17 aspekto interesante di Bhutan ku lo bo deseá pa Kòrsou tambe tin!

Reading Time: 10 minutes

Den sur di Asia na final di e parti wèst di Himalaya, tin un pais ku yama Bhutan. E pais aki ta keda mei mei di China ku India, i estranheronan a yama e  pais aki ‘E reino prohibí’. E pais aki ta e úniko pais ku a disidí di hasi tur kos di forma kontrali, i e resultado kisas lo laga bo keda poko asombrá.

Mi a yega di publiká un lista ku un instansia di Nashonnan Uní ta saka tur aña, kaminda nan ta indiká kua ta e paisnan ku tin e hendenan di mas felis na mundu. Segun e lista aki, e paisnan di mas felis na mundu ta entre otro Suisa, Islandia, Dinamarka, Noruega, Canada, Finlandia, Hulanda èts. E lista aki ta uza algun barometer pa midi felisidat di e hendenan ku ta biba den e pais, i eseinan ta entre otro GDP (Gross Domestic Product), nètwèrk di apoyo sosial, bon estado di salú, libertat pa tuma eskohonan den bida i nivel abou di korupshon. Hopi hende lo keda straño ku un pais manera Merka, kual ta e pais ku mas kantidat di hende mionario na mundu i tambe e pais ku tin e GDP di mas haltu na mundu, no ta paresé den e promé 10 paisnan riba e lista aki.

Den e rapòrt di 2016, Bhutan ta aparesé na di 84 lugá komo e pais di mas felis na mundu. Pero Bhutan no ta preokupá su kabes ku e lista aki. Bhutan tin su mesun investigashonnan ta hasi, i segun diferente enkuesta i investigashonnan ku nan mes ta hasi, 95% di e poblashon di Bhutan ta konsiderá nan mes sumamente felis.

Algun kos importante ku ta hasi e pais aki úniko ta lo siguiente:

Bhutan 131. Bhutan ta e úniko pais na mundu ku no ta uza GDP (Gross Domestic Product). Na aña 1972 Bhutan a stòp di uza GDP  i a kuminsá uza GNH (Gross National Happiness). E terminologia aki a keda kreá pa e rei Jigme Wangchuk. GNH ta midi felisidat di e hendenan dor di wak nan bienestar pa ku e gobièrnu, nan relashon ku e ambiente, laga e hendenan sinti nan parti di e kultura nashonal i satisfakshon ku desaroyo en general di e pais. Den kada desishon ku e gobièrnu di Bhutan tuma, nan ta konsiderá e felisidat di su hendenan.

Bhutan 3

Rei Jigme Khesar Namgyel Wangchuk

2. E sistema polítiko di Bhutan a pasa di monarkia apsoluto pa un monarkia konstitushonal na aña 2008. Nan tin un gobièrnu estilo di Parlamento. Bhutan tin un monarka ku ta na kabes aworakí kual ta Rei Jigme Khesar Namgyel Wangchuk. Ora el a yega na poder el a pasa algun kambio demokrátiko i leinan ku ta hasi posibel ku e hendenan por vota di forma demokrátiko. E rei aki t’e úniko persona riku ku tin den e pais. Segun e habitantenan di Bhutan, e rei ta sòru bon pa nan.

Bhutan 13. E pueblo di Bhutan ta leu for di riku. Nan ta un pueblo ku nos lo konsiderá hopi pober. De fakto, India, kual ta un pais sumamente pober, ta wòrdu konsiderá komo pais riku den komparashon ku Bhutan. Lo bo no haña niun tienda di marka na Bhutan. Lo bo no haña produktonan di Tommy Hilfiger, Prada, Luis Vuitton, Gucci èts na Bhutan. Pero tòg e hendenan mes ta bisa ku nan ta sumamente felis. Promé ku aña 2000, a ni televishon ku Internèt nan no tabata tin. (Despues ku televishon i Internèt a keda introdusí por a nota ku kriminalidat a kuminsá subi na e pais. E habitantenan no ta masha kontentu ku esaki.)

