Dikon bo ta sinti miedu di rechaso?

Reading Time: 10 minutes

 Un persona a puntra mi dikon e tin miedu di rechaso i kon e por kita e miedu ei. M’a skibi hinter un kontesta kual en prinsipio mi lo mester a manda p’e, pero enbes di splika un persona so, dikon no splika tur hende pareu? Ta ko’i egoista splika un persona so òf nò?

Miedu di rechaso ta un miedu, pues un barera ku ta stroba bo di hasi algu. E ta un emoshon ku ta kousa un sintimentu no masha plasentero den bo. Niun hende no ta sinti miedu pòrnada. Miedu ta un emoshon ku hende tin pa yuda protehé nos mes for di kosnan ku lo por hasi nos daño i/òf doló. Manera mi a menshoná den mi buki ‘Niun Pataka’, nos mente no gusta doló. Niun klase di doló. Pa e motibu ei, e lo hasi tur loke ta nesesario pa evitá doló, inkluso gaña su mes. Pero lamentablemente doló ta parti di bida. Si bo no sinti doló lo bo no desaroyá, lo bo no progresá. Un persona ku ta hasi tur kos posibel pa evitá di sinti doló, nunka lo logra e kosnan ku e ke i ku al final lo hasié felis.

rejection-2Rechaso ta un kos ku ta kousa doló. Pero dikon? Hende mester por sa ku den e bida aki e por haña un “Si” i e por haña un “Nò” komo kontesta. Awó ta dikon ta “Si” so hende ke tende? E no ta bai tòg?

Den ‘Niun Pataka’ mi a splika ku doló den bida no ta kos ku bo por evitá. Si bo tin miedu di doló, bo no por sinta warda te ora e miedu kita. E lo no kita su so nunka. De fakto, mas bo skonde pa doló, mas fuerte e miedu ta bira i mas doló e lo hasi dia bo mester sinti doló. Mi a splika den ‘Niun Pataka’ ku e mihó kos ku bo por hasi ta siña rekuperá mas lihé di doló. Den e mesun forma miedu di rechaso ta funshoná. E motibu ku bo lo skonde pa rechaso ta pasó bo no sa kon pa rekuperá (lihé) di e doló, anto esei lo pone bo keda sin tuma kurashi, dor ku bo sa ku si bo wòrdu rechasá, lo bo sinti doló, i ku bo no sa kon pa pasa riba e doló ei.

Pa ki motibu rechaso ta hasi doló?
Bo sa ripara ku tin hende ta haña rechaso, pero nan no ta wòri, siendo ku e otro ta sintié masha malu mes ora e keda rechasá? Loke mi a siña di esaki ta lo siguiente:

Si bo ta sinti doló ora bo wòrdu rechasá ta pasó bo no ta sigur di algu òf ta pa motibu di kosnan ku ainda bo no a aseptá.

Insiguridat tur hende tin. Hende muhé tin hopi inseguridat pa ku nan físika, hende hòmber tin inseguridat pa ku yen kos, entre otro hombresa. Por lo tantu si un muhé aserka un hòmber i e keda rechasá, hopi chèns ku e lo atribuí e rechaso na su aparensha. Prinsipalmente si e hòmber rechasá e muhé, pa despues bai skohe un otro persona femenino ku e muhé rechasá ta persibí mas bunita kuné, e muhé rechasá aki lo sinti hopi inseguridat pa ku su aparensha. Si un hòmber tin kurpa chikí i e no aseptá esaki, i ta sinti ku bida tabata inhustu kuné pa a dun’é un kurpa chikí, esaki lo por afektá su outo-estima. Si e hòmber aki keda rechasá pa un muhé ku el a gusta,  e hòmber aki mesora ta bai pensa ku e muhé a rechas’é pa motibu di su tamaño, siendo ku kisas e muhé a rechas’é pasó e muhé gusta hòmber latino sin importá tamaño di e kurpa!

E mesun kos ta pasa si bo ta keda apliká pa un trabou i un tras di otro bo keda rechasá. Dado momentu bo ta kuminsá haña duda (inseguridat) den bo abilidatnan, i esaki ta kuminsá hasi doló.

