Sòri despensa, ami si stima un redu, anto laga mi splika bo dikon!

Reading Time: 11 minutes

 Promé ku mi trata un tema asina pika i kayente manera REDU, laga mi kuminsá na deseá hende un felis aña 2017 i ku mi ta spera e aña aki si bo logra kumpli ku tur bo deseo nan. (Mi no sa bisa hende ni Bon Pasku ni Bon aña, pero m’a hasié pa mi no tende ku mi tin mal moda!)

Mi ta spera bo sa ku bo por sinta na rant di kama i hasi kuantu orashon ku bo ke, pero si bo no lanta bo atras i move bo yangadó pa logra bo meta nan, pa aña 2018 lo bo ta sintá ku e mesun deseonan atrobe. Mi ta spera tambe ku pa aña 2017 nos por dediká mas tempu na redu i bòmbòshi (kual ta kos ku nos gusta tòg…..atmiti gewoon) i sigui ignorá kosnan ku realmente tin importansha pa nos bida.

Kiko mi kemen ku esei? (Por si akaso bo no a kapta, ta riba sarkasmo mi ta.) Mi a bin ta ripara ku loke mas ta kapta nos atenshon ta básikamente idiotes. Si mi wak rondó di mi, hopi di e kansionnan ku ta bira popular, hopi di e videonan ku nos ta wak i ‘share’ mas tantu, hopi di e páginanan di Facebook ku tin mas siguidó, hopi di e programanan di televishon di mas popular, i hopi di e artistanan ku mas nos ta duna atenshon, tur tin un idiotes ta hasi, kual nos komo hende ta gusta i ku nos ta duna atenshon i kompartí komo algu pa nos sinti nos mes parti di un grupo sosial den e komunidat aki.

Redu ta un di e métodonan mas popular ku nos ta uza pa laga nos mes sinti bon ku nos mes. Mi ta bai splika un bes aki dikon. Aparte di redu, tin mas kos ku nos ta uza, i den mi buki ‘Niun Pátaka’ mi a pone nan tur nèchi den un rei pa bo pone un spil bo dilanti (si bo tin e kurashi). Tin chèns ku lo bo no gusta e kosnan ku bo lo realisá, pero bo tin realisá nan pa bo stòp ku e idiotesnan ku bo ta bezig kuné.

Laga mi kuminsá na bisa tambe ku ami mes ta un hende ku ta analisá mi mes den lo mas profundo ku mi por yega.  Mi ta hasié pasó ami ke ta honesto ku mi mes. Anto maske hopi hende lo bisa ku nan ta honesto ku nan mes, en realidat nan no ta. Pa bo ta honesto ku bo mes, bo tin ku aseptá vulnerabilidatnan ku bo tin, anto pa bo aseptá esei, bo tin ku baha murayanan di defensa ku bo tin. Si bo no ta honesto ku bo mes, hamas i nunka lo bo bira konsiente te pa bo deskubrí kuantu muraya di defensa bo tin rondó di bo, pasó pa definishon, murayanan di defensa ta inkonsiente i ta konsistí di outo-engaño.

Dikon mi ta splika tur e kosnan aki?
E kosnan aki ta djis e preludio pa mi yega n’e parti di REDU….. E kos ku asina tantu nos komo hende gusta.

Mi ta kòrda un bia mi a bai un solisitut pa trabou, i un di e preguntanan ku nan a hasi ta ku si mi ta partisipá na hasiment’i redu. Esaki tabata promé kompania ku mi a solisitá na dje ku a hasi mi tal pregunta. Mi kontesta tabata negativo, pero e kos a laga yen pregunta den mi kabes. E shon a bisa mi ku nan ta apliká sero-toleransha na hasiment’i redu den e kompania. Na momentu ku mi a kuminsá traha den e kompania aki, mi a komprondé dikon el a bisa mi esei. Tabata un di e lugánan di mas tóksiko ku mi a yeg’i traha na dje, anto den ménos ku un luna m’a sali na kareda kore limpi bai, pasó den e lugá ei ta manera kos ku si bo no ta hasi redu, bo no ta ‘hoor thuis’

Kiko presis ta redu?
Dikshonario ta deskribí ‘redu’ komo kòmbersashonnan kasual, sin límite, tokante di un terser persona ku tipikamente ta enserá rumor, engaño, informashonnan no konfirmá, detayenan sensibel i prehuisio ku por ta doloroso pa e persona en kuestion.

