Lo NO bai tin Karnaval 2018!

Reading Time: 6 minutes

 E aña aki lo por bira e último aña ku pueblo di Kòrsou lo tin un Karnaval. Esaki no ta un desishon tumá, sino algu ku lo por pasa dado kaso Kòrsou vota pa un partido polítiko serio, diferente, ku lo sòru di goberná Kòrsou manera mester ta, sin hungament’i polítika, sin kangament’i saya, sin tin hendenan sospechoso i korupto riba lista i sin parlamentarionan ku ta kana parti wanta den Parlamento. Esaki t’e moveshon polítiko ku ami lo ke lanta. Anto mi ta bai splika bo dikon mi ta kere esaki te mihó partido pa Kòrsou, pero ku lo tin su preis!

Foto: Bea Moedt

Pa hopi tempu mi a konsiderá pa drenta polítika, pero komo persona introvèrt mi a pensa ku e área aki lo no ta p’ami. Sinembargo, mirando e krísis gubernamental ku nos ta pasando aden, i e deskonfiansa grandi ku pueblo di Kòrsou tin riba su polítikonan, mi ta kere a yega tempu pa mi hasi loke ta korekto. Anto no tin mihó manera ku restourá e konfiansa di pueblo bèk den su gobernantenan ku un lista kompletamente yená ku personanan introvèrt.

E lista aki lo bai kaba ku tur duda ku hendenan tin den polítiko, ku si nan ta wak nan mesun saku, regla pastechi pa kompinchinan èts, i finalmente pueblo lo tin un gobièrnu limpi, ku personanan kapas, honesto, kreativo i diplomátiko.

Pa kuminsá, hendenan ku subi lista di e partido aki lo tin ku pasa dos ‘screening’. Aparte di e ‘screening’ rekerí pa lei, e kandidato lo tin ku pasa mi mesun ‘screening’ tambe pa wak si e ta introvèrt di bèrdat i no hende hodedó.

Benefisionan di tin un partido introvèrt den parlamento:

1. Lo no tin reglament’i pastechi pa kompinchinan.
Personanan introvèrt no tin un sirkulo sosial grandi. Si nan tin ku regla pastechi mes, lo ta pa un òf dos hende hopi yegá na nan. Niun bisiña, tio, primu ku baisait no por bin pidi nada, pasó simplemente, nos no ta atendé ku nan.

2. Reunionnan den parlamento lo ta hopi mas kòrtiku.
Tur persona introvèrt ta papia ora nan tin algu di bisa, i no ta papia djis pa papia. Konsekuentemente nan lo ta konsiso i al kaso den nan disertashonnan den parlamento, pues reunionnan lo dura hopi kòrtiku.

3. Porfin por baha salario di parlamentario i ministernan.
Personanan introvèrt no sa sali kas masha. Nan no sa kore paranda, kumpra paña karu pa broma ni nada di e kosnan ei. Pues nan no mester di tantu sèn asina.

4. Pueblo lo por sigui polítika sin haña strès.
E echo ku polítikonan ta keda kanga saya, tira palabra pa otro, gaña riba otro, yama diferente rueda di prensa pa papia dos ora largu riba kualke ko’i kèns ku a pasa, lo pasa pa historia. Personanan introvèrt lo no yama atenshon riba nan mes di tal forma, i te na ora ku nan ke koba mama di otro, nan lo hasié por eskrito riba un karta òf riba Facebook.

5. Gañamentu lo no ta un ‘issue’.
Personanan introvèrt ta konosí pa nan honestidat. Nan ta hendenan ku mester pensa bon promé ku nan papia, pues mentira no ta kos ku ta sali di forma komun for di nan boka. Nan lo haña ataka di ansiedat promé ku nan logra gaña algu.

6. Kòrsou lo haña un gobièrnu kapas, kreativo i diplomátiko.
Personanan introvèrt ta keda stimulá pa aktividatnan intelektual. Pues bo por ta sigurá ku nan lo pasa oranan largu ta lesa i studia nan dokumentonan, lo hiba diskushonnan konsiso i al kaso, lo ta kreativo den idea i desishonnan pa ku futuro di Kòrsou, i lo sòru di atendé ku instansianan gubernamental di forma diplomátiko i korekto.