Rechaso ta hasi mas doló si e ta bin huntu ku un sintimentu di impotensia. Por ehèmpel bo a keda rechasá pa un trabou i bo no sa unda mas pa bo solisitá, e rechaso ei lo hasi hopi mas tantu doló.

Importante pa bo sa.
Si bo haña bo ku un rechaso ku a hasi doló, ta bon pa bo analisá pa bo mes dikon e ta hasi doló i kua inseguridat e rechaso ei ta mishi kuné. Unabes bo haña sa esei ta bira hopi mas fásil pa bo pasa riba e doló. (Ku hopi mas fásil mi no kemen ku e ta bira super fásil. E ta simplemente mas fásil ku si bo no tabata sa dikon e ta hasi doló.)

Hopi  bia mi sa puntra hende kua pregunta nan no gusta pa hende hasi nan. E pregunta(nan) ku un persona no gusta pa hende hasi nan ei, ta e kos(nan) ku e persona tin un tiki problema kuné pa aseptá òf ta insigur riba dje.

Kon pa pasa riba sensibilidat di rechaso:
Mi tin ku kuminsá na bisa ku hende ta simplemente koñ’i mama. Hende no sa tene kuenta ku emoshon di hende masha, anto aparte di esaki, hende por ta asina ignorante ku nan no sa kon pa tene kuenta ku emoshon di hende tampoko. Un persona por ta konsiderá un pregunta òf komentario komo algu masha normal, siendo ku pa otro persona e pregunta òf komentario ta mishi ku un herida òf inseguridat ku ta kousa doló n’e persona. Por ehèmpel, hende gusta kana puntra otro “Ki dia bo ta kasa?, Ki dia bo ta traha yu pa kaba?, Ainda bo no a kaba skol? Dikon bo ta gordo asina?” èts. E pregunta aki ta iritá hopi hende, pero hende lo no stòp di hasi esaki, pasó  e ta algu ku nos ta konsiderá “preguntanan di interes sosial outomátiko” djis pa nos haña koí papia. Pa e motibu aki, ta hopi difísil siña hende kon pa bira mas kouteloso ku sintimentu di otro hende.

rejection-3

Meskos ta bira hopi difísil siña hende kon pa trata bo na momentu ku nan tin ku rechasá bo. Ta imposibel fòrsa e hende pa aseptá bo siendo ku e no ke. Si e no ke bo, e lo tin ku rechasá bo, maske esei lo hasi bo doló. Pero bo no por keda sin hasi aserkamentunan òf purba di haña algu ku bo ta interesá den dje, djis pasó bo tin miedu di rechaso. Ta kumini bo siña kon pa bira ménos sensibel pa rechaso ku sinta skonde pa algu ku ta simplemente parti di bida. Pa bo siña pasa riba esaki, bo mester sa kiko te kosnan ku ta hasi bo sensibel pa rechaso:

1. Nesesidat: mas nesesidat bo tin di algu, mas sensibel lo bo ta pa rechaso. E loke bo tin nesesidat di dje ei mester ta algu ku ta difísil pa bo haña. Por ehèmpel si bo tin nesesidat di un hende pa bo bai movies kuné, i bo pidi un persona pa bai ku bo, i e rechasá bo (manera yen hende ta hasi ku mi), hopi chèns ku esei lo no hasi bo masha doló. Pasó hende pa bai movies kuné tin hopi. Si esun no ke, bo ta pidi e otro. Sinembargo si bo tin nesesidat di un trabou partikular, i bo a solisitá pa un, i keda rechasá, hopi chèns ku esei lo hasi bo un tiki mas doló. Meskos si bo ta sinti nesesidat di amor di un persona partikular, por ehèmpel bo mama òf bo tata, i bo wòrdu rechasá, e lo hasi hopi mas doló, dor ku ta un mama òf un tata bo tin!

Nesesidat di amor kombiná ku intimidat tambe ta un ku ta hasi hopi doló. Prinsipalmente si bo ta kere ku ta un persona spesífiko so por duna bo e intimidat manera bo ta deseá. Si e persona ei rechasá bo, lo bo sinti hopi doló!

2. Aseptá rechaso komo un bèrdat: Laga bisa bo a skibi un buki, i bo a bai pidi finansiamentu pa por publiká e buki. Bo a keda rechasá tur kaminda, i asta tin hendenan ku a bisa bo ku bo buki nunka lo bira un éksito. Si bo kere e hendenan aki i aseptá nan komentario komo un bèrdat, e rechaso ei lo bai hasi bo hopi doló.

