Si bo ta hasi e kosnan aki, bo tin miedu di ekspresá bo emoshonnan!

Reading Time: 11 minutes

 M’a yeg’i tende un hende bisa un bia “Hende muhé ku pasa den hopi doló despues ta haña kurason di heru.” Esaki tabata despues ku algun hòmber tabata diskutí tokante asuntunan di relashon, kòrtament’i orea, hòmber ku ta faya ku muhé èts. Kiko abo ta pensa? Hende ku pasa den doló, enrealidat ta bira fuerte? Òf nan ke laga bo kere ku nan ta fuerte?

Hopi hende ta kere ku ora un hende dal sera emoshonalmente ta señal ku el a bira fuerte. Siendo ku esaki ta nèt kontrali. Nos tur komo hende tin vulnerabilidatnan, pero hopi hende ta skohe pa skonde esakinan. Ku nan rason, pasó esaki ta partinan di bo persona ku otro hende por uza pa lástima bo kuné. Pero si bo ta skonde bo vulnerabilidatnan pa un persona ku bo ta den relashon kuné, òf ku bo ta siña konosé pa asina bosnan por forma un konekshon pa despues yega na un relashon, bo ta simplemente poniendo e relashon na peliger pa finalmente e yega na un frakaso. Hende ku ta skonde nan vulnerabilidat ta esnan ku tin miedu di doló, probablemente pasó nan a yeg’i pasa den dolónan ku nan no por a prosesá òf ku nan a tuma hopi tempu pa pasa riba dje, por lo tantu nan lo evitá tipo di dolónan asina. E ta manera piká di lisimbein. Si bo sa kon duru e bestia ei ta pika, lo bo no ke pa un piká bo nunka mas.

Pero komo ser humano, nos tur ke tin un relashon saludabel, un persona ku nos por kompartí bida i emoshonnan kuné, sinembargo, si bo ta un persona emoshonalmente será ku miedu di ekspresá bo sintimentunan i ku miedu di doló, hamas i nunka lo bo por ta den un relashon real ku lo tin éksito, dor di defensanan ku lo bo keda uza pa evitá ku e persona lo husga òf lástima bo. Ademas, pa sierto di nos, un relashon emoshonalmente friu ta manera un standard, debí ku hopi di nos a mira esei komo ehèmpel di nos mayornan. Hopi di nos mayornan a biba pa hopi tempu den  un relashon emoshonalmente friu, no demostrativo i ku kisas a keda ku otro djis pa mantené e famia huntu.

Den mi buki ‘Niun Pátaka’ mi a splika ku skonde pa dolónan emoshonal hamas i nunka lo hasi bo fuerte, i si bo hasi esaki nunka lo bo por tin un relashon satisfecho tampoko. Siña kon pa pasa mas lihé dor di doló emoshonal ta loke ta hasi bo realmente fuerte i asina yuda bo yega na un relashon realmente stabil i satisfecho, lógikamente basta bo skohe e persona korekto.

Si bo ta skonde pa bo emoshonnan ta nifiká ku bo ta reprimí emoshon. Bo ta evitá di ta emoshonalmente ekspresivo pa motibu ku bo tin miedu òf tiki komprenshon di lokualnan ku bo ta sinti òf miedu di perhuisio. Den kasonan asina un persona lo ke aparentá di ta un persona intelektual, tòf, sin emoshon òf no emoshonal (fuerte den bista di otro), no empátiko i ku no ta sinti mashá.

Tur dia mi ta mira hendenan ku ta reprimí nan emoshonnan. Kon mi por sa ku nan ta skonde nan emoshonnan? Awó mi tei siña bo kon mi ta mira nan i asina bo tambe lo por rekonosé nan, plùs pa bo tèst p’abo mes si bo ta suprimí emoshon:

 1. Nan ke aparentá di ta un persona tòf, no empátiko, intelektual i ku no ta sinti mashá.
Esaki ta e eksterior ku nan ke bo mira. Esaki t’e persona ku no ta yora fásil, ku no ta òf no ke ekspresá niun tipo di emoshon dilanti hende por ehèmpel na momentu ku su relashon terminá, ora un ser kerí di dje fayesé èts. Hende lo kere ku e tipo di personanan aki no tin emoshon. Enrealidat tur hende tin emoshon. Solamente ku sierto hendenan tin preferensha pa funshoná mas abase di nan seleber intelektual kompará ku nan emoshon. Pero emoshon tur hende tin, i tur hende lo yega na un punto ku nan tin ku ekspresá esaki. Sinembargo e personanan aki lo lèn mas tantu riba nan seleber intelektual pa asina skonde mas di nan emoshon pa motibu di tiki kòntròl òf falta di komprenshon pa ku loke nan ta sinti.

