E motibu dikon mi a stòp di buska trabou!

Reading Time: 8 minutes

 Manera m’a komprobá pa mi mes, hende ta sinti goso riba tristesa di otro. Pues mi ta bai konta boso un tristesa mas di mi:

Mi tin un estudio universitario, pero dor di mal ekonomia, mal gobernashon, hende egoista, hende sinbèrgwensa, hende arogante, kompanianan ku mal maneho, hendenan ku no ke baha ku penshun èts., tabata super difísil pa mi a haña trabou den loke mi a studia. Den mi bida mi ta kere mi mester a manda 2000 karta di solisitut. Di e 2000 kartanan ei, kisas mi a bai 20 entrevista pa trabou. Algun entrevista a bai bon, otro nan ta puntra yen ko’i kèns, anto den otro bo ta simplemente sinti ku nan a yama bo pòrnada. Mi no sa si ta mi nòmber nan no gusta òf kisas mi kara ta muchu mahos, pero manera mi yega, nan ta hasi mi dos pregunta, despues bisa mi ku lo mi tende kontesta. Tin bia mi ta haña un e-mail bisando ku mi no ta sigui den e proseso di solisitut. Otro bia mi no ta tende nada. Ora mi bèl puntra kiko a pasa ku e proseso di solisitut mi ta tende ku aki un siman lo mi haña kontesta, òf nan ta bisa mi ku e persona ku mester kontesta mi ta ku vakashon. Aparentemente un vakashon sin final, pasó nunka mi no ta tende nada.

Tin sierto kompanianan ku mi a solisitá asina tantu na dje pa un mion di diferente posishon, pero hamas i nunka mi a haña un sita pa entrevista. Esakinan ta entre otro Maduro & Curiel’s Bank i Banko Sentral. Mi ta menshoná nan nòmber pasó ta simplemente un realidat!

Segun mi e dunadónan di trabou no sa ki frustrashon un persona ku ta buska trabou ta pasa aden. Anto si bo tin mas ku dos aña sin traha ta pió. Bo tin ku bai splika ta kiko bo a hasi den tur e dos añanan ei, anto ‘buska trabou’ no ta presis yuda bo kaso. Keda kas wak yu aparentemente tampoko.

Kualke hende lo bisa bo ku bo tin ku traha den algu bou di bo nivel. Mi ta kere e hendenan aki no sa ku kualke hende ku ta buskando trabou, lo ta dispuesto na traha den algu bou di su nivel tambe, pero e tin ku haña e trabou pa e por hasié.

Ya komo debenan ta keda subi, anto mi mester kome pa sobrebibí, mi a kuminsá solisitá den e trabounan ku ta for di mi área di konosementu i ku ta pidi ménos edukashon. Mi a apliká komo weiter i bartènder na un restorant konosí aki na Kòrsou, i ounke e vakatura tabata pidi tres aña di eksperensha den Horeca, mi a disidí di bai p’e tòg.

Mi a haña un yamada di e mènedjer (femenino) ku a invitá mi pa un sita. Mi a prepará mi mes bon pa mi splika nan dikon mi ke traha komo weiter i bartènder i pa mi konvensé nan ku di bèrdat mi ke traha, ku mi no ta hende floho, ku mi ta serio i responsabel.

Job interview 1Ora mi a yega e sita, nos a sinta na un mesa den e restorant i e mènedjer a kuminsá puntra mi dikon un persona ku tantu skol lo ke traha komo weiter i bartènder. Mi a kuminsá splik’é tur kos den detaye, pasó nan ta bisa pa no gaña den un entrevista pa trabou. Anto lo no kumbiní mi gaña tampoko, pasó mi ta gaña hopi malu.

Segun nos tabata papia, un hòmber relativamente yòn a drenta den e restorant. E hòmber a keda kana di forma sospechoso den e restorant. Despues di un ratu e hòmber a saka un arma di kandela, pidi pa tur hende para ketu. Miéntras tantu un di dos hòmber a drenta ku un arma di kandela, bai na e kahera i pidié pa dun’é tur plaka. E mènedjer a spanta i e no tabata sa kiko pa hasi. Ami semper a pidi pa mi no haña mi den un atrako, pasó mi no sa kiko lo mi hasi. Ounke mi tin training di Krav Maga, pero mi no ke pone mi bida na peliger. Aparte di esei, tur training di defensa propio ta siña bo pa no duna resistensia, duna un atrakadó tur sèn i pertinensia i lag’é bai si e no ta representá peliger pa bo kurpa. Pues mi a skohe pa no hasi nada. E kahera a duna e hòmber tur sèn ku tabata tin den kaha, pero e hòmber tabata pidi mas. E mucha muhé a bisa e hòmber ku no tin mas sèn i aki nan e hòmber a bira agresivo.  El a kue e mucha muhé ranka na su krag di kamisa i eksigí mas sèn. Einan e mènedjer a lanta grita pa laga e mucha bai. E di dos hòmber a kue e mènedjer tene na su kabei. Einan mi a probechá lanta i bai mesora riba e hòmber ku a tene e mènedjer. Den un forsegeo mi a desarme i bent’é abou. Miéntras tantu algun kolega i tambe un pòrtir di e restorant a bai purba yuda nan kolega ku tabata na kaha. E pòrtir a haña kabu di pistol den kabes, miéntras nèt ora mi a yega, e hòmber atrakadó a bai mek e pistol riba mi. Mi a haña mi ta pusha su man na laira i purba desarm’e. Di e forma ei ami huntu ku demas empleado a tene e dos hòmbernan abou, te ora ku polis i ambulans a yega.