Tin un tremendo dicho ku ta bisa lo siguiente:

Anto esaki ta e diferensha den hendenan ku mi ta haña interesante fo’i hendenan ku mi ta haña no tin kontenido. Si mi tin ku sinta kòmbersá ku bo, anto e úniko kos ku bo por papia ku mi ta informashon/opinion/historia/bida/ òf bo teoria di otro hende ku no por yuda ami di ningun forma pa mi desaroyá mi mes intelektualmente i spiritualmente òf bai dilanti komo ser humano den e mundu aki, anto e ora ei básikamente bo no ta interesá mi.

Pero den opservashonnan ku mi a hasi di hendenan rondó di mi, mi a ripara ku básikamente REDU ta e tipo di kombersashon mas fásil ku hende por involukrá su mes den dje pa por tin kòmbersashonnan kasual, sera relashonnan sosial ku hende i tambe huzga otro hende pa nan por sinti nan bon ku nan mes. Anto ta akinan mi ke yega.

Despues di diferente investigashon, mundu di sikologia ta splika ku hendenan ku ta hasi redu generalmente ta sufri di ansiedat, tin un nivel di outo-estima abou, tin falta di konfiansa propio, ta aktua abase di yalusí, frustrashon, rabia, envidia i tin un òf mas vulnerabilidat ta skonde.

Si mi mester ta sinsero ku mi mes, mi a deskubrí algu den mi mes. Por ehèmpel, laga bisa ku mi a skibi un buki di siensia i teknologia i despues di hopi promoshon den un aña largu mi a logra bende 300 kopia. Mi bisiña John a bira skibi un buki di kontament’i chiste, i sin masha promoshon, John ta logra bende 2000 kopia den seis luna. Lo mi sinti envidia riba John, i lo mi uza e defensa ku John a skibi idiotes pa hende hari, i komo hende gusta idiotes su bukinan a bende mas ku di mi. Mi ta uza e mekanismo di defensa aki pa dil ku e parti doloroso ku John a logra bende mas buki ku mi hasiendo ménos trabou i esfuerso ku ami. Riba dje, mi ta mira ku mi propio amistatnan a kumpra buki di John i ta kana broma pariba pabou ku e buki ta masha prèt mes, pero te ainda e amistat di mi nan ei no a kumpra ni lesa mi bukinan. Ta kos pa mi bira masha falsu mes. Di aya banda un hende ta bin konta mi ku John a keda sin paga impuesto riba su ganashinan i Landsontvanger a klap John un ‘aanslag’ mand’é den tobo di su wela. Na momentu ku mi tende e notisia aki, mi ta sinti algu ku nan ta yama “Schadenfreude” (Epicaricacy), esta un sintimentu leve di alegria dor di frakaso di otro hende. E sintimentu aki ta bin dor di un kerensha ku mi tin, ku e persona meresé tal kos ku a pas’é, pa bida den mi bista bira mas “hustu”.

Nos tur ta sinti e kos aki na momentu ku otro hende na trabou por ehèmpel haña promoshon, kaminda ta abo t’esun ku ta traha mas duru ku un buriku, i despues kos bai malu ku e persona aki. Bo por sinti esaki ora ku abo den bo matrimonio a duna tur di bo parti pero tòg bo matrimonio a frakasá, kaminda otro hende segun bo opinion ta hasi ko’i desgrasiado ku hende, pero tòg e tin mihó personanan ta kana mané kachó ‘loops’ nan tras, i ku despues nan bida amoroso tambe a frakasá. E por bini tambe dor di falta di kurashi, na momentu ku abo por ehèmpel tin miedu di hasi algu, pero otro persona ku tin mas kurashi, ta hasi kosnan ku abo te ainda no a tribi pa hasi, i ta logra kosnan ku abo ke logra, pero te ainda bo no a logra, i despues kos bai malu ku e persona aki.

Tur esakinan ta ingredientenan ku ta duna nos komo hende interes den hasi redu riba otro persona.

Hende ku ta huzga otro persona, ta hasi redu riba otro persona òf di un otro manera ke pinta otro hende malu, tin un nesesidat di ke laga nan mes sinti ku nan tin balor, aunke ku akontesimentunan ta laga e persona sintié komo un frakaso. Pues básikamente hende ta hasi redu na momentu ku nan ta sinti nan mes inferior, i nan ta uza e hasiment’i redu pa nan por sinti nan mes bon ku nan mes. Mayoria bia e sintimentu inferior ta bon dor di yalusí òf envidia riba algu ku e persona por hasi òf a logra i ku e persona ku ta hasi redu no a logra òf no tin kurashi òf sufisiente konfiansa propio pa hasi.

