Dia 29 di Mei próksimo: abo lo tin kurashi pa hasi e kos aki?

Reading Time: 4 minutes

 Sa tin momentunan kaminda mi loko ta lanta i pone mi hasi tipo di kosnan asina aki, pues no kere ku si bo falta e dia aki, lo bai tin mas. 29 di mei lo ta bo úniko oportunidat!

Ya komo hende ta asina hanshá pa kos, mi ta bai bisa tur kos públikamente ya asina niun hende no ta keda den angustia mas.

Manera mi a bisa, e buki ‘Niun Pátaka‘ lo sali den mei 2016. Pero manera semper, tin hende ta kere ku kos mester bai mané nan ke. Tin hende a manda mensahe pa mi fo’i den aprel ta puntra mi si nan por pasa na mi kas pa kumpra e buki. Tabatin otro hende ku a kere pasó Mei a habri, e por bai Mensing’s Caminada trankil bai buska e buki. Anto riba dje kana puntra e trahadónan pa un buki, ku nan no sa nada di dje. Mi a nèrvia un poko, pasó mi kemen, publikashon di buki riba su mes ta un strès kaba, pues mi no mester di hende pa keda buta preshon riba mi.

Pero pa straño ku parse, otro kos si hende ta warda trankil riba dje. Mi ta mira hende ta warda masha trankil pa otro eventonan sin keda puntra, pone preshon èts. Dikon riba mi si hende ta kue fadá? Nunka m’a mira hende bai Festival Center den Desèmber pa bai wak si Festival di Tumba a kuminsá kaba, anto despues bai reklamá Feco Gomez ku nan a yega topa Festival Center duru será. Nunka ma mira hende bai Parasasa den Ougùstùs pa bai wak si show di Curaçao North Sea Jazz a kuminsá, anto despues yama Gregory Elias reklam’é, pasó nan a sali kas pòrnada. Nunka m’a bira niun hende bai para na Rooseveltweg fo’i den Mart pa warda Marcha di Seú anto despues reklamá Gobièrnu ku ainda no tin kosecha! Pero ora ta trata ami si, niun hende no tin pasenshi. Tur hende tin purá. Niun hende no por warda. T’ami ta bosnan palu delegá!

Riri Surprised Face FI

Ora m’a konta Rihanna loke sierto hendenan a hasi, asina’ki el a keda wak mi. E mes no por a kere!

Awèl, komo bosnan ta asina sin pasenshi, e buki ‘Niun Pátaka‘ lo sali 29 di Mei awó, kual ta kai riba un djadumingu, dia ku tur lugá ta será. Nèt e dia ei tur hende lo por sali nan kas pa bai buska e buki na Mensing’s Caminada i tur otro ‘boekhandel’ ku nunka m’a menshoná. Si…. bai na tur ‘boekhandel’ bai puntra nan si nan a risibí ‘Niun Pátaka’ kaba. Keda bati n’e porta te ora bo kibr’é, òf te ora e alarma kuminsá zona, anto polis bin kue bo! (Mi kemen kue bo bai warda ku bo.)

E úniko kaminda ku bo por haña e buki ta serka mi mes personalmente. Bo sa dikon? Pasó mi ke wak ken tur tin kurashi di bin reklamá mi den mi kara ku m’a tarda pa saka e buki. Bin reis riba mi, pa nos wak kuantor tin….bin hincha riba mi pa nos wak kon awa ta drenta barik’i koko!

Ok, awó den serio, dia 29 di Mei próksimo, ‘Niun Pataka’ lo ta disponibel. No pensa ku ta kos di mal hende mi ta hasi pa sak’é riba un djadumingo. Al kontrario, mi ta hasié pa bo bon, pasó riba 29 di Mei ta nèt un dia ku ami ta di selebrashon, p’esei tur hende ku kumpra e buki personal serka mi lo haña dos regalo serka mi. Pa bo haña e regalonan tin ku sali bo kas e djadumingo ei i bin serka mi, pasó mi no ta warda ni buki ni regalo pa niun hende.

Niun Pátaka!

Niun Pátaka!

Lo mi tei fo’i mainta 10or te atardi 6or pa sinta warda bo bin serka mi. Pa bo sa e sitio lo bo tin ku manda mi un ‘message’ òf e-mail na lionel_326@hotmail.com, pasó mi no ke yen hende riba mi, ni hende pa sorprendé mi, ni hende pa atraká mi. (Ta un kaminda sentral, fásil pa yega.)

Pa un bon deskripshon di kontenido di e buki, chèk e informashon nobo ku mi a kaba di hinka riba e página di  ‘Niun Pátaka‘ ( <<klek riba e link). Pa esnan ku ainda no a wak e avanse ainda, chèk esei riba e linknan aki:

Kibra Hacha preview pdf

Awa, Habon ku Past’i Djente preview pdf

Niun Pataka preview pdf

Aparte di ‘Niun Pátaka’ tambe bo por kumpra ‘Kibra Hacha’ i ‘Awa, Habon ku Past’i djente serka mi. Kada un buki ku bo kumpra ta bin ku su regalo apart. Kemen si kisas bo a yeg’i kumpra e buki kaba, kumpr’é di nobo tòg djis pa bo haña bo regalo.

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.