Tambe ta bin e echo ku nan no ke wòrdu huzgá komo persona emoshonal debí ku den nan kabes nan tin e persepshon ku personanan emoshonal ta personanan debil. P’esei te awe ta biba den nos komunidat ku hende hòmber no ta yora, pa motibu ku hende a krea e persepshon ku yoramentu ta señal di debilidat. Enrealidat esaki ta nèt kontrali. Yoramentu ta un tipo di ekspreshon emoshonal. Basta esaki no ta mará na niun tipo di evento trágiko di pasado, e ta totalmente saludabel. Si un hende bisa bo ku bo ta yora hopi, bis’é ku meskos bo ta kaka tur dia, bo ta yora tur dia tambe. Simplemente bo tin ku saka emoshonnan afó!

2. Nan tin ansiedat i/òf komportashonnan irashonal.
Tin hende ta kere ku ora nan suprimí emoshon, ku eventualmente nan lo disparsé. Sinembargo, tur emoshon ku no wòrdu saka afó, tardi òf trempan lo sali di e forma di mas irashonal ku tin. Tin hende ta kuminsá haña ‘nachtmerrie’ òf soñonan ku ta kousa sierto disturbio, tin hende ta kuminsá yora pa kualke ko’i kèns. Tin hende ta enfrentá problema ku maneho di rabia/strès. Tin hende ta kuminsá pèrdè soño, òf tin difikultat pa drumi.  Tin hende ta eksperensiá kambionan drástiko di beis. Tin hende ta kuminsá kome kosnan ku no ta kuminda, manera eis, òf hariña di pan puru, baking powder èts. Tin hende por kuminsá sinti síntomanan físiko por ehèmpel doló’i lomba òf resistensha debil. Tur emoshon ku no wòrdu ekspresá i prosesá (suprimí) lo sali un dia, i dia e sali lo bo no sa ta kiko ta pasando ku bo.

3. Nan ta sumamente positivo.
Esaki ta un ku ta zona straño òf no? Pasó tur bia hende a bisa ku bo mester ta positivo, òf no? Sinembargo, esaki ta parti di mekanismo di defensa pa stroba bo di dil ku e emoshon ku n’e momentu ei bo ta sinti. Den mi buki ‘Niun Pátaka’, mi a menshoná algun di e mekanismonan di defensa mas komun ku nos komo hende ta uza, i esaki ta kai bou di rashonalisashon. Por ehèmpel, bo pareha ta kibra ku bo i bo amigu/a ta puntra bo kon bo ta sinti. Bo ta kontesta algu manera “Mi ta bon yu. Tur kos ta pasa pa un motibu. E persona ei no ta esun ku Dios a skohe pa mi.”

Esaki ta simplemente un mekanismo di defensa pa suprimi òf posponé e emoshonnan ku na e momentu ei bo ta sintiendo.

4. Nan ke ta drùk konstantemente.
Bo a yega di tende di hendenan ku ta bisa ku nan no por sinta ketu? E personanan aki semper mester ta okupá ku algu konstantemente. Bo sa dikon? Esaki ta algu ku hende ta uza pa evitá di pensa. Na momentu ku nan bai pensa, nan mente lo kai riba kosnan ku a yega di kousa doló i ku ta trese tur emoshon ariba, kual ta loke ku nan no ke. Nan ke suprimí tur emoshon, tene nan abou. Por lo tantu e personanan aki ta esunnan di mas drùk ku ta eksistí. Nunka nan no tin tempu pa nada, i si un dia bo toka un tema ku ta mishi ku un doló ku nan tin, nan ta sea bòltu e tema inmediatamente òf sali kore limpi bai lagabo, pa evitá ku e emoshon ta bin ariba dor ku nan no sa kon pa dil kuné, òf kisas nan lo tin persepshon ku personanan emoshonalmente ekspresivo ta debil.

5. Nunka nan lo no por tin un relashon saludabel, stabil i/òf duradero.
Akinan bo ta mira e hendenan ta hasi algu prèt. Si nan konosé un persona ku nan ta sinti nan ta pegá muchu riba e persona aki, nan ta kuminsá hala atras òf desplegá komportashonnan pa sabotiá e relashon . Nan por bisa bo ku nan tin miedu di pega asina duru riba e persona ku despues lo por kousanan doló. Tambe por sosodé ku nan no ta wak niun persona ku ta disponibel. Por lo tantu semper bo ta mira nan ta maha ku hòmber òf muhé kasá òf personanan ku nan sa ku no ta ideal pa nan, òf hendenan ku ta interesá solamente den sèks. Lo bo ta puntra bo mes, “pa kiko nan lo ke hinka nan kurpa den tur e labatiba aki”? Pa bo por tin un relashon saludabel ku un persona, bo mester ta vulnerabel kuné pa bo por yega na intimidat real. Tur emoshonnan ku bo a yega di suprimí, lo bo tin ku sak’é un dia ku e persona aki si realmente bo ke un konekshon genuino. Esakinan ta  loke e personanan aki semper a skonde p’e, por lo tantu nan lo no hinka nan kurpa den semehante reto pa nan.

