Esaki te 16 espesienan ku mas peliger ta forma pa bida di hende!

Reading Time: 15 minutes

 Resientemente tabata tin insidentenan na Merka kaminda mester a mata un gorila pa motibu ku a persibié komo un menasa pa bida di un mucha. Tambe a mata kuater kaiman (te asina leu ku mi sa) pa buska un mucha di dos aña ku segun e mayornan, un kaiman lo a trèk e bai den laman kuné na un hotèl na Florida. Pero kon peligroso e bestia salbahenan aki ta realmente pa bida di hende?

E lista aki lo bai duna bo un sorpresa. Konsiderá e sorpresa aki komo un regalo pa dia di tata. Prepará bo mes pa bo keda kompletamente babuká:

16. Tribon i ber

Wild animals 1

Mi no mester di wak un pelíkula di tribon pa mi haña miedu di nan, pasó mi tin miedu di nan kaba. Mi tin miedu asta di piská masbangu. Básikamente mi tin miedu di tur bestia ku ta biba den awa, pasó dado kaso nan rabia ku mi, i ataka mi, nan lo tin un bentaha riba mi, pasó nan ta biba tur dia den awa. Nan sa bon kiko nan por hasi den awa, kon pa move, kon pa bringa i kon pa gana nan enemigu. Den awa mi no por kore, den awa mi no por bringa, den awa mi no por hasi nada. Pero pa straño ku parse, tribon no ta representá un menasa pa bida di hende. Tribon normalmente no sa ataká hende. Dado kaso nan ataká un hende tòg, hopi chèns ku ta pa motibu di un konfushon, nan lo a kere ku bo ta nan presa natural, i despues di e promé mordé, nan lo laga bo bai.  Pues por lo general tribon no ta representá peliger pa hende. Pa aña tin registrá ku tribon ta mata solamente 10 hende pa aña mundialmente. E kos aki ta ‘peanuts’!

wild animals 3Ber ta manera mi. Nan ta bira fèrfelu solamente ora nan tin hamber. Nan por ta hopi peligroso e ora ei si. Sa tin insidentenan kaminda ber ta ataka hende ora hendenan bai kamper den mondi. Loke ta trèk e bernan ta e kuminda ku e hendenan tin huntu ku nan. Maske bo tin kuminda será den tènt, un ber ku hamber ta pluma tur bo tènt fo’i otro p’e yega n’e kuminda ei. Ber tambe ta mata un promedio di 10 hende pa aña.

15. Kabai i Baka

Wild animals 4 wild animals 5


Nan ta mustra bestianan masha trankil i amikal, pero ámbos por rabia masha pisá ora hende sara nan pasenshi. Esaki por pone ku nan ta dal bo ‘drop kick’ ku nan pianan patras mandabo den tobo di bo wela. Pa aña tantu kabai komo baka ta mata 20 hende mundialmente.

14. Abeha i vruminga

Wild animals 6Vruminga por lo general no ta peligroso, pero nan mordé por ta peligroso pa esun ku ta alèrgiko pa nan. Tur espesie di vruminga huntu a yeg’i mata 30 hende den un aña.

Abeha por ta un poko mas fèrfelu debí ku ora nan ataka nan ta bin na bòshi. Abeha por lo general no ta ataka si nan no ta sinti nan mes menasá, pero e kos ta ku ta un chin chan kos nan ta sinti nan menasá. Si bo kara ta mahos mes nan lo sinti nan menasa pone ku nan ta bin pika bo! Bo bai mòrs ku nan nèshi, bo por ta den problema serio. E prèt ta ku ora abeha (Honey Bee) pika bo, nan mes lo muri despues, pues mi no ta komprondé pa kiko nan lo wòri si nan ta sinti nan mes menasa. Di tur manera nan lo muri tòg. Abehanan ta mata un promedio 53 hende den un aña.

13. Tiger i Leon

wild animals 2Leon nan ta yama nan ‘rei di selva’ pa motibu ku nan ta tremendo yagdó. Nan tin hopi forsa i velosidat kual ta duna nan bentaha riba hopi otro animal. Sinembargo hende no ta leon su kuminda faborito. Riba e menú di Leon, hende ta paresé te na último lugá komo último opshon. Hende ta smak muchu zür pa nan probablemente (Ta mi ta papia mi kos.) Si un leon disidí ataká i kome un hende, probablemente ta un leon grandi i bieu, ku su djentenan a kuminsá dekaí, pues e mester di un presa fásil pa kou. Si e leon no ta grandi e bieu i e ataká hende, ta pasó e hende mes a provoká e leon.

