Mi ta bai mata mi kurpa……esaki t’e final!

Reading Time: 10 minutes

 Nèt den siman ei mi ta skibi tokante suidisio i djabièrnè último Kòrsou ta bolbe konosé un kaso di asesinato kombiná ku suisidio ku a shòk mi. Mi ta pidi bo pa tene kuenta ku loke skibi akiden no tin nada di haber ku e kaso ku a pasa último!

Den e artíkulo ‘Mi ta bai mata mi kurpa’ mi a duna algun informashon general tokante suisidio i tambe m’a refuta e pensamentu ku hende ku ta mata kurpa tin mente suak. Aworakí mi ta bai splika kiko tur ta pasa ku e persona ku ta pone skohe pa kita su mesun bida.

Mekanismo di Defensa ta e ser humano su manera di protehá su mes kontra dolónan emoshonal ku ta kousa ‘fight or flight’ i/òf depreshon. Tur mekanismo di defensa ta konsistí di ‘outo engaño’. Pues na momentu ku bo ta uzando un mekanismo di defensa pa protehá bo mes kontra di un pensamentu òf situashon doloroso, abo mes no sa ku bo ta hasiendo esei. Ami ta mir’é tur ora serka hende i despues ku bo lesa ‘Niun Pátaka’ bo tambe lo bai mira nan.

Bida por hinka frustrashon den hende su bida, kual bo tin mester di mekanismonan di defensa pa bringa e frustrashon(nan) aki. Frustrashon ta blòkia funshonamentu optimal di bo mente kognitivo, i ta p’esei papia ku hende ta yuda, pasó papiando bo ta yuda saka poko frustrashon afó, pone ku bo por pensa ‘clear’ atrobe. Pero papia ku e hende robes, òf hende ku no ta skucha, òf hende ku ta bisa bo kosnan ku ta stimulá mas frustrashon, ta pone ku hende ta dal sera, i ta skohe pa no papia ku hende mas, pa asina e por protehé su mes. Na momentu ku bo mekanismonan di defensa ya no por dil ku lokualnan bo ta pasa aden, bo ta kai den depreshon. (Tin hende ta skohe pa uza droga i alkohòl kual básikamente ta stroba komunikashon optimal di  neuronanan di seleber, konsekuentemente bo ta ‘pensa’ ménos. Droga, sigaria i alkohòl tambe ta mekanismonan di defensa.)

Bo ta kai den depreshon ora ku ya bo no por dil mas ku bo frustrashon(nan). Bo mente lo purba sali fo’i depreshon, i e manera ku e ta hasi esaki ta dor di drenta e modalidat di ‘fight or flight ’. Asina e siklo ta sigui. Frustrashon, depreshon, ‘fight or flight’. Ora bo ta den ‘flight mode’ bo ta haña pensamentunan di suisidio. E strès di e situashon frustrante ku bo ta aden ta pone bo kurpa produsí neurokimikonan ku ta desbalansá hinter e funshonamentu di bo kurpa i seleber. Bo kurpa no ta produsí e kímikonan aki pa prèt, sino simplemente pa dil ku e strès di e momentu. Pero e kímikonan aki konstantemente den bo kurpa ta kuminsá hasi daño na bo kurpa i tambe seleber. Esaki ta pone ku bo ‘dip’ den depreshon kada bes ta bira mas fuèrte, doloroso i difísil pa sali fo’i dje. (E manera ku bo ta sinti i aktua tur ta dependé di bo situashon ku ta dunando bo strès i frustrashon.) Tin hende lo tin mester di intervenshon i tin hende tin mester di medikamentu pa balansá e kímikonan selebral. P’esei na momentu ku e depreshon bira asina doloroso ku bo no por want’é mas, bo ta drenta ‘flight mode’, kual ta pone bo mata bo kurpa.)

Na momentu ku un persona skohe pa mata su kurpa ta na momentu ku ya e no tin mas mekanismo di defensa ku por yud’é. Anto kere mi, e asuntu di orashon, resa pidi Dios forsa èts., hopi chèns ku e persona a purb’é kaba, i esei no a yuda. Bo bisa e persona ku e mester ta fuerte, básikamente bo ta bisand’e ku e ta suak i ku abo si ta fuerte, pues mas malu e ta sintié, pasó aparte di tur su problemanan, awó bo ta bin insinuá ku e ta suak tambe. Bo no ta mustrando komprenshon i esaki ta masha mal kos.