Hende sin kontenido
Manera mi a menshoná anteriormente, dor di opservashonnan ku mi a hasi, mi ta ripara ku hende ta involukrá nan mes den hasiment’i redu tambe komo nan método pa establesé relashonnan sosial mutuo, huntu ku hendenan ku tin mesun yalusí, frustrashon òf falta di konfiansa propio ku nan. E ta manera un Yu’i Kòrsou pèrdí na Hapon mei mei di yen hende ku no ta papia niun di nos kuater idiomanan. Na momentu ku e Yu’i Kòrsou ei topa ku un otro Antiano, e promé kos ku nan ta hasi ta kuminsá papia riba e haponesnan ku no ta komprondé ingles, kuantu kos straño nan tin ta hasi i kompartí tur nan frustrashonnan pa motibu di limitashon di lenguahe.

Tin hende ta bisa ku nan ta hasi redu pa kita ‘lafheid’.
Esaki ta simplemente un èksküs. Enrealidat hendenan sikológikamente stabil, esta ku no ta sinti nan mes inferior na otro, no tin outo-estima abou èts, outomakamente ta haña REDU algu ku no ta satisfasé nan pa motibu ku nan no tin e nesesidat kousá pa e sintimentu di inferioridat, frustrashon i outo-estima abou. ‘As simple as that!’

Pa rekapitulá, hende ta hasi redu pa e siguiente motibunan:

1. Pa sinti nan mes superior
Hende ku tin outo-estima abou, balor propio abou, falta di konfiansa propio, falta di kurashi pa tuma pasónan nesesario èts, ta haña un plaser temporal den hasiment’i redu.

2. Pa falta di kontenido òf interes
Hende ku no tin sufisiente konosementu, òf aktividatnan di nan interes (hòbi) ta hasi redu komo algu pa tene nan mes temporalmente okupá.

3. Pa envidia
Hende ta hasi redu pa di un òf otro forma purba kousa un impakto negativo riba esun ku ta mas popular ku nan, tin algu ku nan tin deseo di tin, a logra algu ku nan mes ke logra òf tin un estilo di bida ku nan tin deseo di tin.

4. Pa haña atenshon
Hende ta bin ku un supuesto informashon kayente pa otronan ku tin kualke un di e tres puntonan ariba menshoná pa risibí atenshon for di nan. Lógikamente e persona ku tin un redu pa konta ta bira e sentro di atenshon pa un ratu, miéntras nan tin informashon sensibel di hende pa kompartí.

5. Pa sinti nan parti di un grupo
Hendenan sin kontenido, ku no sa di nada otro ku nan lo por uza pa lanta un kombersashon interesante, ta uza redu komo medio pa nan por establesé un kombersashon ku despues lo por yuda nan sera un relashon ku un otro persona. Akinan bo ta bin mira tambe dikon personanan inteligente tin tiki amistat pa motibu ku e kantidat di hende ku nan por haña pa diskutí temanan poko usual ku ta rekerí profundidat i konosementu, ta tiki. Mayoria di hende ta preferá papia di kosnan fásil, manera bida di otro, moda, redu, sèks, eventonan di farándula èts.

6. Pa baha rabia, frustrashon òf temporalmente suavisá nan infelisidat
Hendenan ku tin e sintimentunan aki ta haña sierto plaser den hasiment’i redu!

Mester bisa ku tur hende tin un nivel di kuriosidat pa sa kiko ta pasando den bida di otro hende i kisas esaki ta un motibu ku tin hendenan ke skibi outobiografia di nan bida. Sinembargo e meta di un outobiografia ta pa siña hende algu. E persona en kuestion usualmente ta konta e difikultatnan ku e mester a enfrentá den bida pa inspirá i motivá otronan, i no pa duna abo plaser den su frakasonan.

Tin un dicho ku ta bisa:
“Si bo no tin nada na drechi di bisa di un persona, mihó bo no bisa nada.”

Hasiment’i redu ta simplemente remedi temporal pa bo inseguridat i frustrashonnan ku bo tin.

Si un persona a skibi un buki i a bende mas tantu kopia ku mi, ami por sea bai lesa e buki di e persona ei pa mi wak kua strategia el a uza ku ami tambe por uza, òf keda kontentu ku e 300 kopianan ku mi a bende di kual mi sa ku mi lesadónan tin mesun interes ku mi. Si bo ta buska informashon di otro hende pa sa, mira ku e ta pa bo propio desaroyo òf pa bo komprondé komportashon di hende pa asina yuda otro persona ku informashon balioso, positivo i sin prehuisio.

Si nos tur hasi esaki, e ora ei, programanan, videonan, artíkulonan, potrètnan i demas materialnan ku ta kontené un ke otro idiotes rondó di redu lo no haña bida den nos komunidat.

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.