E bèrdat di ‘InselAir’ (Ami si no ta keda ketu!)

Reading Time: 7 minutes

 Si tin un kompania di aviashon ku ta hopi den notisia awendia ta InselAir. Hopi hende ta reklamá nan pa motibu di tur e retraso i kanselashonnan ku tin, pero mas ainda e echo ku e kompania no ta informá e pasaheronan di kiko ta pasando. Nan ta keda kambia orario i kanselá buelonan sin bisa bo nada. Hende ta yega èrpòrt pa subi avion 8or di mainta, i ta haña nan ta keda èrpòrt te 11or di anochi sin por subi avion, pa despues tende ku nan tin ku bin e siguiente dia, pasó e buelo a keda kanselá. Aparte di esaki e avionnan ta den hopi mal estado, tin ku ta di ‘ground’ i ku no por bula. Manera m’a komprondé ta chatara InselAir ta kumpra na ‘sloperij’, pasa nan un man di fèrf, spùit un tiki ‘air-freshner’ den e kabina, i kuminsá uza pa transportá pasahero. Avion ta keda sakudí den laira, bòltu tur kos den bo stoma.

Awèl, laga mi bisa bo ku mi a kumpra un ‘ticket’ pa bai pasa un wikènt trankil na Boneiru. Bo mes sa, mi tin un ‘side-chick’ einan, i e plan tabata ku mi ta bai serka dje pa huntu nos saka tur strès fo’i kurpa. Ami ta un hende ku ta keda masha loyal na kompanianan lokal te dia mi haña motibu pa no sigui sostené nan. Mi buelo tabata di djabièrnè último ei, 5or di atardi. M’a yega èrpòrt trempan, entusiasmá pa mi bai Boneiru serka mi dushi, mi a ‘check-in’, i bai sinta warda nan yama pa subi avion. Alrededor di 6or, nan ta informá ku e avion tin retraso, i pa sinta warda ku pasenshi. Mi a apresiá ku nan a informá mi di esaki sikiera. Banda di 7or nan ta informá ku e avion ainda tin retraso, pero ku e lo yega 8or en punto, pa asina pasaheronan por subi avion i bai Boneiru. 10or di anochi nan ta kanselá e buelo i bisa pa tur e pasaheronan bin bèk djasabra 6or di mainta. Mi no a gusta esaki masha, pero mi di ta kos ku por pasa. M’a bai kas i bin bèk e siguiente dia. Ora mi ta yega, atrobe nan ta informá ku e buelo tin retraso. pero ku pa 9or di mainta nos lo ta na Boneiru. M’a sinta warda na èrpòrt ei. Ma lesa un buki, m’a post yen kos riba Facebook, m’a sinta wak un pelíkula riba mi ‘tablet’,  m’a tira un kabes, m’a sinta kose un flanèl, m’a skibi un buki, m’a para kòmbersa ku un bewaker, despues m’a skibi un buki mas, kana bai Wendy’s bai kome un ‘hamburger’, pasa Bella Italia, dal un eiskrim, despues bolbe skibi un buki mas.

Despues m’a bolbe tira un kabes, lanta kome atrobe, pinta un kuadro, lanta kana rònt èrpòrt, yuda e señora di limpiesa, bari, dueila, limpia e bañonan, frega pòchi i despues m’a bai laba e outonan ku tin na èrpòrt. Ora m’a bira wak oloshi, logá tin 8or di anochi kaba. Akinan si m’a rabia. Ma sali kana bai ofisina di InselAir na èrpòrt, rabiá pa mi zundra nan, pidi mi sèn bek, plùs pa nan paga mi p’e trabounan ku mi a hasi turesten mi tabata warda.

M’a yega na e ofisina di InselAir, reis pechu ariba, pusha e porta di e kantor di InselAir habri, bai dirèkt serka e yùfrou ku ta traha einan. Awó si bo a yeg’i mira e trahadónan aki, lo bo sa ku InselAir tin par di trahadó mas bon ku un koño. Mi no sa ta unda InselAir a buska e hende n’aki, pero tin par di muhé sumamente dushi ta traha einan. Pero mi no a laga esaki influensiá mi. Mi a bai pa koba nan mama i esei mi ta keda para firme riba dje. M’a yega topa un masha lif mes koló di mespel, kabei largu i bunita. E di ku mi “kumbai Papi”…..mesora m’a kue brek, bira wak patras wak si ta ku mi mes e ta papia. E di ku mi “Ta ku bo mes mi ta papia. Ku kiko mi por yuda bo? Bisami”