Bo por imagin’é di e forma aki. Imaginábo un persona ta den laman brutu ta hoga, anto abo ta pará na kantu ta bis’é p’e resa nos tata ku ave maria, òf bo ta bis’é p’e ser fuerte.  Si ta ami ta den laman hogando, anto bo bisa mi e kos nan ei, ta un baranka di pieda lo mi haña gana di manda riba bo.

drowning

Depreshon ta eskalando den nos komunidat i e ta na kaminda pa bira e malesa mental number un na mundu. Pa motibu di nos situashon di bida, i e echo ku hende konsiente òf inkonsientemente ta huzga i habri nan boka papia kos ku nan no sa di dje, ta pone ku e hende ku ta sufri di dje ta preferá keda ketu i hoga den su sufrimentu enbes di papia habrí di nan problemanan.

Te asta ora un mionario mata su kurpa, hende ta bisa kosnan mané “E ta mionario, e tin tur kos, tòg e ta mata su kurpa”. En realidat nèt e hendenan ku tin ‘tur kos’ nan etapanan di depreshon ta mas doloroso, pa motibu ku fo’i un prinsipio nan ta skohe pa keda ketu i disimulá, dor  ku hende ta kla pa bisa nan ku nan tin tur kos  siendo ku tin yen hende ku no tin nada, pues nan no tin motibu pa ta deprimí. (E famoso ‘count your blessings’) Pues riba e depreshon, nan ta haña sintimentu di kulpa tambe ku nan ta sinti depreshon siendo ku tin hende ku tin ménos ku nan.

Tin un mion di kos ku por kousa frustrashon i depreshon den hende, pues ta imposibel pa mi menshoná tur. Tin hende por ehèmpel ku simplemente no por biba un bida di rutina, pues e echo ku nan tin ku lanta tur mainta bai traha, ya ta algu ku ta kousa frustrashon den nan. Pero den nos sosiedat e persona ehemplar ta esun ku ta lanta tur mainta bai traha. Asin’aki nos ta krea un imáhen di e persona ehemplar/ideal, siendo ku tin persona no ta fit den e diseño ku nos a traha ei. Un persona asina fásilmente por bin sinti frustrashon, prinsipalmente si e no deskubrí ainda ken e ta i kiko e ke. Esaki ta un dje motibunan ku vários hende ta bishita sikólogo, pasó simplemente tin yen hende ku no sa kiko nan ke. Tur loke nan sa ta ku e loke nan tin aktualmente, no ta loke nan ke. Esaki ta kousa frustrashon, strès i depreshon.

Tin hende ta den problemanan serio, por ehèmpel problemanan finansiero ku hopi debe ku nan no sa kon ta sali for di nan. Tin hende ta den relashonnan abusivo ku nan no sa kon pa sali fo’i dje. Tin hende ta sintá na kas aworakí sin trabou, sin sa kon nan ta hasi kome mañan. Tin hende ta den problemanan relashonal ku tin hopi tempu andando i nan ta frustra dor ku no ta bin momentunan di pas. Tin un kantidat di kosnan ku por hinka hende den depreshon.

Un di e kosnan ku ta reforsá depreshon ta nos uzo di medionan sosial. Riba medionan sosial hende tin manera un nesesidat di pinta nan bida mas mihó posibel. Nos ta skonde tur nos problemanan i eksponé solamente e parti bon di nos bida. Na momentu ku un persona ke ekspresá su frustrashon, nos tur ta mir’é komo algu ku e persona mester tene privá, siendo ku esaki ta nèt un oportunidat pa otro persona ku kisas a pasa den e mesun situashon kuné, identifika su mes ku e persona, krea un konekshon ku otro i ekspresá nan frustrashon mutuo. Esaki ta trese alivio den un persona ku ta pasando den depreshon, pa motibu ku e ta mira i sinti ku e no ta e so den su problema.

Mi sa ku maske kuantu mi splika esaki, nada lo no kambia, pasó komo hende nos ta keda ku e nesesidat di mustra otro hende kon superior nos ta na nan, kon nos tin mas material i poseshon ku nan, kon nos si a traha duru hinter luna ku nos por disfrutá di un fiesta karu den sekshon VIP, bai ku vakashon, mustra otro hende kon nos ta bai dilanti i nos ta saka lenga p’e otronan ku si no por òf ku no ta logrando. (Anto ora mi bisa ku mi no gusta hende, nan ta keda wak mi ku kara straño manera kos ku ta ami no ta bon.)

fake FB life

E kantidat di hende ku depreshon ta inkreiblemente haltu, i ta un kantidat di hende tin ta bisti máskara riba nan kara pa sali pafó i dil ku e mundu, siendo ku paden nan ta kompletamente destrosá i kibrá. Esaki t’e realidat, i mas nos sigui hasi e kosnan aki, mas pió e situashon ta bira.

