C-U-C-K-O-O-O-O-O-O-P-R-E-S-S-S-S-S-S, Hacht òmbu!

Reading Time: 4 minutes

Ora bo wak título di e artíkulo aki lo bo ta puntra bo mes ta ki falta mi? Ta nèrvio mi tin, òf ta angua pa lokura nan a pasa mi? Nada no a pasa mi, solamente mi ta purbando na pone énfasis riba nòmber di e ‘website’ aki ku ta CuckooPress i nada otro. Dikon mi ta hasiendo esaki?

irritated manWèl, algun dia pasá mi tabata komiendo den Subway, i mi a topa un señora masha amabel ku tabata keda studia mi. Ami a kere ku ta mi kabes el a gusta, dor ku e tabata asina limpi i nèchi feitá. Mi a pensa ku kisas e lo tabata mira su refleho den mi kabes, pues mi no a preokupá. Despues di un ratu el a puntra mi si ta ami te persona ku ta skibi……(akinan ya kaba m’a bira masha kontentu i eksitá, pasó m’a kere ku porfin un hende a rekonosé mi riba kaya)… el a terminá e frase bisando “riba Cuckoo Express?” (Akinan m’a bira tristu, pasó e nòmber di mi ‘website’ ta CuckooPress, no Cuckoo Express.)

M’a puntra e señora ku si ta CuckooPress e ke men. E di ku mi nò, Cuckoo Express. Ku un kara tristu m’a bisa e señora ku e ora ei no ta ami. Mi a kere ku porfin un hende lo a rekonosé mi, pero no tabata asina. E señora a keda studia mi i el a bisa: “Segun mi ta bo mes si. Bo a skibi tres buki tòg?” M’a bis’é, “si mi a skibi tres buki bèrdat”. E di ku mi “Si, awèl ta bo mes”.

confused babyNa diferente okashon mi a yeg’i topa hende riba kaya, pero dor ku nan ta menshoná yen nòmber diferente ménos e nòmber korekto di mi ‘website’, ami ta pensa ku ta otro ‘website’ òf página di Facebook nan lo ke men.

M’a yeg’i topa hende ku a puntra mi si ta ami ta skibi riba “Koko’s Press”. M’a bisa “no, no ta ami”. Hende a yeg’i puntra mi si ta ami ta skibi riba “Kuku Stress”. M’a bisa “no, no ta ami tampoko”. Hende a puntra mi si ta ami ta skibi riba “Kukus lès” Lamentablemente esei tampoko no ta mi. Un shon mas ku m’a topa riba kaya tambe a puntra mi si t’ami ta skibi riba “Kuku Kèts”. M’a bis’é, “No, esei tampoko no ta ami”.

Pa e motibu ei mi a pensa ku mi ta bai kambia nòmber di mi página di Facebook. M’a pensa pa hasié un nòmber mas fásil ku hende por keda kòrda manera CurPress òf CurMedia òf algu asina.

Pero si mi kambia nòmber di mi página, lo mi tin ku kambia nòmber di tur mi bukinan tambe, pasó ta tur nan ta bisa robes. ‘Kibra Hacha‘ tur hende ta bis’é bon bon. E ta kòrtiku i fásil, pero ‘Awa, Habon ku Past’i Djente‘ si e hendenan tin mané problema kuné. Ta manera kos ku nan no tin energia pa bisa e nòmber kompletu. Nan ta bisa kosnan manera “Awa, Habon” òf nan ta bisa “Pasti’i Djente” òf nan ta asina floho ku nan ta bisa djis un abreviashon AHP. Nan ta bisa tur kos, ménos e nòmber kompletu.

Pues ami a pensa ku kisas pa mihó resultado mihó mi duna mi bukinan un nòmber kòrtiku ku ta fásil pa kòrda. Pero mi ta pensa ku ta ko’i kèns mi ta hasi, pasó Steve Harvey su buki ‘Act like a Lady, Think like a Man’ tur hende ta bis’é bon i kompletu sin kap nada afó. Ata e otro “Fifty Shades òf Grey’ ta pió. Nan ta  bis’é 10 bia tras di otro sin kansa.

Pa e motibunan aki m’a disidí ku mi no ta kambia nada. E ‘website’ ta keda yama CuckooPress te dia hende siñ’é ‘uit het hoofd’. E di tres buki si mi a fasilitá bosnan i m’a bai bèk na dos palabra esta ‘Niun Pátaka’.  Fásil pa bisa, fásil pa kòrda i fásil pa lesa. Bo tin ku djis bai kumpr’é.

(P’a bo mira kuantu kos mi ta pensa i pasa aden ora di skibi algu!)

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.