3. No tin otro opshon: Esaki ta bai huntu ku e sintimentu di impotensia. Si bo a kuminsá ku un negoshi pa motibu ku bo no por a haña niun otro trabou, bo a kue tur bo plaka hinka den un proyekto ku mester di aprobashon di hende, i bo proyekto keda rechasá, e rechaso ei lo hasi doló.

4. E rechaso ta mishi ku un herida emoshonal: Loke mi a splika ariba. Si bo tin un inseguridat, un parti di bo personalidat òf físika ku bo no a aseptá, rechasonan ku bo atribuí na esakinan lo kousa hopi doló,  i ta esaki ta e miedu di rechaso ku mayoria hende tin. Si un persona tin un problema ku su imáhen, pues e no gusta su aparensha, hopi chèns ku si e keda rechasá pa e sekso ku e ta sinti atrakshon p’e, e lo sinti hopi doló, pasó hopi chèns ku e lo kere ku e persona a rechas’é pa motibu di su aparensha.

Si bo sa esakinan ta bira un tiki mas fásil pa bo atendé ku bo sensibilidat di rechaso:
1. Dil ku bo heridanan emoshonal (terapia sikológiko semper ta yuda.) Inseguridatnan pa ku bo imáhen bo tin ku sea aseptá i/òf buska solushonnan ku ta lagabo sinti mihó pa ku bo aparensha.
2. Buska otro opshon (Nunka no pensa ku no tin otro salida pa un problema. Semper tin otro opshon.)

3. Nunka no aseptá un rechaso komo un bèrdat (Si mi lo a bai tras di hende, nunka lo m’a skibi ni ‘Kibra Hacha’, ni ‘Awa, Habon ku Past’i Djente‘, ni ‘Niun Pataka’. Anto tur m’a hasié sin ningun finansiamentu di ningun kompania o/òf instansia.)

Un kos sumamente importante pa bo sa:
Un tipo di rechaso ku ta hasi hopi doló ta rechasonan relashonal, amoroso, seksual èts. Ta importante pa bo komprondé ku kada persona tin un lista di kriterio ku nan ta apliká na momentu di skohe personanan ku nan ke tin komo pareha. Si mi a aserka un muhé i pidié pa frei mi, i e duna mi komo kontesta ku mi no ta su tipo, esei lo por hasi mi doló, solamente si mi bai pensa ku e tipo di persona ku ami ta, no ta bon sufisiente òf atraktivo sufisiente. E persona ku a rechasá mi, kisas e gusta hòmbernan burdugu ku kara di kabritu. Awó ami no ta ni burdugu ni mi no tin kara di kabritu, pues lógikamente e lo no sinti su mes atraé na ami. Úniko kos ku ta mi problema ta ku mi gusta tende e bèrdat kompletu for di hende, sino ami ta keda ku muchu pregunta den mi kabes. Dikon? Simplemente pasó ta asina mi ta. Pa ami por pasa riba algu, mi mester por komprondé presis ta kiko a pasa, pa mi por sera e kaso. Ta p’esei mi ta keda masha leu mes fo’i personanan ku ta konfundí mi, personanan ku mi no ta komprondé nan komportashon, personanan ku no ta honesto ku mi, personanan ku no sa ki baina nan ke èts. E personanan ei por hasi mi loko. Lógikamente bo ta saka e konklushon e ora ei ku ta mayoria hende mi ta keda leu fo’i dje, pasó ta hopi hende ta konfuso, no sa kiko nan ke, i ta leu for di honesto, konsekuentemente nan ta hunga ku sintimentu di otro. Ta p’esei mes mi ta mané mi ta. Mi no ta mòrs ku hende mashá!

Mi ta spera di a yuda bo un poko mas tantu i ku awor bo lo por dil nas mihó ku bo miedu di rechaso.

Por último, mi tin gana di sa di bo…
Mi a yega di splika tokante inseguridatnan di hende muhé i di hende hòmber. Ken bo ta kere tin mas miedu di rechaso? Hende muhé òf hende hòmber i dikon?

rejection

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.