Unda e bon hòmbernan na Kòrsou ta anto?

Reading Time: 8 minutes

 Esaki ta un pregunta ku kada bes mi ta tende hende muhé hasi. Si mi bai nan tras, mi ta haña e impreshon ku no tin bon hòmber mas na Kòrsou. Pero esaki ta bèrdat? Esaki ta kuadra? Òf kisas e muhé ta kore ku tur e bon hòmbernan pasó nan wowo ta mas habrí p’e mal hòmbernan?

Un muhé por haña un bon hòmber riba dje, pero e por bisa ku e hòmber no ta su tipo. Awó mas ku klaro, ta masha difísil pa bo ta den un relashon ku un persona ku bo no ta sinti atrakshon na dje. Pero tin ora bo tin ku wak bon, pasó tin bia nèt e hende ku bo no por soportá ei, òf bo no gust’é pasó e ta manera ‘nerd’, òf bo no ta hañ’é atraktivo pasó e no ta bisti den stail, òf bo no ta haña ku e ta bo tipo, pasó su nanishi ta grandi, kisas ta nèt e persona ei t’esun ku por pone bo kana riba tapeit kòrá pa restu di bo bida, pero tin kosnan ku bo tin ku mira den dje ainda.

Den mi buki ‘Kibra Hacha’ mi a splika dikon sierto muhénan tin tendensia di kai pa hòmbernan tipo ‘Bad Boy’. Den e mesun buki aki i despues den ‘Niun Pátaka‘ mi a elaborá riba kriterianan ku hende ta apliká pa yega na un pareha. Anto tin bia bo tin ku analisá bo mes pa bo wak si bo kriterianan ku ta laga bo yega na e hòmber ku abo tin bista na dje, ta korekto òf no. E kriterianan aki ta kambia segun bo edat ta subi, i bo eksperensianan di bida, kuminsando na e kriansa ku bo a risibí prinsipalmente dor di e promé hòmber ku bo tabata tin den bo bida (usualmente bo tata) ta hunga un ròl masha importante den e tipo di hòmber ku abo lo tin bista p’e. Lesa ‘Niun Pátaka‘ p’abo komprondé presis ki ròl bo kriansa ta hunga den esaki.

E kriterianan ku bo tin ta pa satisfasé sierto nesesidatnan ku bo tin. Bo eksperensianan tambe ta kambia bo lista di kriterio. Prinsipalmente relashonnan anterior ku bo tabatin, i esakinan ta duna bo otro tipo di nesesidat. Mi ta duna bo un ehèmpel metafóriko pa bo komprondé kiko mi ke men.

Mi tabata tin un telefòn Nokia E7. E telefòn aki ta masha bon telefòn. E bateria no tabata grandi, pero si e tabata dura mi sigur dos dia. Ten ku mi a kumpra e telefòn aki, mi kriterio prinsipal tabata pa e telefòn wanta karga mas ku un dia. E tempu ei mayoria hende a kuminsá kumpra Samsung i hopi hende tabata reklamá ku e bateria ta baha den un dia. Ami si no tabata tin pasenshi pa karga telefòn tur dia, pues mi nesesidat tabata pa e bateria dura largu. Anto esei tabata e kaso tambe. E bateria di e Nokia aki tabata dura dos pa tres dia, kual ta hopi bon. Despues di esaki, ta e pantaya tabata sorprendé mi. E telefòn ta bin ku un asina yamá ‘Corning Gorilla Glass’ i e telefòn aki por a kai 10 bia, kibra e vlur, pero e telefòn mes ta keda bon bon. Mi ta hinka e telefòn den mi saku sin ‘case’ sin nada, anto den mi saku tin yabi, sambèchi, skrufdrai, blet, ko’i kòrta uña, kuchú di slais keshi i  un aispik. Nunka e pantaya a raspa a ni un krenchi. Te awe e pantaya ta manera nobo. Mi úniko problema ku e telefòn aki tabata ku e no tin Android ariba. E OS (Operating System) ku e telefòn ta bin kuné ta Symbian, anto esaki tabata limitá mi na hopi ‘applications’ ku mi no por uza.

Pues mi a bai buska un otro telefòn, i akinan mi kriterio a kambia. Mi nesesidat prinsipal ta pa e telefòn tin Android ariba pa mi por ‘download’ tur ‘app’s’ ku mi tabata ke. Asina mi a wak un Sony Xperia Z. Masha bon telefòn, aunke e bateria si no tabata dura tantu manera e Nokia, pero m’a kustumá tòg ku e kargament’i telefòn un bes pa dia ei. E Sony aki si no tin ‘Corning Gorilla Glass’, sino un ‘Shatter Proof Glass’. Pero ya komo ku e Nokia, mi no a uza ‘screen protector’ i  nunka nada no a pasa e pantaya, m’a pensa ku esaki tambe lo no tin mester di niun ‘screen protector’. Pero ora mi tabata hinka mi telefòn den mi saku huntu ku e yabi, sambèchi, skrufdrai, blet, ko’i kòrta uña, kuchú di slais keshi i  un aispik, e pantaya aki si a raspa anto raspa mes. Aworakí mi tin un telefòn ku di baina mi por taip ariba. Kasi nada mi no por hasi ku e telefòn, pasó e pantaya ta asina raspá ku e telefòn no ta respondé ora mi primi ariba. Yamada ta kos ku mi no por hasi mes, pasó ora di sera, e telefòn no ta sera. E telefòn ta keda habri, kome tur mi sèn.

