E bèrdat sin miedu di Gerrit Fransisco Schotte!

Reading Time: 9 minutes

 Den luna di Ougùstùs 2015 mi a publiká un historia impaktante di algu ku a pasa mi den Campo Alegre. (Klek aki pa lesa e historia.) E historia aki a kai den man di èks Minister di Finansa George Jamaloodin, kende no por a kontené su mes, i a manda e historia pa èks Promé Minister di Kòrsou Gerrit Schotte.  

No ta konosí pa ki motibu Jamaloodin lo a manda e historia aki pa Schotte, pero dia tabata tin “Teener Parade’ mi a topa ku Schotte den kaya  i el a bisa mi ku e ta bai yama mi un dje dianan aki pa nos kòmbersá. Mi a dun’é mi number, i mi no a preokupá mas despues, pasó mi konosé Yu’i Kòrsou. Nan ta bisa ku nan ta hasi algu, pero al final nan no ta hasi nada.

Schotte TP2

Momentu ku mi a topa Schotte durante Marcha di ‘Teener Parade’.

Pa mi sorpresa algun tempu despues mi a risibí un yamada telefóniko di un mener ku ta bisa mi ku e ta Gerrit Schotte. En prinsipio m’a chuw i dal e telefòn sera, pasó m’a pensa ku lo ta kualke hende lo ta hasi prèt. Despues e mesun number a bolbe yama i e mesun mener ta pretendé ku e ta Gerrit Schotte. M’a pidié p’e bisa “Ban kambia nos bida” pa mi sa sigur ku t’e. Ora el a hasié m’a spanta, pasó ta Schotte mes. Mi ta tin ku pidié masha despensa pa a sera e telefòn den su orea. Despues di a sali fo’i tur duda mi a puntra Schotte ku kiko asina mi por yud’é. El a bisa mi ku el a lesa algun kos ku mi a skibi anto ku e ke traha un sita p’e papia ku mi. M’a puntr’é papia kiko asina? E di ku mi ku ora mi bin, mi ta sa. M’a bisa Schotte ku mi lo por pasa serka dje, pero mi ta hopi drùk, pues e lo tin ku yama mi sekretario pa asina e haña un sita ku mi. Mi a bisa Schotte pa warda un momentu, ya mi ta pasa e yamada pa mi sekretario. Pa Schotte su suerte, t’ami mes ta mi sekretario, pues djis pa hunga interesante, mi a keda ketu, konta te 10, despues bisa “Haló, sekretario di Mr. Spratt.” ( Mi no por divulgá e kombersashon ku a keda tené entre Schotte i mi Sekretario, pero en todo kaso un sita a keda trahá.)

Riba dia di e sita, mi a bai serka Schotte na sede di MFK. Mi tin ku bisa ku e sede ta masha bunita, full na èrko, ku muzik romántiko ta toka den ‘background’. Na momentu ku mi a yega, mi a wòrdu risibí i eskoltá pa par’i hòmber diki, grandi ku brasa fuerte ku a hiba mi serka Schotte. Schotte a risibí mi ku bòter di shampaña riba mesa ku bolo di fruta ku buskuchi ku chukulati ku yen kos, anto mi a mira tur e tres bukinan ku mi a skibi riba su mesa. Mesora Schotte a bisa mi “Bo ta un Alien”. M’a keda mané “Ta kon e hòmber aki ke bin yama mi Alien awó?” E di ku mi “no tum’é komo un ofensa. Ta e manera ku bo ta skibi, e manera ku bo mente ta funshoná, mi ta hañ’é hopi apart. Ta manera kos ku bo no ta di e planeta aki.” Akinan mi por a komprondé loke el a bisa, pasó segun mi bèrdat mi no ta djaki. Solamente ku mi no sa ta di kua planeta m’a bin, ni mi no sa unda mi nave espasial a keda, pa asina mi por bai mi planeta bèk.

