Esaki ta loke bo telefòn ta bisa di bo personalidat!

Reading Time: 5 minutes

 Manera bo sa kaba, mi gusta hasi hende tur tipo di pregunta ku lo ta bisa algu di nan personalidat. Riba mi Facebook mi ta hasié regular, pero no ta tur hende ta kontesta tur mi preguntanan. Algun di nan, nan ta konsiderá “kosnan personal” i otronan nan ta konsiderá “kosnan muchu kompliká.” Mi a yeg’i hasi un pregunta un bia, i risibí vários kontesta ku tabata bisa “E kos ei no ta kai bou’i bo”. Preguntanan ku sa risibí kontesta asina ta algu manera “Ki dia tabata último bia ku bo a eksperensia un bon orgasmo?” Ku nan rason, e kos ei no ta kai bou’i mi.

Resientemente mi a puntra “Kua marka di telefòn bo tin i kua marka di telefòn lo bo kumpra próksimo.” Esaki tabata un pregunta ku a risibí vários reakshon di hendenan ku a indiká kua marka di telefòn nan tin. Mas ku klaro ami ta sinta puntra mi mes dikon esaki si nan ta konsiderá ku e ta kai bou di mi? E marka di telefòn ku bo tin no ta mi asuntu. E no ta kai bou’i mi….pero pa un motibu òf otro e hendenan lo tabata ke pa mi sa kua marka di telefòn nan tin. Hende porfin!

Remarkabel tabata ku e mayoria di e personanan tabata tin Samsung i algun pipita di hende tabata tin iPhone. Di loke ami sa opservá, den kaya mi ta mira mas tantu Samsung kompará ku iPhone i esaki ta kuadra tambe ku sifranan di International Data Corporation (IDC) ku ta bisa ku Samsung den e di tres kuartal di 2016 ainda ta na promé lugá ku 21% di e merkado, siendo ku Apple (iPhone) ta na di dos lugá ku 12.5% di e merkado. Huawei ta na di tres lugá ku 9.3%.

Ta konosí ku Samsung ta uza Android komo su Operating System (OS) i telefònnan di Apple ta uza iOS. Pa ku e merkado, no tin niun otro OS ku lo gana Android mirando ku te den e di tres kuartal di 2016, Android tabatin 86% di e merkado.

Tin un rivalidat eterno ta konsistí entre tantu e kompania komo e usuarionan di Samsung i Apple. Te ku algun tempu pasá mi tabata sinta mei mei di algun persona ku tabata diskutí kua ta mihó, esta Samsung òf Apple, i nan a puntra ami kua di nan dos mi tin. Manera semper, ami ta apart fo’i tur hende i mi a bisa nan ku ami tin Sony Xperia. Nan a sinti nan un poko laf, pasó ami no por partisipá den nan bataya pa wak kua di nan ta superior. Ami si a sinti mi bon ku mi a laga nan keda laf!

Den un estudio resien, kondusí pa Heather Shaw di University of Lincoln’s School of Psychology, i otro investigadónan di Lancaster University, a bin sali na kla ku e telefòn ku bo tin, ta bisa algu di bo personalidat. E estudio a konkluí ku usuarionan di Android ta mas honesto i humilde kompará ku usuarionan ku tin un iPhone. Tambe nan a konkluí ku hende muhé tin mas tendensha pa kumpra iPhone, i ku usuarionan di iPhone ta duna mas atenshon na nan status (posishon den un klase sosial.)

Anto ta einan mi kera yega………Status! Manera mi a menshoná ariba, lo mester tin un motibu pa kual hende lo ta haña aseptabel pa mi sa kua telefòn nan tin sin konsiderá ku esei no ta mi asuntu!

Laga nos kuminsá na aklara algun kos. Mi ta kere bèrdat ku tur loke bo ta hasi i tur loke bo ta propietario di dje ta bisa algu di bo personalidat, pasó kon ku bo bir’é, ta bo nesesidatnan komo persona ta krea bo personalidat. Den mi buki ‘Niun Pátaka’ bo ta mira presis kon mi ta hasi análisis di hende basá riba su nesesidatnan ku ta krea su komportashonnan i personalidat.

Si bo tin nesesidat di ta un persona di ‘status’, tur bo akshonnan lo ta algu pa duna bo mas status. Lo bo bisti pañanan ku ta elevá bo status, lo bo anda ku personanan ku segun bo ta subi bo status i tambe lo bo tin prendanan manera kadena, oloshi i tambe telefòn ku ta yuda elevá bo status.

Nos no mester kita for di bista si ku eksperensia ta afektá hende su personalidat. Pues un persona ku tabata tin hopi mal eksperensia ku telefònnan Samsung, kisas lo bira kumpra un telefòn iPhone. Por ta posibel tambe ku un persona a kumpra un iPhone pasó su amistatnan a rekomend’é esei, i no ta presis pa motibu di status. E estudio ta huzga hende sin tene kuenta ku otro posibel faktornan ku a pone ku un persona tin un iPhone. Por ta posibel ku ta di regalo el a hañ’e tambe!

Ounke e persona su telefòn por bisa algu di e persona, ami lo no wak su telefòn so pa yega na tal konklushon. Mas ku klaro ku si bo topa un persona ku outo luhoso, paña karu, sapatu di marka, oloshi di marka i tambe un iPhone, bo por asumí ku e persona aki ta un hende ku ta duna su aparensha hopi importansha i di status. Pero esaki tambe por ta posibel den un persona ku un Samsung di último modelo, òf un di esunnan ku ta ridikulamente karu.

E motibu ta ku iPhone, maske e no ta e telefòn di mas popular, e ta gosa di un status di superioridat i kisas esei ta pa motibu di e kalidat superior di tantu e telefòn komo su ‘Operating System’ i kisas tambe su preis (ku ami sigur no ta bai paga pa mi tin un telefòn). Pues hendenan ku tin un iPhone usualmente sa ekshibí un sentido di superioridat, ounke kisas nan no ta atmití esei òf nan no ke bo pensa esei.

Si bo tuma na kuenta otro faktornan ku tambe por determiná personalidat di e persona, via di su telefòn enbèrdat bo por yega na e konklushon ku usuarionan di Android ta un tiki mas simpel i práktiko, i ku usuarionan di iPhone ta mas ambishoná, di status i ku gusta òf ke hala atenshon riba nan.

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.