Si bo a yega na e puntonan aki, ta ora pa bo tèrminá bo relashon!

Reading Time: 9 minutes

 Algu ku lo mester ta opvio pero ta kos ku hopi hende tin problema kuné, esta tèrminá un relashon ku ya no ta funshoná! Tin hende, manera e relashon no ta bai manera nan ke, nan ta manda bo den bo tobo, pero otro hende ta keda lucha, bringa, sofoká nan kurpa, purba drecha kos aña aden aña afó i ta ninga di tèrminá e relashon maske kon malu e kosnan ta kana den e relashon i nan bida.

Den mi buki ‘Niun Pátaka’ mi a splika den detaye kua tipo di persona i tambe pa ki motibu un persona lo ta ninga di tèrminá un relashon, maske kon malu e relashon ta, i den ‘Kibra Hacha’ mi a splika pa ki motibu hende muhé tin mas tendensha di keda pordoná un hòmber ku ta kòrta orea sin fin, i tambe ta ninga di tèrminá e relashon.

Pa hendenan pafó di e relashon, e kos ta keda straño, i ta keda manera kos ku ta sufrimentu e persona gusta. Abo ta mira bon kla kon e relashon no tin niun chèns di sobrebibí, pero tòg e persona den e relashon ta sigui hasi su máksimo esfuerso pa salba e relashon. Hopi bia ta hasi kambionan drástiko den bida djis pa por mantené un relashon, entre otro hala pia for di famia i amistatnan pa salbaguardiá e relashon.

Tin hende ku ta den un relashon sin amor, pero pa seguridat i konfortabilidat no por bai laga e persona ku nan ta den relashon kuné. Tin hende ta keda den relashon pa evitá pasa bèrgwensa di kiebro i/òf divorsio, pa miedu di loke otro hende lo bisa òf pensa di nan. Tin hende ta keda den un relashon disfunshonal djis pa nan por mantené nan status sosial. Tin hende tin miedu di keda nan so, pues ta preferá keda den un relashon bashí, i tin ta asta kòrta orea pa yena buraku i/òf nesesidatnan ku nan tin den nan bida.

E intenshon no ta bai splika tur e motibunan ku un persona ta tolerá un relashon disfunshonal, ya komo mi a hasi esei kaba den e bukinan ‘Kibra Hacha’ i ‘Niun Pátaka’,  pero pa abo ku kisas tin duda ku si bo tin ku tèrminá un relashon òf no, mi ta bai duna bo algun señal ku por yuda bo klara riba status di bo relashon. Nan por ta zona opvio, pero na momentu ku bo ta den relashon, manera nan sa bisa, bo sa tin brel di palu bistí i bo no ta paga tinu riba e kosnan aki.

Esakinan ta mas bien parti di un defensa ku yama ‘outo-engaño’ ku bo ta apliká pa miedu di tèrminá un relashon ku bo ta aden.

Señalnan ku bo tin ku tèrminá bo relashon:

1. E ta konsumí tur bo energia i salú.
Si un relashon ta kostando bo hopi energia pa bo mantené stabil, e ta kaba ku bo konfiansa propio, i ta stroba bo di progresá den bida, no tin sentido pa bo sigui den esaki. Un relashon mester tei pa komplementá kosnan ku bo no tin (den bo personalidat) pa abo krese komo persona i sinti bo kompletu. No pa trese doló’i kabes den bo bida.

2. Kada bes bosnan ta kibra ku otro.
Tin hende lo bisa bo ku nan a yegi kibra-drecha vários bia ku e persona ku nan ta kuné aktualmente, i tin hende ta konsider’é un ‘love-hate relationship’, i bèrdat sa tin okashonnan kaminda dos persona mester pleita hopi ku otro promé ku nan logra haña otro, sinembargo punto di salida ta, i tambe investigashonnan ta mustra ku fo’i ora un relashon ta blo kibra-drecha, chèns ta grandi ku e lo bai kaba na aros i koko na final. Pues esaki mester ta señal ku ta mihó bo tèrminá e ko’i loko ei, promé ku e ko’i loko hasi bo loko di bèrdat.

3. Tin kòrtament’i orea.
Den ‘Kibra Hacha’ mi a menshoná kuantu bia un muhé por keda pordoná un hòmber ku ta kòrta orea, siendo ku manera un muhé kòrta orea, e hòmber ta kibra kuné, paketá maleta i bai biba na un otro kontinente (si e no mata su kurpa promé.) Pero esaki no mester ta asina. Kòrtament’i orea ta señal ku un pèrsona no ta sintié kompletamente satisfecho den un relashon òf tin falta di intimidat den e relashon òf señal ku un di e parehanan tin un problema ku su mes (kual ta e kaso serka mayoria hende hòmber ku tin inseguridat pa ku nan hombresa.) Tin yen motibu ku por pone un persona kòrta orea, pero punto di salida ta ku abo no mester tolerá esaki. Manera bo tin sospecho òf bo a prueba ku tin kòrtament’i orea, bo mester tèrminá e relashon. Si bo ta keda tolerá esaki, konta ku e lo bolbe ripití. Mi ta garantisá bo esei. Ta garantia ku bo por bai banko i saka outo nobo nobo kuné. E LO bolbe kòrta bo orea!

Tin vários hende ku awe ainda ta den relashon ku un persona ku a yeg’i kòrta nan orea. Prinsipalmente si nan a drenta den relashon ku e persona ei na un edat yòn.) Ta keda na abo si bo ke bai e aventura di doló i tristesa aki. Ami ta konsehá bo, no tolerá esaki!