Dor di tur esaki, e entrevista di trabou no por a sigui. Pues e mènedjer a bisa mi ku e lo tuma kontakto despues ku mi pa nos por a hasi un otro entrevista.

job interview 2Despues di mas o ménos dos siman mi a haña un e-mail ta bisa lo siguiente:

“Beste Lionel,

Dank u voor uw geduld met betrekking tot onze feedback over uw sollicitatie voor de functie waiter/bartender. Ook willen wij u bedanken voor uw heldendaad om ons collega’s en klanten te beschermen tegen een gruwelijke aanval. Er zijn geen woorden om onze dankbaarheid te uiten . Echter, het spijt ons u te informeren dat we niet zullen nastreven voor uw kandidatuur voor een positie binnen ons bedrijf.

Hoewel uw kwalificaties opmerkelijk zijn, het selectieproces is zeer competitief en we hebben besloten om verder te gaan met de andere kandidaten van wie de kwalificaties beter voldoen aan onze behoeften op dit moment.

Wij danken u voor uw interesse in onze organisatie en wens u alleen het beste in uw toekomstige ondernemingen.

Mocht u geïnteresseerd zijn in de motivering van deze beslissing dan kunt u contact met ons opnemen.

Graag houden we uw gegevens in ons bestand, zodat wij in de toekomst contact met u kunnen opnemen als wij een vacature hebben die aansluit bij uw ervaring en interesse.”

Mas ku klaro mi a pidi e mènedjer mas splikashon, spesialmente pa e echo ku mi no a haña oportunidat pa un entrevista di nobo, ya komo esun a wòrdu strobá pa e atrakadónan, i tambe dikon nan ta rechasá mi, ku a ni puesto di pòrtir mi no por haña serka nan. E mènedjer a kontesta mi lo siguiente:

Lionel Bon Dia,

E desishon ta basá riba e echo ku bo no tin eksperensha komo weiter ni bartènder. Nos ta un restorant di klase ku ke keda mantené nòmber i bon servisio. Dor di hopi trabou, nos lo no tin tempu pa bai siña niun hende e trabou. Nos mester di un hende ku ya tin e konosementu nesesario pa por drenta den ‘drive’ di e trabou mesora i kuminsá sirbi kliente.

Enkuanto puesto di pòrtir, mi no tin duda ku bo tin tremendo abilidat pa bira un bon pòrtir/bewaker ku por sòru pa tremendo seguridat na nos restorant i nos klientela, sinembargo bo tin muchu edukashon i preparashon pa bira djis un pòrtir. Esaki ta pone nos kore riesgo ku si mañan bo haña trabou na Maduro & Curiel’s Bank òf Banko Sentral por ehèmpel, bo lo no duda na bai laga nos.

Nos kier a ekstendé un invitashon na bo si pa bin kome na nos restorant komo muestra di agradesimentu. “

Mi no a kontestá e mènedjer mas ni tampoko aseptá e invitashon pa kome na e restorant. Un aña despues di e eksperensha aki mi tin tres buki skibí konosí komo ‘Kibra Hacha‘, ‘Awa, Habon ku Past’i Djente‘ i ‘Niun Pátaka’. Mi ta kere mi ta bon bezig tòg, pero tin ora mi no por evitá di pensa si kisas e gèngnan ku ta tira atrako tin un k’e otro vakatura p’ami. Mi tin gan’i sa kuantu hende sa pensa meskos!

Why you want this job(E historia aki no ta kompletamente bèrdat. E ta djis un manera pa ilustrá algu ku hopi hende ku ta buskando trabou ta pasando aden. Tin hopi hende ku ke traha, pero ei mes ta kreando un persepshon ku Yu’i Kòrsou no ke traha! )

[Si bo a gusta e artíkulo aki i/òf bo ta hañ’é interesante, kompartié ku bo amigunan. Sinti bo liber pa laga bo komentario atras!]

**Images used in this article hold copyright by their respective authors. I’m not the owner nor do I hold copyright on these images. I just needed the image for illustration.**

[Even though blogging costs a lot of time and money, I don’t feel like charging my blog readers to be able to read my content. I want to keep it free for everyone. However, funds are still needed in order to produce and publish quality content, as well as writing and publishing books. Consider making a one-time donation to Lion Spratt as a way to show your support. Click here to learn how. Thank you in advance for your generosity!]

It's only fair to share...Print this page
Print
Email this to someone
email
Share on Google+
Google+
Tweet about this on Twitter
Twitter
Share on Facebook
Facebook
Powered by WordPress | Designed by: Image Hosting | Thanks to MegaUpload Search, RapidShare Search and Internet TV

Copy Protected by Chetan's WP-Copyprotect.