Tene kuidou ku e muhénan aki. Nan ta hiba bo bankrut!

Reading Time: 9 minutes

 Masha dia mi ke a bai Movies pero komo niun hende no ke a bai ku mi, pues m’a disidí di bai mi so. Den Movies m’a topa un yùfrou sintá su so ku yen ko’i kome riba su pia. Mi no a pèrdè pa gana m’a aserk’é i puntr’é si e tin kompaño i si no ta asina, ku si mi por sinta band’i dje i nos ta kompaña otro. El a aseptá i asina m’a sinta band’i dje i disfrutá di un bon pelíkula. E muhé aki tabata hole mas dushi ku un hardin di rosa Dahlia i Magnolia, anto el a trata mi masha lif mes. Pues despues di e pelíkula mi a puntr’é si un dia e lo ke bai kome ku mi na un restorant. Mesora el a habri asina dos wowo hanchu i bisa mi ku e gusta kome anto asin’ei lo mi por konkist’é masha fásil mes. Awèl, esei tabata nèt bon chèns pa mi purba impreshon’é ya komo m’a gusta e manera ku el a trata mi.

Pa e sita ku mi tabata tin kuné, m’a bai kumpra paña karu, oloshi ‘Mont Blanc’, hasi reservashon na restorant Wine Cellar, i nos a bai kome, kòmbersá, hari, pasa masha ‘leuk’ mes ku otro. Mi a mira ku el a gusta ku mi. Den su wowonan mi a mira ku e tabata kayendo pa mi.

nafie-1M’a puntr’é si e ke bai kas ku mi pa nos kontinuá e anochi. Su wowonan a saka un brio i el a smail i bisa “SI”! Pero mi no ta kèns. Mi no por a bai mi kas kuné pasó mi kas no ta un bista. Yen paña ku tayó sushi benta aki aya, pues ta hotèl mi mester a bai kuné. M’a reserva un ‘suite’ den Acoya Hotel, i nos a pasa hinter e anochi huntu, masha dushi mes.

Pero mainta realidat di bida ta dal aden anto mi ta mira kon e muhé ta mustra hopi interes den mi. Lamentablemente mi pòtmòni no por sigui mantené e mentira aki pa largu tempu. Pa kolmo mi a mira ku e ta un muhé ‘high maintanance’ ku gusta kosnan nèchi, luhoso i karu, pues mi sigui ku e muhé aki, ta un bes aki e ta hiba mi bankrut. E manera di mas fásil pa kore ku un muhé asina ta di bis’é ku ta hòmber bashí mi ta. Esaki semper a yuda kore ku tur muhé ku ta karu pa mantené. Manera mi bisa e muhénan materialista ku ta hòmber bashí mi ta, nan ta sali kore bai mas duru ku e Quicksilver den ‘X-Men’. Anto esei ta bon tambe, pasó tòg mi no por mantené muhé karu. Nan ta duna mi strès i hinka mi den masha hopi problema finansiero.

Pues mi a bisa e muhé aki ku mi no ta traha. Ta un eskritor i outor pober i bashí mi ta, i ku aki aya mi ta lora man pa tene kabes riba awa. Mesora el a puntra mi “Eskritor i outor? Kua buki bo a skibi?” M’a bis’é ku te ainda mi tin tres buki skibí pero e lo no lesa nan tòg, pasó e bukinan ei lo no ta su stail. E di ku mi “Kon bo por sa kiko ta mi stail?” M’a bis’é “ata mi ta mirabo ei? Mi ta kere lo bo ta manera e muhénan ‘high maintanance’ ku úniko kos ku nan ta lesa ta revista pa sa kua ‘ makeup’ nobo di Revlon, MAC i Covergirl a sali. Mi bukinan no tin e kosnan ei aden. El a puntra mi “kon yama bo promé buki” M’a keda wak e mané “Ki dònder esei ta interesá bo?” Pero mi no a bis’é esei. M’a kontest’é “Kibra Hacha”. E di ku mi, “Mi por a wak’é?” M’a kue e buki dun’é. El a kuminsá ‘blader’ den dje i e di ku mi “hmm….e ta mustra mi interesante. Mi por sinta les’é un ratu?” M’a bis’é “Bon ya…eigenlijk 50 florin p’e buki si pero ya komo b’a hunga mi bon ayera anochi, bo mag les’é pòrnada” E di ku mi “great” M’a bis’é mi ta bai sali hasi pari kos bin pa nos kuminsá prepará pa ‘check-out’. E no a kontesta mi mes, el a keda kabes den buki.

img_6863M’a sali hotèl i lag’é den e ‘suite’, pero mi no a wòri pasó mi tin sigur ku e ta haña mi buki asina laf ku promé e kaba di lesa kapítulo dos ya e lo a kansa i disparsé kaba.

Grandi tabata mi sorpresa ora mi a bin bèk anto ainda e muhé tei. Anto el a kaba di lesa hinter e buki, i puntra mi kua ta e di dos buki. Ami a keda ‘flabbergasted’. Ta hendenan adikto na lesamentu so ta lesa un buki den un dia òf e buki mester ta sumamente bon ku bo no ta haña gan’i stòp di lesa (Meskos ku bo ta lesando e kuenta aki…..bo tin hop’i gana di sa kon e historia aki ta bai kaba òf no?)

