Kasonan na Kòrsou ta sigui subi: Alkohòl ligá ku kanser na pechu i prostat!

Reading Time: 5 minutes

 Pa mi ta masha sinsero, te ku dia di awe nunka m’a komprondé dikon hende ta bebe alkohòl. Mi a purba tur sorto di bibida, esta bibida seku, bibida muhá, bibida stèrki, bibida lali lali, bibida tropikal, bibida karibense enfin….niun no tabata na mi smak. Di bèrdat mi ke a purba komprondé e komportashon di hende pa ku bebementu, i ta p’esei mi a purba bai riba un trep di bebementu. Mi tabata invitá ken ku ta bai sali, bai na un bar pa nos bai bebe. Mi tabata kumpra e mihó bibidanan ku hende tabata rekomendá mi. Te ku dia di awe, no tabatin niun ku a kai na mi smak. Ta p’esei mi a stòp di bebe i yega na e konklushon ku hende no ta bebe pa e smak di alkohòl sino pa e efekto di alkohòl. Den mi buki ‘Niun Pátaka‘ mi a splika dikon mi ta pensa esaki!

Alkohòl ta wòrdu konsiderá un droga i kontrali na loke hende hopi hende ta kere, alkohòl no ta un stimulante sino un droga depresivo, pero ku den e promé instante ta kousa un efekto di euforia. Despues di e euforia, e ‘ethanol’ den e alkohòl ta kuminsá aktua komo un ‘diuretic’, seka bo paden (deshidratá bo), i kousa un estado depresivo. Mas bo sigui bebe, mas e alkohòl ta dal bo abou mas lihé ku un Falkon Perigrine den atake!

hangoverInvestigashonnan di hopi aña a indiká ku e komponente anti-oksidante ‘resveratrol’ ku bo ta haña den biña tin sierto benefisionan pa bo sistema kardiovaskular na momentu ku bo hasi uzo moderá di alkohòl. Den serbes tambe tin sierto vitaminanan ku ta bon p’e kurpa. Sinembargo, investigashonnan di último tempu ta indiká ku e tiki bentaha ku bo por haña di alkohòl no ta bale la pena mirando e riesgo ku alkohòl ta pone bo na dje dor di e echo ku e supstansia aki ta subi bo riesgo di diferente kanser.

Mi konosé vários persona ku ta dal un glas di sea biña òf otro tipo di alkohòl tur siman i tin hende ta hasié tur dia. Nan motibu te ainda ta poko konfuso pa mi. Mi a yeg’i tende “e ta bon pa chill”, “mi gusta dal mi wijntje”, “pa selebrá bida” i un kantidat di otro kos. Pero awó mi pregunta ta…..bo kurpa tambe ta di mesun opinion ku bo? Dikon mi ta puntra esaki?

Pa definishon, alkohòl ta un venenu pa nos kurpa. For di e momentu ku alkohòl drenta bo stoma, e ta un supstansia ku nos kurpa no ke, pasó e ta simplemente un venenu. Pa e motibu ei, bo kurpa tin ku bai prosesá e supstansia pa kambi’é di tóksiko pa algu no-tóksiko. Pues for di ora bo konsumí alkohòl, bo kurpa ta produsí un enzima ku yama “alcohòl dehydrogenase”. E enzima aki tin ku bai kita e atom ‘hydrogen’ for di e alkohòl. Esaki ta sosodé ora e alkohòl yega na bo higra, i akinan e enzima ta kibra e alkohòl pa hasié un supstansia kual nan ta yama un ‘acetaldehyde’. E supstansia aki despues tin ku bolbe wòrdu kibrá pa bira un ‘acetic acid radicals’. Awèl e ‘acetaldehyde’ ei a keda probá di ta hasi daño na hende su DNA i proteinanan den bo kurpa i esakinan por kousa kanser den bo kurpa. Tambe alkohòl ta generá molekülnan ku por reakshoná ku oksígeno ku ta daña bo DNA, proteina, e sélulanan di vèt den bo kurpa. (Un proseso ku yama óksidashon. (Mi a splika e proseso aki den ‘Kibra Hacha’.)

Komo sifuera no ta basta, alkohòl ta impedí bo kurpa di apsorbé nutrientenan ku ta yuda bo kurpa bringa kanser di manera natural, manera vitamina A, B Complex, Vitamina C, D, E i carotenoids. Por último, alkohòl ta subi nivelnan di estrogen, kual ta e hormona liga ku e riesgo di kanser na pechu.

Vários investigashon, tantu na Inglatera komo na Merka ta indiká ku alkohòl kada bes ta keda ligá ku kasonan di kanser, entre otro kanser na kabes i garganta,  kanser esofágiko, kanser di pechu, higra, kanser rektal i kanser na  prostat. Segun un artíkulo ku a sali resientemente den Korant Ekstra, aki na Kòrsou kasonan di kanser na prostat a bin ta subi drástikamente.

alkohol-i-kanser

Mi a yeg’i skibi tokante esaki un bia kaba den e artíkulo “Eksperto ingles ta mustra ku biña kòrá tòg ta malu pa salú!”, pero niun hende no a preokupá nan kabes ku e artíkulo. Awó ku ofisinanan di dòkter ta yen di hende man na kabes, i ku tin yen hende ta muriendo di kanser, awó tur hende ke bira nervioso!

Pues nan a kuminsá konkluí ku uzo moderá di alkohòl no ta ‘safe’. Segun e investigadónan, te asta e montante di mas chikí, por subi bo riesgo di kanser.

Awó, ami ta puntra mi mes ku si ta riba investigashon hende mester warda pa siña esaki. Pasó ta bon konosí ku hende su kurpa no por prosesá mas ku 30 ml di alkohòl pa ora. Mayoria hende ta bebe muchu mas ku esei, i esei ta pone ku ta solamente 20% di alkohòl ta wòrdu prosesá dor di e stoma. Tur sobra ta bai drenta bo sanger komo suptansia tóksiko via di e intestinonan, bai hecha baina.

Mas ku klaro esaki lo kai komo un shòk pe hendenan ku gusta dal nan glas di ‘wijntje’ ratu ratu pa ‘chill’ i pa “selebrá bida”. Pero si bo ta ‘chill’ i selebrá bida ku un venenu manera alkohòl, ta mihó bo kue un bòter di flit Pif Paf bo spùit e den bo kara mesora. Awendia nan ta bin ku aromanan masha plasentero

Segun investigashonnan resien, 30% di kasonan di kanser di último tempu tabata tin komo kousa bebementu moderá di alkohòl. P’e motibu aki nan a yega n’e konklushon ku no tin uzo moderá di alkohòl ku por keda konsiderá komo ‘safe’.

E benefisionan kardiovaskular ku bo por saka d alkohòl, bo por hañ’é dor di simplemente hiba un bida saludabel i hasi ehersisio regular.

Source: HealthStatus

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.