Wild animals 7Serka tigernan tambe e asuntu ta meskos, solamente ku e kantidat di hende ku tigernan a yeg’i mata ta mas tantu i mayoria di esakinan a sosodé na Bangladesh kaminda e poblashon di hende ta stroba e tiger di biba den su habitat natural. Leonnan ta mata mas o ménos 70 hende pa aña i tigernan ta mata mas o ménos 100 hende pa aña.

12. ‘Jellyfish’

wild animals 8‘Jellyfish’ su piká no ta tóksiko pero hopi doloroso. E espesie ku yama ‘Box Jellyfish” ta esun mas tóksiko i un piká di dje fásilmente por mata bo debí ku su venenu ta paralisá bo i esaki ta pone bo hoga. Pues si bo no ta den awa, i un Jellyfish piká, probablemente lo bo sufri di hopi dolo so, pero no muri. Jellyfish ta mata un promedio di 100 hende pa aña.

P.S. Bo tabata sa ku e bestianan aki ta biba alrededor di 500 aña?

11. Biná

Wild animals 9Ken por pensa ku un bestia lif i indefenso asina por mata hende? Biná no ta ataká hende te asina leu ku ami sa. Nan tin mas miedu di hende ku nada. E problema ku biná ta ku semper nan ta kore krusa bo dilanti ora bo ta stür i esaki ta kousa varios aksidente kaminda hende ta muri. Biná ta sòru pa un total di 120 morto pa aña sin ku nan por yuda!

10. ‘Cape Buffalo’

wild animals 10Si dado kaso bo mira un Cape Buffalo un kaminda, e mihó kos ku bo por hasi ta saka kareda kore limpi bai. Cape Buffalo ta ataká hende, nan ta morde bo, trapa bo plècha bo, i hasi un desaster ku bo. Si bo mira unu, probablemente tin mas, anto nan tur lo bin riba bo. Pues manera bo mira un, sali kore bai masha leu mes. Si e Cape Buffalo ta lastimá, e ta bira un poko mas agresivo. Nan ta pisa mas o ménos 680 kilo i nan ta wòrdu konsiderá peligroso i impredesibel. Nan ta asina peligroso ku a ni leon no sa mòrs ku nan. ‘Cape Buffalo’ pa aña ta mata alrededor di 200 hende.

9. Elefante

Wild animals 11Elefantenan ta midi entre 3 pa 4 meter haltu i ta pisa entre 4000 pa 7000 kilo. Esaki ta hasi nan bestia di mas grandi i pisá ku ta kana riba tera, i si un no gusta bo, fásilmente e por kue un di su pata grandi nan di plècha bo pió ku bakoba hechu. Elefantenan por lo general ta basta trankil, pero tin ora nan sa tin nan beis. Prinsipalmente esnan yòn por ta un poko mas agresivo i nan sa bai molostiá hende den paisnan manera India ku Sri Lanka. Elefantenan pa aña ta mata alrededor di 500 hende.

8. Krokodel

crocTin hende ta trese nan Kòrsou probablemente pasó nan ta haña nan ‘leuk’, i ora nan no por mas ku nan, nan ta benta nan unda ku ta den mondi. (Òf ta kaiman nan ta bin kuné….mi no sa). Un konosedó di bestia lo por distinguí un krokodel fo’i un kaiman fásilmente. Tin algun karakterístika ku ta distinguí nan fo’i otro pero ami ta lubidá nan tur bia. Básikamente krokodel tin tendensha di biba den awa salu i kaiman den awa dushi. Bo por rekonosé kaiman i krokodel na nan forma di boka. Kaiman su boka ta mas hanchu i dor ku e parti ariba di su boka ta mas hanchu, ora su boka ta será, bo ta mira su djentenan parti ariba so. Krokodel su boka ta mas manera un forma di V, pues e ta bai bira punta na final, anto tantu e parti ariba komo e parti abou di su boka ta mesun hanchu pues ora su boka ta será, bo ta mira tantu e parti ariba komo e parti abou di su djentenan.

Wild animals 12

Ariba Kaiman, Abou Krokodel

E bestianan aki por bira grandi, i nan ta ekstremadamente lihé i ábil, kual ta hasi posibel ku nan por kaptura kua presa ku nan ke, i devorá esaki manera nada. Segun nan ta bisa, esnan mas peligroso ta Saltwater i Nile Crocodile i si bo provoká nan, bo ta aden. Mayoria bestia tin miedu di hende, pero krokodel si no. Si bo mira un kaiman òf krokodel riba tera, bo aserk’é anto e no hala atras, no bai mas serka di dje, pasó si bo yega den un distansia di 1 pa 2 meter di dje, den un bulá e ta ataká bo, gara bo, i kome bo manera ta batata machiká e ta kome. Pero lo mi no konsehá bo yega dje serka aki, pasó den un distansia di 20 meter un kaiman chikí por kore ku velosidat di 40 km pa ora, siendo ku un hende komun di baina por yega 16 km pa ora. Sinembargo, hende no ta presis nan menú faborito. E bestianan aki por ta basta floho, i nan ta preferá algu fásil pa nan kou i no un presa ku ta bringa ku nan. Pa e motibu ei nan no sa ataká hende fásil a ménos ku bo no molostia nan, pero komo ku hende gusta bai kaminda nan ta, nan lo morde bo, i dor di forsa di nan kakumbein, fásilmente un mordé di nan por mata bo!

