Kiko ta bo problema ku bo no ta ‘app’ mi bèk anto?

Reading Time: 11 minutes

 Ora bo manda un mensahe pa un hende riba ‘app’, bo ke p’e kontesta bo bèk tòg? Pero tin hende ku simplemente ta lesa bo mensahe i sigui hasi otro kos sin kontesta bo bèk. Kiko ta nan problema? Skeit nan tin? Nan ta ignorando bo? Nan no gusta bo? Wanta nan mester?

Pa di promé, awendia tin yen manera ku bo por manda mensahe pa un persona ku ta bai via Internèt. Bo por manda un ‘app’, un ‘Facebook message’, un e-mail i kisas riba Instagram ku Twitter tambe tin manera pa manda mensahe pa hende. Mi no ta sigur, pasó mi no ta uza tantu kos asina. Tres kos ami ta uza mas tantu kual ta e-mail, whatsapp i Facebook.

Ántes hende no tabata tin niun dje kosnan aki. Si bo ke puntra hende algu, bo tin ku lanta bo atras, kana bai serka dje i puntr’é, òf warda te dia bo dal den dje pa bo puntr’é òf bisi’é algu. Despues a bin telefòn di kas ku bo por yama hende i chèlèlè. Segun tempu ta bai, nan a bin ta krea mas aparato pa mehorá komunikashon entre hende, pero de fakto nos komunikashon a bira mas pió ku nunka. Ántes bo mester a skibi un karta pa un hende i warda entre un pa dos siman pa haña kontesta bèk, awendia den ménos ku dos minüt bo por tin bo kontesta bèk. Mas ku klaro ku esaki ta dependé kon lihé e persona kontestá bèk. Esaki kisas a hasi hende muchu impasiente, te ku awor hende ta manda un mensahe pa bo, anto keda ku nan telefon den man pa warda bo kontesta bèk. Si bo no kontesta mesora, nan ta keda manda yen mensahe un tras di otro pa bo kontesta nan bèk, òf puntra bo ta kiko bo ta hasiendo pasó segun nan bo ta tarda pa kontesta. Whatsapp tin asta diferente manera pa bo sa ku bo mensahe a bai, ku si e persona a risibié i ku e persona a les’é. Unabes e persona a les’é, abo ta keda ‘wonder’ awó ta ki ora e ta kontestá bèk. Tin hende manera mi ku tin un tiki mas pasenshi i ta sinta warda ku pasenshi te dia bo haña bon di kontestá. Pero n’e otro banda tin hende ku simplemente no ta kontestá bo mensahe……NUNKA! Anto e hendenan ei mi ke probechá di e oportunidat aki pa manda nan bai skòp koko seku pia abou mardugá den kloof!

unresponded-text-messages-2-1Pa mi ta sinsero, mi tin ku atmití ku mi tambe tin ora ta bira chanchan promé ku mi kontestá un hende, i esaki por tin diferente motibu. Si mi no tin Internèt, simplemente mi no por kontestá. Mi no ta kana 24/7 ku Internèt riba mi telefòn pasó pa di promé mi no tin asina tantu sèn i pa di dos, fo’i ora mi ta riba kaya ta nifiká ku mi ta okupá ku otro kos, pues mi no tin tempu pa kontestá bo mensahe. Si bo disidí di ‘app’ bo tin ku warda trankil te ora mi haña un WiFi pa mi kontesta bo. Si ta algu di emergensia, mi ta rekomendá bo pa yama mi i no sinta warda pa mi kontestá bo ‘app’. Pero e kos mester ta ègt emergensia. No yama mi djis pa kuminda òf pa konta mi un anékdota estúpido ku a pasa ku bo na trabou òf riba kaya!

Un otro motibu ku mi por keda sin kontestá ta pasó bo a bisa algu ku pa ami ta sin importansia. Kosnan sin importansha ta por ehèmpel “Bon dia” òf “Kon ta”, òf “Bon Siman”. Pa ami, e kosnan ei no tin importansha.

Otro motibu ku mi por keda sin kontestá ta pasó mi no sa kiko pa kontestá bo bèk. Tin ora mi ta bai pensa bin bèk kiko pa kontestá bo, pero tin ora nada no ta drenta mi kabes, pues e ora ei mi no ta kontestá bo mensahe. No ta asina ku bo hasi mi un pregunta, mi ta keda sin kontestá si. Si mi keda sin kontestá òf mas bien reakshoná ta pasó bo a bisa mi algu òf hasi un remarke ku simplemente mi no tin nada di bisa riba dje.

unresponded-text-messages-8

Esei ta e motibunan ku ami por keda sin reakshoná riba un mensahe. Pero otro hende tin yen otro motibu mas pa keda sin kontestá bo mensahe, anto awe mi tin gana di eksplorá nan un ratu, pasó tin hendenan a yeg’i keda sin kontestá preguntanan ku mi a hasi, anto via di e post aki mi ke manda nan bai bati nan kabes den baranka aya na ‘noordkant’ òf si tin tempu ainda, bula riba e rabu di orkan Matthew p’e bai benta bo den golfo di Mexico!

