No tin hòmber ni muhé na tinu mas pa sali kuné?

Reading Time: 7 minutes

Un bia un dama a yeg’i bisa mi ku e ‘Dating Experience’ na Kòrsou awendia ta hodidu. Segun e ta bisa, no tin hende hòmber na drechi pa sali kuné. No den sentido ku no tin hende hòmber na Kòrsou, pero den sentido ku e hende hòmbernan su komportashon ta laga hopi di deseá i ku nan ta papia asina tantu disparate, ku nan no ta lanta interes den e muhé pa sali ku nan.

Esaki ta algu ku mi mes por konfirmá. Den e hende hòmbernan ku mi konosé, sigur un 90% ta papia puramente idiotes. Mi no sa ta ken ta nan influensha, ku si ta Dongo òf ta Uzimátiko òf ta Mosta, pero ta idiotes so nan ta kana papia, plus nan tin hopi falta di madures. Bo no por sinta papia algu serio ku nan, sin ku nan kuminsá hasi muchachada bo dilanti.

Pa kuminsá, hende hòmber ta madurá hopi lat. Si nan ta bou di 40 aña, bo por konta ku nan tin yen muchachada ta hasi, siendo ku e hende muhénan ta madurá hopi mas lihé. Pa di dos, aparentemente niun hende no a siña nan kon pa trata muhé. Pues den trato, nan ta mas brutu i bestia k’e chimpansé di Tarzan. Anto riba tur esaki, nan ta papia puramente disparate. Nan ta puntra yen kos irelevante mané ta inspektor di polis nan ta, nan foko ta demasiado riba kosnan seksual, nan ta keda pretendé yen ko’i kèns, mayoria bia nan ta purba demasiado pa impreshoná enbes di ta nan mes i asina nan tin un set di ridikules mas ta hasi.

Pero no ta hende hòmber so ta malu den e aspekto aki. Kisas e ta mas opvio, dor ku hende hòmber ta yag mas tantu, pues tin mas muhé ta ekspresá nan frustrashon pa ku e komportashon di e sekso maskulino. Pero tin hòmbernan ku tambe tin nan dolónan ora nan bai un sita ku hende muhé.

Aki mi ta pone reakshon di algun hende hòmber, ora ku a puntra nan dikon nan no a bai un di dos sita ku e dama ku nan a sali kuné. Nan reakshonnan tabata lo siguiente:

Nos no tabata tin nada en komun
E kombersashon no tabata ‘flow’. Nos no tabata tin nada en komun ku nos por a papia riba dje. Nada ku ami gusta, e no gusta, òf kosnan ku e gusta, no ta interesá mi, pues un di dos sita lo no tin sentido.”

E tabata konstantemente den su telefòn
“Mi no tabata tin su atenshon. Konstantemente e tabata keda wak den su telefòn, i mi a haña esei hopi iritante i tambe un falta di rèspèt. Nunka mas lo mi sali kuné!”

Mi no mester a yag riba dje mas
Ya, fo’i dje promé sita nos a sèks kaba. M’a haña loke mi tabata ke, pues no tabata tin nada mas p’ami yag ariba. E ta zona kruel si, pero ya, ta asina e kosnan ta.”

Mi no tin tempu
“Mi kalènder di sitanan ta yen. Mi ta sali ku un muhé diferente tur dia, pues si un muhé no ègt “waw”mi, mi no ta sali kuné mas.”

E no a ofresé pa paga
“Nos a bai kome na un restorant super luhoso. El a kome, chupa dede te respu riba mi. Ora e resibu a yega, e no a ofresé pa paga. Mi no ta bisa ku mi lo a lag’é paga, pero mi ke a sikiera mira ku e ta dispuesto na paga. El a keda sinta mané prensès Kalulu riba stul sin ofresé pa paga a ni mitar di e resibu, pues ami no tabata interesá pa bolbe sali kuné.”