Krokodel i kaiman pa aña ta mata un promedio di 2500 hende.

7. Hippopotamo

Wild animals 15Den karikatura nan ta pinta e bestianan aki masha gordo, chuchu i ‘leuk’. Mi ta haña esaki ta kos ta pompa hende, pasó kualke mucha un dia por mira un hippopotamo ‘live’ i e ta kapas di bai kore bras’é, siendo ku e bestianan aki no gusta hende mes. Kos serio mi ta papia, nan no tin lei ku hende.  E bestianan aki ta spanta hopi lihé, solamente ku ora nan spanta nan no ta kore bai. Ta net e ora ei nan ta bira sumamente agresivo i nan lo no pensa dos bia pa ataká hende. Bo ta mira nan manera gordo i floho, pero no kere bo. E kos ku mas a sorprendé mi ta ku nan ta landa mió ku kualke tribon òf bayena. Kos serio….chèk e video aki:

Hippopotamo ta e menasa mas grandi pa hende den e kontinente di Afrika i te bestia ku mas tantu hende ta mata na Afrika. Pa aña hippopotamo ta mata un promedio di 3000 hende.

6. Skòrpion

emperor scorpion or imperial scorpion (Pandinus imperator)Un piká di skorpion por hasi bo malu i e ta hasi hopi doló. E skorpion di mas peligroso yama ‘Deathstalker scorpion’ i su nòmber mes ta bisa tur kos. E skorpion aki tin un venenu den dje ku fásilmente por mata un beibi òf un persona di edat. Si bo ta bon bon di salú, un piká di skorpion no mester mata bo. E motibu ku tantu hende asina ta muri pa piká di skòrpion ta pasó nan gusta skonde den kas di hende, i nan lugá preferí ta den bo sapatunan. E paisnan ku nan ta frekuentá mas tantu ta nort Afrika i medio oriente. Pa aña skorpion ta mata un promedio di 5000 hende.

5. Kolebra

Wild animals 17Ora mi menshoná kolebra, probablemente bo ta bai pensa riba Boa òf Anaconda, pero esakinan no ta ni wòrdu menshoná. Esnan mas peligroso ta kolebranan venenoso i entre esnan mas peligroso tin Asian Cobra, Saw-Scaled Viper i Inland Taipan. Asian Cobra no tin miedu di hende. E venenu di e kolebra aki ta sumamente ‘neurotóksiko’, esta ku ora e drenta bo sanger rápidamente e ta bai na bo sistema nèrvioso kual ta pone ku bo ta asfiksiá, esta pèrdè abilidat pa hala rosea. Bo ta haña e kolebranan aki mas tantu na China, India, Vietnam Malaysia ku Tailand. Inland Taipan su venenu ta asina fuerte ku e ta mata bo den ménos ku 30 minüt. De fakto un kolebra Inland Taipan so por mata 100 hende ku djis 110 mg di su venenu. No opstante esaki, tòg Inland Taipan no ta e kolebra di mas venenoso na mundu. Belcher’s Sea Snake t’e kolebra di mas venenoso na mundu i ku djis un tiki miligram di su venenu, bo por mata mil hende kuné.

Kolebranan manera Boa i Anaconda no ta venenoso i nan no ta morde. E kolebranan aki ta lora nan kurpa rondó di nan presa i primi nan te ora nan rementá i muri.

Parse ku kolebranan venenoso no gusta hende mashá, aunke Inland Taipan i Belcher’s Sea Snake no ta dje agresivo ei segun nan ta bisa, i lo bo no topa nan fásil a ménos ku bo mes no bai te kaminda nan ta. Piskadónan si sa haña Belcher’s Sea Snake ora nan bai kue nan reda di piská. Tin dos sifra hopi diferente ta keda menshoná den e kantidat di hende ku kolebra ta mata pa aña, pues laga mi bisa ku e sifra lo ta entre 15.000 pa 50.000 hende pa aña.

