M’a bin pa ‘sirbi e pueblo’!

Reading Time: 8 minutes

 Un palabra ku polítikonan ta uza hopi ta ‘sirbi pueblo’. Tur partido ku lanta ke sirbi e pueblo. Kada un ke sirbi e pueblo den nan propio forma. Tin di nan ta bai laga trabounan lukrativo pa asina nan por drenta polítika pa ‘sirbi pueblo’, otronan ku a frakasá den estudio, trabou i bida en general ke bin salba nan mes sirbiendo e pueblo.

Emily de Jongh Elhage semper a bisa “ta pa e pueblo eifó mi ta hasié.” El a sirbi pueblo manera su konsenshi a bis’é ta bon pa hasi. No ta muchu kla ku si e pueblo a keda “blij” ku su sirbishi.

Anthony Godett a bisa un bia ku ta “sirbidó di pueblo” e ta. E ke sirbi pueblo asina tantu, ku ora e pueblo no vota p’e, e ta rabia bai sirbi yuana. Pero ketu bai su kurason ta bati p’e pueblo i e no ta entregá!

Gerrit Schotte a lanta MFK hinkando miónes di florin den kampaña pasó e kier ta “Mas serka di bo”. Sinembargo hopi hende no ke mira Schotte sirbi nan, pasó segun nan Schotte ta ruman dje hòmber kòrá ku rabu ta kologá na su atras i dos kachu riba su kabes. Miéntras tantu, e tin hopi hende konfundí, pasó na 2010 e di ku a ni maske bin terser guera mundial, niun hende no por para elekshon, pero awó si ta dispuesto na regalá tur su djòkinan na gobièrnu Hulandes, basta nan para elekshon pa asina e por sirbi e pueblo sin mester hinka miónes atrobe den un otro elekshon. Mester bisa ku tin hende ta kere ku ta Schotte ta tras di e último temblornan ku Kòrsou a bin ta sinti, pa motibu ku un desaster di naturalesa lo ta e úniko motibu ku lo por para elekshon!

Charles Cooper a retirá for di polítika, pero e di “semper lo mi keda disponibel pa sirbi e pueblo.” Cooper a lanta MAN fo’i morto, te tabata na kaminda pa hib’é graf bèk. Pa esei no sosodé, el a hala atras i lanta partido PAS mas lihé ku Hesus a tuma pa resusitá. No ta muchu kla kiko a pasa ku partido PAS, pero Cooper ta haña den MFK tras di un lider ku mas tipo, e lo tin mas chèns di por sirbi e pueblo.

Miéntras tantu Hensley Koeiman ke sirbi e pueblo mustrando su humildat i karisma. Pero falta di konosementu ta pone ku ainda e no por sirbi e pueblo a ni un hòstia seku!

A mata lider di Pueblo Soberano pasó nan a haña ku e ta dividí e pueblo enbes di sirbié manera tur e otronan ta hasi. Anto fo’i dje dia ei e partido a bin abou mas lihé ku falkon peregrine. Mester bisa ku e motibu ku nan a kita sosten for di e gobièrnu último ta komprendibel i mi ta duna nan rason, solamente ku pa sierto soberanonan, no ta masha kla e motibu ku nan a bai djòin e bloke ku presisamente Wiels a kore limpi bai laga nan promé ku a likid’é. Opviamente nan gana di sirbi pueblo ta asina grandi ku nan no ke keda afó!

Amparo Dos Santos a bisa bon kla ku e si a bin pa sirbi e pueblo. E no tin mester di nada, ya komo e tin 50 mion dòler riba su kuenta di banko. Sinembargo t’e mes a pone hopi traba pa ku konstrukshon di hospital nobo pasó e kemen ku e tereno ta di dje. Mester wak bon ta den ki forma e ke sirbi e pueblo, pasó e partido yama “Kòrsou di nos tur” pero kisas e kemen ku Kòrsou ta di dje so.

Eugene Ruggenaath a sali for di polítika pa motibu di famia, pero awó su yuchi chikitu a bis’é “Papa, bai bèk bai sirbi e pueblo.” Parse k’e famia ta preferá Eugene keda leu fo’i kas.

Eugene Cleopa a kue asiento di MAN bai kuné na interes di e pueblo. El a drenta PAIS bira “gai di tur ora” pa sigui sirbi e pueblo. Awor ku PAIS ta ‘Rest in Peace’ el a regresá MAN bèk pasó ainda e no a kaba di sirbi e pueblo. Tin hende ta puntra si MAN konosé algu ku yama “dignidat:, pero ya…..aparentemente ora bo ke sirbi pueblo, bo no mester tene rèspèt pa bo mes.

Glenn Sulvaran i Jose Jardim a haña ku nan a sirbi pueblo demasiado kaba. Awor nan ta bai sirbi nan mes poko.

Eduard Braam ta sirbi pueblo na un forma ku niun hende no ta komprondé. Algun ta bisa ku e ta preferá sirbi mucha.

Gassan Danawi niun hende no ta komprondé si el a bin pa sirbi e pueblo òf trese Curastars den Parlamento.