Riba Facebook bo ta haña yen hòmber ku speshi ku asina nan mira potrèt di un muhé bunita, nan ta kuminsá bombardiá e pober ku yen mensahe estúpido i sin sentido. Kosnan estúpido i sin sentido ta por ehèmpel “He eh, bo ta hopi bunita bo sa mama, bon dushi b’a keda, bo tin hopi karni, mara mi por kome bo” èts. Tin hende muhé tin bon manera òf basta pasenshi i ta reakshoná bèk, pero e kòmbersashon ta keda asina superfisial ku nan ta kue fadá i stòp di duna e hòmbernan ei atenshon. Ku superfisial mi kemen kosnan manera “Bon dia dushi, Ki tin? Unda bo ta biba? Bo tin frei? Ki dia nos por topa”. Ta totalmente komprendibel si bo kue fadá i keda sin reakshoná riba e tipo di mensahenan aki.

Riba whatsapp e historia no ta diferente. Tin hende ku mi tambe a keda sin kontestá i esaki ta por ehèmpel hendenan ku ta papia kos sin kontenido. Ku esaki mi kemen ku nan ta keda riba “Se, ki tin, ki ba hasi? Kon ta? Kon ta ku bo? Ang oké……bo tei? Kiko bo ta hasiendo? Ang….oké. B’a kome kaba? Kiko bo a kome? Ang oké,  Bon probecho”. Despues di un ratu mi ta stòp di kontestá bo, pasó na mi pareser, si bo no tin nada di papia, bo por bien keda ketu.

Pero ora ami manda bo un mensahe, ta kos na tinu mi ta manda. Bo keda sin kontesta mi, ègt bo por bien bai bisti un dùikbrel, kue un piki, i bai koba buraku den fondo di laman na Caracasbaai pa buska petroli pa bo yuda salba Kòrsou.

unresponded-text-messages-9Por sosodé ku inkonsientemente mi a lesa bo mensahe pero dor di drùk mi a lubidá di kontestá. Pero semper mi ta bin bèk pa kontestá bo.

Tin hende ku mi no sa mira nan personal i un kòmbersashon ‘online’ so ku e persona aki ta kansa mi. Despues di tempu, mi ta kuminsá pèrdè smak di papia ku bo, pasó mi no sa mira bo tòg, pues mi lo tin ménos tendensha pa gasta mi energia ku bo. Esaki tambe ta un motibu ku mi ta keda sin reakshoná riba un mensahe.

unresponded-text-messages-4Awor, ami a yeg’i manda mensahe pa hende sin ku nunka mas nan a kontestá. Mas ku klaro mi no ta gusta, pero mi mensahe no tabata djis un “kon ta” òf  “bon siman”. Ami a hasi un pregunta, anto nunka mas e persona no a kontestá. Mas ku klaro ku ami nunka mas lo mi manda un mensahe p’e persona aki, pero mi ta ‘wonder’ si dikon e no a kontestá mi nunka mas.

Mi a yega na algun posibilidat ku un persona ta simplemente ignorá mi pregunta. Mi ta asta inkluí e motibunan pa kual ami a yeg’i ignorá hende su pregunta:

1. E persona ke ignorá mi: tin hende ta hopi pèrsistente te ku nan ta kansa hende. Esaki ta un motibu ku mi tambe por ignorá un persona i no kontest’é mesora, pero lo mi kontestá eventualmente si. Pues kisas e persona a konsiderá mi muchu pèrsistente òf el a konsiderá ku mi a puntra ko’i kèns i e kier a ignorá mi. En todo kaso, fo’i ora bo kuminsá ignorá mi, mi tambe ta kuminsá ignorá bo bèk!

 

unresponded-text-messages-12. Kisas dor di drùk el a lesa e mensahe i lubidá di kontesta bèk: Ta algu ku por pasa ku mi, pero ami semper ta wak bèk wak si tin un algun mensahe ku mi a lesa sin kontestá bèk. Kisas tin hende ku no sa hasi esaki.

Loke tambe ta duna mi nèrvio ta ora hende bisa ku nan ta drùk i lo kontestá bo despues (kual ta oké), i nunka mas nan no ta hasié (esaki si no ta oké). Laga abo hasi un kos ku nan no gusta bo ta mira. Bo ta bira mesora e persona di mas malu, kruel, egoista i vengativo ku ta eksistí na mundu!