7. Kòrsou por tin garantia riba kuater aña di gobernashon stabil.
Loke nos ta enfrentá aktualmente, esta ku kada bes polítikonan ta kita sosten for di gobièrnu, lo no pasa fásil ku un parlamento introvertí. Esaki ta p’e simpel motibu ku e ta bira ‘hot news’ i e parlamentario ei lo bai den spòt di notisia. Tur medio di prensa lo ke yam’é na telefòn pa entrevista i puntr’é si ta bèrdat ku el a kita sosten for di gobièrnu i pa kua motibu. Niun persona introvèrt lo no por soportá tal preshon. Te na ora ku nan disidí di bai fo’i parlamento mes, nan lo hasié di e forma mas silensioso i sutil posibel i laga partido ku su asiento i tur koroto atras.

8. Hamas i nunka lo tin partiment’i wanta den Parlamento.
Mi no konosé niun introvèrt ku gusta konfrontashon. Nos ta hendenan masha trankil, no ta drenta diskushon kayente ku niun hende. Si nos tin ku manda bo un grandi, ta riba Facebook nos lo hasié. Te na ora ku nos haña gana di dal bo wanta, ta un ‘app’ nos ta manda ku un ‘emoticon’ òf un imáhen animá kaminda Doña Florinda ta pasa Don Ramon un wanta. Te ei nos por yega. Pero hamas i nunka un introvèrt lo ta kapas di agredí un otro persona, i ménos un otro persona mesun introvèrt kuné. Di baina nos lo papia ku otro, te pa nos yega asina leu.

Pues manera bo mes ta mira, ta un partido di personanan introvèrt ta loke Kòrsou tin mester di dje.

Nos lo bai pone hopi atenshon riba e ‘screening’ si, pasó awendia ta yen hende tin ku a fada di atende ku hende, i diripiente nan kiersa ku nan tambe ta introvèrt pa motibu ku nan ke tin un sirkulo chikí di amistat. E hendenan aki ta hodedó nan ta, i nos lo no aseptá nan riba nos lista!

(Si bo ke sa kiko ta introvershon òf ku si bo ta introvèrt òf nò, chèk e bukinan ‘Kibra Hacha‘ i ‘Niun Pátaka‘. )

Si pueblo vota pa e partido aki den e elekshon benidero, lo NO bai tin Karnaval 2018.
Manera mi a bisa, tur kos tin su preis, anto si e partido aki yega na poder, lo no bai tin Karnaval 2018. Dikon? Pasó niun introvèrt no gusta semehante bochincha i aglomerashon di hende. Ademas, ta den e periodo aki tur gobièrnu a probechá pasa tur e leinan ku medidanan severo pa pueblo pasó nan sa ku e pueblo su kabes ta den fiestamentu ku bebementu ku ‘baila malu pasa bon’. Tur subida di preis, impuesto, ‘rijkswet’ i akuerdonan ku a perhudiká nos komo pueblo a keda aprobá i pasá den  periodo di Karnaval. Pues nos komo introvèrt lógikamente lo para e fiesta aki, anto abo lo no gusta, pues lo bo reklamá, zundra i koba nos mama. Pa e motibu ei, mihó nos legumai e partido di hendenan introvèrt aki.

Manera nan ta bisa, tur pueblo meresé e gobièrnu ku nan tin. Si bo ta bon den analisá festival di Tumba, kua banda a toka mihó k’e otro, kua kantante a presentá su tumba mihó ke otro, kua Tumba mester a klasifiká si òf no, kua tumba tin mihó letra k’e otro, kua grupo di Karnaval a lusi bunita, kua banda ta bon den pone ambiente èts, pero nada ku tin di haber ku gobernashon di bo pais no ta interesá bo, ku eksepshon di ora wanta kai den Parlamento, anto e ora ei bo meresé e gobièrnu ku nos tin. Anto esaki no ta bai kambia tampoko, te dia abo kambia. Pero hey….manera nan ta bisa: “tur hende ke mira kambio, pero niun hende no ke kambia”. P’esei mes nada no ta bai kambia tampoko!

Felis Karnaval tur hende!

Foto: Bea Moedt

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.