E klup nobo aki ta buskando muhénan lokal pa traha komo ‘stripper’!

Reading Time: 7 minutes

 Si bo haña e oportunidat pa traha komo ‘stripper’, lo bo hasié? Si mi bisabo ku hasiendo e trabou aki, lo bo por gana ‘mad money’, lo bo ta interesá den dje? Si mi bisa bo ku e trabou aki ta ‘easy money’, lo bo kere mi? Si mi bisa bo ku tin un klup nobo na Kòrsou ku ta buskando muhénan lokal pa baila komo ‘stripper’, lo bo ta interesá?

Si bo ta un di e hendenan ku a wak e entrevista di Liesje Obispo, i bo a haña gana di kita for di e trabou ku bo tin aktualmente, pa subi avion, bai Hulanda òf Merka bai traha komo ‘stripper’, wèl e artíkulo aki lo yuda bo hopi. Den e entrevista bo por a mira kon nan a pone énfasis riba e kantidat di plaka ku Liesje ta gana. Mi kemen, loke e shon ei ta traha den un luna, ami no ta hañ’é a ni den un aña. (Asina pober mi ta.) Ta parse ku e ta stima su trabou i ta orguyoso di esei. Segun loke el a bisa, ta fo’i chikí e kier a bira ‘stripper’. (Bon ya, el a bisa baila, pero ta yen otro kos bo por baila ku no ta inkluí kitament’i paña i baila chanchan dilanti hòmber pa sèn, tòg?) Pero ta presisamente ‘stripper’ el a skohe p’e!

Lagami kuminsá na bisa ku mi ta gusta wak un ‘stripshow’. Unu so, pasó despues di wak unu, ya m’a kansa kaba. Si e muhé ta bon, e kos por ta interesante. Pero den e entrevista ku Liesje, m’a keda ku hopi pregunta. Ami komo persona kurioso, no ta bai buska ‘stripper’ pa wak nan baila (so). Ami ta bai buska nan pa puntra nan konbin nan ta hasi e trabou, kuantu sèn nan ta gana hasiendo e trabou, kiko nan ta gusta di e trabou, kiko nan no gusta di trabou i un kantidat di otro pregunta. (Ègt mente di un persona introvèrt. Pregunta so tin aden.) Anto si e entrevista ku Liesje a duna bo gana di bai traha komo ‘stripper’, sigui lesa, wak si na final bo ta keda ku e mesun gana.

Un nòmber mas interesante i formal pa un ‘stripper’ ta un ekdisiasta, esta un persona ku ta baila i kita paña pa show. Bo no mester di niun estudio pa drenta e profeshon aki, solamente un kurpa atraktivo, abilidat pa baila riba un forma sensual i abilidat pa ‘poledancing’ (sin kita kai dònder abou kibra tur bo bunitesa dilanti hende.) E parti di mas atraktivo di e trabou aki ta e kantidat di sèn ku bo por gana. Liesje a informá bo di esei kaba, pues esei bo sa. Ta bèrdat ku bo por gana bon sèn ku e trabou aki.

Riba ‘website’ di Forbes, tres stripper a duna di konosé ku e trabou ta yuda generá bon sèn. Nan ta papia aki di montantenan entre 2000 pa 3000 dòler den dos siman basá riba un promedio di 90 ora di trabou. Pues pa luna e hendenan aki ta traha 10 mil florin trankil. Riba un bon dia ta posibel pa gana 3000 dòler den un anochi. Pero segun nan ta bisa, esaki te úniko kos ku ta motivá nan pa hasi e trabou. Si bo ta kere ku nan ta hasi esaki, pasó nan gusta e trabou, òf pasó e trabou ta ‘leuk’, bo ta totalmente ekiboká.

Pa kuminsá, mayoria ‘stripclub’ no ta paga ‘strippers’ pa baila. E kos ta nèt kontrali. Si bo ke baila komo ‘stripper’, abo tin ku paga e lugá un suma, i bo ta uza e lugá pa abo traha bo sèn via di e klientenan. Tin lugá ta kobra ‘strippers’ un porsentahe tambe di e sèn ku nan haña for di klientenan.

