Bien bèrdè Kòrsou no ta bai dilanti…..hopi rabiá mi ta!

Reading Time: 5 minutes

Ayera, riba un djabièrnè fin di luna, koriendo den tráfiko di Kòrsou mi a topa mi ku kòntròl di polis. Mi no ke niun hende komprondé mi malu; ami mas ku tur hende ta sostené tur ehersisio ku kuerpo polisial hasi pa yuda hasi nos pais mas sigur pa nos tur biba ariba. Pero mi ke men, tin kos ku simplemente no por.

Un kòntròl di polis djabièrnè atardi ora ku tur hende tin sèn den nan saku pa pasa supermerkado hasi nan kompras, pa asina yena frishidèr ku ko’i kome, ta totalmente inaseptabel. Bo ta stanka tráfiko, bo ta kousa pániko den komunidat, bo ta laga hendenan bira nèrvioso, prinsipalmente ami. Riba tur e inkombeniensianan ku nan a kousa serka mi, e polis ku a para mi a duna mi but tambe. Bo ta kere asina ku m’a kobra, bo ta bin kita mi sèn fo’i mi pa bai hinka den kaha di gobièrnu? Anto warda te ora bo tende but pa kiko…..

Kosovo. Pristina. Police control.Si polis duna mi but pasó mi a pasa den lus kòrá, mi ta komprondé. Tipo di komportashon asina ta kousa peliger pa bida di otro. Si polis duna mi but pasó mi a kore den ‘verboden’, tambe mi ta komprondé, pasó hende mester mantené nan mes na regla. Pero e polis a duna mi but pasó mi no a paga impuesto di vehíkulo for di aña 2001. Promé ku el a duna mi but, e polis a puntra mi dikon mi no a paga impuesto for di aña 2001. M’a bis’é ku esei no ta kai bou di dje. Mi situashon finansiero ta algu privá i no ta asuntu di niun polis. “No ta tur hende mester sa mi bida”, asina mi a bisa e polis. Niun hende, ni e polis no ta biba den mi saku pa nan sa kon duru mi tin e. Mi no ta keda sin paga impuesto djis pa prèt. Si mi no a paga fo’i 2001 ta pa un motibu tòg?

En todo kaso, e polis a konsiderá ku mi a hasi fresku, pues el a baha mi for di mi outo p’e listra mi. Huntu ku mi tabata tin un dama, ku tambe e polisnan a pidié pa e baha for di outo. Nan a listra nos dos. Akinan a bin pompamentu. E muhé ku mi tabata huntu kuné ta un latina. Ora polis a listr’é nan a ripara ku e ta ilegal na Kòrsou. Ni maske kuantu mi a papia ku e polisnan, nan no a tende di mi. Nan a arestá e muhé, hib’é imigrashon pa deport’é. Akinan mi a bira sumamente furioso, pasó m’a kab’i paga e muhé 1000 florin p’e pasa tres anochi ku mi. Mi a splika e polis esei, i mi a bis’é ku mi por primintié ku djaluna mainta mi mes ta baha e muhé na imigrashon. E polis a bisa mi “Ang, bo no tin sèn pa paga impuesto, pero bo tin sèn pa paga prostituta si”. Atrobe rekordá e polis ku esei no ta su asuntu.

Komo si fuera esei no tabata sufisiente e polis a disidí di listra mi outo tambe. Bou di stul di outo nan a mira un kuchú i nan ta bin puntra mi dikon mi ta kore ku kuchú den outo. Mi a splika nan ku mi ta hasi ‘fitness’, i mi gusta kome fruta. E kuchú ta djis pa mi por kòrta mi apel ku mi apelsina pa mi kome. Nan no a kere mi i a kue mi kuchú den ‘beslag’. Mi a bira ‘Coro pa Caracas’ riba e polis i mi a kuminsá hasi masha beheit i ònbeskòp k’e polis.

knife

Mi kuchú di kòrta apel.

Esaki ta e problema di Kòrsou. Polisnan enbes di bai buska e atrakadornan ku malechornan ku ta kana pariba pabou ku arma di kandela, nan ta bin sinta molostiá un bon suidadano manera mi…..anto no ken ku ta. Un di e mihó eskritor i outor intelektual di Kòrsou, i aktualmente e ‘bestselling author’ na Kòrsou. Bo ta kere ami bo ta bin hasi fèrfelu kuné? Bo ta saka gainan mafioso i ku ta un menasa pa komunidat den libertat pa traha lugá den prizòn pa laga ami pasa un anochi den un sèl na Rio Canario. Ami, esun ku a skibi e buki ‘Kibra Hacha‘ ku a kambia bida di tantu muhé frustrá ku tabata tin na Kòrsou? Ami ku a skibi e buki ‘Awa, Habon ku Past’i Djente’ ku tur hende a kumpra i lesa, te ku tur a kaba. Ami ku a skibi ‘Niun Pátaka’ kual ta e úniko buki ku ta splika kon kompliká i hodedó hende por ta den nan bida i nan relashon. Ami polis ta arestá pasó mi ta pober i mi sèn no ta yega pa paga impuesto, pasó mi tin nesesidatnan seksual ku mi no por wanta, anto pasó mi ta kana ku un kuchú pa mi por hiba un bida saludabel?

Asin’aki nos ke pa Kòrsou bai dilanti?

Awèl un kos mi ta bisa bosnan……si pa djaluna bo no bai Mensing’s Caminada ainda, bai buska bo bukinan ‘Kibra Hacha’ i ‘Niun Pátaka’, òf bo no tuma kontakto personal ku mi pa bo kumpra bo bukinan ku mi firma den dje, òf bo kopia digital (pdf), un tabla lo bula rib’e lugá aki. Lo mi hasi hopi mas ko’i ònbeskòp spesialmente p’ami bai será, pasó e kuminda eiden ta dal bon mes. Lo bo no kere, pero e kuminda di prizòn ta mihó k’e pan ku keshi seku ku mi sa kome tur dia akifó. Lo ta bon si nan por sera mi den prizòn di hende muhé si, pasó e gainan eiden tur ta wak mi ku kara straño!

Dayenne Kibra Hacha and Niun Pataka[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.