4. Tur hende ta haña enseñansa i kuido médiko grátis. Tin skolnan di arte kaminda studiantenan por desaroyá nan abilidatnan artístiko, i nan ta asta wòrdu pagá dor di gobièrnu pa bai skol!

Bhutan 105. 80% di hinter e poblashon ta agrikultor. Sifranan di 2015 ta indiká ku e pais tin un porsentahe di desempleo di apénas 2.6% Kòrsou su porsentahe di desempleo ta 13% (2013), kual ta hopi haltu. Esaki ta djis pa bo por kompará!

Bhutan 26. Bhutan ta un di e nashonnan di mas yòn na mundu. Segun sifranan di Nashonnan Uní di 2016, Bhutan tin un poblashon di 781,952 habitante. Por lo ménos 50% di e habitantenan aki ta konsistí di hendenan bou di 17 aña.

Bhutan 147. No opstante e echo ku nan ta hopi pober, Bhutan tin un márgen di kriminalidat hopi abou, debí ku e pais ta pone hopi atenshon riba hende i no material. Un di e otro motibunan kisas por ta e echo ku mayoria di e hendenan ta Bhudda, un di e religionnan mas spiritual ku ta eksistí. Den un pais di kasi 800 mil habitante, tin 20 kaso di asesinato pa aña. Kòrsou ku tin 150 mil habitante i nos ta bula e sifra aki ku amor! (De fakto Kòrsou su poblashon ta  sinku bia mas chikí ku di Bhutan i ku un promedio di  20 kaso di homisidio pa aña basá riba sifranan di 2009. Nos a bisti e korona mes mes ora ku na 2013 a mata asta un polítiko parlamentario, lider di e partido mas grandi na Korsou!)

Bhutan green8. Un di e motibunan ku kisas e pais aki ta asina felis ta e echo ku nan ta atmirá, kuida i respetá naturalesa. Bhutan ta un di e paisnan di mas bèrdè na mundu i e úniko pais na mundu ku ta negativo den emishon di karbon dioxida. 72% di e pais aki ta kubrí pa naturalesa puru i vírgen.

Esaki a keda establesé den un akta pa ku e filosofia di GNH, kaminda e pueblo mester konservá por lo ménos 60% di su naturalesa. E hendenan ta kuida i atmirá e naturalesa ku tin rondó di nan.

Bhutan a prohibí uzo di pèstisida i produktonan pa fertilisá tera. Tur produkshon orgániko mester ta puramente natural.

Bhutan 11Kuminsamentu di e aña aki, e rei i reina a duna lus na nan promé yu. E nasementu di e prínsipe a keda selebrá ku plantashon di 108,000 mata den hinter e pais. E religion Bhudda ta kere ku mata (naturalesa) ta e dunadó di bida. Tambe nan a inougurá un asina yamá ‘Hardin di felisidat’ na e suidat di Thimphu, kaminda bishitantenan ta keda invitá pa bin planta un mata durante nan estadia. E idea ta pa e lugá bira un sitio ku tin un mata diferente di kada pais di mundu.

Bhutan 89. Den e kapital di Bhutan, Thimphu, nan no tin lus di tráfiko. Ta polis di tráfiko mester dirigí e tráfiko. Un bia nan a pone lus di tráfiko, i e hendenan a reklamá asina tantu te ku nan mester a kit’é bèk. Nan ta haña ku lus di tráfiko ta duna nan strès.

Jigme Thinley

Promé Minister di Bhutan, Jigme Yoser Thinley

10. Segun e promé minister Jigme Yoser Thinley, kada bes ku nan ke bini ku un plan pa desaroyo di e pais, nan ta puntra nan mes si e plan ei lo yuda hasi e pueblo mas felis. E plan no mester trese rikesa, e mester trese mas felisidat pa e hendenan. E plan no mester trese informashon so, e plan mester yuda duna e hendenan konosementu i sabiduria. Segun e minister, no tin sentido pa bo ta biba rondoná di kosnan luhoso, pero ora bo pone bo kabes riba bo kusinchi pa bo drumi, bo sinti ku bo no ta felis.

