Bo mester di sèn? E hendenan aki ta mustra kon pa bira riku ku hopi tiki sèn!

Reading Time: 9 minutes

 Promé ku sèn tabata eksistí, bo sa kon hende tabata biba? Kon nan tabata kumpra kos?  Na ingles nan ta bisa ‘Money is the root òf all evil’. Awèl si ta asina, pa kiko nos ta kore mané loko tras di sèn anto?

Un tempu hende tabata biba abase di trokamentu. Na ingles nan ta bisa ‘barter’. Pues si abo tin un saku di hariña i bo mester di un saku di suku, ami tin un saku di suku, anto mi mester di un saku di hariña, nos por troka esaki, i nos tur dos ta haña loke nos ke. Pero despues nan a bin mira ku trokamentu por ta un dolo’i kabes na momentu ku abo tin algu ku kisas niun otro hende no ke. Laga bisa por ehèmpel ku bo tin un saku di bonchi pretu, anto bo mester di un saku di aros. Pero niun hende no ke tuma bo saku di bonchi pretu. Pues bo ta keda sin por kumpra e saku di aros ku bo mester, pa motibu ku bo no tin algu ku otro hende ta interesá den dje.

Tiki tiki kosnan a bin kambia, te ku nan a bin krea komestibel ku hende por kumpra kos kuné ku nan por uza bèk den tempu kòrtiku. Pues por ehèmpel ami ta duna bo mi saku di aros, a kambio pa algu ku mi por troka bèk hopi lihé, dor ku tur hende kere. Tiki tiki a lanta e nesesidat ku e komestibelnan aki mester ta transportabel (fásil pa karga i kana kune), duradero (no kos ku ta daña lihé), homogenio ( algu ku por troka pa algu di balor igual), skars (no algu ku kualke hende por traha), divisibel (algu ku por dividí i uza pro-rata, pues por ehèmpel kibra 10 heldu den dos moneda di sinku, kual tin mesun balor ku e papel di 10.

Asin’ei hende a keda uza sèn te awe, te ku awó hende ta uza ‘falta di sèn’ komo motibu ku nan ta pegá ku hopi kos. Pues nan no por hasi nada pa motibu di falta di sèn. Sèn ta skars pa nos ku ta pober, pasó tin yen idiot ku tin masha hopi sèn wardá den banko ta laga nan para kue stòf den nan kluis. Esei ta pone ku esnan ku no tin hopi sèn tin ku bringa pa sèn. E situashon aktual ta ku 1% di poblashon di mundu tin mas o ménos 90% di tur sèn ku tin na mundu. Anto e sobra 99% di poblashon di mundu tin ku lucha ku e 10% di sèn ku a sobra pa nos parti entre nos.

Algun persona a disidí ku nan no ta laga nan bida dependé di uzo di sèn. Anto e personanan aki ta esnan ku ta impreshoná mi. No esun ku tin kas tres piso, outo luhoso, yate ku yen ko’i loko. E hendenan ku ta impreshoná mi semper ta esnan ku ta biba di e forma di mas humilde posibel.

Mi a yeg’i skibi di Daniel Norris ku ta un hòmber mionario ku ta hunga den Major League Baseball pero e ta biba den su vèn, i pa luna e ta uza solamente 800 dòler for di tur e mionesnan ku e ta gana. ‘Pichiri’ ta un palabra ku nos ta uza pa deskribí un persona ku no ta saka sèn fásil. Na ingles tin un otro palabra ku nan ta uza, konosí komo ‘frugal’. Esaki ta pa deskribí personanan ku ta sumamente ekonómiko. Nan no ta uza sèn riba kosnan ku nan no tin mester di dje djis pasó nan tin e sèn pa gasta.

Aki ta sigui tres persona ku a disidí ku nan ta bai biba den e forma di mas simpel posibel:

Brandon (fam deskonosí)
Brandon a disidí ku e ta stòp di dispidí tur su sèn na hür di apartmènt ku kas èts. El a kumpra un trùk di 128 pia pa 10 mil dòler i esei el a hasié su kas. E ta traha pa Google, pues e ta baña i bisti paña den e campus di Google, i einan mes e ta laga su trùk parker tambe. Brandon kualke dia lo tin pensa pa bai biaha rònt mundu i e ta bisa ku si e ke hasi esei, e mester kustumbrá biba di maneranan no konvenshonal.

Brandon Truck

Brandon su kas parti pafó

Brandon truck inside

Brandon su kas parti paden

Dor di tur e sènnan ku e ta spar, Brandon ta bisa ku e lo saka e sèn ku el a hinka den e trùk pronto.

Daniel Suelo
Daniel probablemente a ègt frustra di pagamentu di hipotek ku hür ku gastunan mensual. Daniel a disidí ku e ta bira ‘homeless’ pa eskoho. E no ke niun kas, niun apartmènt ni nada. Segun Daniel, e sistema ku e mundu ta aworaki, bo mester tin sèn pa bo biba i forma parti di e sistema kapitalista aki. E no ta di akuerdo ku esei, i Daniel a disidí sera su kuenta di banko, entregá pasport ku reibeweis i asta kambia su fam di Shellabarger pa Suelo (‘tera’ na Spañó) i bai biba den un kueba na Arches National Park den un prinsipio. Sinembargo, bo no mag keda den e lugá aki pa mas ku 14 dia, pues despues ku el a pasa esaki, nan a dun’é un but di 120 dòler. Daniel no a wòri, pasó e no tin sèn pa paga e but ni nada ku nan por kita fo’i dje tòg. (Pues e solushon pa bo sali for di bo debenan no ta pa buska mas sèn, sino pa bira mas bashí.)