Alien Spaceship

En todo kaso, Schotte a papia yen kos ku mi, ku mi no mester konta bo, pasó simplemente e no ta kai bou di bo. El a konta mi historia di su tawela, su bisiña, su primu i aktu primunan, tempu e tabata hunga ninichi, tapa kara ‘polis en dief’ enfin, yen kos. Loke mi mester bisa, ta ku si tin un hende ku por bende un frishidèr i un djùk yen yen di eis ku un èskimo ku ta temblando di friu, esei ta Schotte. Mira aki…e hòmber aki tin abilidat pa bende un álbùm yen di potrèt ku un hende siegu ku no ta mira un dònder. E tin e abilidat pa bende un disko kompakto musikal ku un hende surdu ku no por skucha ani bientu supla. E tin e abilidat pa bende un piano ku un hende ku no tin man ni pia. Mi ta bisa bo, si Schotte ke, e por bende un medaya di bròns ku Michael Phelps i Usain Bolt. Ata mi ta bisa bo…..Mi ta bisa bo esaki, pasó el a papia asina bon di mi bukinan, ku mi mes a haña gana di kumpra nan serka dje.

Pero mi a deskubrí un bèrdat di Schotte…anto ami ta bai konta bo kiko ta Schotte su bèrdat. Despues ku mi duna bo e informashon aki, ta keda na abo kiko bo ta hasi kuné. Ta keda na abo si bo ta konta otro hende, òf bo ta tene pa bo mes. Ta keda na abo si bo ta uz’é positivamente òf negativamente. Tur loke ami ta hasi ta konta bo un kos ku mi no mester konta i ku mi por haña mi den problema serio kuné!

Na momentu ku Schotte a lesa e historia di Campo Alegre ku mi a menshoná ariba, el a bai Mensing’s Caminada pa kumpra mi bukinan. Na momentu ku el a yega Mensing, el a dal un pari buèlta den e rèkinan pa buska e bukinan. Ora e no por a keda kla, el a puntra un empleado di Mensing pa e bukinan, pero e no por a kòrda nòmber di e bukinan, ni e nòmber di e outor. Schotte tabata huntu ku Sophia, su yu muhé chikí. E tabata tin Sophia den su brasa hisá na momentu ku el a bai puntra e empleado pa nòmbernan di un di mi bukinan: “Bon tardi Señora, bosnan tin mas di e buki uhmm…. Kibra……Kibra ….uhm……Aidjo, Kibra kiko atrobe?” Gerrit ta keda pensa i bisa “Kibra….Kibra…. Kibra” Sophia ta bira grita masha duru mes “HACHAAAAAA”

No ta muchu kla ku si ta nòmber di e buki Sophia a grita asina òf ku si ta nister el a nister. En todo kaso, e señora di Mensing a kapta e kos mesora ta bisa “Ang si, ‘Kibra Hacha‘, klaro ku nos tin mas Sr. Schotte. Até aki.” E empleado a kue un ‘Kibra Hacha’ duna Schotte den su man.

“Awor el a saka un buki mas resientemente ku mi ta haña mashá interesante”, Schotte a bisa. “Ta kon e nòmber ta atrobe….uhmm…uhmm” Segun Schotte ta pensa nòmber di e buki Sophia ta grita i kanta yen kos straño den Schotte su orea. Sophia tabata purba hala Schotte su atenshon bisando “hupaduibakibadiklaprrak”. Schotte ta bisa “Ablif Sophia?” Sophia ta trèk Schotte su kamisa i bisa “Ghakidoepahriotakichuopa”. Schotte ta bisa “Kiko bo di Sophia?”. Sophia ta kuminsá kue fadá i bisa un tiki mas duru “Frioaopaphuchuriaaaaaaaaa!”. Schotte sin por a komprondé nada a bisa “Sophia, Papa no ta komprondé niun pátaka di loke bo ta papiando”. Einan e empleado di Mensing a bira bisa “Klaro ku ‘Niun Pataka’ tambe nos tin Sr. Schotte. Até aki.” Schotte ta bisa “Ang si bèrdat bèrdat. ‘Niun Pátaka’ e buki yama”