M’a bis’é ku ta for di djabièrnè 5or mi mester a bula bai Boneiru. Awe ta djasabra 8or di anochi, anto ainda mi no por pone un pia na Boneiru. E di ku mi “Si, bo sa…..e piloto ta malu ku diarea na Boneiru, p’esei e avion no a yega ainda.” M’a puntr’é “anto no tin niun otro piloto?” E di ku mi “e otronan ta ku fakansi”. Despues e di ku mi “T’abo t’e gai ku ta skibi riba CuckooPress tòg” M’a bis’é si, pero no ta esei te ‘issue’. E di ku mi “he eh, mi gusta lesa bo kosnan bo sa. Bo ta masha prèt mes.” M’a bis’é…”focus yùfrou focus.” E di ku mi “mané aworakí mi tin gan’i sa kiko bo tei skibi di bo eksperensia ku InselAir. “Ma bis’é, si mi skibi algu mes lo no ta nada bon.” E di ku mi”Bèrdat bo gusta kuki asina tantu manera bo sa skibi riba Facebook?”. Ma bis’é “Ki dònder e kos ei tin di haber ku loke mi ta reklamando di dje?” E di ku mi “Pa kasualidat mi tin un kuki den mi tas, bo kere?” M’a bis’é. “Mi no ke niun kuki, mi ke……….warda, kuki di kiko bo tin”? E di “Di rasenchi” Mi di…..”hmmm….oké, ‘nami un pida numa.” El a keda wak mi ku un kara masha lif mes i puntra mi “Un pida so bo ke òf bo ke tur”. Ma bis’é “Mi puntr’é “Mi mag haña tur?” E di ku mi “klaro, basta bo skibi un kos ‘leuk’ di InselAir riba bo blog”. M’a bisi’é ku ami hamas i nunka un hende lo por kumpra ku un miserabel kuki. Mi ta hende, honesto, íntegro, korekto, desente, intachabel i inkumprabel”. El a saka e kuki for di e saku, dal un hap den dje den un forma masha sensual mes, anto e di “hmmmm….esta dushi e kos aki ta”. M’a keda wak e sin por a kere loke e shon aki ke a hasi ku un pida kuki. Si mi tin ku bisa e bèrdat di InselAir, mi ta bis’é sin miedu i no tin niun hende, pa bunita i atraktivo i sensual ku e ta, ku lo por kumpra mi a ni ku un kònteiner di kuki.

Diripiente m’a mira e yùfrou ta bai den tas, saka un saku mas ku no un, ni dos, sino tres kuki di rasenchi den dje. Awèl, ami sigur no tin nèt nèt nada di reklamá di InselAir. Semper ku mi a bula mi a ser tratá masha nèchi mes. Bèrdat e avionnan sa tin tardansa, pero esaki ta únikamente pa tèst bo pasenshi. InselAir ta muchu mas ku un simpel kompania di aviashon. Nan ta ‘care’ pa e pasaheronan, i yuda nan desaroyá pasenshi pa dil ku tur tipo di reto den bida. E kanselashonnan ku tin ta simplemente pa bo tuma tempu pa reflehá i realisá ku e dia ei lo por tabata bo último dia na mundu. InselAir ta operá ku yen avion bieu ku ta keda bati i sakudí den laira pa sakudí bo i pone bo realisá kon balioso bo bida ta. Pa asina bo yega kas bo bai serka bo mayornan, bo kasá i bo yunan pa bisa nan kuantu bo stima nan. InselAir ta hasi hopi mas kos kompará ku otro kompanianan di aviashon. Nan ta duna nan kontribushon pa kresementu di e ser humano. Ami ta bula i lo sigui bula ku InselAir.

Por sierto, for di e dia ei, mi ta bai èrpòrt djis pa prèt pa mi wak si e yùfrou ei tei. Mi ta kana pasa 10 bia dilanti kantor di InselAir djis pa wak ki dia e tin kuki pa mi. Ami ta sigui bula ku InselAir, danki na su servisio fenomenal.

 Ang, anto e tres bukinan ku mi a skibi miéntras ku mi tabata warda mi buelo, esta ‘Kibra Hacha’, ‘Awa, Habon ku Past’i Djente’ i ‘Niun Pataka’ ta disponibel na Mensing’s Caminada. Ta kon mi ta hasi reklamá InselAir asina? Úniko kos ku ta fastidia mi ta e muhé di Boneiru ku ta blo keda yama ta puntra ki dia mi ta yega Boneiru pa kaba. Mi ke men, bo no tin kuki…..basta di keda fastidia mi bida. Hacht òmbu!

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.