Yu’i Kòrsou no ke traha: e otro banda di e medaya!

Reading Time: 6 minutes

 Mi ta tende hopi doño di trabou ta reklamá ku a bira difísil pa haña yu’i Kòrsou ku ke traha òf yu’i Kòrsou bon trahadó.

Mayoria bia bo ta tende hende bisa ku e yu’i Kòrsou simplemente no ta dispuesto na traha pa tiki sèn, òf no ta dispuesto na traha tur tipo di trabou siendo ku e estranhero si (kisas debí n’e situashon ku el a sali fo’i dje den su pais). Den e artíkulo aki mi ke kue tòg un otro banda dje medaya (un medaya ku tin hopi banda.)

Mi ta aseptá ku awendia yu’i Kòrsou a bira poko pompadó. Bon mirá, hende en general ta poko pompadó. Hende su bista ta fihá riba sèn, hende su meta prinsipal den bida a bira sèn, por lo tantu, tiki ta esnan ku ta kue trabou tene ku dos man, eksplorá i profundisá realmente den nan trabou. Awendia a bira asina ku hende ta sinta na trabou, hasi presis loke nan tin ku hasi, manera nan a wòrdu siñá. Despues di esaki, sinta nan ta sinta wak kalènder wak ki dia e sèn ta pasa riba nan kuenta. Bo faya paga nan 1 sèn pretu di ménos, bo ta mira kon nan ta bai reklamá mesora na porta di PZ. Esaki ta realidat.

Pero doñonan di trabou (maneho) tambe ta pompadó. Pasó e doño di trabou òf e mènedjer inkompetente ta buska e trahadó marioneta ku nan por maniobrá i manipulá mané nan haña ta bon. Pasó pa e doño di trabou, no ta un akuerdo di trabou tin entre dos persona, sino djis un persona den nesesidat el a duna un chèns. Si, pasó e trahadó ta nada mas ku un persona den nesesidat di sèn (kual a bira e kos ku nos ta biba p’e) pues e doño di trabou ta sinti ku e ta doño di e trahadó. E ta sinti ku e por pone reglanan ridíkulo i apsurdo riba e trahadó. E ta sintié ku poder pa disidí kiko e trahadó por hasi òf lag’i hasi bou di ora di trabou i tin bia asta ku su bida. E ta sinti ku e por disidí kon t’e mihó manera p’e trahadó hasi loke e tin ku hasi, sea ku e trahadó ta sintié konfortabel òf no. E trahadó básikamente a bira katibu di e doño di trabou. Pa logra esaki, e mènedjer/doño di trabou ke establesé outoridat. E ta e ‘boe-man’ òf ‘boe-vrouw’ na trabou. Esun ku tur hende tin miedu di dje, pasó e por kita bo fo’i trabou ora e haña ta bon. Eifó tin yen hende mas den nesesidat di sèn, pues fásilmente por kita un pone un otro. Konsekuentemente tur trahadó tin miedu di eksplorá i profundisá nan mes den nan área di trabou. E trahadó no ke tuma inisiativa, pasó e tin miedu di hasi kos ku nan ta zundr’é òf reklam’é p’e despues. E tin miedu di kometé fayo, pasó nan ta kapas di kit’é fo’i su salario òf dun’é ‘schorsing’ sin pago. Bo ta haña bo ku hendenan ku ta traha ku un sierto prosedura ku tin 20 aña bieu, anto niun hende no sa dikon ta asina e kos mester ta. Tur a sigui hasié, pasó ta asina nan a wòrdu siñá, anto ta asina nan a hasié semper, ku chèns asta ku nan tin 20 aña ta hasié robes. Pasó nan no ta pensa pa nan mes.

Pero ta e tipo di hendenan ei nos ta produsí tambe. Nos ke hendenan ku un diploma kual ta fungi komo prueba ku e persona tin sierto nivel di sigui òrdu, memorisá kos, i apliká kos manera bo siñ’é. E no mester analisá ni kuestioná kos, pasó esun ku ta analisá i kuestioná por representá peliger pa e kompetensia di su superior. Ta kua mènedjer/doño di trabou ke pa un ‘simpel’ trahadó mustr’é riba algu ku e ta hasiendo robes? Nò, e personanan ei ta muchu fèrfelu. Anto nan no ke e trahadó ku ta laga nan bos zona tampoko, pasó e doño di trabou/mènedjer ta simplemente bisa bo “Si bo no gusta, ata e porta ei”! Anto dia bo doño di trabou/mènedjer kuminsá traha riba bo lastu nèrvionan, esei ta bira e dia ku ya bo no ta gusta bo trabou mas!

There's the doorTur loke e trahadó ke hasi awendia, ta hasi presis loke e tin ku hasi, pa asina e por kobra fin di luna. Nada mas. Esaki ta hasi trabou den tim tambe algu imposibel. Pasó niun hende no ke hasi niun krenchi èkstra di loke no ta kai bou di nan. Esmas, ku tur e trato desigual ku maneho tin riba trahadónan, esta subi esun ku ta chupa di puesto, i ignorá esun ku honestamente ta traha duru, tantu trabou den tim, komo esfera di trabou ta bira asina tóksiko, ku tur hende ta bai trabou pa hasi loke nan tin ku hasi, i bai nan kas. Fo’i djaluna nan ta sinta konta kuantu dia falta pa djabièrnè yega pa kaba. Anto ta di e personanan aki, ta spera bon servisio di nan pa ku klientela?

Esaki te trahadónan ku tin, e trahadónan ku e esfera di trabou mes ta krea, pasó nan tin muchu miedu di pèrdè trabou. Nan ta sigui tur regla i òrdu ku wòrdu imponé, anto tur ku bin aserka ta wòrdu motivá pa hasi meskos. “Go with the flow” nan ta bisa bo. Sea bo gusta òf no gusta loke bo ta hasi, no ta importá! Basta bo tin un trabou i basta bo kobra fin di luna!

Anto nos ta puntra nos mes dikon nos ta bon den duna mal servisio i dikon Kòrsou no ta bai dilanti?

Den mi buki ‘Kibra Hacha’ mi a skibi kon ami ta mira te mihó manera pa krea un ambiente kolegial i di pas na trabou i ku hendenan ku ta traha pa e kompania enbes di hendenan ku ta traha pa djis pa kobra fin di luna. Pero mas ku klaro, nèt e personanan ku mester lesa e buki aki, ta muchu arogante, i ta sinti ku nan sa tur kos kaba!

Den e buki ‘Niun Pátaka’ mi a papia di dos personalidat di hende ku lo bo mira nan tambe den trabou. Personalidat di hende tambe tin su impakto den e área di trabou, i esun ku ta manehá e kompania mester sa di esakinan pasó e ta trahando ku hende. Bo kapasidat pa manehá un kompania ta wòrdu midí na bo kapasidat pa manehá hende. (Emotional Intelligence) Anto si di bèrdat bo ke bon trahadó, bo mester sa kon pa hasi konekshon ku e hende (manera pader Römer semper a bisa). No ta kumpra ta kumpra ‘bon trahadó’ manera ta banana ku pampuna hechu bo ta kumpra na barku. Bo ta krea e bon trahadó segun su abilidatnan i su personalidat!

Dayenne Kibra Hacha and Niun Pataka[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.