tin den bida. Si, mi sa ku lo bo hari. No hunga ròl hasi mané ku bo no sa hari ora hende pasa den trastu. Hende gusta hari mal eksperensia di otro. Mi kana, slep kai, dònder abou mané patia bèrdè riba mi atras, hende lo hari mi, graba mi pone mi riba ‘social media’, despues bin puntra si mi ta okay. Asina ta hende i mi a kustumá ku esei kaba. Pues mi ta bai duna bo pèrmit pa hari e mala suerte ku mi tin den bida. Si bo lesa henter e buki sin hari a ni un bia, mi ta duna bo e sèn bèk, i te asta benta un kos riba dje pa bo molèster.

Delantá mi ke pidi mi diskulpa si tin un hende ku mi a ofendé den e buki. Mi a pone nòmber i fam di hendenan ku tabata envolví den historianan ku mi ke a konta, i tambe reakshonnan di hendenan ku sa reakshoná riba mi postnan riba Facebook. Mi no a pidi pèrmit, pasó hende gusta ninga mi ora mi pidi pèrmit. P’esei mi a hasi mi kos sin pidi pèrmit. Mi ta spera bo no rabia.

Preis di buki!
Mi bukinan (Kibra Hacha, Awa, Habon ku Past’i Djente, Niun Pátaka i Hink’é aden) tur ta duna bo plaser, p’esei mi a pone tur na e preis uniforme di 50 florin pa unu (hardcopy). Pues kuminsa pone e sèn ei un banda. Pa e mesun 50 florin ei, ami ta haña solamente trinta minüt di plaser serka un di e 2500 ‘tragomeisjes’ ku tin na Kòrsou. Anto esei ta pa un ròndu so. Si mi ke bai un di dos ròndu, mi tin ku bolbe paga. Mi bukinan, si bo lesa nan mané haragan, lo bo tin mínimo dos dia di plaser. Si bo lesa entre un pa dos kapítulo pa dia, lo bo tin mas o ménos un siman di plaser. Si bo ke bai un ròndu mas, e lo no kosta bo nada. Pa 50 florin, mi ta haña esei un bon dil, òf no?

Lo no keda mi straño si, si bo lesa e artíkulo aki, i despues bin puntra mi tòg si ‘Hink’é aden’ ta na boekhandel kaba, ki preis mi bukinan tin òf ku si bo por haña un buki grátis. Mi a kustumá ku hende kaba!

Danki na tur e personanan ku mi por a konta ku nan yudansa pa ku e buki ‘Hink’é aden‘ entre otro Ydelllienne Heerenveen, Aymar Profas Photography, Dayenne Gouverneur, Fabienny Thielman i tambe RidderCargo Services.

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV
Copy Protected by Chetan's WP-Copyprotect.