Steven Martina a hasi su regreso den MAN pasó e di “Ta mi tata a bisa mi ku awor a yega ora pa sirbi e pueblo.” Lo ta bon si e por splika kon e tin pensá di gana voto di tur e hendenan ku el a laga kòrta nan awa i koriente tempu e tabata na Aqualectra. Bon ku MAN no a hasié lider di e partido pasó tin hende no ke mir’é a ni pintá.

Suzy Römer di ku masha ten e n’ ta mete ku polítika. E di ku e tabata den su kantor ta gana su bon plaka. El a asta hiba Wiels korte, pasó Wiels tabata mòrs kuné polítikamente, pero Suzy mes a keda straño konbin el a pèrdè e kaso ei, i wes a bis’é bon kla “fo’i ora bo ta atendé ku asuntunan polítiko, ta ko’i mòrs kuné bo ta”. Pero partido a aserk’é p’e sirbi e pueblo te ku el a bai laga nan pasó nan no ke a hasié lider p’e sirbi e pueblo mas na su smak. Awó parse ku algun hóben a aserk’é pa e yuda nan sirbi e pueblo, i awó nan ta bai PIN e delaster depchinan ku pueblo a sobra.

Humphrey Davelaar a rekonosé ku Suzy a lastr’é den elekshon, i a konfirmá ku lo retirá komo lider despues di e periodo di gobernashon. Pero awó ku gobièrnu a kai, Humphrey no ke skit. E kemen ku el a stèns ku e periodo di gobernashon lo a dura kuater aña i no sinku luna. Komo tal, e ke sirbi su kara di pòrkchòp na e pueblo un biaha mas komo lider di partido Nashonal.

Mester bisa ku Partido Demokrat a mustra di tin hopi perseveransha. Tur fórmula nan ta buska pa por logra sirbi pueblo den Parlamentu. Tur sort’i strategianan ta purba bin kuné. Aña pasá nan a bin ku partido tur na hende muhé, kual a hasi mi hopi preokupá pa motibu ku si akaso si lo a yena parlamento e ora ei nos lo tin yen parlamentario ku ke sirbi pueblo, pero ku no ta papia ku otro. E bia aki atrobe nan tei purba nan suerte ku un shon ku mi no konosé. Hopi sèn pa tira afó nan tin en todo kaso, djis pasó nan ke sirbi e pueblo!

Marylin Moses a skapa ku el a bai laga PAIS, sino e tambe lo ta mesun “Rest in Peace” ku Alex Rosaria. Pero e pregunta ta keda ta den ki forma e ke sirbi e pueblo, pasó algu ku e shon ei ta bon den dje ta “konstatá morto”! Ta Moses mes polis mester a yama pa konstatá morto di partido PAIS.

Jacintha Constancia a zembla Giselle Mc.William un bon wanta na nòmber di e pueblo. Mester bisa ku hopi hende a kondena e akto aki, sinembargo ta danki n’e wanta aki hopi hende a haña interes den polítika. T’e wanta aki a pone ku hopi hende a bin siña palabranan nobo manera parlamento, reunion públiko, disertashon èts. Elsa Rozendal ta e promé persona ku a sali na defensa di señora Mc.William pero tur loke ami ke sa ta kiko tin entre e i direktor di UTS. Kisas ta di eibanda e fondonan ta sali pa por sirbi e pueblo ku e vakaturanan, pues mi no mester reklamá!

Awor tin un partido nobo liderá pa Ydelienne Heerenveen ku parse ta bin bende Vibrator ku Dildo pa asina e pueblo por sirbi su mes. Pero Omayra Leeflang a bisa bon kla ku esaki ta inaseptabel. Leeflang ta haña ku si di bèrdat partido PUSH ke sirbi pueblo, nan tin ku parti Vibrator ku Dildo pòrnada, anto el a pidi Ydelienne pa reservá un Dildo pretu di 20 inch p’e!

E pueblo mes no sa si e ke wòrdu sirbi òf no. Lesando loke tin skirbi ariba, bo mes por komprondé ta dikon e pueblo no mester di sèks mas. Gobièrnu mes ta ‘kue’ nan tur dia sin vaselin. Hopi hende ta kana tur dia ku nan atras tur feilá. Mi ta spera e pueblo klara si, pasó dia 28 di aprel próksimo e tin ku disidí si e ke sigui wòrdu sirbi òf no.

 Ta bon pa bo sa ku dikshonario polítiko ta definí e palabra “sirbi pueblo” di siguiente forma:

Sirbi pueblo (verbo):
Tuma hende hasi pendeu pa asina bo hode nan bida i di henter nan famia gradualmente  pa bo propio benefisio.

Si bo ta sinti ku e polítikonan ta strès bo tur dia, mi ta rekomendabo pasa Mensing’s Caminada wak e buki “Awa, Habon ku Past’i Djente.“. E buki ei ta santu remedi kontra preshon, strès i tenshon!

Urólogo Dr. Isa ta rekomendab’e!

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.