Mi ta bai mata mi kurpa!

Reading Time: 9 minutes

 “Mi no por mas ku e situashon aki. Mi no ta mira niun solushon òf posibel salida. No tin niun hende pa yuda mi, ni niun hende ku ta komprondé mi. No tin niun hende ku berdaderamente ta skucha i mustra komprenshon pa mi. E doló ku mi ta sinti aki a bira insoportabel i no tin otro manera pa mi sali fo’i dje!”

Ora un persona mata su kurpa bo ta tende hende bisa kosnan manera:  “Ta hendenan mentalmente suak ta mata kurpa. Nan mester hasi orashon i pidi Dios forsa.”

Esaki ta presis e motibu ku hendenan ku depreshon ku ta pensando pa kita nan bida ta skohe pa no papia ku hende, aunke nan tin nesesidat di hasi esaki. Hopi bia e reakshon ku nan ta tende di hende, no ta yuda nan ku apsolutamente nada.

Den e último 45 añanan kasonan di suisidio a subi mundialmente ku 60%. Suisidio no konosé límite demográfiko ni límite sosio-ekonómiko i tantu paisnan no desaroyá komo paisnan kompletamente desaroyá tin sifranan haltu di suisidio.

Nan ta bisa ku djaluna ta un dia popular pa hende kometé suisidio, sin embargo segun un estudio 25% di tur suisidio ta sosodé riba un djarason, kompará ku 14% ku ta sosodé riba djaluna. Tambe e estudio ta bisa ku despues di djarason e persona su chèns di kometé suisidio ta baha ku 50%. Na Kòrsou e último kaso di suisido (ku mi ta kòrda) a sosodé den Yüni riba un djasabra. Mi ta kere hopi di nos no ta realisá kuantu hende nos ta dal den dje diariamente, ku frekuentemente ta haña minimo e gana di disparse òf bai un kaminda masha leu mes. Esaki ta djis e inisio di loke mi ta bai splika!

Un hende ku yega asina leu na mata su kurpa, no ta djawe pa mañan a skohe pa hasi esei. E tin hopi tempu kaba ta kontemplá esaki, i na momentu ku el a tuma e desishon pa pone fin na su bida ta na momentu ku e no por dil ku e situashon ku e ta den dje mas. E no tin nada di haber ku mente suak anto bo por manda e hende resa kuantu ‘Nos Tata’ ku ‘Ave Maria’ ku bo ke, pero esei lo no trese solushon p’e situashon ku e ta aden, pues e lo no yuda e persona ku nèt nèt nada.

E pais ku mas tantu kaso di suidisio ta Guyana, siguí pa Sur Korea. Hapon ta na di 19 lugá pero ta hala hopi atenshon debí ku e ta un pais sumamente riku i ku kasi no tin kriminalidat. Den un pais ku 127 mion habitante, pa aña sa tin un promedio di entre 2 pa 10 kaso di asesinato. (Kòrsou ta gana Hapon limpi den esei ku alrededor di 20 asesinato pa aña i ku un poblashon hopi mas chiki.) Pero suisidio si tin un promedio di 70 pa dia na Hapon i mayoria di nan ta hende hòmber. Hendenan di edat ta kometé hopi suisidio pa motibu di soledat. E hóbennan sa kometé suidisio pa diferente motibu entre otro problemanan finansiero. Na 2014 Hulanda tabata tin 1835 kaso di suisidio, pues un promedio di sinku suisidio pa dia, i akinan tambe hende hòmber ta prevalesé!

Suicide 6

Pa bo por komprondé dikon un hende ta yega asina leu na mata su kurpa, bo tin ku komprondé kon hende ta funshoná. Pa di promé tur hende tin nesesidatnan básiko, un sèt di kerensha i metanan den bida ku nan lo ke logra. Tur loke por strobabo di kumpli ku bo nesesidatnan básiko, òf ta presentá su mes komo un menasa pa kerenshanan ku semper bo tabata tin i/òf ku bo tin miedu di kambia, òf ta stroba bo di kumpli ku bo metanan, lo por kousa algu ku mi tin sigur nos tur a yega di eksperensha kual ta frustrashon. Frustrashon ta nada mas ku e límite di toleransha ku bo tin pa un situashon ku bo ta konsiderá fèrfelu. E frustrashon por bin dor di soledat, konflikto di kerensha, sintimentu di un impotensia di no por kambia un situashon ku bo ta aden, pèrdè speransa èts.

Di akinan tur kos ta sigui pasa den un sekuensha. Si bo frustrashon no wòrdu solushoná, bo ta bin kai den depreshon. Akinan bo ta pèrdè gana di hasi tur kos, asta kosnan ku bo gusta. Bo mente ta drenta e fase aki p’e protehá su mes for di tur e frustrashon ku el a bin ta dil kuné. E ta manera bai den un ‘hibernation mode’ pa evitá ku e tin ku dil ku mas kos. P’esei e ta kita bo smak di sali kas, e ta kita bo smak di atendé ku hende, e ta kita bo smak di hasi tur kos, ya asina e no tin ku dil ku nada. Solamente ku e modalidat aki no ta sinti dushi. Bo ta sinti bo skur di paden, manera kos bo ta den laman hundu i sukú kaminda bo no ta mira nada, te p’abo sa unda bo tin ku landa bai pa bo yega tera. Pa e motibu ei si bo bisa un hende ku ta deprimí, p’e hasi algu ku e gusta, e no ta yuda ku nada. Bo mand’é bai hasi orashon, tampoko bo no ta yud’é ku nada. Bo bis’é ku e mester ta fuerte, tampoko bo no ta yud’é ku nada. De facto, e kosnan aki ta empeorá su situashon pa motibu ku e ta sinti ku e mes no por saka su mes for di e depreshon ku e ta sinti, i abo ta lag’é sinti e peso ei mas ainda.