P’esei mi a skibi e buki ‘Niun Pátaka’. Lesando e buki aki bo ta bin mira kiko presis ta hende i mira tur e máskaranan ku hende ta bisti kual ta e outo-engaño ku hende ta apliká pa aparentá di ta fuerte. Ademas, mas debil un persona ta mas tantu máskara e ta bisti pa evitá ku hende ta kousa dolónan emoshonal den dje. Ora bo haña bo ku hendenan ku ‘bitch attitude’, arogante, hostil èts., tur tin un mekanismo di defensa ta apliká, pa skonde heridanan ku nan tin i pa evitá ku hende ta lástima nan òf mishi ku nan den nan herida. Pero tin bia máskaranan ku hende ta bisti ta kuminsá bira pisá, i e dolónan emoshonal ku ta keda suprimí ta kuminsá bin ariba pió ku volkan.

Hendenan ku ke mata nan kurpa usualmente no ta papia di nan dolónan (pa evitá tende kosnan ku hende ta papia ku por pone nan sinti pió) pero tin ora nan por menshoná algu den e direkshon ei òf tin bia bo por nota algu straño na nan komportashon ku ta duna bo indikashon ku nan tin pensá di mata nan kurpa. Na momentu ku bo nota òf konstatá ku un persona ta deprimí i/òf ku pensamentu di kometé suisidio. Bo por hasi lo siguiente:

1. Si ta hende e ta buska pa papia kuné, skucha e persona ku atenshon. Evitá di skucha djis pa duna konseho òf pa abo por haña kos di papia.

2. Laga e persona sinti ku bo ta komprondé i ku bo ta ‘care’ p’e.

3. Enbes di duna e persona konseho, òf sinta konta kosnan ku bo mes a pasa aden manera kos ku ta abo t’esun deprimí, hasi e persona pregunta.

(Purba semper na lokalisá e persona si bo no ta huntu kuné i bai serka dje. Na ningun momentu no lag’é su so. Purba drenta den kontakto ku su sikólogo òf un persona profeshonal si ta nesesario!)

Preguntanan ku bo por hasi ta por ehèmpel:
“For di ki tempu bo a kuminsá sinti asina? Kiko a pasa ku bo a kuminsá sinti asina? Kiko te kosnan ku bo a hasi pa trese alivio na bo situashon? Bo a pensa na buska yudansa kisas serka un sikólogo?”

E preguntanan aki ta mas bien pa yuda e persona ekspresá su mes i bien por ta posibel ku pensando riba un kontesta, e ta yuda trese mas klaridat serka e persona. Klaro ku pa mustra e persona ku bo ta komprondé su situashon, bo por bis’é ku bo tambe a pasa den algu similar, pero hopi bia hende ta haña e nesesidat di ke papia tokante di nan propio eksperensha, kitando e atenshon riba e persona ku n’e momentu ei ta den mas nesesidat di atenshon. Pues bo por konta bo eksperensia solamente pa laga e persona sinti ku e no ta e úniko ku ta eksperensiá e loke e ta pasando aden.

No sinti bo malu ni obligá na yuda e persona pa sak’é fo’i su problema. Hopi bia djis e echo di tin un persona ku ta mustra kompashon i komprenshon ta sufisiente pa duna e persona un tiki alivio. Evitá di duna bo opinion, evitá di ke ‘sakudí’ e persona p’e bin bei, evitá di ekspresá bo mes na un manera bòt. Mustra komprenshon, hasi pregunta pa yuda e persona ekspresá su doló. Si bo ke mustr’é riba algu ku kisas e ta robes, hasié via pregunta. Por ehèmpel si un muhé ta deprimí pasó e hòmber no ta para na kas, enbes di bisa e persona “Pero bo no ta e hòmber su doño”, ta mihó hasi e pregunta “Bo ta konsiente ku ora bo ta den relashon ku un persona, no ta nifiká ku bo ta su doño?” E motibu ta ku si e persona tin mekanismonan di defensa ta apliká, e lo no bai skucha loke bo ta bisa. Bo hasié un pregunta, despues e mes lo bai analisá pa su mes si su komportashon ta korekto òf no.

En todo kaso, mi no a realisá ku e artíkulo aki a bira asina largu. Mi diskulpa. Mi ta stòp di skibi aworakí. Buska bo ‘Niun Pátaka’. E buki ei ta santu remedi kontra frustrashon i depreshon!

Si bo no ta kere, puntra sikólogo Drs. Rodney Stewart!

Neuro-Psycholoog Drs. Rodney Stewart

Neuro-Psycholoog Drs. Rodney Stewart

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.