Daniel ratu ratu ta keda drumi den kualke kueba ku e topa na Ost di Utah òf den área di Arizona. Pero hopi bia hendenan ta ofresé alohamentu i kuminda ora nan mir’é riba kaya ta kana. E ta haña alohamentu tambe di su amigu i konosí nan, pero tambe hende totalmente deskonosí. Despues di  tempu hende a kuminsá uza Daniel p’e wak kas pa nan (house watch), pues asina Daniel ta biba i kome. Daniel no ta uza sèn ètòl i e ta bibando asina pa mas ku 10 aña kaba.

Daniel Suelo

Daniel Suelo

Heidemarie Schwermer
Heidemarie kisas lo sorprendé bo un tiki. Heidemarie ta un sikoterapista aleman, ku a disidí ku e ta bai biba sin uza niun depchi di sèn. Na edat di 53, Heidemarie a disidí ku e ta hasi su mes liber di tur material i poseshon. El a pone 200 euro un banda pa kasonan di emergensha, i el a entrega tur loke ku e tabata tin. El a entrega kas, outo i tur sobrá material i poseshon ku e tabata tin ku eksepshon di algun produkto di primera nesesidat i algun paña. Segun Heidemarie ora el a mira su apartemènt kompletamente bashí el a bula di alegria, pasó por fin e ta un muhé liber. Heidemarie ta haña ku hende ta hinka muchu tempu i energia den e mundu materialistiko i nan no ta mira ku sèn i material no ta duna bo kasi nada bèk.

Heidi Schwermer

Heidi Schwermer

Akinan Heidemarie a kuminsá hiba un bida di trokamentu. E no ta hasi nada pa sèn, sino pa kosnan ku e tin mester. Den un prinsipio el a pensa na keda drumi serka su amistatnan i a kambio di esei e ta duna nan konsulta di sikoterapia. Pero esei no a funshoná ya komo su amistatnan no tabata ke esei. Pues despues di esei el a kuminsá limpia bentana di kas i sierto labornan manual a kambio di kuminda i un kamber. Pa tur loke e tin mester, e tabata ofresé algu a kambio. Por ehèmpel pa su pelukera kòrta su kabei, e tabata bai kana ku e pelukera su kachónan.

Tur loke Heidemarie tin di poseshon ta un maleta ku paña p’e kambia, tres par di sapatu, algun make-up i un glas. E no sa kumpra nèt nèt nada.Heidemarie ta duna konsultanan di sikoterapia, limpiesa di kas, laba paña, bentana èts., a kambio di kuminda, alohamentu i otro kosnan ku e tin mester.

Despues di un aña ku el a hasi esaki, el a gusta asina tantu ku el a hasié pa un aña mas. Asina Heidemarie a sigui te ku awor e tin 17 aña sin ku el a kue niun depchi for di e 200 dòler ku el a buta un banda pa emergensha.

Despues ku un reportero a tende di Heidemarie, el a invit’é pa un programa di radio p’e papia. Despues di a hasi e programa aki, diferente kanalnan di televishon, korant i universidatnan tabata invit’é pe bin papia i duna charla. Pues asina Heidemarie ta biaha pòrnada tambe.

Despues di esaki, Heidemarie a stòp di limpia bentana i otro trabounan manual. Heidemarie tin 70 aña, i awor  e ta solamene duna konsulta i lès na hendenan ku tambe ke biba sin sèn. A kambio pa su konosementu e eksperensha e ta haña kuminda, alohamentu i tin bia asta biahamentu. Na 2010 el a traha un dokumental ku yama ‘Biba sin sèn’ ku ya a pasa riba pantaya grandi na 30 diferente pais.

HeidemarieAktualmente Heidemarie ta risibí sèn di penshun, pero e ta duna tur su sèn na hendenan ku tin hopi mester di dje. Segun Heidemarie, si bo ègt tuma e tempu pa deskubrí kiko ta e kosnan ku di bèrdat tin balor pa bo, i kiko te kosnan ku di bèrdat ta hasi bo felis, lo bo ripara ku bo no tin mester di sèn pa logra niun. E sistema di biba aki no ta fásil, segun Heidemarie, pero e esfuerso ta bale la pena, i ta pesei te ainda e no a bai bèk na uzamentu di sèn!

Aunke mi no sa kon e hendenan aki ta paga pa kumpra kosnan manera desodorante, ko’i feita, dentista òf brel di bista, tòg mi ta kompletamente di akuerdo ku Heidemarie. Pa bo mira kiko te kosnan ku di bèrdat tin balor pa bo, bo tin ku liberá bo mes for di e programashon ku mundu ta duna bo fo’i dia bo a nase! Mester bisa si ku no ta tur hende lo por biba di e forma humilde ekstremo aki, meskos ku no ta tur hende por logra bira riku òf mionario un dia, ni maske nan bisa bo ku si bo por soñ’é, bo por logr’é.

Manera mi a menshoná, esaki ta e personanan ku ta impreshoná i inspirá mi i pa via di loke mi ta siña di nan mi ta purba na siña bo tambe kosnan ku bo no ta mira i/òf tende otro kaminda. Chèk e bukinan ‘Kibra Hacha‘ i Niun Pataka, i eksperensiá un mundu kompletamente diferente di loke usualmente bo sa mira òf tende di dje.

(Feature Image Foto by Curaganga!)

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.