Na momentu ku bo ta den depreshon bo mente outomátikamente ta pasa p’e siguiente fase kual ta ‘fight or flight’. Esaki ta un abilidat primitivo di hende pa yuda protehá nan mes. Esta, na momentu ku bo ta sinti bo den peliger, bo kurpa kompletu ta kai den sea e posishon di pelea (bringa òf defendé bo kurpa) òf bo ta bai den e posishon di hui. Dor ku nos ta hendenan sivilisá, nos tin ménos tendensha pa skohe pa pelea (dependé e situashon tambe), pero huida si nos ta buska konstantemente pa situashonnan fèrfelu. Pues na momentu ku bo tin un frustrashon konstante den bo bida ku bo mente no por dil mas kuné, e ta bai kai den e ‘fight or flight’ (den e kaso aki ‘flight ’) i akinan bo ta bin haña gana di drenta avion i bai biba un lugá masha leu mes. Dependé kon profundo e frustrashon/depreshon ta bo ta haña gana di bai drumi anochi sin lanta bèk mainta. Pues simplemente bo ke disparsé i den kasonan mas severo bo ta haña pensamentunan di suisidio, gana di kometé suisidio, i/òf bo ta hasi intento pa kita bo bida òf bo ta simplemente mata bo kurpa. (Hopi bia ora hende hasi intento di suisidio ta nan forma di buska/pidi atenshon, pues e ta diferente for di hende ku realmente ta kometé suisidio. E no ta nifiká ku e persona ku hasi intento, no por hasié, simplemente e no a yega asina leu.)

Por lo general hende muhé ta hasi mas intento pa kometé suisidio, i por lo general hende hòmber ta kometé mas suisidio. E motibu ta simplemente pasó hende muhé tin mas toleransha pa dolónan emoshonal kompará ku hende hòmber. Aparte di esei, hinter e sosiedat tin mas komprenshon pa ekspreshonnan emoshonal di un ser femenino, kual ta yuda trese alivio, pero den kaso di un ser maskulino e tin mas chèns di wòrdu huzgá, por lo tantu nan tur ta suprimí/kontené nan emoshonnan aden i hende hòmber mas lihé ta reforsá nan mekanismo di defensa ku supstanshanan kímiko manera sigaria, alkohòl i otro droganan.

Hende muhé tin mas manera pa deskargá su mes i sosiedat ta mir’é mas aseptabel. Hende hòmber tin mas problema ku nan outo-estima, no opstante ku nan ta skonde esaki! Tambe hende hòmber ta sinti mas preshon di sosiedat pa ku su situashon finansiero i ta haña mas preshon di responsabilidatnan ku e tin ku karga pasó e ta e sekso maskulino. Komo hende muhé ta e sekso físikamente debil, hopi atenshon i konsentrashon ta bai na e muhé pa bis’é ku e ta fuerte, pero hende hòmber kual ta esun emoshonalmente mas debil (ounke esaki ta wòrdu bon skondí), básikamente niun hende no ta preokupá kuné. Esakinan kisas ta splika dikon muhé ta hasi mas intento di suisidio, pero al final hende hòmber t’esun ku mas ta kita nan bida. Nan mekanismo di defensa ta basha den otro hopi mas lihé!

Hende ku ta mata kurpa ta hende mente suak?
Laga mi splika bo presis dikon abo ta konsiderá bo mes mas fuerte. E persona ku ta konsiderá su mes ku mente mas fuerte básikamente tin mas abilidat pa gaña su mes. Korekto…..asina mes. (Mira e kos for di un otro ángulo pa evitá pensamentu negativo. Por ehèmpel si bo a keda sin haña un trabou ku ègt bo tabata ke, bo ta bisa bo mes “Tin algu otro na kaminda ku ta mihó p’ami”). Den kasonan severo, mas bon bo por gaña bo mes, mas chèns bo tin di evitá pensamentunan di suisidio. Esaki t’e motibu tambe ku mas ignorante bo ta, mas felis bo ta biba, ménos pensativo bo ta, ménos chèns bo tin di eksperensha frustrashon/kambio di kerensha i depreshon. E personanan ku ta pensa konstantemente  riba kosnan di mundu, ta analisá bida i opservá komportashon di hende i impaktonan ku esaki tin riba bida na mundu i naturalesa tin mas chèns di eksperensha frustrashon i depreshon, pa motibu ku nan ta mas konsiente di loke ta pasa rònt mundu i un hende asina ta mas konsiente ki ora e ta gañando su mes. (No tur bia, pero e chèns ei ta mas grandi serka nan).

Den mi buki ‘Niun Pátaka‘ mi a splika ekstensamente kiko ta Mekanismo di Defensa, pa kiko nos tin nan i kuantu di nan nos komo hende tin. Ora bo lesa nan bo ta bin mira kuantu bo ta gaña bo mes pa evitá di kousa doló emoshonal den bo mes.

Mi ta kap e artíkulo na dos, dunando bo chèns di buska e buki ya asina ta bira mas fásil pa bo komprondé e siguiente parti. Buska e buki na Mensing’s Caminada òf tuma kontakto ku mi na lionel_326@hotmail.com òf via Facebook, i siguiente siman mi ta bai splikabo na plaka chikí kon un hende ta yega asina leu na mata su kurpa.

Dayenne Niun pataka

 [Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.