11. E pueblo di Bhutan ta un pueblo sumamente humilde i kualke hende lo no por ku nan sistema di bida. Tin tribunan ku ta asta biba sin koriente. Mayoria bia nan ta pasa nan oranan bishitando otro, kushina, kome, kanta, kuida e bestianan i hasi nan ritualnan spiritual.

Bhutan 412. Mariwana ta krese pa loko na Bhutan. Bo tin mas chèns di haña un mata di mariwana ku kualke otro tipo di mata na Bhutan. Remarkabel ta ku mayoria habitante no ta huma mariwana. Nan ta uza e mariwana pa duna e porkonan di kome. E mariwana ta duna e porkonan mas hamber pa nan kome ya ora nan tin ku sakrifiká e porko, e karni di e porko ta smak mas dushi.

Bhutan 513. Tin un tipo di para (Black-necked crane) ku nan ta konsiderá un espesie skars. Bo mata un di e bestianan aki, bo ta haña kastigu di prizon pa bida largu. (Kemen warda bo chincha!)

Bhutan 6

‘Paro airport’

14. ‘Paro airport’ ta e úniko aeropuerto internashonal na Bhutan. E ta keda mei mei di serunan haltu di Himalayas. Subi i baha un avion riba e airport aki ta keda konsiderá algu sumamente peligroso. E pilot tin ku maniobrá e avion di tal forma pa e no dal den e puntanan haltu i skèrpi di e seru, e tin ku evitá di pasa serka di e kasnan den serkania pa despues baha riba un pista di aterisahe smal i di ménos ku 1900 meter. Tin solamente ocho pilot sertifiká ku por baha un avion na e aeropuerto aki.

Bhutan 715. Bhutan t’e úniko pais ku na 2010 a prohibí kultivashon, produkshon i benta di tabako. Kualke hende ku wòrdu gará ta huma, lo haña kastigu di prizon di entre 3 pa 5 aña. Pero despues di hopi protesta nan a hasi un kambio na e lei aki. Bo tin mag di kumpra tabako pa uzo personal, pero bo tin ku warda e resibu pa paga impuesto di importashon. Si bo no hasi esaki, nan lo klap bo un but para tur bo kurason, òf bo ta bai será!

16. Hendenan di Bhutan tin un tradishon di pinta pénisnan den erekshon riba nan muraya di kas. Esaki supuestamente ta yuda kore ku spiritunan malu. Esaki ta sigur algu ku nos tin ku kuminsá hasi, en bes di sende pagara pa kore ku fuku. E fuku ku nos tin na Kòrsou opviamente no tin miedu di vürwèrk. Nos tin ku purba algu otro tòg?

17. Kisas e motibu ku nan ta yama Bhutan e reino prohibí ta e difikultat pa bo bishita Bhutan. Pa bo bishitá Bhutan, bo tin ku baila riba nan ritmo. Bhutan ta kere den tiki kantidat di turismo, pero ku kalidat haltu. Ta imposibel bai Bhutan riba bo mes. Bo tin ku tuma un pakete ku ta kosta 250 dòler pa dia, i bo ta haña estadia, kuminda, transporte i servisio di guia. E gobièrnu ke evitá un fluho grandi di turista i pa e motibu ei nan ta kontrolá fluho di turista.

E idioma ku nan ta papia na Bhutan ta Dzonghka i tiki hende ta komprondé ingles. Si bo ke bai biba na Bhutan, e manera di mas fásil i e chèns di mas grandi ku bo tin ta pa bai duna lès di ingles.

Si bo a gusta e artíkulo aki, lo bo kai stimá ku e buki ‘Kibra Hacha’ ku ta kontené un variashon di informashon ku bo no tabata sa di dje. Tantu Kibra Hacha komo ‘Awa, Habon ku Past’i Djente’ ta bèk riba merkado i optenibel na Mensing’s Caminada i tambe serka mi mes personal. Dia 29 di mei próksimo ‘Niun Pataka‘ lo ta optenibel personal serka mi, i dia 30 di Mei na Mensing’s Caminada! Tur e bukinan aki ta optenibel digital tambe! Chèk nan respektivo link pa mas informashon!

DSCN3063

Direktor Kas di Kultura, Gibi Basilio!

Source: Unbelievable Facts

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.