4. Kachó doméstiko

Wild animals 20Probablemente lo bo no a ni spera di topa esaki den e lista aki. Bo ke men kon porta ku kachó kual ta e mihó amigu di hende por ta mata hende? Wèl, probablemente ta pasó hende ta pompa hopi. Kachó ta mata un promedio di 25000 hende pa aña, den kual 90% di e mortonan ta debí na infekshon di e malesa ‘rabbies’ ku bo por haña dor di e mordé di e kachó. 80% di e mortonan aki ta bin di India so kaminda tin hopi kachó di kaya ta kana rònt.

3. Hende

Wild animals 21Hende ku ta mata hende mi ta klasifiká nan komo animal. Nan no por ta nada otro. Segun un rapòrt trahá na 2013 pa UNODC (United Nations Office on Drugs and Crime), basá riba un investigashon ku a keda hasi na 2012, hende ta responsabel pa un kantidat di 400.000 morto intenshonal pa aña. E sifra aki ta konsistí di solamente kasonan di homisidio. Kòrda si nos wak tur e otro formanan ku hende ta mata hende entre otro via gueranan di religion, gueranan polítiko, kudishi ku ta kousa desigualdat, pobresa, sklabitut (modèrno)  i mal gobernashon. Anto abo tin miedu di kolebra ku kaiman ku kos? Semper m’a bisa ku e kos ku mas hende mester tin miedu di dje, ta hende mes!

2. Muskita

Wild animals 22Ta parse ku mas abou nos yega di e lista, mas sorpresivo e kosnan ta bira òf no? Kon un bestia chikí i molestioso manera un muskita por mata mas tantu hende kompará ku un tribon òf leon? Fásil, e bestianan aki ta responsabel pa un kantidat di malesa ku ta kore rònt. Aunke nos por diskutí si, ku e malesanan aki ta bira un problema pa hende pa motibu di hende mes, pero en todo kaso muskita ta responsabel pa un malesa konosí komo ‘African Sleeping Sickness’ kual ta kousa inflamashon di bo seleber. E malesa aki ta afektá alrededor di 500.000 hende pa aña kual un 80% ta muri di dje.

1. Sangura

Wild animals 23E bestia chikí, fini, flaku i apsurdo ei? Si, sangura ta sòru pa mas ku 1 mion morto pa aña mundialmente. Esaki t’e bestia/insekto/animal ku mas morto di hende ta kousa pa aña. Nos mes a konosé kuantu molèster un sangura por trese, ku e epidemia di Chikungunha ku a paralisá hinter Kòrsou. Aparte di Chikungunha e insektonan aki ta responsabel pa otro epidemianan manera Dengue, Malaria i Zika!

Awor e parti ku mas lo bo ‘gusta’:
Manera bo mes por mira, mayoria di e bestianan peligroso aki ta skohe pa no mòrs ku hende, aunke ku si nan ke, nan por hasi daño enorme na kurpa i bida di hende. Sinembargo hende si ta skohe pa mòrs ku nan i mata nan sea pa uza komo konsumo òf pa hende entretené nan mes. Tin un kantidat grandi di bestia salbahe ku aworakí ta keda konsiderá komo espesienan den peliger, komo ku e kantidat ku a sobra ta asina tiki, ku tin chèns ku pronto nan lo stòp di eksistí.

Bestianan manera Leopardo, Rinoseronte, Gorila di montaña èts., tur ta aktualmente espesienan protehá, debí ku na hinter mundu a sobra ménos ku 300 di nan. Eksistensia di tigernan tambe ta den peliger debí ku na mundu a sobra algu banda di 1000. Hende konstantemente ta keda yag riba nan i uza nan kueru pa traha materialnan ku nan por bende karu riba merkado, òf tambe yag riba nan djis pa prèt i pa stimulá nan ego! Esun ku mata nan ta mesun kulpabel ku esun ku ta gasta míles di florin pa kumpra produktonan trahá di kueru di e animalnan aki. Si no tabata tin kumpradó, lo no tabata tin mester di yagdó! Pensa riba esaki prome ku bo ke saka sèn pa kumpra un produkto trahá di kueru di un di e animalnan aki.

Mi ta kere ta p’esei tin bestianan manera muskita i sangura ku tei pa molostiá hende. Hopi hende ta puntra kiko ta propósito di un sangura òf un muskita. Wèl, esaki ta e kontesta: aparte di fungi komo kuminda pa araña i totèki, kual tambe nos tin fis di nan, sangura ku muskita ta simplemente kastigu pa hende!

Kòrda ku tantu ‘Kibra Hacha’ komo ‘Awa, Habon ku Past’i Djente’ i tambe ‘Niun Pátaka’ ta disponibel na Mensing’s Caminada. Tambe bo por kumpra bo vershon .pdf kual lo kumbiní esnan ku ta biba pafó di Kòrsou! Email mi na lionel_326@hotmail.com pa mas informashon!

Lion with three booksSource: Animal Danger, OMGFacts

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

 

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.