3. Kisas e persona ke laga mi sinti malu: esaki no ta algu ku ami a yeg’i hasi, pero kisas tin hende ku ke simplemente laga bo sinti malu dor di keda sin kontestá bo mensahe.

4. Miedu: miedu tambe ta un motibu ku hende por keda sin kontestá. Kisas nan ta sinti ku e kòmbersashon ta bayendo den un direkshon no plasentero òf ku e kos ta bai bira un problema, i nan lo ke evitá esei. Kisas nan tin miedu i no sa kon pa formulá loke nan ke bisa pa e no kai den mal tera. Esaki ta algu ku sa pasa ku mi, pero tòg, semper mi ta bai pensa mi kontesta i kontestá bèk.

Mi a ripara ku hopi hende no ta kontesta e-mail. No ta tur hende ta wak nan e-mail tur dia, pues si bo ke risibí kontesta di un hende mesora, e-mail no ta e mihó manera. Ami si semper ta kontesta e-mail den ménos ku 24 ora. ‘App’ tambe mayoria bia mi ta kontesta basta no ta “bon dia” ku “kon ta” bo a bisa mi. Keda sin kontestá bo nunka mas si no ta mi stail, i tampoko mi no ta gusta esun ku ta hasié. Mi ta komprondé ku tin ora bo ta drùk i kos por sali fo’i bo kabes, pero si mi ripara ku e ta algu ku ta pasa kada bes, mi ta simplemente stòp di manda mensahe p’abo.

Awor, un persona riba mi Facebook ku yama Roos Alba a bisa ku mi gusta hasi pregunta nan inkómodo. Importante ta ku mi no sa hasi hende riba whatsapp niun pregunta inkómodo. Ta riba Facebook so mi ta hasi esei. Anto riba mi Facebook si mi no ta wòri ku si bo keda sin kontestá mi pregunta, pasó mi no ta manera hendenan ku mester di ‘likes’, ‘comments’ i ‘shares’ pa mi biba. (Ata mi ta tira puña atrobe. Egt mi mester di un aw’i Koko bon friu pa mi ches ariba. Si bo no a komprondé e parti aki, ta pasó bo no ta riba mi Facebook. No wòri, ta ko’i pinda mi ta hasiendo.) Pues si bo ke bo por lesa i ignorá mi kuantu ku bo ke riba Facebook, pero no pidi mi ‘app’ anto despues ignorá mi eiriba.

E supuesto preguntanan inkómodo ku mi ta hasi riba mi Facebook no ta ni dje inkómodo ei. Akibou mi a pone algun ehèmpel. Ta kosnan ku mi ke sa, i mi ta hasi nan pa esun ku ke kontestá. Si niun hende no kontestá mi ta bai hasi mi pregunta na otro hendenan ku ta un poko mas habrí, pues kontesta lo mi haña. Lo mi apresiá si abo ku ta biba na Kòrsou, Aruba, Boneiru òf Hulanda tambe duna mi un kontesta komo persona antiano, pero si bo ke ignorá mi tambe ta bon.

pregunta-inkomodo-1

pregunta-inkomodo-2

Ehèmpel di preguntanan ku mi ta hasi riba mi Facebook. Abo ta haña nan inkómodo?

Manera semper m’a bisa mi Facebook ta habrí pa tur hende ku si lo ke kontesta mi preguntanan inkómodo, solamente mi no ke hende ku ta skonde tras di kòmpiuter i bati boka, pues bo profil mester indiká ta ken kariso bo ta.

Pa e personanan ku tòg ke mi papia ku nan, pero no ke kontestá mi preguntanan inkómodo, mi ta rekomendá bo lesa mi bukinan. Den nan mi ta hasi yen pregunta ku bo no mester kontesta. De fakto bo no mester bisa mi mes ku bo a kumpra nan. Djis slùip drenta Mensing’s Caminada sin bisa niun hende nada, kumpra bo bukinan i bai lesa nan. Prinsipalmente p’e temporada di orkan aki lo ta bon pa bo tin algu di lesa. Ta tres buki nan ta. Ora bo kaba ku ‘Kibra Hacha’, bo ta lesa ‘Niun Pátaka’, i sinta warda’Awa, Habon ku Past’i Djente’. Ora nan yega Kòrsou lo mi bisa bo! Kada bes ku bo tin gana di papia ku mi, bo por lesa mi bukinan i bo no mester reakshoná riba nada ku bo lesa. Bo keda sin kontestá mi riba ‘app’ si, mi ta manda bo bai tira kabes sin zuèmpak òf zuèmbruk den triángulo di Bermuda. Kòrda m’a atvertí!

three books

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

 

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.