Na Campo Alegre tampoko bo no ta wòrdu pagá pa baila komo ‘stripper’. Tur trahadó seksual di Campo alegre tin ku paga 110 florin pa nan kamber pa dia, anto esunnan ku baila ta haña un deskuento riba e tarifa aki. Si bo duna un bon show, bo lo por bende bo mes komo trahadó seksual i asina haña mas kliente. Hopi ta hasi esaki, maske nan no gusta, pa motibu ku no ta tur dia nan tin e sèn kompletu pa kubri nan gastunan diario. Den e trabou aki, tin dia ta bon, tin dia ta ménos bon, i tin dia ta malisimo, pues kada deskuento ta yuda. Aparte di kamber, nan tin ku saka alrededor di 40 florin pa dia pa kuminda i tambe nan mester di sèn pa kumpra produktonan ku nan mester pa por traha. Bo keda sin traha un dia pasó bo ta sinti malu òf no tin gana di atendé ku hende, ta den debe so bo tin chèns di hinka bo kurpa.

Mayoria ‘stripclub’ no ta konsiderá niun ‘stripper’ komo un “trahadó”. Nan ta simplemente un kontratista independiente ku no tin derechi riba niun klase di benefisio.

‘Strippers’ tambe mester paga impuesto, pero si abo disidí di bira ‘stripper’ kisas abo lo bira e promé ku si ta kumpli ku su deber síviko di paga  impuesto. Niun sobrá no ta hasié, i ta difísil persiguí nan legalmente.

Teps ku un ‘stripper’ ta haña ta varia pa kada kliente. Tin ‘stripper’ ku ta sèks ku nan klientenan i tin ku no ta sèks ku nan klientenan.

Manera mi a bisa anteriormente, si bo a wak e entrevista di Liesje, kisas lo bo a keda ku e impreshon ku e ta gusta e trabou un mundu. Hopi hende ta pensa ku traha komo ‘stripper’ ta ‘leuk’, pero segun algun ‘stripper’ a duna di konosé, esei no ta bèrdat. Den sierto okashonnan bo ta haña bo ta baila pa un gai ‘hot’ i super dushi pero por lo general nan ta ‘assholes’ i nan no tin e kantidat di sèn ku bo ta buskando. Den otro okashon bo ta haña bo ta baila pa e hòmber gordo bieu ku ta hole stinki i ku ta keda wak bo manera ta un pida karni bo ta, anto e si tin e sèn ku bo ta buska. Esaki no ta nada ‘leuk’. Segun e ‘stripper’ a bisa, e ta hasié simplemente p’e sèn.

Si bo papia ku algun trahadó seksual komo un persona ku a bin pa pasa un “momentu agradabel” , lo bo haña e impreshon ku nan ta muhénan masha kayente, ku gusta sèks i gusta mèlèmèlè riba hòmber. Si bo bai ku e intenshon di siña konosé e persona bo ta haña kompletamente un otro impreshon. Bo ta bin siña ku kada un tin un motibu fuerte pa kual nan ta hasi e trabou, pero ku si nan ta gusta e trabou, esei ta totalmente leu for di bèrdat. Hopi di nan ta klasifiká e trabou komo algu sumamente difísil ku ta hasi bo vulnerabel pa strès, tristesa i depreshon. E trato ku nan ta risibí di mayoria hende hòmber ta sumamente repudiabel, i algun di nan ta haña nan ta sali na kareda for di e trabou ei di mal ratu ku nan ta pasa, no opstante tur e sèn ku nan lo por gana via di e trabou.

Den e artíkulo ‘Historia impaktante di un muhé ku a traha 25 aña komo prostituta!’ bo lo por lesa mas tokante bida di un trahadó seksual, pa bo sa realmente kiko nan ta pasa aden.

Aspektonan ku lo yuda bo traha i mantené bo mes den e profeshonnan aki ta nesesidat pa sèn, òf ambishon pa yega na hopi sèn di un forma lihé. Karakterístikanan ku ta motivá bo pa hasi e trabounan aki ta falta di balor propio, outo-estima abou, falta di amor propio ku tur ta bini dor di un pasado ku a krea heridanan òf un bashí emoshonal. Si bo no tin esakinan, chèns ta grandi ku manera bo kuminsá, bo ta stòp! Pa sierto hende, e sèn no ta bal e humiashon ku bo tin ku pasa aden. Otronan por tolerá esaki dor di e nesesidat.

Por último, mi no sa di niun klup nobo ku ta buskando niun muhé lokal pa traha komo ‘stripper’. Mi sa si ku ainda bo no a bai klup Mensing’s Caminada bai kumpra mi bukinan ‘Kibra Hacha’, ‘Awa, Habon ku Past’i Djente’ i ‘Niun Pátaka’. Ta kiko bo ta warda anto?

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

 

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.