Shete tep pa yuda bo filma mihó ku bo telefòn!

Reading Time: 6 minutes

 Telefònnan selular awendia ta karga kámara ku diferente karakterístikanan sumamente avansá kual ta hasi posibel pa abo traha videonan ku kalidat relativamente haltu. Pero meskos ku sakament’i potrèt, no ta e kámara ta saka bon potrèt, ta esun tras di e kámara mester hasi su trabou bon. Anto mi sa mira par’i video riba Internèt ku mi ta puntra mi mes, ta dikon hende ta filma malu asina, siendo ku nan tin un bon telefòn ku bon kámara den nan man?

Prinsipalmente ora hende ta filma bòmbòshi pa pone riba Internèt, esun ku ta wak e video ke mira kos bon filmá. Sino, e video ta kousa nèrvio ora ku bo ta mira ku e bòmbòshi ta bira kayente, pero esun ku a filma a filma manera makaku ku tabata hunga ku un telefòn miéntras e tabata grawatá su webu. Anto esei ta daña tur e efektividat di bo video. Pues aki mi ta bai duna bo algun tep, kon pa bo krea mihó videonan ku bo telefòn:

1. Tene e ko’i k*** horizontal!
Por fabor, ora bo ta filma, stòp di tene e telefòn vertikal (portrait). Mi no sa ken a siña bo esei, pero laga pa awe ta último bia ku bo ta tene e telefòn vertikal pa filma algu. E mihó manera pa bo tene e telefòn ta horizontal (landscape). Di e forma aki e video ta sali di un manera ku e miradó por wak e ‘full size’, riba kua aparato ku e ke, sea telefòn, tablet, kòmpiuter òf asta televishon.

2. Tene e telefòn stabil!
Bo sa kiko ta ‘na mi nervio? Ora mi mira hende graba kos, anto e imáhen ta asina instabil ku bo tin ku fòrsa bo wowo pa mira loke ta pasando. Bo por kana i filma, pero purba tene bo man mas stabil posibel. Kámaranan un poko mas sofistiká tin loke nan ta yama ‘image stabilization’, pero si bo man ta keda sakudí mané drogadikto ku tin 24 ora sin dal su koka, e ora ei e imáhen ta keda sakudí tòg. Konsentrá riba loke bo ta hasi i purba tene bo man mas stabil posibel!

3. Kita bo man for di e mikrofon.
Mi ta imaginámi ku hopi hende no sa mes unda nan mikrofon di telefòn ta sinta, pero si bo ke filma bòmbòshi pa hende mira riba Facebook, bo tin ku buska esei pa sa, pasó si bo dede ta tapa e mikrofon ta mesun leu nos a keda. Mi lo no ta tende e bòmbòshi ku ta pasando na drechi si bo dede ta tapa e mikrofon.

Tambe bo tin ku tene na kuenta ku e mikrofon ta den e telefòn. Si bo tin un rench’i dede bistí por ehèmpel ku ta keda dal den e telefòn, ta yen zonido mahos ta sali den bo video. Train e kosnan aki pa ora bo tin ku graba bòmbòshi, bo hasié na drechi pa hende mira.

4. Wak bo ángulo bon.
Si bo ta den un multitut di hende, bo tin ku wak si no tin hende pará bo dilanti ku kisas ta stroba bo di filma e kos ku bo ke filma. Tambe si bo ke kambia di ángulo, evitá di keda zuai bo telefòn sin fiha riba e loke bo ke filma. Hende mester di mínimo sinku sekònde pa por ‘focus’ riba un obheto den un video. Bo keda zuai e telefòn di robes pa drechi ta iritashon so bo ta kousa. Si bo ta muchu eksitá pa filma, i bo keda zuai e telefòn bai bin den bo hansha pa filma tur kos, e persona ku ta wak e video no ta mira e loke bo a filma bon tòg. Tambe, evitá di filma suela. No ta e suela bo ke filma tòg? Si bo tin ku move di un distansia pa otro, pone pousa, i despues move, òf tene e telefòn di ‘focus’ riba algu otro ku no ta suela. E kos ei ta keda hopi fastioso.

Si bo ke kambia di ángulo òf di sitio, ta rekomendabel primi pouze, i despues move di sitio. Esaki ta si bo ke tin e video tur ta un, sin ku bo ke bai sinta editá e video despues.

5. Klaridat
Lo mi apresiá bo esfuerso si bo ke filma dos pareha ta sèks den mondi, pero si ta muchu sukú ku mi no ta mira nada, laga e kos ei para numa. Wak bo klaridat bon promé bo filma. Lógikamente si bo ke filma un pareha ta sèks anochi den mondi, bo no por sinta pone efekto di lus ku kos, (a ménos ku nan mes ke) pero otro kaminda nan si, wak e lus bon, wak pa muchu solo òf otro lusnan  no ta dal den e lèns, i si abo ta mira silueta den e pantaya, probablemente ta esei e miradó lo mira tambe. (A ménos ku ta esei ta bo intenshon.)

6. Sera bo snùit
Mi por komprondé ku no ta un video profeshonal bo ta trahando, pero tin ora esun ku ta filma ta keda papia òf hari i e ta iritante pa esun ku ta wak e video. Si bo ta filmando un pelea for ehèmpel, evitá di keda grita “HOOOOOODEEEE”. Esei tambe ta hopi iritante. Bo sa tende kamarógrafonan di TeleCuraçao òf TVDirect ta grita òf ta hari miéntras nan ta filma? No tòg? Bo no mester igualá nan kalidat, pero purba imitá nan sikiera.

7. Uza ‘video editor’.
Si bo a filma un video di 10 minüt, siendo ku kisas ta 3 minüt so di e video tin kos interesante aden pa wak, uza un ‘video editor’ pa saka partinan no esensial afó. No publiká un video kaminda dos hòmber a keda bati boka nuebe minüt largu, anto e pelea mes a dura un minüt. Ban serio ke kos nan. E hende ku ta wak tin mas kos di hasi.

Mi ta spera e tepnan aki yuda bo krea mihó kalidat di video. E bia aki mi no ta bai hasi propaganda pa mi bukinan ‘Kibra Hacha’ ni ‘Awa, Habon ku Past’i Djente’ ni ‘Niun Pátaka’, pasó e tópiko no tin nada di haber ku e bukinan aki. Mi no ta ni menshoná nan nòmber, ni bisa ku bo por haña tur tres na Mensing’s Caminada, pa bo no kere mes ku ta buki mi ta purba bende bo. Mi a skibi e tepnan aki simplemente pasó mi ta mira hende ta traha pari video ku ta traha riba mi nèrvionan. Fo’i ora mi mira nan tin e telefòn vertikal ten’é ya m’a nèrvia kaba. P’esei mi a skibi e artíkulo aki pa wak si mi por yuda elevá bo abilidatnan filmatográfiko. Mi ta spera ku di awe pa dilanti mi mira progreso den kalidat di bo videonan.

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.