Pues esaki a kambia mi nesesidat i a pone ku awor mi kriterio prinsipal ta ‘Corning Gorilla Glass’ dor di e bon eksperensia anterior ku mi tabata kuné. Bo ta komprondé unda mi ke yega?

For di un prinsipio ku mi tabata sa ku mi ke baha i instalá ‘apps’ ku kos, lo mi no a kumpra Nokia, pasó Nokia no ta uza Android. Mi bista tabata mas pa e durashon di bateria, kual despues a resultá algu ku mi a siña biba kuné tòg. E kargamentu di telefòn un bes pa dia ei no ta dje malu ei. Mi tin ku djis sòru pone e telefòn karga tur anochi, i durante dia e ta bai bon bon. Pa loke ta trata e pantaya, bon mirá, e ‘Shatterproof Glass’ tambe ta bon bon. Ta ami tin ku stòp di pone mi telefòn kaminda ku tin kosnan skèrpi manera yabi, sambèchi, kuchú di kòrta apel, aispik èts. Anto si mi djis sto’i hasi floho i pichiri, kumpra un ‘screen protector’ di 3 dòler, mi pantaya lo keda bon bon!

Bo ta komprendé loke mi ke men?

Manera mi a menshoná ariba, hopi hende muhé, debí na sierto nesesidatnan ku nan tin, ta kai pa hòmbernan ku lo tuma nan hasi pen-bieu un dia. Hòmbernan muheriego por ehèmpel for di edat yòn a desaroyá abilidatnan pa konkista muhé. Nan nesesidat (pa un motibu òf otro) ta pa tin yen muhé. Manera Gibi Doran a bisa….”E no por mira saya”. E hòmbernan aki (sakando e fama di Gibi afó) sa kon pa papia ku muhé. Nan sa kon pa trata muhé pa muhé pa muhé kai mané patia bèrdè pa nan. E muhé por bira asina kèns riba e hòmbernan aki (pa motibu di e manera ku e hòmber ta kumpli ku nan nesesidatnan sikológiko) ku e hòmber por tuma e muhé hasi manera e haña ta bon.

Si nan sa kon pa hasi esaki ku un muhé, nan sa kon pa hasié ku mas. Komo nan tin e abilidat pa haña kua muhé ku e ke, e ta bira loke nan ta yama ‘unresponsive’. E ta trata bo bon pa un tempu, duna bo atenshon pa un tempu, te dia e ta kansa òf mira un otro ku ta interes’é mas ku bo. Bo bin ku yu riba dje, b’a kue awa mes. Bo ta flèt tur su kaya!

Pero prèt ta ku si bo puntra un muhé ki tipo di hòmber e ke, e lo no deskribí e tipo di hòmbernan ei. E lo deskribí un hòmber, fiel, sensibel, ku ta trat’é bon, dun’é tur kariño i atenshon, ku ta komprondé, ku ta komuniká bon kuné èts. Pero pa un motibu òf otro, ora nan sali eifó, nan ta kai pa ‘Gibi Doran and Co’!

E kos ta ku pa motibu di e muhé su nesesidatnan inkonsiente, e hòmber fiel, sensibel, ku tin mas tendensia di tene kuenta ku bo sintimentu i nesesidatnan konsiente, no ta atraktivo den promé bista pa e hende muhé. E muhé di forma inkonsiente ta buska e hòmber ku mas ta kumpli ku su nesesidatnan inkonsiente, i e ta mira kua hòmber lo por kumpli ku su nesesidatnan aki sin paga tinu kuantu doló’i kabes e hòmber aki lo por trese kuné.

Awor, lo bo ta puntra ta kiko t’e nesesidatnan inkonsiente di hende muhé anto? Esei ta difísil pa mi bisa, pasó manera mi a indiká, nesesidat sikológiko di kada hende ta diferente, i nan ta forma i kambia dor di situashon di bida ku el a nase aden, su kriansa, kerensha (religioso) i eksperenshanan di relashonnan anterior. Pero, hopi hende muhé ta wòrdu atraé pa sierto kosnan básiko den hende hòmber i esei ta:

1. Rekurso finansiero (pa komodidat i status den bida).
2. Haltura (pa laga nan sinti nan mes protehé.)
3. Tur loke un hòmber ta haña pa medio di tèstòsteròn, esta kurpa muskuloso, barba, stèm bas profundo, kachete hanchu, i ambishon pa yega na hopi rekurso, fama, logro èts.

 Den ‘Niun Pátaka’ mi a splika ku tur hòmbernan aki tin un kos ku nan. Nada ku ta dushi i bon no ta bin pòrnada, meskos ku si bo kome un bon saté ku batata chines ku hopi sous ariba, konta ku e siguiente dia bo por haña kakamentu!

Karakterístikanan manera inteligensia, konosementu, personalidat ta ‘nice to have’ i nan lo bisa ku nan ta importante, pero investigashon ta mustra otro.

Den mayoria kaso, e hòmber ku na final e muhé lo por tin algu duradero kuné, den un prinsipio nan ta konsiderá nan laf, no spontáneo, ‘needy’ òf muchu sensibel. Prèt ta ku e hòmbernan aki ta kumpli ku nesesidat inkonsiente di nèt e mal muhénan ku lo tuma nan hasi, i asina e siklo ta sigui bai. P’esei awendia segun nos persepshon, no tin ni bon hòmber, ni bon muhé. Pero nan tei. Ta bo bista tin ku habri pa nan!

Lo mi sigui riba e tema aki un otro bia!

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.