6. Nan ta konsehero di tur hende, ménos di nan mes.
Nan ta e personanan ku semper ke duna otro hende konseho i nan ke aparentá di ta “oké’” ku nan mes. Sin ku bo pidi nan nada, nan ta kla pa duna bo konseho kon nan ta kere bo tin ku resolvé bo problemanan òf kon bo tin ku biba bo bida. Usualmente nan ta duna bo konsehonan ku nan mes no ta implementá pa nan mes. Mas ku klaro, e personanan aki SA ku nan tin problemanan pa resolvé, sinembargo pa nan ta hopi mas fásil resolvé bo problemanan ku resolvé di nan mes. Pues nan ta keda gaña nan mes ku nan ta resolviendo algu, yudando bo ku bo problema nan i asina sigui suprimí nan propio emoshonnan. Hende ta sabí òf no? Lesa ‘Niun Pátaka’ bo ta sa kon sabi hende por ta.

7. Nan tin miedu di bai sikólogo.
Sikólogo ta pa hende loko òf no? NO, bo ta robes. Si bo ta pensa asina, bo no mester di sikólogo so, sino un sikiater tambe p’e duna bo un remedi anti-ignoransia. Sikólogo ta pa nos tur. Nos tur a òf lo por pasa den momentunan difísil den bida, i ku tin kosnan ku nos tin ku prosesá i saka afó. Un sikólogo pa definishon mester ta un persona ku bo por papia kuné sin sinti bo husgá, pues ta netamente loke bo mester pa prosesá e momentunan difísil ku bo a eksperensia. Esaki ta e persona ku mihó konseho lo por duna bo kon pa prosesá dolónan ku bo a yeg’i pasa aden i siña bo konosé/rekonosé i dil mihó ku bo emoshonnan. Tin bia nos ta uza amigunan pa hasi esaki, kual no ta malu, pero tin ora amigunan sa duna konseho robes. Un sikólogo ta un persona studiá den komportashon humano i lo sa mihó kon pa guia bo. Sinembargo hopi hende tin miedu di bai sinta papia nan kosnan privá ku un hende straño, i nan no gusta ku e sikólogo ta keda hasi un mion di pregunta, kobando asina profundo den nan pasado pa saka afó ken ta e persona sintá nan dilanti. Pero esaki ta algu ku tin ora mester sosodé i ta parti di e proseso di mehorashon. Bo miedu pa sinta papia bo kosnan privá ku un persona deskonosí no mester kita, ta resultado positivo di e terapia bo mester nota.

Mi tin ku bisa ku no ta tur sikólogo ta bon. Meskos ku no ta tur kanal di televishon ta pasa bon pelíkula, di mesun forma no ta tur sikólogo ta duna bon terapia. Esaki no ta nifiká ku bo no mester dun’é un chèns. Si bo ta wak un kanal ku ta pasa pelíkula laf, bo no ta tira e televishon afó tòg? Bo ta simplemente kambia e kanal. Meskos ku si bo tabata tin mal eksperensia ku un sikólogo, bo tin ku simplemente buska un otro. Bo mester ta habrí p’e si, sino lógikamente e lo no funshoná. Pues si bo tin pensá di bai un sikókologo, buska un ku ta bon. Un bon sikólogo hamas i nunka lo purba di hasi bo e persona ku e ta kere bo mester ta. E mester yuda bo bira e persona ku abo ta haña ta bon pa bo mes. Ami ta rekomendá Dr. Stewart. Aunke e ta papia hopi, el a mustra mi ku e ta konsiente di un fayo ku hopi sikólogo ta hasi. Su métodonan ta efisiente i e sa su stòf.

Tur hende sa pa nan mes si nan tin ku bishitá un sikólogo òf no. No ta ami tin ku bisa bo esei.

Neuro-Psycholoog Drs. Rodney Stewart

Si bo ta uza supstanshanan kímiko pa skonde pa bo emoshonnan manera sigaria, alkohòl i otro droganan, prinsipalmente si tur dia bo TIN ku dal un “algu” pa bo sinti bo bon, hopi chèns ku bo tin algu ta suprimí ta wanta abou ku chèns di bira adikto tambe. Tin ora ta nèt e supstansianan aki ta yuda bo saka algun emoshon afó, pero esakinan lo sali hopi bia di un forma no korekto, i e no ta kura e doló ku ta generá e emoshonnan. Manera mi a bisa kaba, tur emoshon ku bo suprimí lo bini riba superfisie un dia, tardi òf trempan. Buska moda di dominá bo emoshonnan promé ku nan haña chèns di dominá abo!

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

 

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.