Ora tin kòrtament’i orea, hende muhé tin tendensia di bai hunga ‘Dora The Explorer’ i buska e fayo den nan. Nan lo keda nochinan largu ta pensa unda nan a faya, anto kere mi, nan lo haña algu pa kulpa nan mes di dje. Sea nan a dediká muchu tempu na trabou, òf nan tabata kana muchu den bata washi-washi ku kleps manera misil ruso den kas. Ounke esakinan por pone kualke hòmber spanta i bula waya, punto importante ta ku si tin intimidat real den bo relashon, e kosnan aki lo no pasa. Ku intimidat real den un relashon, tur problema lo haña solushon, promé ku bin bulament’i waya. Kaminda intimidat kuminsá kai afó manera koriente di Aqualectra, einan porta ta habri pa tur tipo di problema!

4. Su famianan no gusta bo.
Si bo no ta un persona manera mi ku no ta wòri ku si hende gusta bo òf laga, e ora ei lo no ta kumbiní bo ta den un relashon ku un persona ku su miembronan di famia no gusta bo. Nan lo por pone e persona ei kontra bo òf di otro forma hasi bo relashon tóksiko.

Si bo ta manera mi, e ora ei no ta problema, Si nan no gusta mi, ami ménos gusta nan. Te na ora ku nan gusta mi, tòg mi no gusta nan. Mi no sa atendé ku hende masha, kemen si nan no gusta mi ta ganga m’a haña asina!

5. E no ke pasa tempu ku bo.
Manera mi a menshoná, tin hende ta keda den un relashon pa seguridat òf konfortabildiat òf benefisio. Pues nan no tin niun sintimentu pa ku e persona pero nan no ke bai laga e persona tampoko. Esaki ta pone ku nan lo evitá di pasa momentunan íntimo ku e persona. Si bo ta ripara e tipo di komportashonnan aki den bo pareha, mand’é den tobo.

6. Su relashon ku su amistatnan ta mihó ku di bo kuné.
Yen bia mi ta tende hendenan ta reklamá ku nan pareha tin un amiga òf amigu ku nan ta hopi sera kuné, ku nan ta sali hopi kuné, ‘app’ hinter dia kuné, hasi tur sort’i kos kuné, pero ku e pareha mes ta ketu. Pa ami e kos no por ta mas kla. Si bo ta gusta bo amigu/a asina tantu, bai frei e anto. Ta señal ku bo tin ku tèrminá bo relashon ku e persona aki.

7. E gusta primintí sin kumpli.
Esaki ta kos ku por hasi mi loko. Mi ta detestá kualke persona ku no ta tene nan mes na nan palabra. Mi kemen, tur hende por faya ku nan palabra un bia, pero tin hende ta hasi e kos aki ku smak. Esaki ta trese òf stroba e konfiansa den e relashon i e ta hasi e relashon unu difísil pa biba kuné. Lamentablemente e kantidat di personanan ku gusta primintí sin kumpli ta hopi. Ami no tin toleransha pa e kos aki. Manera bo faya ku mi un bia, mi ta kla ku bo. Mi ta realmente detestá e kos aki.

8. Personalidat inkompatibel.
Ta eksistí personalidatnan ku ta inkompatibel maske ku tin atrakshon fuerte na otro. Si boso dos no tin niun intenshon di hasi otro daño  òf hasi otro su bida difísil, pero ku tòg boso forma di ser ta kansa e otro, òf kisas ta abo t’esun ku no por ku e forma/personalidat di e persona, ta kumbiní bo tèrminá e kos. No bai tras di loke hende ta bisa kuent’i bo tin ku stima e persona manera e ta. E kos  nai ta kos di novela ku pelíkula. Si bo no gusta e pèrsonalidat di e persona, simplemente bai lag’é pa otro hende ku si lo gust’é manera e ta. Si no, bo ta bai strès pa e persona kambia su forma di ta, i esaki ta doló’i kabes so e lo trese kuné.

9. No tin intimidat.
Intimidat ta e konekshon di mas fuerte ku por tin entre dos persona. Si e konekshon aki no tei, mi no sa kiko bo ta hasi ku e persona ei ainda. E intimidat por keda re-esablesé si, pero ámbos persona mester ke. Fo’i ora un persona tin miedu di intimidat (anto HOPI hende tin miedu di intimidat), e ta keda será, ku miedu di habri su mes pa kualke motibu, ta mihó bo legumai e relashon ei.

10. No tin rèspèt.
Hende por falta bo rèspèt den diferente forma. Kisas e no ta respetá bo forma di ta, kisas e ta laga bo pasa bèrgwensa den hende, kisas e ta sintié superior n’abo òf mas sabí ku bo, òf kisas e ta asta falta bo rèspèt i pone man riba bo.

Falta di rèspèt ta señal opvio ku bo mester tèrminá e relashon al instante. Pero lo bo no kere kuantu hende ta tolerá e kos aki.

Na momentu ku bo tèrminá un relashon ta bin e proseso di rekuperashon, i esaki tambe ta algu ku hopi hende tin miedu di dje. Sinembargo si bo a lesa ‘Niun Pátaka’ e ora ei e proseso ei lo mester ta mas fásil, basta bo hasi loke mi bisa bo. Den sierto kasonan e por tuma mas tempu, pero unabes bo tèrminá ku un relashon definitivamente, e proseso di rekuperá bo mes ta pasa mas lihé ku bo ta pensa, basta bo hasi loke mi a skibi den e buki. Pa aweró bo no bai lesa e buki, hasi loke abo ke, anto despues bin pidi sèn bèk pasó bo no tin fin di lubidá e persona. No tin garantia pa hende orea duru…….sóbadje hende orea duru tin hopi!

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.