Di e forma aki bo por kambia un hòmber muheriego!

Reading Time: 6 minutes

 Bo tin un hòmber muheriego ku bo tin gana di kambia pa asina e tin bista i wowo pa abo so? Bo sa ku e ta kana ‘flirt’ i sèks ku diferente muhé i bo ke p’e stòp di hasi esaki? E tin yen maña i triki ta uza pa konfundí bo ya asina e por saka benefisionan ku e ta deseá for di bo i bo ke p’e stòp di hasi esaki?

Den e artíkulo “Komprondé e sikologia di un hòmber òf un muhé ‘player’” mi a splika dikon sierto hendenan tin komportashon di ‘Player’. Pero mi ta haña diferente hende muhé ta puntra mi “ kon mi ta hasi kambia e hòmber?”. E pregunta aki ta komprendibel. Kisas nan ta den relashon ku un hòmber ‘player’, i nan no ke tèrminá e relashon pa bai buska un otro. Kisas nan ta sinti ku ta e hòmber ei nan stima, i ku no tin niun otro manera e.  ‘En todo caso’,  no preokupá. Mi ta bai siña bo kon ta kambia un hòmber asina stap pa stap!

Playing men 5Hòmber muheriego ta loke nan ta yama un ‘Player’. Un hòmber ku ta hunga ku sintimentu di hende muhé pa su benefisionan. E benefisionan aki usualmente ta seksual, pero nan por ta otro kos tambe. (Tin hende muhé ‘player’ tambe ku ta básikamente hasi meskos ku loke e ‘player’ maskulino ta hasi, pero pa propósito di e artíkulo aki mi lo konsentrá solamente riba e ‘player’ maskulino’.) Nan ta namorá bo uzando diferente táktika ku nan tin di naturalesa, pues no ta skol di ‘Don Juan’ nan a bai pa siña esaki, pero e efekto di nan táktikanan ta funshoná perfektamente na nan benefisio.

Un di e táktika ku nan ta uza ta konfushon. Pensa ku mi un ratu: Kiko bo ta pensa ariba ora algu ta konfundí bo? E kos ku ta konfundí bo ei ta laga bo na pas? Usualmente ora bo ta konfundí bo ta keda pensa riba e loke ta konfundí bo inkonsientemente, pasó bo mente ke resolvé un pùzel i miéntras e no resolvé, e no ta laga bo na pas. Bo por purba skohe pa no pensa ariba, pero no ta algu ku bo por evitá fásilmente. Pues si bo ta den un relashon ku un hende konfundí, den sentido ku e no sa ken e gusta òf ki baina e ke, òf e hende ta bezig ta konfundí bo konsientemente, miéntras ku e no ke òf no ta rekonosé bo komo e persona ku e ta den un relashon figo kuné, bo por konsiderá ku e persona aki por ta bezig ta ‘play’ bo.

Dikon hende muhé gusta skohe hòmbernan muheriego pa despues ke purba kambia nan?
Bo ta kòrda den ‘Kibra Hacha’ mi a splika ku un di e motibunan ku un hòmber ta kòrta orea ta pa stimulá su outo-estima? Hende muhé tambe ke stimulá nan outo-estima, i hopi bia nan ta hasi esaki dor di tuma retonan den bida manera logra kambia un hòmber. (Aparte di kumpra yen sapatu ku ‘handbags’ ku nan no tin mester.)

Kon abo lo sinti bo, si bo logra kue un hòmber ‘player’ i hasié un hòmber di famia, ku ta stima su yunan, stima su muhé, pone bira hòmber di kas, baidó di misa èts. ? Lo bo sinti bo great òf no? Esaki lo stimulá bo outo-estima i konfiansa propio.

