Si bo mira bo nòmber riba e lista aki…..pordoná mi!

Reading Time: 5 minutes

 Facebook ta duna e oportunidat pa hende por duna su evaluashon riba kontenido di un página. Esaki nan ta yam’é un ‘Rating and Review system’. Por ehèmpel si bo wak riba página di ‘Kòrsou tin Trabou’ nan tin un tremendo ‘rating’ pasó e página di bèrdat ta hasiendo un bon trabou, prinsipalmente pa esnan ku ta buskando trabou.

Mi a haña ku esaki ta great pa pone riba mi página tambe pa asina hende por duna nan evaluashon riba lokualnan ku mi ta skibi i publiká riba CuckooPress. Ku mínimo 1 strea bo por bisa ku e página su kontenido ta malu, i ku máksimo 5 strea bo por bisa ku e página su kontenido ta tremendo. Bo por añadí un komentario tambe aserka pa splika dikon bo ta dunando e página e kantidat di strea ku bo a dun’é. Mi tambe (CuckooPress) tabata hasi uzo di e sistema aki, pero mi a haña mi ta kit’é. Dikon?

Bo ta kòrda un tempu  bo tabata mira un kantidat di propaganda di e kompania EmGoldex/Intergold? Nan tabata pone diferente potrèt ku un kantidat grandi di sèn pa hasí bo haragan i invertí den nan plan di invershon. Manera semper, tur bia ku bin tipo di kosnan asina ki, hopi hende ta kai aden, pasó mas ku klaro, tur hende ke hopi sèn n’e manera di mas fásil ku tin, anto ta presisamente esaki e hendenan di Emgoldex/Intergold tabata brinda. Nan tabata primintí bo porsentahenan haltu di ganashi ku djis un suma chikí di invershon. Ounke nos tur sa ku nada ku ta zona muchu bon, simplemente no por ta bon, pero tòg hopi bia nesesidat (i tin bia sinbèrgwenseria) ta pone ku nos ta kai aden tòg.

Ami manera un idiot kier a atvertí hende, dor di duna bo un splikashon via di un artíkulo titulá “E motibunan pa kual bo lo ke keda leu for di Emgoldex (Global Intergold)!” kon e plan di EmGoldex/Intergold ta funshoná. Pero manera semper ta mas fásil tuma hende hasi, ku splika hende kon otro hende ta tumando nan hasi.

Aparentemente e grupito di hendenan ku ta den òf tras di e negoshi ei, no a haña leuk ku mi a saka e artíkulo, i nan a kuminsá bombardiá mi página ku bòshi ‘bad reviews’ i algun a añadí algun komentario ku mi ta mal informá hende sin buska drechi èts. Esaki a pone ku m’a sera mi boka, i tambe kitando e artíkulo plùs e posibilidat pa bo por duna mi bo evaluashon. Akibou bo por mira kon nan a bombardiá mi ku ‘bad reviews’ den un dia:

Bad reviews 1

Bad Reviews 2

Bad reviews 3

(Ripará kon tur e ‘bad review’ nan a drenta despues di 16 di ougùstùs 2015 kual ta e dia ku mi a publiká e artíkulo di Emgoldex/Intergold)

Despues di un pari tempu, Banko Sentral ta saka un atvertensha ku ta bisa ku e kompania Emgoldex/Intergold ta kompletamente ilegal i nan no tin niun pèrmit legal pa pidi hende sèn pa hasi niun klase di intervenshon. Ami a spera ku e mesun grupito aki lo a yama konferensha di prensa mesora en kadena ku tur kanal di radio i televishon pa duna Banko Sentral tambe ‘bad review’ i splika e hendenan kon Banko Sentral tambe ta mal informá e pueblo. Pa mi sorpresa, tur a keda ketu. Aparte di esei, algun persona a sali dilanti riba Facebook bisando ku nunka mas nan a haña loke a primintí nan. Awor mi no ta ni mira propagandanan di Emgoldex/Intergold mas.

Warning Emgoldex

Artíkulo publiká riba Curaçao Chronicle

Straño no? Unda tur e hendenan ku a bisa ku CuckooPress ta mal informá sin buska drechi a keda? Unda Laeticia Xavora, Quincy Jansen, Süßes Mädchen, ‘Zoete Whiitechoco, Alexandra Duarte, Gold Rush, Ludgarda Lampe, Elmar Balentien, Laquisha Ricardo, Gig Gold i Vladimir Brezhnev a keda? Bosnan a bai prensa pa bisa ku Banko Sentral ta mal informá e pueblo kaba?

En todo kaso, e parti malu ta ku unabes hende duna bo ‘bad review’ riba Facebook, bo no por kit’é mas. T’e 11 personanan ariba menshoná t’e únikonan ku por kita nan mesun evaluashon. Pues pa motibu di e hendenan aki, CuckooPress a keda un página ku mal nòmber. Mi no sa si un dia nan lo por haña un lugá den nan kurason pa pordoná mi ku mi a stroba nan di traha plaka riba kustia di hende. Mi ta sumamente arepentí i próksimo bia mi ta primintí di no stroba nan kòmplòt/ negoshi ilegal. Mi a pone e ‘review & Rating’ bèk, pa mi wak si e 11 personanan aki lo por pordoná mi i kita nan ‘bad review’! Mas ku klaro, abo tambe por yuda drecha e ‘rating’ dor di duna bo opinion riba e página. Opinion honesto si, no kos pompadó!

Dado kaso nan no pordoná mi, mi mes a krea un página riba mi ‘website’, pa bo duna bo opinion riba artíkulonan ku mi skibi òf di e bukinan ku mi a publiká esta ‘Kibra Hacha’, ‘Awa, Habon ku Past’i Djente‘ i pronto ‘Niun Pátaka‘. Mi ta asta enkurashá esnan ku ta haña ku mi ta mal informá pa nan tambe duna nan opinion. Laga mi sa dikon mi ta duna informashon robes sin buska drechi, ki informashon robes m’a duna sin buska drechi , i bin ku prueba tambe ku ta mustra ki informashon robes m’a duna sin buska drechi.

Tur luna lo mi pone e página ‘Testimonials‘ riba Facebook pa asina bo por skibi bo evaluashon, òf si kisas bo ke laga un kòmplimènt òf kritiká konstruktivo atras. Pero bo krítika mester tin base si. Si mi a stroba bo di abuzá di hende pober di un forma no étiko i ilegal, no ta mi falta.

Danki pa bo atenshon. Pasa un dushi dia!

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.