Despues di un ratu Schotte ta puntra e empleado pa un buki mas: “Anto e mesun outor aki tin un buki mas ku nòmber mashá nèkdó.  Segun mi e yama Awa, Habon ku…..ku…..Ai Dios, ta kiko falta mi e dia nan aki?Awa, Habon ku…..Awa, Habon ku kiko atrobe?” Schotte ta purba pensa. Diripiente Gerrit ta sinti Sophia ta dal’é ku algu duru den su orea. E ta bira wak Sophia i mir’é ku algu den su man. Asombrá Gerrit ta puntra Sophia: “Sophia ta kiko bo ta hasi ku Papa su skeir’i djente den bo man?” Einan e empleado ta bisa ‘Awa, Habon ku Past’i Djente‘ tambe mi tin Sr. Schotte. Até aki”.

Schotte a bai kas ku su tres bukinan, lesa nan i el a gusta nan asina tantu ku el a hasi loke yen hende mas ta hasi ora nan kaba di lesa mi bukinan. Aparentemente ora hende kaba di lesa mi bukinan, nan ke mira mi personal pa nan konfirmá ku si mi ta hende normal òf no. Pa e motibu ei Schotte a yama mi Alien, anto asina tin yen hende mas ta yama mi Alien te ku mi ta konvensí ku m’a bin di otro planeta. Dado kaso bosnan mira mi nave espasial un kaminda bentá, dal mi un ‘call” (Mi kemen manda mi un mensahe) pa mi bai buska mi nave, ya asina mi por bai mi planeta bèk.

Pa esnan ku a kere ku ta redu di Schotte mi lo a skibi…bosnan ta robes. Bòmbòshi bo gusta. Pa esnan ku a sinta warda mi konta e bèrdat di Schotte….wèl lo bo keda ku gana pasó mi no sa nada di Schotte. Mi no konosé Schotte. Kon bo ke mi konta bo kos di hende ku mi no konosé? Bo ta hasi mané ku ta masha amigu di Schotte mi ta. Ami no sa nèt nèt nada di Schotte, pero di bo si mi sa ku bo gusta redu i bòmbòshi. Úniko kos ku mi por remarká ta ku Schotte a sera un palabrashon ku mi, i a kumpli ku e palabrashon. Esaki sigur ta algu ku mi ta apresiá!

Di e forma aki Gerrit Schotte kende  ta e polítiko mas popular na Kòrsou, ta sostené hóbennan positivo ku ta uza nan talento pa bai dilanti. Tur hende por kòrda kon tempu ku Churandy Martina tabata deskonosí, e úniko hende ku tabata sostené i yuda Churandy inkondishonalmente tabata Gerrit Schotte i danki na su aporte Churandy Martina a bira un tòp atleta rekonosé entre e mihó sprinternan riba mapa internashonal.

Schotte ta rekomendá e bukinan aki. Uza bo tempu positivamente, lesa un, òf dos òf tur tres di e bukinan aki pa asina bo stimulá i mehorá bo mente, lenguahe, kreatividat i bo fantasia.

(E artíkulo aki di ningun forma no ta niun klase di aviso polítiko, ni esaki no ta nifiká un konseho òf rekomendashon di voto. Esaki ta djis un historia ku a pasa mi (mas o ménos) ku mi a kompartí ku bo. Tampoko mi no a wòrdu pagá dor di Schotte pa skibi e historia aki. Mara tabata asina. M’a pidié 100 heldu si, pero e di ku mi e no tin. Na lugá di e 100 florin el a duna mi un di e armband di elastik na’i ku MFK skibí ariba. Kos ku mi no por kumpra a ni pan franses kuné.)

Lion and Schotte full

Por sierto, mi tin ku bisa ku Schotte su mannan ta sumamente suave. Por poko mi a pidié pe karisiá mi kara ku e mannan suave ku e tin ei.

 [Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.