Pero esaki ta posibel?
Un hòmber ‘player’ tin un motibu ku e ta kana ‘play’ hende muhé. E motibunan por ta diferente i den e artíkulo ‘Esaki t’e motibunan ku ta hasi difísil pa un hòmber ta fiel‘, mi a menshoná diferente di e motibunan aki. E motibunan ta originá di su mente inkonsiente kual ta algu ku e no tin dominio riba dje (ainda). E ta meskos ku un hende ku ta huma sigaria. Tin di nan ke stòp, pero e úniko motibu ku nan no a stòp ainda, ta pasó nan no por. Nan tin un konflikto entre nan mente konsiente i nan mente inkonsiente. Den mi buki ‘Niun Pátaka’ mi a splika mas detayá kon konflikto ta originá den hende su mente.

playing men 2Kon bo ta kambia un hòmber ‘Player’?
Masha fásil mes. Konsiderá kon difísil ta pa bo kambia bo mes, i lo bo ripara kon difísil ta pa bo kambia un hòmber muheriego. Si bo no a komprondé e frase ei, laga mi pone mas fásil p’abo: BO NO POR!

E hòmber muheriego lo kambia di su mes dia ku:

1. E ke
2. E bira konsiente di kiko ta su konfliktonan
3. E resolvé su konfliktonan

Bo por yud’é kambia si e ke, pero si e mes no ke, benta sèrbètè blanku den rin numa. E mihó kos ku bo por hasi ta dediká tempu na abo mes i purba na saka afó dikon bo ta sinti bo atraé na hòmbernan muheriego. Si ta pa bo por stimulá bo outo-estima i konfiansa propio, mihó bo buska otro maneranan ku bo por hasi esaki. Tene kuenta ku esaki ta un sintimentu ku ta bin abase di bo kerenshanan. Pues básikamente bo tin ku traha riba bo mes. Siña konosé bo mes, kiko bo ke, kiko bo no ke, kiko ta bo nesesidatnan realístiko, i kambia e nesesidatnan irealístiko.

Nos konfliktonan ta basá riba nesesidatnan sikológiko di nos mente inkonsiente. E nesesidatnan aki ta bira konflikto ora nos mente konsiente tin otro plan. Por ehèmpel, un hende ta huma pa satisfasé su nesesidat sikológiko di su mente inkonsiente. Pero e mente konsiente sa ku humamentu ta malu pa su salú. Kua ta gana awó? E mente inkonsiente usualmente ta gana, pasó e ta super mas poderoso ku esun konsiente. Loke nan ta yama ‘will power’ (forsa di boluntat) ta sinta den bo mente konsiente. Pero si bo nesesidat inkonsiente ta hopi grandi, e nesesidat ei ta kome bo ‘will power’ i kou e manera wesu di ‘Kentucky Friend Chicken’. Lesa mas di esaki den mi buki ‘Niun Pátaka‘. Esaki no ta nifiká ku ta imposibel pa gana bo mente inkonsiente, solamente ku e ta tuma hopi forsa di boluntat i trabou konstante. Tin okashonnan ku ta terapia bo tin ku bai. Hipnoterapia ta e estilo di terapia perfekto, anto kere mi ku tin ora lesamentu regular (riba e tema),  tambe ta yuda. E por yuda resolvé konfliktonan entre bo mente konsiente i mente inkonsiente. Bo tin ku lesa kos na tinu si!

Un hende ku no siña konosé su sikologia personal lo hasi hopi kos ku e no por splika dikon e ta hasié. Miéntras e no sa dikon e tin sierto komportashonnan e lo no por kambia nan tampoko. Konosementu di e sikologia humano ta importante pa bo desaroyo. P’esei mi a skibi e bukinan ‘Kibra Hacha’ i ‘Niun Pátaka’, kual lo siña bo konosé i komprondé mas di bo komportashon i di e hendenan rondó di bo!

Awor ku bo sa esaki, ainda bo ta bai sigui gasta bo tempu pa kambia un hòmber? Laga mi sa, ya mi ta pidi nan pa skibi bo nòmber den ‘Guiness Book òf World Records’ komo e persona mas kabes duru ku m’a yeg’i konosé!

Playing men 3[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.