M’a bis’é “e otro buki ta ‘Awa, Habon ku Past’i Djente’. El a puntra mi si e mag les’é. Mi a bis’é flèt “NO. “B’a haña un buki pòrnada kaba, ta Sanikolas b’a kere mi ta? Mi kemen b’a hunga mi bon si, ‘pero no es para tanto”. E di ku mi…..”Bo ta ban purba atrobe” M’a bisi’é atrobe flèt “NO”. M’a kue tene na su man, trèk’e pa mi sak’é pafó pasó awó si ta di mas. Sóbadje ora di ‘check-out’ ta sek’i yega, anto mi keda mas ora mi tin ku paga èkstra. Mi no tin sèn p’e ko’i lokonan aki. Imposibel un anochi di sèks tin ku sali mi karu asin’aki. Mi tabata purba push’é sak’é fo’i dje ‘suite’ pero el a keda resistí i pidi mi pa e buki ‘Awa, Habon ku Past’i Djente’. M’a keda purba push’é pa mi sake pafó, pero………

img_6878

E muhé aki tabatin mala maña. El a kuminsá papia masha lif mes den mi orea bisa mi kiko tur e ta bai hasi ku mi si mi lag’é. M’a keda bisi’é “Nò, Nò Nò…nos tin ku sali pafó”, pero tòg el a logra gana mi. El a pusha mi riba stul, kai sinta riba mi, kuminsá sunchi mi pashonalmente…….anto ami ta hòmber ku ta para un bes, i manera mi para mi ta pèrdè forsa. Wega a bai ròndu mesora.

img_6883

Mi mester a dun’é e buki ‘Awa, Habon ku Past’i Djente’ p’e lesa numa. El a bai sinta riba teras p’e lesa.

img_6867

Hende por ta haragan pa buki asina?

Atrobe mi a bis’é ku mi ta bai bin, pero sinseramente mi ta spera ku pa ora mi bin bèk el a bai, pasó simplemente mi no tin sèn pa mantené. E di ku mi “Ta bon papi’. Den mi mes mi ta pensa “Di unda mi ta sali k’e muhé mané ‘pega pega na’ki?”

Awèl, dos ora despues mi a bolbe bin bèk i haña e muhé ta grita hari meskos ku hende loko. E di ku mi “Nunka un buki a pone mi hari asina tantu. Mi gusta bo stail di skibi, dushi. Hopi realístiko pero prèt.”

Awó si mi no sa mas kiko pa hasi ku e muhé aki, anto mas ora bai, mas sèn mi tin ku paga n’e ‘suite’ pasó ya ora di ‘check-out’ a pasa kaba. Pero m’a pensa ku e último buki si lo pone sali na kareda, pasó ‘Niun Pataka’ no ta pa ken ku ta. M’a pensa ku e buki aki lo forsa e muhé aki su chip sigur. M’a dun’é e buki p’e bai lesa. El a tum’é ‘bon djente afó’ i e di ku mi “Mi ta bai les’é aworakí!” El a bai sinta kant’i ‘pool’ p’e lesa e buki.

img_6872M’a sali bai atrobe, pero e bia aki m’a bin mesora bèk pasó bo mes sa, mas ora mas sèn, plùs mi tabatin sigur ku awó si e muhé lo a disparsé.

Ora m’a yega e muhé a keda wak mi, wak e buki i bisa “Waw……waw. Mi ta mira asina tantu kos den e buki aki ku mi no tabata sa di mes”. E muhé a saka 150 florin duna mi. E di ku mi e ke tres di e buki aki. Un p’e mes, un pa su ruman muhé i un pa su amiga.

Awó si m’a keda kompletamente sorprendí i babuká. Mi a puntra e muhé “ta kiko tin robes ku bo anto? M’a bisabo mi ta pober, mi no tin sèn. E paña ku oloshi karu ku mi tabatin bisti, mi tin ku hiba tur bèk, pasó mi no por ‘affort’ nan. Ni sèn pa paga e ‘suite’ aki mi no tin.

E muhé a hala su kabeinan patras, kana bin serka mi, reis pechu dilanti, wak mi den mi wowonan i bisa mi “Papi, m’a paga e kamber kaba. Bo ta kla pa ‘check-out’ òf bo ke bai un ròndu mas?”

Na tur hende hòmber, tene masha kuidou ku e muhénan ku bo ta drenta kuné. Tin ora bo ta purba impreshoná un muhé pa bo haña bon sèks, pero e bon sèks ei por sali bo masha karu mes. Pa mi suerte e muhé aki no a hiba mi bankrut. El a hunga mi tres bia bon hungá, m’a bend’é tres buki, plùs danki na dje m’a keda den ‘suite’ di un hotèl pòrnada….ang, m’a menshoná ku m’a pidié p’e kasa ku mi tambe?  Lo mi manda karchi di invitashon di mi kasamentu personal pa bo, basta bo  tin un, dos òf tur tres di e bukinan aki. Tur tres ta optenibel aworakí na Mensing’s Caminada, pues sali bo bai buska nan mesora!

three books(E dama riba e imágennan ta simplemente un modelo. E historia a pasa di bèrdat si, wèl parsialmente di bèrdat, pero ku kompletamente un otro persona. Kisas e tabata djis un soño tambe. Mi no ta sigur mas. Agt, djis bai buska bo bukinan :D)

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.