E úniko palu na mundu ku ta bou di aresto!

Reading Time: 5 minutes

 Barack Obama a bisa ku merikanonan ta muchu floho pa eksplorá mundu. E merikanonan a tum’é masha na malu, ounke Obama tin rason. Pero no ta e merikanonan so ta floho. Yu’i Kòrsou tambe ta pida floho. Mihó bisá, nos interes ta den kosnan ku tin di haber ku redu, ribirishi i bòmbòshi i nada ku ta elevá nos konosementu, amplia nos eksperensia i desaroya un mentalidat mas habrí. Mira kuantu hende tabata lesa i sigui dos novela ku aparentemente tabata masha interesante riba Internèt tokante ‘Thots’ i un famia ku ta komportá nan mes meskos ku ‘The Kardashians’.

Kosnan importante mes ku ta pasa rònt mundu no ta importá nos, kosnan ku al final lo por bin afektá nos bida despues, no ta interesá nos. Pero ken a pone chanchan ku tete falsu si nos ta konsiderá tópiko di dia. Ken a drumi òf laga di drumi ku Chris Brown si ta ‘hot item’ di siman.

En todo kaso, ami ta haña interesante i ‘great’ pa nos eksplorá mundu un tiki mas. Ta p’esei mi a skibi un buki ku yama ‘Kibra Hacha’. Den e buki aki mi ta papia di un kantidat di kos ku mi tin sigur ku bo no tabata sa di nan. Riba mi Facebook tambe mi ta hasié ku regularidat. Ta un kantidat di kos interesante tin ku bo por siña algu fo’i dje i danki na e kos ku yama Internèt, tin e posibilidat ku mundu por yega fásilmente serka bo sin ku bo mester gasta un depchi pa biaha rònt mundu. Klaro ku si bo por hasi esei, hasié. Pero si bo ta hasié, no laga bo aventuranan keda te na shòp den e ‘Mall’ nan di mas konosí, i keda den e hotèlnan di mas luhoso. Sinembargo konosé e pueblo di e paisnan. Siña di nan kultura, kuminda, kerensha i kustumbernan. Amplia bo mente i konosementu. Sènnan ku bo ta gana den e mundu aki lo no yena niun buraku den bo. Sinembargo eksperensia i rekuerdonan plasentero ku bo tin lo keda den bo kurason pa semper, i ta esaki ta duna bo bida nifikashon.

DSCN3063

Direktor Kas di Kultura, Gibi Bacilio!

E loke mi ta bai konta bo aki ta algu ku normalmente lo mi pone riba mi Facebook, pero ya komo mi ke ‘make a point’ mi ta pone akiriba pa bo mira.

Rònt mundu tin kosnan sumamente straño i úniko, anto m’a bin komprondé ku na Pakistan, den un área kaminda e ehérsito di Landi Kotal ta establesé, tin un palu ku nan ta yama ‘Banyan Tree’, anto e palu aki aparentemente ta bou di aresto, sintando un kastigu pa mas ku 100 aña kaba. Mas ku klaro e kos aki ta lanta un kuriosidat den mi, i mi a bai wak si ta bèrdat. Pa mi sorpresa, esaki a resultá di ta asina.

banyan-tree-under-arrest

‘I am under arrest!’

Kon un palu por ta bou di aresto?
Ta asina ta ku na aña 1898, tempu ku Pakistan tabata bou di e imperio britániko, un ofisial di ehérsito britániko, James Squid, tabata kompletamente bou di su awa (fuma). Kanando ta bai den direkshon di e palu, el a mira ku e palu ta kanando ta bin serka dje i el a sintié menasá dor di e palu. Mesora e ofisial a duna òrdu na un sargento pa arestá e palu. E sargento konfundí lo a puntra e ofisial “Kon bo ke pa mi arest’é?” E ofisial lo a bis’é “Benta un kadena rondó di dje p’e no hui bai niun kaminda!” Asina e sargento lo a hasi, i te ku dia djawe e palu ta arestá, ku e kadena lorá rònt di dje i ku un bòrchi ku ta bisa “Mi ta bou di aresto!”

Hopi hende ta bishitá e área aki djis pa wak e úniko palu na mundu ku ta bou di aresto. E pober palu tin mas ku 100 aña sintando un kastigu pa un delito ku e no a kometé!

Esaki ta algu ku lo mi a pone riba mi muraya di Facebook pa mi ‘friendsnan’ lesa. Pa bosnan falta nan tin ku les’é akiriba pasó ami no ta skibi e mesun kos dos bia. Lo mi apresiá si bosnan ‘share’ e, ya asina nan tambe lo por mir’é riba bo muraya i siña algu nobo. Kualke dia ku bo lora band’i Pakistan, saka un ‘selfie’ na e palu aki. No bai hasi ko’i mas i kòrta e kadena pa liberá e palu si, pasó e pais ta konsiderá e palu komo algu pa rekordá nan riba leinan inhustu i inhustisia general den e pais. Si nan ta kapas di tene un palu bou di aresto inosentemente pa mas ku 100 aña, abo kometé un delitu den nan lugá, b’a h*de!

banyan-tree-3

Source: The Huffington Post

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.