E muhé tabata fastioso
“Su potrètnan ‘online’ tabata nèchi. Personal si e muhé tabata fastioso. A ni su personalidat no tabata meskos manera esun ku mi tabata ‘chat’ kuné. Mi a gusta su personalidat ‘online’ mas tantu.”

E diskushon a kue un rumbo robes
“Manera nos a kai sinta, el a puntra mi kiko mi ta pensa di Donald Trump ku kos. Asina e diskushon a kue un rumbo di polítika, i di einan tur kos a bai sawaka. Ami no ta interesá pa bolbe sali kune!”

Riba plaka e tabata
“Su preguntanan tabata prèt pero iritante. E tabata blo keda puntra kuantu sèn mi ta paga na kas, kuantu sèn mi ta gana, ki outo mi ta kore èts. El a dunami impreshon ku ta riba plaka e ta.”

E no a sunchi mi
“Ya, despues ki e sita a bai bon, mi a kere sigur ku lo m’a haña brasa ku sunchi. Ora mi a len riba dje pa bras’é i sunch’é, el a saka man duna mi i bisa mi bonochi. M’a pèrdè interes pa sali kuné atrobe.”

E último gai ei mi ta komprondé si. Tin ora bo ta saka yen sèn riba un muhé, bai kome kuné, kore keiru, gasta gasolin, anto al final a ni un sunchi e muhé no ke ‘nabu. Bo ta haña gana di ‘dònder op’ e muhé ei, prinsipalmente ora bo sa ku tin muhé ta sali ku bo solamente pa haña ko’i kome pòrnada, òf pa saka fabor for di bo!

Pero loke mi ta haña mas lamentabel ta ku tin hopi hende, hòmber i muhé ku no por hiba un kòmbersashon na tinu. Nan kòmbersashonnan ta muchu komun, i ta bai muchu tokante nan bida, pasado i tur nan doló i tristesanan. Despues ku mi kaba di skucha hinter bo historia eksitante di tur kalvario ku bo a pasa aden, ami ta simplemente pèrdè interes si bo no tin nada interesante pa papia di dje ku mi. Tin hende ta bisa ku nan no sa kiko pa papia. Si bo no sa kiko pa papia ta pasó bo no ta lesa, ni sigui akontesimentunan ku ta pasa rònt mundu, ni bo no ta wak niun programashon edukativo ku ta pone bo pensa. Bo no ta sinta pensa riba nada ku no ta e bida diario ku nos ta biba, pues ami fásilmente ta pèrdè interes den un persona asina. Si úniko kos ku bo tin pa papia ariba ta bo trabou, bo famia, bo yunan, kua redu b’a mira riba Facebook i kua episodio di ‘Kabe’i Boto’ tabata ‘hot’, hopi chèns ku den ménos ku dos sita, ya m’a pèrdè interes den bo kaba.

E hòmbernan ku tin awendia ta mesun kos. Hende hòmber ta asta pió, pasó eseinan no gusta lesa mes, i úniko ku kos ku nan ta interesá den dje ta ‘sèks’. Nan bida ta konsistí di korement’i kaya hinter dia, pasa snèk serka Carmen ku Belkis bebe serbes bira fuma, papia ko’i kèns bai gol. Òf nan ta bai saliña ku koral tabak papia kuent’i skwerment’i outo ku hòpment’i bròmber ku buta ‘fever’ ku kos. Un muhé ku ke stimulá su seleber intelektual tur dia lo pèrdè interes hopi lihé den un hòmber asina!

Próksimo bia ku bo ke bai un sita, mi ta rekomendábu lesa ‘Kibra Hacha’ i ‘ Niun Pataka’. Lesa nan kompletu, despues bai diskutí e temanan ku e persona ku bo a bai sita kuné. Mi ta garantisá bo ku lo bo sa di impreshoná bo sita i bo ‘dating experience’ nunka mas lo ta meskos. No bai sinta kabes den telefòn si, pasó esei si ta daña hinter e asuntu!

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.